Vikatan.com

www.vikatan.com would like to send you push notifications.

Notifications can be turned off anytime from browser settings.

வங்கிகளின் இதர சேவைகள்


- கே ஆர் வைகுண்டம், மதுரை


வைப்புக்கணக்குகள், கடன் கணக்குகள், பணமாற்றம் இவற்றைத்தவிர மற்றும் பல சேவைகளையும் வங்கிகள் வழங்குகின்றன. இவற்றில் கீழ்க்கண்டவற்றைக் குறிப்பாகச் சொல்லலாம்.

லாக்கர் வசதிகள் -

வங்கிகள் பல கிளைகளில் லாக்கர் எனப்படும் காப்புப் பெட்டக வசதி அளிக்கின்றன. லாக்கரைப் பொறுத்தவரை வங்கிக்கும், வாடிக்கையாளருக்கும் ஒரு வீட்டுச் சொந்தக்காரருக்கும், வாடகைக்கு குடியிருப்பவருக்கும் என்ன தொடர்பு உள்ளதோ அதே தொடர்பு தான் உள்ளது. வங்கிக் கிளைகள் தங்களுடைய பண இருப்பையும், விலை மதிப்புள்ள ஆவணங்களையும் பாதுகாக்க தகுந்த கட்டமைப்பை செய்தே ஆக வேண்டும்.

அதனால், அதே அமைப்பைக் கொண்டு வாடிக்கையாளர்களுடைய விலை மதிப்புள்ள பொருட்களையும் பாதுகாப்பாக வைக்க வசதி செய்து தர முடிகிறது. 

வங்கிகள் லாக்கர் பெட்டியை வாடிக்கையாளருக்கு நீண்ட கால வாடகைக்கு தருகின்றன. பொதுவாக வாடிக்கையாளர்கள் லாக்கர்களில் விலைமதிப்புள்ள நகைகள், முக்கியமான ஆவணங்கள் போன்றவற்றை வைக்கின்றனர். வாடகை கட்டவில்லையென்றால் நோட்டீஸ் கொடுத்து விட்டு லாக்கர் பெட்டியை உடைத்து காலி செய்யும் அதிகாரம் வங்கிக்கு உள்ளது.

இந்தச் செலவு ஏற்படலாம் என்பதால் வங்கிகள் ஒரு குறிப்பிட்ட தொகையை லாக்கர் எடுப்பவர்களிடம் வைப்புத்தொகையாக வசூலிக்கின்றன. லாக்கர் பொருட்களுக்கும் நம் காலத்திற்குப் பிறகு அதை நிர்வாகம் செய்யக்கூடிய தக்க நபருக்கு சென்றடைய நாமினேஷன் வசதி உள்ளது. 

 மியூச்சுவல் ஃபண்டுகள் மற்றும் காப்பீட்டு பாலிசி

 மியூச்சுவல் ஃபண்டுகள் மற்றும் காப்பீட்டு பாலிசி விற்றல் அண்மைக்காலத்தில் வங்கிகளின் முக்கிய வேலைகளில் ஒன்றாகி விட்டது.

இங்கு மியூச்சுவல் ஃபண்டுகள் பற்றி ஒரு சிறு குறிப்பு: ம்யூச்சுவல் ஃபண்டுகள் கூட்டு முதலீடு செய்கின்றன. கூட்டு நிதி அல்லது பரஸ்பர நிதி என்றும் சொல்லலாம். நம்மில் பலருக்கு பங்குச் சந்தைகளின் நுணுக்கங்கள் தெரிவதில்லை. முதலீடு செய்யக்கூடிய நல்ல கம்பெனிகளைக் கண்டறிய முடிவதில்லை. முதலீடு செய்த பின் அந்த நிறுவனம் செவ்வனே செயல்படுகிறதா என்று கண்காணிக்க முடிவதில்லை. பங்குச் சந்தைகளின் ஏற்ற இறக்கத்தையும் பணமாற்ற அளவையும் பார்க்கும் பொழுது நம்முடைய முதலீட்டுத் தொகை மிகவும் சிறியதாக இருக்கிறது. 

மியூச்சுவல் ஃபண்டுகள் பலருடைய சிறிய முதலீட்டுகளை ஒன்று சேர்த்து, பங்குச் சந்தைகளிலும், கடன் சந்தைகளிலும் ஆய்வு செய்வதற்கும் முதலீடு செய்வதற்கும் வல்லுனர்களை நியமித்து, வரும் வருவாயை முதலீட்டார்களர்களுடன் பகிர்ந்து கொள்கின்றன.

வங்கிகள் மியூச்சுவல் ஃபண்டுகள் காப்பீட்டுக் கம்பெனிகளின் வினியோகஸ்தர்களாக செயல்பட்டு, வைப்புக் கணக்குகளும், சேமிப்புக் கணக்குகளும் துவக்கத் தேவையான அதே ஊக்கத்துடன் காப்பீட்டுப் பாலிசிகளையும் ம்யூச்சுவல் ஃபண்டுகளையும் விற்கின்றன. சொல்லப்போனால் வைப்பு மற்றும் கடன் கணக்குகள் தொடங்கும்  வாடிக்கையாளர்களின் தொடர்புதான் வங்கிகளுக்கு இவ்வாறு விற்பனையாளர்களாக செயல்படுவதற்குப் பெரும் பலமாக உள்ளது. இந்த சேவைக்காக வங்கிகளுக்கு கமிஷன் கிடைக்கும்.

ஆனால், சில வங்கி அலுவலர்கள் வங்கிகளுடைய வைப்புக் கணக்குகளுக்குப் போட்டியாக, காப்பீடுப் பாலிசிகளும், மியூச்சுவல் ஃபண்டுகளும் செயல்படுவதாகக் கருதி இவற்றை விற்பதில் ஈடுபாடு காட்டுவதில்லை. ஆனால் வாடிக்கையாளர்கள் வங்கிகளின் சேமிப்புக் கணக்குகளைத் தவிர மற்ற சேமிப்பு மார்க்கங்களையும் ஆய்வு செய்வதைத் தவிர்க்க முடியாது. இந்த மாற்று சேவைகளை நாம் அளிக்காவிட்டால் வேறு நிறுவனங்கள் அளிக்கும். நமக்குக் கிடைக்கக்கூடிய கமிஷனும் கிடைக்காமல் போய் விடும். இதனால் வங்கி நிர்வாகங்கள் காப்பீட்டுப் பாலிசி மற்றும் ம்யூச்சுவல் ஃபண்ட் இவற்றை விற்க வேண்டி தங்களுடைய கிளைகளை ஊக்குவித்தே வருகின்றன. 

கட்டணங்கள்/ வரி வகைகள் வசூல் -

 பல நிறுவனங்களுக்கு பொது மக்களிடமிருந்து பணம் பெற வேண்டிய தேவை உள்ளது. சில சமயங்களில் குறிப்பிட்ட விதி முறைகளுடன் பணத்தை வசூலிக்க வேண்டி உள்ளது. வசூலித்த பணத்தை கணக்கு விவரங்களுடனும் தகுந்த ஆவணங்களுடனும் நிறுவனங்களிடம் ஒப்படைக்கும் பொறுப்பை வங்கிகள் ஏற்கின்றன.

இவ்வகையில் மின் கட்டணம், பள்ளி/ கல்லூரிக் கட்டணங்கள், தொலை பேசிக் கட்டணம் போன்றவற்றை வங்கிகள் ஏற்கின்றன. அரசாங்கத்தின் சார்பாக வருமான வரி சுங்க வரி, கலால் வரி, சேவை வரி, வணிக வரி போன்றவற்றையும் வங்கிகள் ஏற்று அரசுக்கு தகுந்த விவரங்களுடன் கணக்கு அளிக்கின்றன. பங்குச் சந்தைகளில் முதலீடு செய்வோர் வங்கிகளிலேயே பணத்தைச் செலுத்துகின்றனர்.

முதலீடு கேட்கும் கம்பெனிகள் வரைமுறைகளுக்கு உட்பட்டே இந்த முதலீட்டுத் தொகையின் மேல் உ¡¢மை கோர முடியும். இந்த வரைமுறைகளை கம்பெனிகள்  அனுசா¢க்கின்றனவா என்று உறுதி செய்யும் சேவையையும் முதலீட்டாளர்களுக்கு வங்கிகள் அளிக்கின்றன.

 அன்னியச் செலாவணி -

நீங்கள் ஏற்றுமதி இறக்குமதி செய்பவராகவோ அல்லது வேலை / சுற்றுலாப் பயணத்துக்காக வெளிநாடு செல்பவராகவோ இருந்தால் உங்களுக்கு அன்னியச் செலாவணி வாங்கவோ விற்கவோ வேண்டிய தேவை இருக்கும். அன்னிய செலாவணி வர்த்தகத்தை மேலாண்மை செய்ய வேண்டிய பொறுப்பு சர்வ் வங்கியுடையது. வங்கிகள் ரிசர்வ் வங்கியிடமிருந்து உரிமம் பெற்று பொது மக்களுக்கும், தொழில் நிறுவனங்களுக்கும் டாலர், யூரோ, பவுண்ட் போன்ற அன்னியச் செலாவணி விற்று வாங்கி வருகின்றன.

பில் வசூல் -

தொழில் மற்றும் வர்த்தக நிறுவனங்கள் வேறு ஊர்களிலோ அல்லது வேறு நாடுகளிலோ உள்ள மற்ற நிறுவனங்களிடமிருந்து பொருள் விற்றதற்கான நிலுவையை வசூலிக்க வேண்டி வருகிறது. இதற்கான பண ஓலையை (பில் ஆஃப் எக்ஸ்சேஞ்) வங்கிகள் பணம் பெற வேண்டிய நிறுவனத்தின் சார்பில் தங்களுடைய பல்வேறு இடங்களில் உள்ள கிளைகள் மற்றும் நேச வங்கிகள் மூலமாக வசூலிக்கின்றன.

 தேவைப்பட்டால் பணம் கட்ட வேண்டியவரிடமிருந்து பணம் வரும் வரை காத்திருக்காமல் உடனே பில்லுக்கான தொகையை தங்களுடைய சேவைக்கான கட்டணம் மற்றும் வட்டியைக் கழித்துக்கொண்டு பணம் பெற வேண்டிய தங்களுடைய வாடிக்கையாளருக்கு அளிக்கின்றன.

ஆலோசனை சேவைகள் - 

உபரிப் பணத்தை முதலீடு செய்ய விரும்பவர்களுக்கு, பங்குச் சந்தைகள், மியுச்சுவல் ஃபண்ட்கள் மற்றும் இதர நிதி முதலீட்டு வாய்ப்புகளில் பணம் பிரித்துப் போடுவது பற்றியும், எவ்வளவு காலத்துக்குப் போடலாம் என்பது பற்றியும், நாம் செய்யும் முதலீட்டினால் நம்முடைய வருமான வரி, சொத்து வரி போன்றவற்றில் ஏற்படும் தாக்கம் பற்றியும் வங்கிகள் நிதி ஆலோசனை வழங்குகின்றன.

இதே போன்று பங்குச் சந்தையில் பொது மக்களிடமிருந்து முதலீடு பெற விரும்பும் நிறுவனங்களுக்கு பங்குச் சந்தை நிலவரத்தைப் பற்றியும், பொது மக்களிடமிருந்து முதலீடு கேட்க அவர்கள் கடைப்பிடிக்க வேண்டிய விதிமுறைகள் பற்றியும் ஆலோசனை வழங்குகின்றன. அந்த நிறுவனங்கள் முதலீட்டாளர்களுக்குக் கண்டிப்பாக வழங்க வேண்டிய விவரங்களின் தொகுப்பையும் வங்கிகள் தயாரித்து அளிக்கின்றன.

கியாரண்டிகள்  -

  அரசுத் துறைகள், அரசு நிறுவனங்கள் மற்றும் பெரும் வணிக நிறுவனங்கள் பெரு மதிப்புள்ள பொருள்களையோ, சேவைகளையோ வாங்கும் பொழுது அவை கண்டிப்பாக டெலிவரி செய்யப்படும் என்றும் தரமானவையாக இருக்கும் என்றும் உத்திரவாதத்தை எதிர்பார்க்கின்றன. விற்போருக்கு முன்பணம் கொடுத்தால் அது திரும்பி வரும் என்பதற்கும் உத்திரவாதம் எதிர்பார்க்கின்றன. சில சந்தர்ப்பங்களில் காரியம் விரைவாக நடக்க வேண்டி உத்திரவாதம் இருந்தால் பல விதிமுறைகளைத் தளர்த்துகின்றன.  பொருள் / சேவைகள் விற்போர் சார்பில் வங்கிகள் இத்தகைய உத்திரவாதமாக கியாரண்டி அளிக்கின்றன. வங்கிகள் இத்தகைய பொறுப்பை ஏற்குமுன் இதற்கான தகுந்த ஆய்வுகளை மேற்கொள்கின்றன. தகுந்த செக்யூரிடி பெற்றுக்கொள்கின்றன. இதனால் வங்கிகளுக்கு கமிஷன் தொகையும் கிடைக்கிறது.

 டீமேட் கணக்குகள் -

பணத்தை சேமிப்புக் கணக்குகளில் வைப்பு செய்கிறோம். இதே போல் கம்பெனி பங்குகளை வைப்பு செய்ய டீமேட் கணக்கு பயன்படுகிறது. பங்குகள் (உருவம் கொண்ட) காதித ஆவணங்களாகவே கொடுக்கப்பட்டன. ஆனால் தற்போது பங்கு வழங்கும் நிறுவனம் பங்குகளை முதலீட்டாளருடைய டீமேட் கணக்கில் நேரடியாக செலுத்தி விடுகிறது. காதித ஆவணம் எதுவும் இல்லாததால் இவை உருவமற்ற (டீமேட்) கணக்குகள் எனப்படுகின்றன.

பின்னாளில் முதலீட்டாளர் இப்பங்குகளை விற்றாலும் காதித மாற்றம் இல்லாமல் அவருடைய டீமேட் கணக்கிலிருந்து பங்கு வாங்குபவருடைய டீமேட் கணக்குக்கு மாற்றி விடலாம். சேமிப்புக் கணக்கு சேவை அளிப்பது போலவே வங்கிகள் டீமேட் கணக்குகள் சேவையும் அளிக்கின்றன. சில வங்கிகள் ஒரு படி மேலே போய் பங்குச் சந்தையில் ப்ரோக்கர்களாகவும் செயல்பட்டு முதலீட்டாளர்கள் சார்பில் பங்குகளை விற்றும் வாங்கியும் வருகின்றன.

 

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ