Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

இனி எல்லாம் வளமே!


நிதி ஆலோசனை என்பது எல்லா குடும்பத்தினருக்கும் அவசியம். அவரவர்களின் வரவுக்கு ஏற்றபடி செலவு செய்து, சேமிப்பு மற்றும் முதலீடுகளை உயர்த்திக் கொள்வதன் மூலம்தான் எதிர்காலத் தேவைகளை எளிதாகப் பூர்த்தி செய்துகொள்ள முடியும். இதற்கு நிதித் திட்டமிடல்  கட்டாயம் தேவை. அந்த வகையில் இந்த வாரம் சென்னை தண்டையார்பேட்டையைச் சேர்ந்த பாலசுப்ரமணியன் நம்மிடம் நிதி ஆலோசனை கேட்டு வந்திருந்தார்.

வயதில் அரை நூற்றாண்டை கடந்திருக்கும் இவர், சென்னையில் அரசு நிறுவனத்தில் பணியாற்றி வருகிறார்.  பிடித்தம் எல்லாம் போக மாதம் 80,000 ரூபாய் சம்பளமாக வருகிறது. இவரது மனைவி சாந்தி, இல்லத்தரசி. இவர்களுக்கு மூன்று பெண்கள், மூத்தவள் பாரதிக்கு திருமணமாகி கனடாவில் இருக்கிறார். அடுத்து, ஸ்வேதா மற்றும் ஸ்வாதி என இரட்டையர்கள். இதில் ஸ்வாதி சென்னையில் உள்ள தனியார் நிறுவனத்தில் பணியாற்றி வருகிறார். பிடித்தம் போக இவரின் மாதச் சம்பளம் 60,000 ரூபாய். ஸ்வேதா பி.இ. முடித்துவிட்டு எம்.பி.ஏ. இறுதி ஆண்டு படிக்கிறார்.  தவிர, வீட்டு வாடகை மூலம் 23,000 ரூபாய் கிடைக்கிறது.

 

இவரது எதிர்காலத் தேவைகள்!

இரண்டு மகள்களுக்கும் இன்னும் இரண்டாண்டுகளில் திருமணம் செய்ய 29 லட்சம் ரூபாய் தேவை.

ஓய்வுக்காலச் செலவுக்கு மாதம் 50,000 ரூபாய் தேவை.

தெளிவான விவரங்களைக் கொடுத்த பாலசுப்ரமணியன் குடும்பத்துக்கு நிதித் திட்டமிடலை விளக்கிச் சொன்னார் நிதி ஆலோசகர் வி.சங்கர்.

இன்ஷூரன்ஸ்!

ஏற்கெனவே இவரிடம் 1.7 லட்சம் கவரேஜ் கொண்ட மூன்று மணிபேக் பாலிசி இருக்கிறது. இதில் ஒரு பாலிசி மட்டும் 2012-ல் முதிர்வடைந்துவிடும் என்பதால் அதை மட்டும் வைத்துக் கொண்டு மீதி இரண்டு பாலிசிகளை சரண்டர் செய்துவிடலாம். இதனால் கட்ட வேண்டிய பிரீமியம் தொகை மிச்சமாகும். இதுதவிர 40 லட்சம் ரூபாய்க்கு டேர்ம் இன்ஷூரன்ஸ் எடுத்துக்கொள்வது அவசியம். இதற்கு வருட பிரீமியம் சுமார் 16,000 ரூபாய் கட்ட வேண்டி வரும். இதுவரை மணிபேக் பாலிசிக்காக கட்டி வந்த பிரீமியத்தை இதற்கு பயன்படுத்திக் கொள்ளலாம்.

அரசுப் பணியாளர் என்பதால் இன்றைய நிலவரத்தில் இவரது குடும்ப உறுப்பினர்கள் அனைவருக்கும் அரசாங்கத்திடமிருந்தே ஹெல்த் கவர் கிடைக்கிறது. இவர் ஓய்வுபெற்ற பிறகும் ஹெல்த் கவர் கிடைக்கும். ஆனால், முழுவதுமாக கிடைக்குமா என்பதை இவர் அலுவலகத்தில் கேட்டு தெரிந்துகொள்வது அவசியம். தற்போது கிடைப்பதைவிட குறைவாகவே கிடைக்கும் என்றால், அன்றைய நிலையில் தனியாக ஐந்து லட்சம் ரூபாய்க்கு ஃப்ளோட்டர் பாலிசி எடுத்துக் கொள்வது நல்லது.

திருமணத் தேவை பூர்த்தியாக..!

மகள்களுக்கு இன்னும் இரண்டு வருடத்தில் திருமணம் செய்ய வேண்டும் என்கிறார். இதற்கு 24 லட்சம் ரூபாய் தேவை என்று சொல்கிறார். இரண்டு ஆண்டுகள் கழித்து என்கிறபோது 29 லட்சம் ரூபாய் செலவாகும். இரண்டே ஆண்டுகளில் இவ்வளவு பெரிய பணத்தைச் சேமிக்க வேண்டும் என்றால் நிறைய முதலீடு செய்ய வேண்டும். இதற்கு முதலில் தற்போது இருக்கும் கடன்களை குறைத்தாக வேண்டும். முதலில் வீட்டுக் கடன் 27 லட்சம் ரூபாயைக் குறைத்தால் மாதம் 40,000 ரூபாய் இ.எம்.ஐ. கட்ட வேண்டிய சுமை குறையும். இதற்கு என்ன வழி என்று யோசித்தால், காரைக்குடியில் இருக்கும் வீட்டை விற்று அதன் மூலம் கிடைக்கும்       25 லட்சம் ரூபாயையும், கையில் இருக்கும் கொஞ்சம் சேமிப்பையும் சேர்த்து வீட்டுக் கடனை முழுவதுமாக அடைக்கலாம்.

அதன்பிறகு இ.எம்.ஐ-யாக கட்டிவந்த 40,000 ரூபாயிலிருந்து 29,000 ரூபாயை எடுத்து மகள்களின் கல்யாணத் தேவைக்காக முதலீடு செய்யலாம். தவிர, ஸ்வாதியின் சம்பளம் 60,000 ரூபாய், ஏற்கெனவே செய்து வரும் மியூச்சுவல் ஃபண்ட் முதலீடு, ஆர்.டி. சேமிப்பு 15,000 ரூபாய் என மொத்தம் 1.04 லட்சம் ரூபாயை தொடர்ந்து இரண்டு வருடங்கள் 10% வருமானம் எதிர்பார்க்கக்கூடிய டெப்ட் ஃபண்டுகளில் முதலீடு செய்ய வேண்டும். முதலீடு முடிவின்போது 28 லட்சம் ரூபாய் கிடைக்கும். துண்டு விழும் தொகைக்கு மூன்றாவது பெண் படிப்பு முடித்து ஓராண்டு வேலைக்குச் செல்வார் என்பதால் அந்த வருமானத்தை திருமணச் செலவுக்கு பயன்படுத்திக் கொள்ளலாம்.

ஓய்வுக்காலத் தேவை!

இவரது ஓய்வுக்காலத்திற்கு இன்னும்         84 மாதங்கள் பாக்கி இருக்கிறது. அதற்குள் ஓய்வுக்காலத் திற்குத் தேவையான தொகையைச் சேர்த்தாக வேண்டும்.

எப்படி சேர்க்கலாம்?

வீட்டுக் கடனுக்காக கட்டிவந்த இ.எம்.ஐ. 40,000 ரூபாயிலிருந்து திருமணத் தேவைக்கான முதலீடு 29,000 ரூபாய் போக மீதி இருக்கும் 11,000 ரூபாயை 10% வருமானம் எதிர்பார்க்கக்கூடிய கடன் ஃபண்டுகளில் இன்றிலிருந்து 24 மாதங்கள் முதலீடு செய்ய வேண்டும். திருமணத் தேவை முடிந்த பிறகு இ.எம்.ஐ. தொகையிலிருந்து திருமணத் தேவைக்காக முதலீடு செய்துவந்த 29,000 ரூபாயை ஓய்வுக்காலத்திற்கான முதலீட்டில் இணைத்து அடுத்த 64 மாதங்களுக்கு மொத்தம் 40,000 ரூபாயாக முதலீட்டை தொடர வேண்டும். முதலீடு முதிர்வின்போது இந்த முதலீட்டின் மூலம் 55 லட்சம் ரூபாய் கிடைக்கும்.

வருடா வருடம் இவரது சம்பளம் 6% உயர்ந்தால்கூட 7,500 ரூபாய் சம்பள உயர்வு கிடைக்கும். இந்த பணத்தைத் தொடர்ந்து 72 மாதங்கள் 10% வருமானம் எதிர்பார்க்கக்கூடிய கடன் ஃபண்டுகளில் முதலீடு செய்தால் எட்டு லட்சம் ரூபாய் கிடைக்கும். இது தவிர, அலுவலகத்தில் இருந்து பி.எஃப். 40 லட்சம் ரூபாயும், பணிக்கொடை 10 லட்சம் ரூபாயும் கிடைக்கும். ஆக, முதலீட்டின் மூலம் 63 லட்சம் ரூபாயும், ஓய்வுபெறும்போது அலுவலகத்திலிருந்து கிடைக்கும் தொகை 50 லட்சம் ரூபாயும் சேர்த்து மொத்தம் 1.13 கோடி ரூபாய் இவரின் கையில் இருக்கும். இந்த பணத்தைப் பாதுகாப்பான முதலீட்டில் போட்டு வைப்பதன் மூலம் இவர் எதிர்பார்க்கும் வருமானம் ஓய்வுக்காலத்தில் கிடைக்கும். இது தவிர, மாதம் இவருக்கு பென்ஷன் தொகை 3,500 ரூபாய் கிடைக்கும் என்று சொல்லியிருந்தார். இதை வைத்துக் கொண்டு ஓய்வுக் காலத்தை நிம்மதியாக கழிக்கலாம். மனமார்ந்த வாழ்த்துகள்!

-செ.கார்த்திகேயன்,
படங்கள்: ச.இரா.ஸ்ரீதர், ஜெ.வேங்கடராஜ்.

''நிம்மதியா இருக்கேன்..!''

டந்த 2011, ஆகஸ்ட் 14-ம் தேதி, நாணயம் விகடன் இதழில் சென்னை மேற்கு மாம்பலத்தைச் சேர்ந்த ஜானகிராமன் குடும்பத்திற்கு நாம் நிதி ஆலோசனை தந்தோம். நாம் தந்த நிதி ஆலோசனைகளை அவர் பின்பற்றுகிறாரா, அவருக்கு அது பயனுள்ளதாக இருக்கிறதா என்பதை அவரிடமே கேட்டோம்.

''நீங்க தந்த ஆலோசனைகளை என்னால முடிஞ்ச மட்டும் ஃபாலோ பண்றேன். நீங்க சொன்னபடி இன்ஷூரன்ஸ் பாலிசிகளை சரண்டர் பண்ணிட்டு டேர்ம் இன்ஷூரன்ஸ் பாலிசி எடுத்திருக்கேன். என் மொத்த குடும்பத்துக்கும் ஹெல்த் இன்ஷூரன்ஸ் ஃப்ளோட்டர் பாலிசி எடுத்திருக்கேன். இதனால எதிர்காலத்தைப் பத்தின பயமில்லாம நிம்மதியா இருக்கேன். ஆனா, முதலீடு விஷயத்துல மட்டும் கொஞ்சம் பின்தங்கிட்டேன். சில எதிர்பாராதச் செலவு வந்ததுதான் காரணம். ஆனாலும், மாசம் 5,000 ரூபாயை மியூச்சுவல் ஃபண்டில் முதலீடு செய்றேன். கூடிய விரைவில நீங்க சொன்ன அளவுக்கு முதலீட்டை அதிகப்படுத்துவேன். ரொம்ப தாங்க்ஸ்'' என்றார்.

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP
Advertisement
Advertisement

MUST READ

Advertisement
Advertisement
[X] Close