Vikatan.com

www.vikatan.com would like to send you push notifications.

Notifications can be turned off anytime from browser settings.

வீட்டுக் கடன்: கட்டட மதிப்பீடு குறித்த ட்விட்டர் கேள்வி பதில்

இன்று ( 14.10.2015) நாணயம் விகடன் ட்விட்டர்  கேள்வி பதில் பகுதியில் வீட்டுக் கடன்: கட்டட மதிப்பீடு  குறித்த சந்தேகங்களுக்கு பதிலளித்தார் டி.பார்த்தசாரதி, சொத்து மதிப்பீட்டு நிபுணர்.

 


வீட்டுக் கடன்: கட்டட மதிப்பீடு  குறித்த உங்கள் சந்தேகங்களுக்கு உங்களது ட்விட்டர் கணக்கிலிருந்து @nanayamvikatan உங்கள் கேள்வியை #AskNV என்று ட்விட் செய்து பதில் பெறுங்கள் என அறிவித்திருந்தோம். அதன்படி வந்த கேள்விகளும், அதற்கு அவர் அளித்த பதில்களும் இங்கே உங்களுக்காக

1. நான் வங்கி குறிப்பிட்ட மதிப்பீட்டாளரிடமிருந்து வீட்டின் மதிப்பீட்டை  வாங்கி  வங்கியிடம் சமர்ப்பித்துவிட்டேன். சமீபத்தில் சொத்தின் மதிப்பு அதிகரித்துள்ளது. வங்கியிடம் வேறு ஒரு மதிப்பீட்டை சமர்ப்பித்து கூடுதல் கடன் வாங்க முடியுமா?


 தாராளமாக கடன் வாங்கலாம். ஆனால் நீங்கள் கூடுதலாக வாங்க இருக்கும் கடனுக்கும் சேர்த்து மாதத் தவணையை உங்களால் சரியாக செலுத்த முடியும் என்றால் நீங்கள் வங்கியிடம் மீண்டும் கடனுக்கு விண்ணப்பித்து மதிப்பீட்டாளரிடமிருந்து தற்போதைய அதாவது சொத்தின் மதிப்பு அதிகரித்த மதிப்பீட்டை சமர்ப்பித்து கடன் பெறலாம்.

2. சொத்து மதிப்பீடு என்றால் என்ன? விரிவாக விளக்கவும்? சொத்து மதிப்பீட்டிற்கு தோராயமாக எவ்வளவு செலவு ஆகும்? 

சொத்து மதிப்பீடு என்பது சொத்தை வாங்க இருப்பவரும், சொத்தை விற்க இருப்பவரும் சேர்ந்து விவாதித்து, எந்த நிர்பந்தத்திற்கும் உள்ளாகாமல், ஒரு விலைக்கு வாங்குவதற்கும் விற்பதற்கும் ஒப்புக் கொள்வது  வீட்டை வாங்க இருப்பவருக்கும், வீட்டை விற்க இருப்பவருக்கும் வீட்டின் மதிப்பு தெரியவில்லை என்றால், ஒரு மதிப்பீட்டாளரை அணுகலாம்.
மதிப்பீட்டாளர், வீடு எந்த மாதிரியான இடத்தில் அமைந்திருக்கிறது, வீட்டில் உள்ள வசதிகள், சாலை போக்குவரத்து, கைடுலைன் மற்றும் சந்தை மதிப்பு போன்ற அனைத்தையும் கணக்கில் எடுத்துக் கொண்டு வீட்டின் மதிப்பை கணக்கிட்டு தருவார்.
பொதுவாக வீட்டுக் கடன் என்றால் ரூ. 3000 - 7500 ரூபாய் வரை கட்டணமாக வசூலிக்கப்படும். இதற்கு 14 சதவிகிதம் சேவை வரியும் கட்டணமாக வசூலிக்கப்படும்.
வேறு வகையான கடன்களுக்கு எவ்வளவு வசூலிக்க வேண்டும் என்பதற்கு ஒவ்வொரு வங்கியும் தனித் தனியாக கட்டண அட்டவணை கொடுத்திருக்கிறது. அதன்படி தான் கட்டணங்கள் வசூலிக்கப்படும்.

3. நான் ஒரு பழைய வீட்டை வாங்க இருக்கிறேன். வங்கியில் கடன் கேட்ட போது  பொறியாளரிடமிருந்து வீட்டின் மதிப்பீட்டு அறிக்கை வாங்கி வரச் சொன்னார்கள். ஏன் இந்த மதிப்பீட்டை கேட்கிறார்கள்?


 அந்த சொத்து இன்னும் எத்தனை ஆண்டுகளுக்கு பயன்படுத்தக் கூடியதாக இருக்கும் என்பதை அறிந்து கொள்வதற்கும், சொத்தின் உண்மையான மதிப்பு எவ்வளவு என்பதை அறிந்து கொள்வதற்கும் தான் மதிப்பீட்டாளரிடமிருந்து ஒரு சொத்துக்கான மதிப்பீட்டை வாங்கச் சொல்கிறார்கள். பொதுவாக ஒரு சொத்தின் மொத்த மதிப்பில் 80 சதவிகிதத்திற்கு கடன்  கிடைக்கும்.

4. வங்கி குறிப்பிட்ட  மதிப்பீட்டாளருக்கு  பதிலாக வேறு மதிப்பீட்டாளரிமிருந்து வாங்கலாமா? 


 வாங்க இயலாது. வங்கிகளுக்கு என்று ஒரு குறிப்பிட்ட  மதிப்பீட்டாளர்கள் குழு இருப்பார்கள். அந்த குழுவில் இருக்கும் மதிப்பீட்டாளர்களைத் தவிர வேறு யாரிடமிருந்து வாங்கினாலும் வங்கியில் கடன் பெற இயலாது.

5. மதிப்பீட்டாளர்களுக்கு எவ்வளவு தொகை  கட்டணமாக செலுத்த வேண்டி இருக்கும்?


இதற்கு இரண்டாவது  கேள்வியிலேயே விடை கொடுக்கப்பட்டுள்ளது.

6. ஃப்ளாட்டை கடன் மூலம் வாங்க இருக்கிறேன். ஃபளாட்-க்கு எப்படி சொத்து மதிப்பீடு செய்வார்கள்?


ஃப்ளாட்டை மதிப்பீடு செய்யும் போது அன்டிவைடெட் ஷேர் ஆஃப் லேண்ட் (Undivided share of land), சூப்பர் பில்ட் அப் ஏரியா, வாங்க இருக்கும் வீடு எந்த மாடியில் அமைந்திருக்கிறது போன்ற விவரம், லிஃப்ட் வசதி, குடிநீர், கார் பார்க்கிங், வீட்டின் பழமை மற்றும் அதன் பராமரிப்பு போன்றவைகளை எல்லாம் கவனத்தில் எடுத்துக் கொண்டுதான் ஃப்ளாட் மதிப்பீடு செய்யப்படுகிறது.


7. என் சொந்த நிலத்தில் வீடு கட்ட இருக்கிறேன்.  எனக்கு எதன் அடிப்படையில் வங்கி / வீட்டு வசதி நிறுவனம் வீட்டுக் கடன் அளிக்கும்?


 முதலில் உங்கள் நிலத்தில் வீடு கட்டுவதற்கு அனுமதி வாங்க வேண்டும் (சென்னை என்றால் G+2  தளம் என்றால் சென்னை மாநகராட்சி இடமும், அதற்கு மேல் என்றால் சிஎம்டிஏவிடமும் சேர்த்து அனுமதி வாங்க வேண்டும். மற்ற நகரங்கள் என்றால் அந்த அந்த பஞ்சாயத்து அலுவலகத்தில் அனுமதி பெற வேண்டும்).
அனுமதி பெற்ற பின் வீட்டை கட்டுவதற்கு எவ்வளவு செலவு ஆகும் என்கிற ஒரு கணக்கீட்டை அனுமதி பெற்ற சர்வேயர் அல்லது மதிப்பீட்டாளர் மூலம் பெற வேண்டும். இந்த கணக்கீட்டை உங்கள் வருமான சான்றுகளுடன் வங்கியில் சமர்ப்பித்தால் வங்கி உங்களின் சான்றிதழ்களை பரிசீலித்து கடன் வழங்கும், அதிகபட்சம் வீட்டின் கணக்கீட்டில் 80 சதவிகிதம் வரை கடன் கிடைக்கும்.

8. நான் 30 வருட பழைய வீட்டை வாங்க இருக்கிறேன். இதற்கு வீட்டுக் கடன் வழங்க எப்படி மதிப்பீடு செய்வார்கள்?


  competent person to issue structural stability certificate. பொதுவாக 15 வருடங்களுக்கு முன் கட்டப்பட்ட வீடுகளை வாங்க இருக்கிறீர்கள் என்றால் அந்த வீட்டின் உறுதி தன்மையை பரிசோதித்து ஒரு ஸ்டெபிளிட்டி சர்டிஃபிகேட் வாங்க வேண்டும். இந்த ஸ்டெபிளிட்டி சர்டிஃபிகேட்டை ஸ்ட்ரக்சுரல் இன் ஜினீயர்கள் வழங்குவார்கள். இந்த இன்ஜினீயர்கள் கட்டடம் இன்னும் குறிப்பிட்ட ஆண்டுகள் உறுதியாக இருக்கும் என்று சான்று வழங்கிய பின்   தான் வங்கி கடன் கொடுப்பதை பற்றி பரிசீலிக்கும்

9. நண்பரின் இடத்தை வாங்க இருக்கிறேன். சந்தை விலை சதுர அடி 1500 ரூபாய்தான், ஆனால் கைடுலைன் மதிப்பு 2,200 ரூபாயாக இருக்கிறது. வீட்டுக் கடன் வாங்குவது என்றால் எந்த மதிப்புக்கு தருவார்கள்?


வீட்டுக் கடன் வாங்காமல் சொந்த பணத்திலேயே வீட்டை வாங்க இருக்கிறீர்கள் என்றால், இந்த விலை மாறுபாட்டை பற்றி பிரிவு 47A  -க்கு தெரியப்படுத்தி மதிப்பீட்டை திருத்திக் கொள்ளலாம். ஆனால் வீட்டுக் கடன் வாங்க இருக்கிறீர்கள் என்றால் 2200 ரூபாய்க்கு அரசு கட்டணங்களான முத்திரைத் தாள் கட்டணம் மற்ற கட்டணங்களை செலுத்த வேண்டும். ஆனால் வங்கிகள் சந்தை மதிப்பிற்குத் தான் கடன் வழங்கும்.

 

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ