Vikatan.com

www.vikatan.com would like to send you push notifications.

Notifications can be turned off anytime from browser settings.

ஷேர்லக் - பிஏசிஎல்-க்கு சிபிஐ வைத்த ஆப்பு!

''எத்தனை நாள் மக்களையும், காவல்துறையையும் ஏமாற்ற முடியும்? ஒருநாள் இல்லாவிட்டாலும் ஒருநாள் மாட்டித்தானே ஆக வேண்டும்?'' என்றபடி, நம் கேபினுக்குள் நுழைந்தார் ஷேர்லக். ''விளக்கமாகச் சொல்லுங்களேன்'' என்று கோரிக்கை வைத்தோம்.

''ரியல் எஸ்டேட் முதலீடு என்று சொல்லி அப்பாவி மக்கள் 5 கோடி பேரிடமிருந்து 45,000 கோடி ரூபாய் வசூல் செய்து, பொன்ஸி திட்டம் நடத்தியதாக பிஏசிஎல் நிறுவனத்தின் மீது சிபிஐ வழக்குத் தாக்கல் செய்திருப்பதாகப் பத்திரிகைகளில் செய்தி வந்துள்ளது. அதோடு நிற்காமல், இந்த நிறுவனத்தின் டெல்லி அலுவலகத்தில் தொடர்ந்து ஐந்து நாட்கள் ரெய்டு நடத்தி, முக்கியமான பல ஆவணங்களைக் கைப்பற்றி இருக்கிறதாம் சிபிஐ. இதில் பினாமி பெயரில் கோடிக்கணக்கான ரூபாய் மதிப்புள்ள சொத்துக்களை இந்த நிறுவனம் வாங்கிக்குவித்திருப்பது தெரியவந்திருக்கிறதாம். மேலும், முதலீட்டாளர்களுக்கு விவசாய நிலம் தருகிறோம் என்று சொல்லிவிட்டு, அவர்களிடம் திரட்டிய பணத்தைக் கொண்டு ஆஸ்திரேலியாவில் ஹோட்டல் ஒன்றில் முதலீடு செய்திருப்பதாகவும் சிபிஐ விசாரணை யில் வெட்டவெளிச்சமாகி உள்ளதாம். விரைவில் இந்த நிறுவனங்களின் உரிமையாளர்கள் கைது செய்யப் படலாம் என்கிற நிலை உருவாகி இருக்கிறதாம்.

தமிழகத்தின் பல மாவட்டங்களில் இந்த அமைப்பு நிறையவே பணம் வசூலித்து இருக்கிறதாம். இந்தப் பணம் ஈமு கோழியில் போட்ட பணம்போல ஆகிவிடுமோ என்று பதைபதைத்துப் போயிருக்கிறார்களாம் மக்கள், பாவம்'' என்று உச்சுகொட்டியவருக்குச் சுடச்சுட டீ தந்தோம். அதை விருட்டென்று குடித்தவர், அடுத்த செய்தியைச் சொல்ல ஆரம்பித்தார்.

''ரூ.25,000 கோடி டெபாசிட் மோசடி வழக்கில் சஹாரா நிறுவனத்தின் தலைவர் சுப்ரதோ ராயை ஜாமீனில் வெளிவரமுடியாதபடி கைது உத்தரவு பிறப்பித்தது சுப்ரீம் கோர்ட். அம்மாவுக்கு உடம்பு சரியில்லை என்று ஏதேதோ சாக்குபோக்கு சொல்லித் தப்பிக்க எவ்வளவோ முயற்சி செய்தார் சுப்ரதோ ராய். 'நத்திங் டூயிங். அவரைக் கைது செய்தே ஆகவேண்டும்’ என்று கறாராக உத்தரவு பிறப்பித்துவிட்டது சுப்ரீம் கோர்ட். கடைசியில் வேறு வழியில்லாமல் லக்னோ போலீஸிடம் இன்று காலை சரண் அடைந்தார். அவரை வருகிற செவ்வாய்க்கிழமைவரை காவல் துறைக் கட்டுப்பாட்டில் வைத்திருக்க நீதிமன்றம் உத்தரவிட்டுள்ளது'' என்றவரிடம், இன்றைக்கு வந்த ஜிடிபி ரிப்போர்ட் பற்றி கேட்டோம்.

''2013-14-ன் மூன்றாம் காலாண்டில் நம் நாட்டின் ஜிடிபி வளர்ச்சி 4.7 சதவிகிதமாக இருந்தது. இது கடந்த கடந்த காலாண்டைவிட 0.1% குறைவு. கடந்த நிதி ஆண்டின் இதே காலகட்டத்தில் நம் ஜிடிபி வளர்ச்சி 4.4%தான். அதிலிருந்து ஓரளவுக்கு முன்னேறி இருக்கிறோம் என்றாலும், 5 சதவிகிதத்துக்குமேல் நம் வளர்ச்சி சென்றால்தான் நம் நாட்டின் மீது எல்லோருக்கும் நம்பிக்கை வரும்'' என்றார். 

 

மேலும் வாசிக்க விற்பனையில் இருக்கும் நாணயம் விகடனை வாங்கி படியுங்கள்!

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ