Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

முதலீடு: மியூச்சுவல் ஃபண்ட் மட்டுமே போதுமா?

- சேனா சரவணன்
 
சமீபத்தில் நீங்கள் மியூச்சுவல் ஃபண்ட் முதலீடு குறித்த சில  விளம்பரங்களை தொலைக்காட்சிகளில், பார்த்திருப்பீர்கள். அந்த விளம்பரங்களில் 'சர்வரோக நிவாரணி' என்பது போல் மியூச்சுவல் ஃபண்ட் அனைத்து சேமிப்பு மற்றும் முதலீட்டு தேவைகளுக்கும் ஏற்றது என்பது போல் சொல்லப்படும். மேலும் நான்கு நாட்களுக்கு, நான்கு மாதங்களுக்கு ஏன் நான்கு நாட்களுக்கு கூட மியூச்சுவல் ஃபண்டில் முதலீடு செய்ய முடியும் என்பது போல் விளம்பரம் வருகிறது. உண்மையில் இந்த விளம்பரங்களில் சொல்லப்படுவது போல், மியூச்சுவல் ஃபண்ட்,  ஒருவரின்அனைத்து முதலீட்டு தேவைகளையும் நிறைவேற்றுகிறதா? 
 
 
பொதுவாக, மியூச்சுவல் ஃபண்ட் முதலீடு என்றாலே அது பங்குச் சந்தை சார்ந்தது, ரொம்ப ரிஸ்க் ஆனது என்கிற கருத்து நம்மவர்கள் இடையே இருக்கிறது. ஆனால், இது முழுக்க முழுக்க உண்மை இல்லை. மியூச்சுவல் ஃபண்டில் பல்வேறு வகையான முதலீட்டு திட்டங்கள் இருக்கின்றன. ஒவ்வொரு வகை முதலீடும் வேறு வேறு ரிஸ்க் அளவு கொண்டவை. ரிஸ்க் இல்லாத முதலீடுகளும் மியூச்சுவல் ஃபண்டில் இருக்கின்றன. 
 
மியூச்சுவல் ஃபண்டுகளில் அதிக ரிஸ்க் என்பது பங்குச் சந்தை சார்ந்த திட்டங்களில்தான். இவை பணவீக்க விகிதத்தை விட அதிக வருமானத்தை தந்துக் கொண்டிருக்கின்றன. அதேநேரத்தில், ஒருவரின் மொத்த முதலீடையும் பங்குச் சார்ந்த மியூச்சுவல் ஃபண்டில் போடுவது தவறு. ஒருவரின் வயதுக்கு ஏற்ப, இந்த ஃபண்டில் முதலீட்டை மேற்கொள்ளலாம். அதாவது, உங்களின் வயதை 100-லிருந்து கழித்து வரும், எண்ணை சதவிகிதமாக கருதி, அந்த அளவு தொகையைதான் முதலீடு செய்ய வேண்டும். உதாரணமாக, ஒருவரின் வயது 40 என்று வைத்துக் கொள்வோம். அவர் ஈக்விட்டி ஃபண்டுகளில் 100-40 =60% முதலீடு செய்ய வேண்டும். 40 வயதான இவர் ரூ. 1 லட்சத்தை முதலீடு செய்ய திட்டமிட்டிருந்தால், ரூ.60,000 மட்டுமே ஈக்விட்டி ஃபண்டுகளில் முதலீடு செய்ய வேண்டும்.   மீதியை கடன் சார்ந்த மியூச்சுவல் ஃபண்ட்கள், தங்கம், ஃபிக்ஸட் டெபாசிட் போன்றவற்றில் பிரித்து முதலீடு செய்யலாம். 
 
மியூச்சுவல் ஃபண்டில் கடன் சார்ந்த திட்டங்கள், பேலன்ஸ்ட் திட்டங்களில் (பங்குச் சந்தை மற்றும் கடன் திட்டங்களில் கலந்து முதலீடு செய்யப்படுவை) அதிக அளவுக்கு ரிஸ்க் கிடையாது. இந்தத் திட்டங்கள் பணவீக்க விகிதத்தை விட சிறிது அதிக வருமானம் தந்துக் கொண்டிருக்கின்றன.  
 
லிக்விட் மியூச்சுவல் ஃபண்ட், கில்ட் ஃபண்ட், இன்கம் ஃபண்ட் போன்றவற்றில் ரிஸ்க் என்பது மிக குறைவு. இவை ஃபிக்ஸட் டெபாசிட்-ஐ விட ஓரிரு சதவிகிதம் அதிக வருமானம் தந்துக் கொண்டிருக்கின்றன. எனவே, மியூச்சுவல் ஃபண்ட்டில் அதிக ரிஸ்க் இருக்கிறது என்று ஒதுங்கி இருக்க தேவை இல்லை. 
 
மேலே கூறப்பட்ட ஃபண்டுகளில் தேவைக்கு ஏற்ப 4 நாள்கள் முதல் எவ்வளவு நாள்களுக்கு வேண்டுமானலும் முதலீட்டை தேவைக்கு ஏற்ப வைத்துக் கொள்ள முடியும். அதேநேரத்தில், குறிப்பிட்ட மியூச்சுவல் ஃபண்ட்களில் குறிப்பிட்ட காலத்துக்கு முதலீடு செய்தால் மட்டுமே எதிர்பார்க்கும் லாபம் கிடைக்கும். குறிப்பாக, பங்குச் சந்தை சார்ந்த ஈக்விட்டி ஃபண்டுகளில் 3 முதல் 5 ஆண்டுக்கு மேல் முதலீடு செய்தால் மட்டுமே கணிசமான லாபத்தை பெற முடியும். 
 
லிக்விட் ஃபண்டுகளில் எப்போது வேண்டுமானாலும் பணத்தை போடலாம், எடுக்கலாம். இதில் ஆண்டுக்கு சுமார் 7% வருமானம் கிடைக்கும். வங்கி சேமிப்பு கணக்கு மாற்றாக இதில் முதலீடு செய்து வரலாம். வங்கி சேமிப்பு கணக்கில் 4% வட்டி கிடைக்கும் நிலையில் 7% வருமானம் என்பது கூடுதல் லாபம்தானே? 
 
முதலீட்டு ஆலோசகர் வ.நாகப்பன், '' இன்றைக்கு பங்குச் சந்தையில் சுமார் 95 சதவிகித இந்தியர்கள் முதலீடு செய்யவில்லை.  அதற்கு காரணம், நேரம் இன்மை, முதலீட்டை முழுமையான புரிந்துக் கொண்ட திறன் இன்மை போன்றவை காரணங்களாக உள்ளன. இப்போது ஃபிக்ஸட் டெபாசிட் (எஃப்டி) மூலமான வருமானமும் சொல்லிக் கொள்ளும்படி இல்லை. ஐந்தாண்டு கால எஃப்டி வட்டி 7.5% அளவுக்கு குறைந்துவிட்டது. அந்த வகையில், நடுத்தர மக்கள் தங்கள் முதலீட்டின் ஒரு பகுதியை பங்குச் சந்தை சார்ந்த  மியூச்சுவல் ஃபண்ட் திட்டங்களில்  போட வேண்டும்.
 
 இந்த ஈக்விட்டி மியூச்சுவல் ஃபண்ட்களில் ரிஸ்க் இல்லை என்று சொல்ல முடியாது. பங்குச் சந்தையை விட குறைவான ரிஸ்க் இருக்கிறது. சிறப்பாக நிர்வகிக்கப்பட்டு வரும் நல்ல மியூச்சுவல் ஃபண்ட்களை தேவைக்கு ஏற்ப தேர்ந்தெடுத்து நீண்ட காலத்துக்கு முதலீடு செய்து வருவது அவசியம்.  ரிஸ்க் எடுக்கும் திறன், மனநிலை, மியூச்சுவல் ஃபண்ட் பற்றி அறிவு ஆகியவற்றின் அடிப்படையில் உங்களுக்கு ஏற்ற ஃபண்ட்களை தேர்வு செய்வது அவசியம். நடுத்தர குடும்பத்தில் மாதம் தலா ஆயிரம் ரூபாயை அதாவது ரூ.3,000-ஐ டைவர்சிபைட் ஃபண்ட், பேலன்ஸ்ட் ஃபண்ட், இண்டெக்ஸ் ஃபண்ட்களில் முதலீடு செய்து வர வேண்டும்.  
 
டைவர்சிபைட் ஃபண்ட்களில் முதலீடு பல்வேறு பங்குகளில் பிரித்து செய்யப்படுவதால், ரிஸ்க் குறைகிறது. பேலன்ஸ்ட் ஃபண்டில் முதலீட்டின் ஒரு பகுதி சுமார் 30% தொகை ஃபிக்ஸட் டெபாசிட், பாண்டுகளில் முதலீடு செய்யப்படுவதால் ரிஸ்க் குறைகிறது. இண்டெக்ஸ் ஃபண்ட்களில் முக்கிய பெரிய நிறுவனப் பங்குகளில் முதலீடு செய்யப்படுவதால் ரிஸ்க் குறைவாக இருக்கும்.  மேலும், இந்த ஃபண்ட்கள் மூலம் கிடைக்கும் வருமானத்துக்கு ஓராண்டுக்கு பிறகு வரி எதுவும் கிடையாது என்பது கூடுதல் சிறப்பு" 
 
 
பிர்லா மியூச்சுவல் ஃபண்ட் தலைமை செயல் அதிகாரி ஏ.பாலசுப்பிரமணியன் கூறும் போது, '' மியூச்சுவல் ஃபண்ட்களில் செய்யப்பட்ட முதலீடு நீண்ட காலத்தில் அதிக லாபம் தந்திருப்பது நிரூபிக்கப்பட்டுள்ளது. பிள்ளைகளின் கல்வி, திருமண செலவுகள், வீடு வாங்க, கார் வாங்க என பல இலக்குகளை நிறைவேற்ற மியூச்சுவல் ஃபண்ட் முதலீட்டை தேர்வு செய்யலாம். மியூச்சுவல் ஃபண்டில் பல்வேறு தேவைகளுக்கு பல்வேறு திட்டங்கள் இருக்கின்றன." 
 
மியூச்சுவல் ஃபண்ட் திட்டங்களில் நீங்கள் எடுக்கும் ரிஸ்க் அளவுக்கு ஏற்ப, அதிக வருமானம் கிடைக்கும். அதற்கு சில ஆண்டுகள் காத்திருப்பது அவசியம். மியூச்சுவல் ஃபண்ட் விளம்பரத்தில் சொல்வது போல், எதில்தான் ரிஸ்க் இல்லை. வாழ்க்கையில் பல விஷயங்களில் ரிஸ்க் எடுக்கும் நீங்கள், முதலீட்டில் கொஞ்சம் ரிஸ்க் எடுத்து அதிக வருமானம் பெறுங்களேன். 
 
 
 
 
 
 
  

 

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP
Advertisement
Advertisement
Advertisement

MUST READ

Advertisement
Advertisement
[X] Close