Vikatan.com

www.vikatan.com would like to send you push notifications.

Notifications can be turned off anytime from browser settings.

வாசல் கதவை தட்டும் வங்கிகள்; இப்போது கடன் வாங்கலாமா?

 டன் வாங்காமல் வாழ்க்கையை நடத்துவது  முடியாத காரியம். ஆனால் தேவையில்லாத கடன் நம்முடைய வாழ்க்கையையே சீரழித்துவிடும் என்பது உண்மை. தற்போது கடன் வாங்குவதற்கான சூழல்  மிகவும் நன்றாக உள்ளது.  சமீபத்தில் சென்னை, கடலூர், திருவள்ளூர், காஞ்சிபுரம் ஆகிய மாவட்டங்கள் மழை வெள்ளத்தால் கடுமையாக பாதிக்கப்பட்டது. இந்த மாவட்டங்களில் வசிக்கும் பெரும்பாலான மக்கள் அனைத்துப் பொருட்களையும் இழந்துவிட்டார்கள். மழையில் பாதிக்கப்பட்டவர்கள் தங்களின் வாழ்க்கையை மறுசீரமைத்துக் கொள்வதற்காக வங்கிகள் கடன் வழங்கத் திட்டமிட்டுள்ளது.  ஆனால் இந்தக் கடனை எந்தவிதமான பாதிப்பும் இல்லாதவர்களும் வாங்க முடியும்.


 

மழைக்கு முன்பு ஏதாவது தேவைக்காக கடன் வாங்க வேண்டுமெனில் வங்கியில் கடனுக்காக விண்ணப்பித்துவிட்டுப் பல நாட்கள் காத்திருக்க வேண்டிய நிலை இருக்கும். மேலும் நமக்கு எவ்வளவு கடன் கிடைக்கும், வட்டி விகிதம் எவ்வளவு என்ற தகவல்களை வாடிக்கையாளர்கள் கேட்டு தெரிந்து கொண்டுதான் விண்ணப்பிக்க வேண்டியிருக்கும்.  ஆனால் தற்போது கடன் வேண்டுமா எனக் கேட்டு ஒரு நாளைக்கு 4 அல்லது 5 போன் கால்கள் வருகிறது. கடன் நல்லது எனச் சொல்லி மெயில் வருகிறது. இது போன்று கடன் வாங்குவதற்கான அத்தனை வாய்ப்புகளும் உள்ள நிலையில் கடன் வாங்கலாமா, வாங்கக்கூடாதா என்பதைப் பார்ப்போம்.
 
பல வங்கிகள் ஏற்கெனவே கடன் வாங்கியிருக்கும் வாடிக்கையாளர்களுக்குச்  சிறப்பு சலுகையாக, கூடுதலாகக் கடன் வழங்குகிறது. அதாவது வீட்டுக் கடன், வாகனக் கடன் ஆகிய கடன்களை வாங்கியிருக்கும் வாடிக்கையாளர்களுக்கு அந்தக் கடனை அடிப்படையாக வைத்துக் கூடுதல் கடன் தொகையை வழங்குகிறது. இதுமட்டும் இல்லாமல் சம்பளக் கணக்கு வைத்திருக்கும் வாடிக்கையாளர்களுக்கு நிபந்தனைகள் இல்லாமல் தனிநபர் கடன் வழங்குகிறது.
 
கடன் ஏன்?

கடன் என்பது நோய் தீர்க்கும்  மருந்து போல. அதை தேவையான நேரத்தில் மட்டும்தான் பயன்படுத்த வேண்டும். அதாவது கடன் கேட்டு விண்ணப்பிப்பதற்கு முன் ஏன் கடன் வாங்க வேண்டும், கடனின் அவசியம் என்ன,  இப்போது கட்டாயம் கடன் தேவையா, கடன் வாங்கும் தொகையில் என்ன செய்யப்போகிறோம் என்பது போன்ற  கேள்விகளை நீங்களே கேட்டுக் கொள்வது நல்லது.  

கடனுக்கான வட்டி விகிதம்!
 
கடன் வாங்குவதற்கான மனநிலையை துண்டுவது வட்டி விகிதம்தான். அதாவது இப்போது வழங்கப்படும் சிறப்புக் கடன் அடிப்படை வட்டி விகிதத்தில் வழங்கப்படுகிறது. இதனால் மிகவும் குறைவான  வட்டியில் கடன் கிடைக்கிறது.  ஆனால் இந்தக் கடனுக்கான வட்டி விகிதத்தை  வங்கி எப்போது வேண்டுமானாலும் உயர்த்தலாம். இது நிலையான வட்டி விகிதம் கிடையாது என்பதை புரிந்து கொள்ள வேண்டும்.

 

முதலீடு!
 
சிலர் குறைவான வட்டியில் கிடைக்கிறது என்பதற்காகக் கடன் வாங்கி, அந்தத் தொகையை முதலீடு செய்வார்கள். அதேபோல தங்கம், ரியல் எஸ்டேட் போன்றவற்றிலும் முதலீடு செய்வார்கள். இது முற்றிலும் தவறு. தங்கம், ரியல் எஸ்டேட் போன்றவற்றில் வருமானம் என்பது கிடையாது. அவற்றின் விலை உயர்ந்தால்தான் லாபம் கிடைக்கும். இப்போது உள்ள சூழ்நிலையில் அவற்றின் விலை உயராது.
சிலர் கடன் வாங்கிய தொகையை  ஃபிக்ஸ்ட் டெபாசிட் திட்டத்தில் முதலீடு செய்வார்கள். இதுவும் தவறானது. ஏனெனில் கடனின் வட்டி விகிதத்தை விட ஃபிக்ஸ்ட் டெபாசிட்டின் வட்டி விகிதம் குறைவாக இருக்கும்.
 
மேலும் கடன் வாங்கும் வட்டி விகிதத்தை விட அதிக வருமானம் தரும் முதலீட்டுத் திட்டங்கள் மிகவும் குறைவானது. குறுகிய காலத்தில் அவ்வளவு வருமானம் கிடைக்காது. எனவே கடன் வாங்கி முதலீடு செய்வதை தவிர்ப்பது நல்லது. 
 
சிபில் ஸ்கோர்! 

எந்தவிதமான சிறப்புக் கடனாக இருந்தாலும், கடன் கேட்டு விண்ணப்பம் செய்தவரின் சிபில் ஸ்கோர் எவ்வளவு என்பதை வங்கிகள் பார்க்கும். அதில் எதாவது பிரச்னை இருந்தால் கடன் கிடைக்காது. மேலும் நீங்கள் கடன் கேட்டு விண்ணப்பம் செய்த விவரம் சிபில் ரிப்போர்ட்டில் அப்டேட் செய்யப்படும். இப்படி அடிக்கடி கடனுக்காக விண்ணப்பித்து அது நிராகரிக்கப்பட்டால் நீங்கள் கடன் வாங்குவதற்காக அதிக ஆர்வமாக இருக்கிறீர்கள் எனப் பதிவாகும். இதன் காரணமாக  புதிய கடன் கிடைப்பதில் சிக்கல் உண்டாகும்.
 
என்ன சிக்கல்!
 
கடனுக்கான தேவையே இல்லாத நேரத்தில் கடனை வாங்கினால் தேவையான நேரத்தில் கடன் வாங்குவதில் சிக்கல் ஏற்படும். அதாவது இப்போது கிடைக்கிறது என்பதற்காக நீங்கள் தனிநபர் கடன் ரூ.3 லட்சம் வாங்குகிறீர்கள் என வைத்துக் கொள்வோம். இந்தக் கடன் வாங்கிய ஆறு மாதம் அல்லது ஒரு வருடத்தில் வீட்டுக் கடனுக்காக விண்ணப்பிக்கிறீர்கள் என வைத்துக் கொள்வோம். அந்தச் சமயத்தில் உங்களின் கடன்  தகுதியில், தனிநபர் கடன் தொகை போக மீதமுள்ள தொகைக்குத்தான் கடன் கிடைக்கும். இதனால் உங்களுக்குத் தேவையான தொகை கிடைக்காது. மேலும் கடன் எளிதாகக் கிடைக்கிறது என்பதற்காக வாங்கி விட்டு, அதைத் திரும்ப செலுத்துவதில் ஏதாவது பிரச்னை ஏற்பட்டால் அதுவும்  சிபில் ஸ்கோரில் பிரதிபலிக்கும்.   எனவே கடனின் அவசியம் என்ன என்பதைத் தெரிந்து கடன் வாங்குவது நல்லது.   

பிற காரணங்கள்! 
 
மேலும் இந்தக் கடனை வாங்கித் திரும்ப செலுத்தும் போது எந்த விதமான வரிச் சலுகையும் பெற முடியாது. அதோடு கடன் தொகை முழுவதையும் குறிப்பிட்ட காலத்துக்கு முன்பே திரும்ப செலுத்தினால் அதற்குக் கட்டணம் செலுத்த வேண்டியிருக்கும்.
தமிழகத்தில் ஏற்பட்டுள்ள இந்த மழை வெள்ளப் பாதிப்பை பல வங்கிகள்  பிசினஸ் வாய்ப்பாக பயன்படுத்திக் கொள்ள திட்டமிட்டுள்ளது. உண்மையிலே நீங்கள் பாதிக்கப்பட்டிருந்தால் அந்தக் கடனை வாங்கி நிலைமையைச் சீர் செய்து கொள்ளலாம். இல்லையெனில் கடன் வாங்காமல் இருப்பதே நல்லது.
 
இரா.ரூபாவதி.   

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP