Vikatan.com

www.vikatan.com would like to send you push notifications.

Notifications can be turned off anytime from browser settings.

டே டிரேடிங்: பவர் ஆஃப் அட்டர்னி தர வேண்டுமா?

 

 

?ஆன்லைனில் பங்குகளை வாங்கி, விற்பதற்கான நடைமுறையை என் புரோக்கரிடம் கேட்டேன். அதற்கு பவர் ஆஃப் அட்டர்னி தர வேண்டும் என்கிறார். இப்படி கேட்பது சரியா?

- சுந்தரி, விருதுநகர்.

ஏ.ஆர்.வாசுதேவன், மேலாளர், சிடிஎஸ்எல், சென்னை.

''ஆன்லைனில் பங்கு முதலீடு அல்லது வர்த்தகம் செய்ய விரும்புகிறவர்கள் செபியின் பரிந்துரைக்குட்பட்ட சட்டப் பிரிவுகளின்படி, பவர் ஆஃப் அட்டர்னியில் கையெழுத்திட்டு புரோக்கரிடம் கொடுக்கலாம். இது பங்குகளை வாங்கும்போதும் விற்கும்போதும் தடையில்லாமல் பங்குகளை டெலிவரி செய்வதற்கு உதவும். இதைத் தர விருப்பம் இல்லையெனில் ஒவ்வொருமுறையும் பங்குகளை விற்கும்போது, குறிப்பிட்ட நேரத்துக்குள் டெலிவரி ரசீதைத் தர வேண்டியிருக்கும். டெலிவரி செய்யத் தவறும்போது அதற்கான நஷ்டத்தை நீங்கள்தான் ஏற்க வேண்டும். இது சட்டப்படி வரையறை செய்யப்பட்டதுதான். பவர் ஆஃப் அட்டர்னி தருவதினால் எந்தப் பிரச்னையும் வராது. மேலும், ஒவ்வொருமுறை பங்குகளை வாங்கும் போதும், விற்கும்போதும் உங்களுக்கு எஸ்எம்எஸ் அலர்ட் வந்துவிடும்.''

?எனக்கு 25 வயது ஆகிறது. பொதுத்துறை வங்கியில் பணிபுரிகிறேன். மாதம் ரூ.26 ஆயிரம் சம்பளம் வாங்குகிறேன். இதில் மாதம் ரூ.10 ஆயிரம் என்னால் சேமிக்க முடியும்.  அடுத்த இரண்டு வருடத்தில் திருமணம் செய்யத் திட்டமிட்டுள்ளேன். அதன்பிறகு  எதிர்கால (வீடு வாங்க, குழந்தைகளின் படிப்பு) தேவைகளுக்காக முதலீடு செய்ய நினைக்கிறேன். குறைந்தபட்சம்       10 ஆண்டுகள் கழித்துதான் இந்தப் பணம் தேவைப்படும். எந்த வகையான மியூச்சுவல் ஃபண்டுகளில் முதலீடு செய்யலாம்?

- ஆனந்த், வேலூர்.

ரவிக்குமார், நிதி ஆலோசகர்.

''மாதம் ரூ.10,000-த்தை அடுத்த பத்து வருடத்துக்கு முதலீடு செய்யத் திட்டமிட்டுள்ளீர்கள். இதை மூன்றாகப் பிரித்து முதலீடு செய்யலாம். அதாவது, 4,000 ரூபாயை லார்ஜ் கேப் ஃபண்டுகளான பிர்லா ஃபிரன்ட்லைன் ஈக்விட்டி ஃபண்ட், எல் அண்ட் டி ஈக்விட்டி ஃபண்ட், ஹெச்டிஎஃப்சி டாப் 200, ஐசிஐசிஐ புரூடென்ஷியல் டாப் 100 ஃபண்டில் தலா ஆயிரம் ரூபாயை எஸ்ஐபி மூலமாக முதலீடு செய்யலாம்.

3 ஆயிரம் ரூபாயை மிட் கேப் ஃபண்டுகளான ஹெச்டிஎஃப்சி மிட் கேப் ஆப்பர்ச்சூனிட்டீஸ் ஃபண்ட், ஐடிஎஃப்சி பிரீமியர் ஈக்விட்டி, ஃப்ராங்க்ளின் பிரைமா அல்லது பிரைமா பிளஸ் ஃபண்டில் எஸ்ஐபி முறையில் முதலீடு செய்யலாம்.

மீதமுள்ள 3 ஆயிரம் ரூபாயை வேல்யூ ஃபண்ட் அல்லது பேலன்ஸ்டு ஃபண்டுகளில் முதலீடு செய்யலாம். அதாவது, ஐசிஐசிஐ புரூடென்ஷியல் டிஸ்கவரி ஃபண்ட், பிர்லா சன் லைஃப் வேல்யூ ஃபண்ட் ஆகியவற்றில் எஸ்ஐபி முறையில் முதலீடு செய்யலாம்.

இந்த ஃபண்டுகள் சராசரியாக 12 சதவிகிதம் வருமானம் தந்தால் பத்தாண்டு கழித்து உங்களுக்கு ஏறக்குறைய 23 லட்சம் ரூபாய் கிடைக்க வாய்ப்புள்ளது.''

?ஏற்றுமதி செய்பவர்களுக்கான வருமான வரி சலுகைகள் என்னென்ன?

- எம்.சி.சுந்தர்,

கே.உன்னிகிருஷ்ணன், இணை துணை பொது இயக்குநர், இந்திய ஏற்றுமதி நிறுவனங்களின் கூட்டமைப்பு.

''சிறப்புப் பொருளாதார மண்டலத்தில் இருப்பவர்கள் சில வரி சலுகைகளைப் பெற முடியும். அதாவது, 80-ஐஏபி பிரிவின் கீழ் 2005, ஏப்ரல் 1-ம் தேதி அல்லது அதற்குபின் தொடங்கப்பட்ட சிறப்புப் பொருளாதார மண்டலத்தில் இயங்கும் நிறுவனங்களுக்குக் கிடைக்கும் 100 சதவிகித லாபத்துக்கும் வரி செலுத்த தேவையில்லை.

நிறுவனம் செயல்படத் தொடங்க ஆரம்பித்து, 15 வருடங்களில் ஏதாவது 10 வருடத்துக்கு இந்தச் சலுகையைப் பெற முடியும்.

அடுத்து, சிறப்புப் பொருளாதார மண்டலத்தில் செயல்படும் ஆஃப் ஷோர் பேங்க் கிளை, சர்வதேச நிதி நிறுவனங்களின் கிளைகள், 80எல்ஏ பிரிவின் கீழ், கிடைக்கும் லாபத்தில் முதல் 5 வருடத்துக்கு 100 சதவிகிதமும் அடுத்த 5 வருடத்துக்கு 50 சதவிகிதமும் வருமான வரி விலக்கு பெற முடியும்.''

?எனக்கு 35 வயதாகிறது. ஒரு கோடி ரூபாய்க்கு டேர்ம் இன்ஷூரன்ஸ் பாலிசி எடுக்கும் தகுதி உள்ளது. ஆனால், நான் தற்போது ரூ.30 லட்சம் ரூபாய்க்குதான் டேர்ம் இன்ஷூரன்ஸ் எடுத்திருக்கிறேன். மீதமுள்ள தொகைக்கு டேர்ம் இன்ஷூரன்ஸ் எடுக்கத் திட்டமிட்டுள்ளேன். ஏற்கெனவே பாலிசி வைத்துள்ள நிறுவனத்திலே புதிய பாலிசி எடுக்கலாமா அல்லது வேறு நிறுவனத்தில் பாலிசி எடுக்கலாமா?

- சுடலை, தாம்பரம்.

பலராமன், இன்ஷூரன்ஸ் ஆலோசகர்.

''டேர்ம் இன்ஷூரன்ஸைப் பொறுத்தவரை, பாலிசிதாரர் மரணம் அடைந்தபின் நாமினியாக நியமிக்கப்பட்டவர்தான் க்ளைம் செய்ய முடியும். எனவே, க்ளைம் விகிதம் சிறப்பாக உள்ள நிறுவனங்களில் பாலிசி எடுப்பது நல்லது.

நீங்கள் ஏற்கெனவே பாலிசி வைத்துள்ள நிறுவனத்தின் க்ளைம் விகிதம் நன்றாக இருந்தால், அதே நிறுவனத்திலேயே மீதி தொகைக்கு பாலிசி எடுத்துக்கொள்ளலாம். இல்லையெனில், வேறு நிறுவனத்தில் பாலிசி எடுப்பது நல்லது.''

?என் சித்தப்பா 2010-ம் ஆண்டு வீட்டுக் கடன் வாங்கியிருந்தார். கடந்த மாதம் இறந்துவிட்டார். அவர் வாங்கிய கடனுக்கு இன்ஷூரன்ஸ் எடுத்திருந்தார். ஆனால், வங்கியில் சித்தப்பா இறந்த விவரத்தைக் கூறினோம். வங்கியில் அவர் எந்தவிதமான இன்ஷூரன்ஸும் எடுக்கவில்லை. நீங்கள் கடனை திரும்பச் செலுத்தியாக வேண்டும் என்கிறார்கள். அவர் இன்ஷூரன்ஸ் எடுத்துள்ளாரா, இல்லையா என்பதை எப்படி தெரிந்துகொள்வது?

- பன்னீர்செல்வம், புதுச்சேரி.

இந்திரா பத்மினி, பொதுமேலாளர், இந்தியன் ஓவர்சீஸ் வங்கி, மத்திய அலுவலகம், சென்னை.

''வீட்டுக் கடன் வாங்கும்போது கடன் தொகைக்கு ஈடாக லைஃப் இன்ஷூரன்ஸ் எடுத்துக்கொள்ளும் வசதியுள்ளது. உங்கள் சித்தப்பா கடன் வாங்கியுள்ள வங்கிக் கிளையில் கடன் எண்ணை தந்தாலே போதும்; அதை எளிதில் தெரிந்துகொள்ள முடியும்.

இல்லையெனில் கடன் கட்டியதற்கான விவர அறிக்கையில் இன்ஷூரன்ஸ் பிரீமியம் பிடிக்கப்பட்டுள்ளதா என்பதைப் பார்க்கலாம். இன்ஷூரன்ஸ் பிரீமியத்துக்கான தொகை கடன் தொகையுடனே சேர்க்கப்பட்டிருக்கும். இதில் இன்ஷூரன்ஸ் எடுத்ததற்கான விவரம் இல்லையெனில் அவர் இன்ஷூரன்ஸ் எடுக்கவில்லை என்றுதான் அர்த்தம்.''

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ