Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

ஆர்பிஐ வட்டி குறைப்பு... யாருக்கு என்ன லாபம்?

இரா.ரூபாவதி

கடந்த வாரம் முழுவதும் ஹாட் டாக்காக இருந்தது ஆர்பிஐ கவர்னர் ரகுராம் ராஜன் தான். ஆர்பிஐயின் கொள்கை வரைவுக் கூட்டத்தில் அவர் 0.25 சதவிகித வட்டி விகிதத்தைக் குறைப்பார் என்றே எல்லோரும் நினைத்திருந்த நிலையில், 0.50 சதவிகித வட்டியைக் குறைத்து அனைவருக்கும் இன்ப அதிர்ச்சியைத் தந்தார் ரகுராம் ராஜன். இதனால் அனைத்துத் துறையினரும் மகிழ்ச்சி வெள்ளத்தில் திளைத்தனர். வட்டி விகிதம் குறைப்பு அன்று பங்குச் சந்தையும் ஏற்றம் கண்டது. 
வட்டி குறைந்தால்!
பொதுவாக, வட்டி விகிதம்  குறையும்போது தொழில் நிறுவனங்களுக்கு எளிதாகக் கடன் கிடைக்கும். அதன் மூலமாக உற்பத்தி பெருகுவதற் கான வாய்ப்பு உருவாகும். வட்டி விகிதத்தை மத்திய ரிசர்வ் வங்கி அதிகரிக்கும்போது, வங்கிகள் ரிசர்வ் வங்கியிடம் இருந்து வாங்கும் கடன் மீதான வட்டியும் அதிகரிக்கிறது. எனவே, நிறுவனம் மற்றும் தனிநபர் களுக்கு வங்கிகள் தரும் கடன் மீதான வட்டியும் அதிகரிக்கும். 

அதேபோல, எப்போதெல் லாம் ரிசர்வ் வங்கி வட்டியைக் குறைக்கிறதோ, அப்போது வங்கிகள் ரிசர்வ் வங்கியிடம் இருந்து வாங்கும் கடனின் மீதான வட்டியும் குறைவதால், வங்கிகள் தரும் கடன் மீதான வட்டியும் குறையும். இதனால் கடன் வாங்கித் தொழில் நடத்தும் பெரும்பான்மையான நிறுவனங்களின் உற்பத்திச் செலவும் குறையும் என்பதால் லாபம் அதிகரிக்கும். அல்லது ஏற்கெனவே இருக்கும் நஷ்டமும் குறையலாம்.

வட்டி விகிதக் குறைவு என்பது இது முதல்முறை இல்லை. ஜனவரி 2015-லிருந்து இதுவரை 1.25% வரை வட்டி விகிதம் குறைக்கப்பட்டுள்ளது. கடந்த நான்கு வருடங்களில் இல்லாத அளவிற்கு வட்டி விகிதம் குறைந்திருக்கிறது. 
 
தொழில்கள் வளரும்!
இந்த வட்டி விகிதம் குறைப்பினால் தொழில் துறைக்கு எந்தவிதமான நன்மை உருவாகும் என்பது குறித்து சிஐஐ அமைப்பின் பொது இயக்குநர் சந்திரஜித் பானர்ஜி யிடம் கேட்டோம்.
 
‘‘இந்த வட்டி விகித குறைப்பு வரவேற்கத்தக்கது. உலகளவில் நிலவும் பொருளா தாரச் சூழ்நிலை மற்றும் பணவீக்க விகித குறைவின் காரணமாகவே இந்த வட்டி விகித குறைப்பு நிகழ்ந்துள்ளது. இதன்மூலமாகத் தொழில்துறை பெருமளவு வளர்ச்சி அடைவதற்கான வாய்ப்புள்ளது. தற்போது நிலவும் தேக்கநிலை யிலிருந்து தொழில்துறை வெளிவருவதற்கு இது உதவியாக இருக்கும். அதாவது, தொழில் துறை எளிதாகக் கடன் வாங்குவதற்கு வழிவகுக்கும். இதன் மூலமாக, கார்ப்பரேட் துறையின் வளர்ச்சி மற்றும் முதலீடு அதிகரிக்கும்” என்றார்.

வட்டியைக் குறைத்தால் வளர்ச்சி வந்துவிடாது!

‘‘வட்டி விகிதக் குறைப்பினால் மட்டும் தொழில் துறை வளர்ச்சி அடையாது. தொழில் துறையில் பல பிரச்னைகள் உள்ளன. குறிப்பாக, கடன் வாங்குவதில் இருக்கும் சிக்கல் என்பது எப்போதுமே தொழில்துறைக்கு இருந்துகொண்டேதான் இருக்கும். பெரும்பாலான நிறுவனங்கள் வாங்கும் கடனில் 70 - 80 சதவிகித கடன் இந்தியா வில் உள்ள வங்கிகளிலும், மீதமுள்ள 20 - 30 சதவிகிதக் கடன் வெளிநாட்டிலும் வாங்கப் படுகிறது. இந்தியாவில் வாங்கப் படும் கடனுக்கான வட்டி விகிதம் 7 - 8 சதவிகிதத்தில் இருக்கும்.

ஆனால், வெளிநாடுகளில் வாங்கும் கடனுக்கான வட்டி விகிதம் 2 - 3 சதவிகிதத்தில் இருக்கும் என்றாலும், ரூபாயின் மதிப்பில் ஏற்படும் ஏற்ற, இறக்கத்தால் அதிக அளவில் பணத்தைக் கட்டவேண்டிய ரிஸ்க் உருவாகும்.  இதன் விளை வாகத் தொழில்துறை கடன் சுமையில்தான் இருக்கும். எனவே, வட்டி விகித குறைப்பி னால் மட்டும் வளர்ச்சி வந்துவிடாது'' என்றார்  சென்னையைச் சேர்ந்த பொருளாதார நிபுணர் டி.பி.கபாலி. 
 
எஃப்டி வட்டி குறையுமா?
ஆர்பிஐ வட்டி விகிதத்தைக் குறைத்தாலும், வங்கிகள் வட்டி விகிதத்தைக் குறைப்பதில்லை என்பது ஆர்பிஐ கவர்னர் ரகுராம் ராஜன் சொன்ன குற்றச்சாட்டு. வங்கிகள் வட்டி விகிதத்தை ஏன் குறைப்பதில்லை,  வட்டி விகிதம் குறைக்கப்பட்ட தால்,  எஃப்டிகளின் வட்டி குறைக்கப்படுமா என சிட்டி யூனியன் வங்கியின் சிஇஓ காமகோடியிடம் கேட்டோம். 

“வீட்டுக் கடனுக்கான வட்டி விகிதம் குறைய வாய்ப்புள்ளது. அதே நேரத்தில் எஃப்டிக்கான வட்டி விகிதமும் குறையக் கூடும். இதனால் வங்கிகளில் முதலீடு செய்யும் டெபாசிட்டு களின் எண்ணிக்கையும் குறைய வாய்ப்புள்ளது. இது அந்தந்த வங்கிகள் எடுக்கும் முடிவுகளின் அடிப்படையில் இருக்கும். அதாவது, ஆர்பிஐ வட்டி விகிதத்தைக் குறைத்தாலும் வங்கிகள் கட்டாயமாக வட்டி விகிதத்தைக் குறைக்க வேண்டும் என்ற அவசியம் இல்லை. 

மேலும், சில வங்கிகள் டெபாசிட்டுகளின் எண்ணிக்கை குறையக் கூடாது என நினைத்து வட்டி விகிதத்தைக் குறைக்காமல் வைத்திருக்கவும் வாய்ப்புள்ளது. வங்கிகளின் நிர்வாகச் செலவுகளின் அடிப்படையில் வட்டி விகிதம் நிர்ணயிக்கப் படுகிறது” என்றார்.
 
வீட்டுக் கடன் வட்டி குறையுமா? 
வட்டி விகிதம் குறைக்கப்பட்ட வுடன்  சில வங்கிகள் வீட்டுக் கடனுக்கான வட்டி விகிதத்தைக்  குறைத்துள்ளன. இதனால் வீட்டுக் கடன் இஎம்ஐ சிறிது குறையும். 20 ஆண்டுகளுக்கான ஒரு லட்சம் ரூபாய் வீட்டுக் கடனுக்கு 0.5%  வட்டி குறைந்தால் மாதத் தவணை 33 ரூபாய் குறையும். இதுவே 20 ஆண்டுகளுக்கு வட்டியானது ஒரு லட்சம் கடனுக்கு ரூ. 7,920 மிச்சமாகும். (பார்க்க  அட்டவணை)

பங்குச் சந்தைக்கும் நன்மையா?
இந்த வட்டி விகிதக் குறைப்பினால் பங்குச் சந்தைக்கு என்ன நன்மை என பங்குச் சந்தை நிபுணர் வி.நாகப்பனிடம் கேட்டோம். “தற்போதைய வட்டிக் குறைப்பு என்பது, கடன் வாங்கித் தொழில் செய்யும் பெரும்பான்மையான நிறுவனங்களுக்குச் சாதகமான அம்சம்தான். அதேசமயம், ரொக்கக் கையிருப்பு அதிகமாக வைத்திருக்கும் விப்ரோ, இன்ஃபோசிஸ், டிசிஎஸ், இந்துஸ்தான்லீவர், கோல்கேட், போன்ற ‘கேஷ் ரிச்’ நிறுவனங் களுக்கு இதில் பெரிய லாபம் இல்லை. இதனால் அந்த நிறுவனங்களின் முதலீடுகளின் மீதான வட்டி வருவாய் எதிர்காலத்தில் குறையும் என்பதால், வரும் ஆண்டுகளில் இதர வருவாயும் குறைய வாய்ப்பிருக்கிறது.

கடன் அடிப்படையில் இயங்கக்கூடிய தொழிற்துறை களான ஆட்டோ, வங்கிகள், நிதி நிறுவனங்கள், வீட்டுமனைத் துறை, அடிப்படை உள்கட்டுமானம் ஆகிய துறைகள் இந்த வட்டி விகித குறைப்பினால் லாபம் அடைய வாய்ப்புள்ளது.

இங்கு நாம் முக்கியமாகக் கவனிக்க வேண்டியது, ரிசர்வ் வங்கித் தலைவர் ரகுராம் ராஜன் சொல்லியிருக்கும் விஷயத்தைத் தான். ரிசர்வ் வங்கி வட்டியைக் குறைத்துக்கொண்டே போனாலும், அதே அளவுக்கு இதர வங்கிகள் வட்டியைக் குறைக்கவில்லை எனக் குற்றம் சாட்டியிருக்கிறார். வட்டிக் குறைப்பின் பலனைக் கடன் வாங்கியவர்களுக்குச் சேர்க்கவில்லை என்றால் என்ன அர்த்தம்? அந்தப் பலனை வங்கிகள் அனுபவிக்கின்றன என்றுதானே? எனவே, வரும் காலாண்டுகளில் வங்கிகளின் செயல்பாடுகளில் கணிசமான முன்னேற்றத்தைப் பார்க்கலாம். ரிசர்வ் வங்கியிடம் வங்கிகள் வாங்கும் கடன் மீதான வட்டி ஒருபக்கம் குறைவு. வங்கிகளிடம் கடன் வாங்கியவர்களுக்கு வட்டி குறைப்பு செய்யவில்லை என்பது இன்னொருபக்கம். எனவே, வங்கிகளின் ‘நெட் இன்ட்ரெஸ்ட் இன்கம்’ எனும் நிகர வட்டி வருவாய் இப்போது அதிகரிக்கலாம்.

நம் நாட்டில் விற்பனையாகும் வாகனங்களில் மூன்றில் இரண்டு பங்கு, கடன் மூலமாகத் தான் வாங்கப்படுகிறது எனச் சொல்கிறது ஒரு புள்ளிவிவரம். எனவே, ஏற்கெனவே உலோகப் பொருட்களின்  விலையில் ஏற்பட்ட கடும் சரிவால் பெரும்பலன் அடைந்துவரும் ஆட்டோ துறைக்கு வட்டி விகிதக் குறைப்பு என்பது மேலும் வலிமை சேர்க்கும்.
ஆனால், ஆட்டோ பங்குகளின் விலை ஏற்கெனவே  கணிசமாக அதிகரித்துவிட்டது. என்எஸ்இ ஆட்டோ துறைக் குறியீட்டின் பி.இ 50-க்கு மேல். எனவே, சூழல் சாதகமாக இருந்தாலும், கரெக்‌ஷனில் விலை குறையும்போது முதலீட்டுக்கு யோசிக்கலாம்.

இன்ஃப்ரா துறைக்கு மிகச் சாதகமான விஷயம் இது என்றாலும், இந்தத் துறையில் நல்ல கார்ப்பரேட் கவர்னன்ஸ் உள்ள தரமான பங்குகள் குறைவு. ஆக, சந்தைக்குச் சாதகமான விஷயம் என்றாலும், ஃபிக்ஸட் ரிட்டர்ன் டெபாசிட்டுகளில் இனி முதலீடு செய்பவர்களுக்குக் கொஞ்சம் கவலை அளிக்கக் கூடிய விஷயம். பணவீக்கம் தொடர்ந்து குறைவாக இருக்கும் பட்சத்தில், ‘ரியல் ரேட் ஆஃப் ரிட்டர்ன்’ ஸ்திரமாக இருக்கும் என்பதால், அவர்களும் கவலை படத் தேவையில்லை.
இதெல்லாம் உள்ளூர் சூழல். இவற்றை மட்டுமே பார்க்காமல், இன்று இருக்கக்கூடிய சர்வதேச சூழல், நிச்சயமற்றதன்மை ஆகியவற்றையும் கணக்கில் எடுத்துக்கொண்டு முதலீடு செய்வது நல்லது’’ என்றார்.

வட்டி விகிதம் குறைந்திருப்பதினால் உருவாகும் நன்மைகள் சாதாரண மனிதர்களுக்கு சென்று சேர வங்கிகள் நடவடிக்கை எடுக்க வேண்டும் என்பதே நம் வேண்டுகோள்!


விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP
Advertisement
Advertisement

MUST READ

Advertisement
Advertisement
[X] Close