Vikatan.com

www.vikatan.com would like to send you push notifications.

Notifications can be turned off anytime from browser settings.

பி நோட் முதலீட்டாளர்களினால் சந்தை சரியுமா?

கடந்த சில நாட்களாகப் பி- நோட் என்ற வார்த்தை பங்குச் சந்தையில் அதிகமாக அடிப்படும் வார்த்தையாக உள்ளது. இந்த பி - நோட் (Participatory Notes) என்றால் என்ன? இதனால் பங்குச் சந்தையில் ஏற்படும் பாதிப்புகள் என்ன என்பது குறித்துப் பங்குச் சந்தை நிபுணர் வி. நாகப்பனிடம் கேட்டோம்.
 
''வெளிநாட்டு முதலீட்டாளர்கள் இந்திய பங்குச் சந்தையில் முதலீடு செய்வதற்கு செபி அமைப்பிடம் பதிவு செய்ய வேண்டும். அதாவது வெளிநாட்டு முதலீட்டாளர்கள் தங்களை எஃப்ஐஐயாகப் பதிவு செய்து கொள்வது அவசியம். அதன் பிறகுதான் இந்திய சந்தையில் முதலீடு செய்ய முடியும். ஆனால் சில முதலீட்டாளர்கள் எஃப்ஐஐயாகப் பதிவு செய்து கொள்ளாமலும் முதலீடு செய்வதற்கான சில வழிகள் உள்ளன. அதாவது எஃப்ஐஐயாகப் பதிவு செய்து கொண்டவர்கள் மூலமாக சில முதலீட்டாளர்கள் முதலீடு செய்ய முடியும். இவர்கள்  முதலீட்டிற்கு இணையாக எஃப்ஐஐகள் பி - நோட் கொடுப்பார்கள். இந்த பி - நோட்டை தமிழில் பங்கேற்பு ஆவணங்கள் என்று குறிப்பிடுவார்கள். பி - நோட் மூலமாக முதலீடு செய்வதற்கு வெளிநாட்டு முதலீட்டாளர்கள் தங்களை பற்றிய முழு விவரங்களும் செபியிடம் கொடுக்க வேண்டும் என்ற அவசியம் இல்லை.
 
எஃப்ஐஐ மூலமாக முதலீடு செய்வது பெரும்பாலும் ஒழுங்கு செய்யப்பட்ட பெரிய நிறுவனங்கள்தான். வெளிநாடுகளில் பிஎஃப், மியூச்சுவல் ஃபண்ட் போன்ற முதலீட்டு தொகையை எஃப்ஐஐ மூலமாக இங்கு முதலீடு செய்வது வழக்கம். இப்படி முதலீடு செய்பவர்களின் முழு விவரமும் எஃப்ஐஐ வசம் இருக்கும்.இதனால் செபி  அமைப்பு தகவல்களை கேட்கும் போது உடனடியாக வழங்க முடியும். 
ஆனால் பிநோட் மூலமாக முதலீடு செய்யும் போது முதலீட்டாளர்கள் குறித்த தகவல்களை வழங்க தேவையில்லை.  இந்த வாய்ப்பை பயன்படுத்தி  சில முதலீட்டாளர்கள் ஆவணங்களை கொடுக்காமல் முதலீடு செய்கிறார்கள். பி - நோட்டை பொறுத்தவரை பெயர், முகவரி உள்ளிட்ட விவரங்கள் தெரியாததால்  இந்திய சந்தையில் கறுப்புப் பணம் அல்லது தீவிரவாதிகளின் பணம் முதலீடு செய்யப்படுவது அதிகமாகும் என்ற அச்சம் பங்குச் சந்தையைக் கட்டுப்படுத்தும் அமைப்பான செபிக்கு வந்துள்ளது.
 
எனவே இதைத் தடுக்கும் விதமாகச் சில நடவடிக்கைகளை எடுக்கச் செபி முடிவெடுத்தது. அதாவது பி - நோட் மூலமாக முதலீடு செய்யப்படும் முதலீட்டாளர்களின் தகவல்களை எஃப்ஐஐகளிடம் செபி கேட்டது. இதன் விளைவாக அந்தச் சமயத்தில் சந்தைகள் தற்காலிகமாக  சரிய ஆரம்பித்தது. இதேபோல 2007ல் நடந்தபோது செபி பி-நோட் மூலமாக வரும் முதலீட்டை முழுவதுமாக தடை செய்தது. அந்த தடையை ஒட்டி தற்காலிகமாக சந்தை சரிந்த போதிலும், பின்னர் விரைவிலேயே சந்தை மேலே ஏறியதையும் பார்க்க முடிந்தது. அந்த சமயத்தில், பி-நோட் வழியான முதலீடு என்பது 40 சதவிகிதம் வரை இருந்தாக சொல்லப்படுகிறது. பி -நோட் மீதான அப்போதைய தடைக்கு பிறகு பி-நோட் வழியாக முதலீடு செய்த பல வெளிநாட்டு முதலீட்டாளர் தங்களை செபியிடம் நேரடியாக எஃப்ஐஐயாக பதிவு செய்துக் கொண்டார்கள். எனவே, எஃப்ஐஐகளின் எண்ணிக்கை சில நூறு அதிகரித்தது. இதிலிருந்து தெரிய வருவது என்னவென்றால் பி- நோட் மூலமாக வரும் முதலீடுகளை மட்டும் நம்பி இந்திய சந்தை இல்லை என்பதால் முதலீட்டாளர் அச்சப்பட தேவையில்லை. சொல்லப்போனால் இந்திய பங்குச் சந்தைகள் அளிக்கும் லாபத்தினால் இன்னும் அதிகமான எஃப்ஐஐ வருவதற்கான வாய்ப்புகள்தான் உள்ளது." என்றார். 
இரா.ரூபாவதி.

 

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP