Vikatan.com

www.vikatan.com would like to send you push notifications.

Notifications can be turned off anytime from browser settings.

மல்லையா போலவே டபாய்க்கும் 5275 பேர்: பரபரப்புப் பட்டியல் வெளியீடு!

மல்லையா வாங்கிய ரூ. 9000 கோடி கடனுக்கே இப்படி வாயைப் பிளக்கிறோமே, இவரைப் போலவே இன்னும் 5275 பேர் வங்கிகளில் கடனை வாங்கி திருப்பிக் கட்டாமல் மோசடி செய்திருப்பதாக சிபில் பட்டியல் வெளியிட்டுள்ளது. இவர்கள் வாங்கிய மொத்த கடன் மதிப்பு ரூ. 56,521 கோடி என்று தெரிவிக்கப்பட்டுள்ளது.

திட்டமிட்டு மோசடி செய்யும் இவர்களைப் போன்ற பெரும் பண முதலைகள் வாங்கிய கடன் கடந்த 13 ஆண்டுகளில் 9 மடங்கு உயர்ந்துள்ளது. 2002-ல் வங்கிகளுக்கு இருந்த திட்டமிட்ட மோசடிக்காரர்களின் வாராக்கடன் ரூ. 6,291 கோடி. ஆனால் தற்போது அது 9 மடங்கு உயர்ந்து ரூ. 56,621 கோடியாக உள்ளது. இது இந்த நிதி ஆண்டில் விவசாயத்துறையின் வளர்ச்சிக்கு ஒதுக்கியிருக்கும் நிதியைவிட 1.5 மடங்கு அதிகம்.

விவசாயி ஒருவர், காய்ந்துபோய் வாடும் பயிருக்கு உரம் போட கடன் வாங்கிவிட்டு வங்கியாளர்களின் டார்ச்சர் தாங்காமல் தற்கொலை செய்துகொள்கிறார். ஆனால் வங்கிகள் பல ஆயிரம் கோடி கடன் வாங்கிவிட்டு ஏமாற்றும் இதுபோன்ற பெரும்பணக்காரர்களுக்கு கடனை கோடி கோடியாகக் கொட்டி கொடுத்துள்ளன. அவர்களால் வாராக் கடன் சுமை அதிகரித்தது மட்டுமல்லாமல், மாபெரும் பொருளாதார சீர்கேட்டுக்கும் வழிவகுத்துள்ளன. இவற்றில் தனியார் வங்கிகளைக் காட்டிலும் பொதுத்துறை வங்கிகள் தான் 73 சதவிகித வாராக் கடன்களினால் சிக்கி தவிக்கின்றன.

நிறுவனங்களைப் பொறுத்தவரை கடன் இல்லாமல் செயல்படும் நிறுவனங்கள்தான் நன்றாக செயல்படும் நிறுவனங்களாகப் பார்க்கப்படுகின்றன. ஒரு நிறுவனத்தின் விரவாக்கத்துக்கும் வளர்ச்சிக்கும் அவசியம் நிதி உதவி அவசியம்தான். ஆனால் இந்த நிறுவனங்கள் பெரும்பாலும் கடன் வாங்கியத் தொகையைத் தங்கள் இஷ்டத்துக்கு ஆடம்பரத்துக்கும், பகட்டு விளம்பரத்துக்கும், பிற நிறுவனங்களுடனானப் போட்டிக்கும் என திட்டமிடாமல் செலவிட்டதன் விளைவுதான் இது.

இந்திய வங்கிகளின் மொத்த வாராக் கடன் ரூ. 1.44 லட்சம் கோடி என்று தெரிவிக்கப்பட்டுள்ளது. இதில் 30 சதவிகித தொகையைத் திருப்பி செலுத்த வேண்டிய நிறுவனங்களின் பட்டியல் மட்டுமே வெளியிடப்பட்டுள்ளது.

இதில் அதிக மோசடிக்காரர்கள் உள்ள மாநிலங்களில் மகாராஷ்டிரா மாநிலம் முதலிடம் பிடித்துள்ளது. மொத்தம் 1,138, பேர் ரூ. 21,647 கோடி கடனை வாங்கி திருப்பி செலுத்தாமல் மோசடி செய்துள்ளனர்..

டாப் 10 திட்டமிட்ட மோசடிக்கார நிறுவனங்கள்:

வின்சம் டைமண்ட்ஸ் ஜுவல்லர்ஸ் அண்ட் ஃபார்எவர் பிரீசியஸ் ஜுவல்லரி                                 (ஜெயின் மேத்தா, ரவிச்சந்திரன், ரமேஷ் பாரிக்,மற்றும் பலர்) - ரூ. 3263 கோடி
ஜூம் டெவலப்பர்ஸ்  (விஜய் சவுத்ரி, பிஎல் கெஜ்ரிவால்) -  ரூ. 1647 கோடி
கிங்ஃபிஷர் ஏர்லைன்ஸ் (விஜய் மல்லையா) - ரூ. 1201 கோடி
பீட்டா நாப்தோல் (தீபக் பவேஜா, சதிஷ் தேஷ்பாண்டே, மற்றும் பலர்) - ரூ. 951 கோடி
ராசா டெக்ஸ்டைல்ஸ் (ஶ்ரீவத்சவ்) - ரூ. 694 கோடி
ராங்க் இண்டஸ்ட்ரீஸ் (டிவி ரமேஷ், ஶ்ரீனிவாசராவ், மற்றும் பலர்) - ரூ. 551 கோடி
எக்ஸ்எல் எனர்ஜி (பெருந்தோட்டத்தில் ரவிந்திரநாதன், விகாஸ், மற்றும் பலர்) - ரூ. 413 கோடி
டெக்கான் கிரானிக்கல் (வெங்கட்ராம் ரெட்டி, விநாயக் ராவ் ரெட்டி) - ரூ. 409 கோடி
எலக்ட்ரோதெர்ம் லிட். (முகேஷ் பந்தாரி, பலர்) - ரூ. 385 கோடி
சைலோக் சிஸ்டம் லிமிட்டெட்                                                                                                                           (சுதர்ஷன் வெங்கட்ராமன், ராமானுஜம் சேஷாத்ரி, பலர்)-
ரூ. 361 கோடி

மேலும் பட்டியலை விரிவாகப் படிக்க http://bit.ly/1nTA60D

வங்கிகள் இன்று மக்களுக்குக் கட்டாய ஒன்றாக மாறிவிட்டது. உழைத்து சம்பாதித்தது 100 ரூபாயாக இருந்தாலும் அதனை வங்கியில் வைத்து சேமிக்கவே மக்கள் நினைக்கிறார்கள். ஆனால் வங்கிகள் இதுபோன்று கடனை வாங்கி ஏப்பம் விடும் பெரு நிறுவனங்களுக்கு மக்கள் பணத்தை வாரிக் கொடுத்துவிட்டு தற்போது நெருக்கடி என்று புலம்பிக்கொண்டிருக்கிறது.

- ஜெ.சரவணன்

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ