Vikatan.com

www.vikatan.com would like to send you push notifications.

Notifications can be turned off anytime from browser settings.

நிதி நிறுவனங்களில் வாங்கிய வீட்டுக் கடனை வங்கிக்கு மாற்ற முடியுமா?

 
எப்படியாவது சொந்த வீடு வாங்கிவிட வேண்டும் என்ற எண்ணத்தில் வங்கியில் கடன் கேட்டு விண்ணப்பிப்பவர்களின் எண்ணிக்கை அதிகம். ஆனால், இவர்களில் பெரும்பாலானவர்களுக்கு கடன் கிடைப்பதில்லை. அதற்குப் பல காரணங்கள் உள்ளன. சம்பளம் குறைவாக இருக்கும், கிரெடிட் ரிப்போர்ட்டில் ஏதாவது சிக்கல், முகவரிச் சான்றில் பிரச்னை, வீட்டு ஆவணங்களில் பிரச்னை போன்ற பல்வேறு காரணங்களினால் கடன் நிராகரிப்புச் செய்யப்படுகிறது.


இப்படி கடன் நிராகரிக்கப்பட்டவர்கள் அடுத்ததாக அவர்கள் கடன் கேட்டு விண்ணப்பிப்பது வங்கி அல்லாத நிதி நிறுவனங்களில்தான். இங்கு வட்டி சற்றுக் கூடுதலாக இருக்கும். அதாவது, வங்கியின் வட்டி விகிதத்தைவிட ஓரிரு சதவிகிதம் அதிகமாக இருக்கும். இந்த வட்டி விகிதம் குறித்து வீட்டுக் கடன் வாங்குபவர்கள் யாரும் கவலைப்படுவதில்லை. அதுமட்டும் இல்லாமல் சில நிறுவனங்கள் 100 சதவிகிதம் கடன் வழங்குகிறது. அதாவது, வீட்டின் மதிப்பில் 80-85 சதவிகிதம் வரைதான் கடன் வழங்க வேண்டும் என்பது ஆர்பிஐயின் விதிமுறை.


அடுத்தது, கிரெடிட் ஸ்கோர் குறைவாக உள்ளவர்கள், வேறு சிக்கல் உள்ளவர்களுக்கு இன்னும் ஓரிரு சதவிகிதம் கூடுதலாக வட்டி விகிதம் இருக்கும். அதிக வட்டி விகிதத்தில் கடன் வாங்குவது குறித்துக் கேட்டால், ஓரிரு வருடத்தில் கடனை வேறு வங்கிக்கு மாற்றிக்கொள்வோம் எனக் கடன் வாங்குபவர்கள் கூறுகிறார்கள். வங்கி அல்லாத வீட்டுக் கடன் நிறுவனங்களில் வாங்கும் கடனை வங்கிக்கு மாற்ற முடியுமா என்பது குறித்து எஸ்பிஐ வங்கியின் துணைப் பொதுமேலாளர் பி.ரவீந்திரநாத்திடம் கேட்டோம்.

“வங்கி அல்லாத நிதி நிறுவனங்களில் வாங்கும் கடனை வங்கிக்கு மாற்றிக்கொள்ள முடியும். புதிதாகக் கடன் வாங்கும்போது உள்ள விதிமுறைகள் இதற்கும் பொருந்தும். வீட்டின் ஆவணங்களை மீண்டும் சரிபார்த்த பிறகுதான் கடன் கிடைக்கும். அதில் ஏதாவது சிக்கல் இருந்தால் கடன் நிராகரிக்கப்படும்.
கடன் வாங்கும் சமயத்தில் வீட்டின் மதிப்பில் 80 சதவிகிதத்துக்குத்தான் கடன் கிடைக்கும். ஆனால், இதுபோன்று நிதி நிறுவனங்களில் இருந்து கடனை மாற்றும் போது, வீட்டுக் கடனில் பாக்கி உள்ள தொகைதான் கடனாகக் கிடைக்கும். வீட்டின் மதிப்பு உயர்ந்திருந்தாலும் பாக்கி தொகை மட்டும்தான் கடனாகக் கிடைக்கும். ஏற்கெனவே வாங்கிய கடனில் பாக்கித் தொகை அல்லது வீட்டின் மதிப்பு அதில் எது குறைவோ அந்தத் தொகைதான் கிடைக்கும்.
அடுத்து, சிபில் ஸ்கோரில் ஏதாவது பிரச்னை இருந்தாலும், வங்கி அல்லாத வீட்டுக் கடன் நிதி நிறுவனங்கள் கடன் வழங்குகிறது. ஆனால், அந்தப் பிரச்னையை சரி செய்து தற்போது நல்ல ஸ்கோர் வைத்திருந்தால்தான் மீண்டும் கடன் கிடைக்கும். மேலும், வாங்கும் கடன் தொகைக்கான இஎம்ஐ-யைச் செலுத்தக்கூடிய அளவில் உங்களின் வருமானம் இருக்க வேண்டும். இது குறைவாக இருக்கும்போதும் கடன் கிடைக்காது. மேலும், புதிதாக வாங்குபவர்களிடம் வாங்கப்படும் அத்தனை கட்டணங்களும் உங்களிடம் வாங்கப்படும்” என்றார்.

வங்கி அல்லாத வீட்டுக் கடன் நிறுவனங்களில் ஓரிரு சதவிகிதம் வட்டி கூடுதல் என நினைத்து கடன் வாங்குகிறீர்கள். அதை வேறு வங்கிக்கு மாற்றும்போது அதை அவ்வளவு எளிதில் மாற்றுவதற்கு அந்த நிறுவனங்கள் விடுவதில்லை. அடுத்தது ஆவணங்களில் பிரச்னை, சிபில், வேறு பிரச்னைகளைச் சரிசெய்யாமல் அப்படியே கடனை தொடரும்போது நீங்கள் கூடுதலாக பல லட்சம் ரூபாய் செலுத்த வேண்டியிருக்கும். அதாவது, 20 ஆண்டுகளுக்கு 25 லட்சம் ரூபாய் வீட்டுக் கடனை 11.5 சதவிகித வட்டி விகிதத்தில் வங்கியில் கடன் வாங்கும்போது மாதம் ரூ.26,661இஎம்ஐ செலுத்துவீர்கள். இப்படி 20 ஆண்டுகள் கடனைச் செலுத்தினால் மொத்தமாக 63.98 லட்சம் ரூபாய் செலுத்த வேண்டியிருக்கும். இதில் வட்டி மட்டும் 38.98 லட்சம் ரூபாயாக இருக்கும்.

ஆனால், நீங்கள் அதே தொகையை 9.5 வட்டி விகிதத்தில் கடன் வாங்கும்போது உங்களின் இஎம்ஐ ரூ.23,303 ஆக இருக்கும். வட்டி மட்டும் 30.92 லட்சம் ரூபாய் செலுத்த வேண்டியிருக்கும். ஆக, 2 சதவிகித வட்டி வித்தியாசத்தில் நீங்கள் கூடுதலாக 8 லட்சம் ரூபாய் வட்டி செலுத்த வேண்டியிருக்கும்.
வீட்டின் மதிப்பு உயராமல் இருந்தால் பாக்கி உள்ள தொகையை நீங்கள் செலுத்த வேண்டியிருக்கும். அதிகமாக உள்ள தொகையை வங்கி கடனாகத் தராது. எனவே, கூடுதலாக உள்ள கடன் தொகையைச் செலுத்த கையில் பணம் இல்லை எனில், கடனை அதே நிறுவனத்தில் தொடரவேண்டிய நிலை உருவாகும். எனவே, அதிக வட்டிக்குக் கடன் வாங்குவதைவிட, கடன் வாங்குவதைத் தவிர்ப்பதே சிறந்தது.
இரா.ரூபாவதி.

___________________________________________________________________________________________________
மணிகண்டன், திருநின்றவூர்.
“சொந்தமாக வீடு வாங்க வேண்டும் என்பதுதான் என்னுடைய பலநாள் கனவாக இருந்தது. ஆனால், எனக்கு நிரந்தர வேலை இல்லை. சமீபத்தில்தான் சொந்தமாகத் தொழில் ஆரம்பித்தேன். அதனால், வங்கியில் வீட்டுக் கடன் கிடைப்பது கடினமாக இருந்தது. இந்த நிலையில் வங்கி அல்லாத வீட்டுக் கடன் நிறுவனத்தில் கடன் வாங்கியிருக்கிறேன். வட்டி அதிகம் என்பது தெரியும். சில வருடம் கழித்து வேறு வங்கிக்குக் கடனை மாற்றிக்கொள்ளலாம் என்று நினைத்துத்தான் கடன் வாங்கியுள்ளேன்.”

 

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP