Vikatan.com

www.vikatan.com would like to send you push notifications.

Notifications can be turned off anytime from browser settings.

உண்மை நிலையை அறிவதில் நீங்கள் எப்படி?


       
      பொதுவாக மனிதர்கள் எந்த ஒன்றையும் மேலோட்டமாக பார்த்து மதிப்பிடுபவர்களாகவே இருக்கின்றனர். அதனால் உண்மை என்னவென்று நமக்குத் தெரியாமலே போய்விடுகிறது. எதை நம்ப வேண்டுமோ அதை நம்பாமல், எதை நம்பக்கூடாதோ அதை நம்புகிறவர்களாகவே நம்மில் பெரும்பாலோனோர் இருக்கின்றனர்.


    உதாரணத்துக்கு அதிக லாபம் தருவார்கள் என்று நம்பி ஈமு போன்ற பொன்ஸி திட்டங்களில் முதலீடு செய்து  மக்கள் ஏமாந்துவிடுவதை நாம் பார்த்துக் கொண்டுதான் இருக்கிறோம்.


   அதே நேரத்தில் பங்குச் சந்தை, மியூச்சுவல் ஃபண்ட் போன்ற முதலீட்டு திட்டங்கள் அதிகமாக லாபத்தை தந்தாலும், அவற்றில்  முதலீடு செய்யாமல் வங்கியிலும் தங்கத்திலும் ரியல் எஸ்டேட்டிலும் முதலீடு செய்து குறைந்த வருமானத்தை பெறுவதையும் பார்க்கின்றோம். இந்த மாதிரி தவறாக புரிந்து கொள்ளப்பட்டவனை பற்றிய ஒரு குறும்படம் தான் "ஹோம்லெஸ் பிளைன்ட் ட்ரூத்"


       பல நாட்களாக முடி வெட்டப்படாமல், கிழிந்த சட்டையுடன், பிச்சைக்காரனைப் போன்ற தோற்றம் கொண்ட  ஒருவன் எப்போதும் இரவில் ஒரு கடையின் மூடப்பட்ட ஷட்டரின் முன் உறங்குவது வழக்கம். அவனுக்கென்று தங்குவதற்கு வீடு இல்லை. தினந்தோறும் காலையில் கடையை திறக்கும் முதலாளி கடையின் முன் படுத்துக்கிடக்கும் அவனை அடித்து துரத்திவிடுகிறார். ஒரு நாள் காலையில் முதலாளி கடையை திறந்த போது கடைக்குள் யாரோ சிறுநீர் கழித்திருப்பதை அறிந்து மிகுந்த கோபத்துக்கு ஆளாகி கடைக்கு முன் படுத்துக்கிடக்கும்  அந்த வீடு இல்லாதவன் தான் சிறுநீர் கழித்திருப்பான் என்று நினைத்து அவனை எட்டி உதைக்கிறார். படுத்துக்கிடந்த அவன் தன் மேல் விழுந்த உதையை தாங்கிக் கொள்ள முடியாமல் ஓடிவிடுகிறான்


         அடுத்த நாள் காலையில் முதலாளி கடையைத்  திறந்த போது எப்போதும் கடைக்குமுன் படுத்துக்கிடக்கும் அந்த வீடு இல்லாதவனை தேடுகிறார். அவன் அங்கே இல்லை. சில நாட்களாக அவன் அங்கே உறங்க வருவதில்லை. தான் அடித்ததினால் தான் அவன் கடையின் முன்னால் படுக்க வருவதில்லை என உணரும் அந்த  முதலாளி கவலையுடன் பக்கத்திலிருப்பவர்களிடம் விசாரிக்கிறார். அவன் இனி எப்போதுமே வரமாட்டான் என்கிறாள் ஒரு பெண்.


                   தான் உதைத்த அன்றிரவு என்ன நடந்திருக்கும் என்று தன் கடையின் முன்னால் பொருத்தப்பட்டிருக்கும் சிசிடிவி கேமிராவில் பதிவான காட்சிகளைப் பார்க்கிறார் முதலாளி. அவருக்கு அதிர்ச்சி மேல் அதிர்ச்சி காத்திருக்கிறது. வீடு இல்லாத அந்தப் பிச்சைக்காரன் இரவில் கடைக்கு பாதுகாவலனாக இருந்திருக்கிறான். கடையை யாரும் அண்ட விடாமல் பாதுகாக்கிறான். கடைக்குள் வேறு யாரோ சிறுநீர் கழிப்பது கேமிராவில் பதிவாகி இருக்கிறது. அன்றைக்கு இரவு கடையில் இருக்கும் பொருட்களை திருட வந்த சில திருடர்களிடம் சண்டைப் போட்ட போது அவர்களால் கத்தியால் குத்தப்பட்டு அந்த வீடு இல்லாதவன் இறந்து போவதும் கேமிராவில் பதிவாகி இருக்கிறது. உண்மை  என்னவென்று தெரியாமல் அப்பாவியான அந்த வீடு இல்லாதவனை அடித்ததற்காக குற்ற உணர்வில் அந்தக் கடை முதலாளி அழுவதோடு குறும்படம் முடிகிறது.


அந்தக் கடை முதலாளி எப்படி அந்த வீடு இல்லாதவனைப் பற்றிய உண்மையை அறியாமல் இருக்கிற மாதிரி நாமும் பங்குச் சந்தை, மியூச்சுவல் ஃபண்ட் போன்ற முதலீட்டு திட்டங்களில் இருக்கும் நன்மையைப் பற்றிய உண்மையை அறியாமல் இருக்கிறோம்.



 

 

த.சக்திவேல்

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ