Vikatan.com

www.vikatan.com would like to send you push notifications.

Notifications can be turned off anytime from browser settings.

கமாடிட்டி வியாபாரம் 7 - கார்டமம் வியாபாரம்

 கமாடிட்டி வியாபாரம் 7 -  கார்டமம் வியாபாரம்

தி.ரா.அருள்ராஜன் 

தலைவர், எக்ட்ரா பங்குச் சந்தை பயிற்சி நிறுவனம்.

இனி நாம் பார்க்க இருப்பது, மாறுபட்ட இன்னும் ஒரு எடுத்துக்காட்டு:
இந்த எடுத்துக்காட்டில் நாம் எடுத்துக்கொள்வது, கார்டமம். இந்த பொருள், ஸ்பாட் விலையை ஒப்பிட்டு பார்க்கும்போது,  நடப்பு மாத்ததின் ஃபியூச்சர்ஸ்  விலையானது கூடுதலாக இருந்தாலும், அடுத்தடுத்த ஃபியூச்சர்ஸ் மாதங்கள் விலை குறைந்துக்கொண்டே  போகிறது.
 
கீழே விலை விவரங்களை பார்ப்போம்.
கார்டமம் தேதி: 20.08.2014.
கார்டமம் ஸ்பாட் ஒரு கிலோ விலை = ரூ.960.70
கார்டமம் செப்டம்பர் 2014 ஒரு கிலோ = ரூ.969.20
கார்டமம் அக்டோபர் 2014 ஒரு கிலோ = ரூ.955.70
கார்டமம் நவம்பர் 2014 ஒரு கிலோ = ரூ.950.50
கார்டமம் டிசம்பர் 2014 ஒரு கிலோ = ரூ.950.00
 
இந்த எடுத்துக்காட்டில், கார்டமம் ஸ்பாட் விலையான ரூ.960.70 ஐ விட நடப்பு மாதமான செப்டம்பர் மாத கான்டிராக்ட் விலையானது, ரூ969.20 கூடுதலாக உள்ளது.  எனவே நாம் இதை கான்ட்டாங்கோ என்ற வரையறைக்குள் கொண்டு வரலாம்.                                                                                                                                 
 
ஆனால் இதில் ஒரு வித்தியாசமான நிகழ்வு என்னவென்றால், பியூச்சரில், செப்டம்பர் மாதவிலை ஸ்பாட் விலையைவிட கூடுதலாக இருந்தாலும்,  அடுத்தடுத்த மாதங்களின் விலை, காஸ்ட் ஆஃப் கேரியை கணக்கில் கொண்டு பார்த்தால், விலை கூடுதலாகவே இருக்கவேண்டும்.  ஆனால், இந்த பொருளின் அக்டோபர், நவம்பர் மற்றும் டிசம்பர் விலைகள் படிப்படியாக குறைந்துகொண்டே போகிறது.  
 
அதுவும், தற்போதைய ஸ்பாட் விலையைவிட குறைவான அளவில் வியாபாரம் ஆகிறது.  இதனால் நமக்கு தெரியவேண்டியது என்னவென்றால், அக்டோபர், நவம்பர் மற்றும் டிசம்பரில் வியாபாரம் செய்யும் வியாபாரிகள், கார்டமம், அந்த மாதங்களில், விலை குறையும் என்று நம்புகிறார்கள்.
இந்த நம்பிக்கைக்கு பின்புலமாக இருப்பது, வரும் மாதங்களில், ஏலக்காயின் அறுவடையின் மூலம் சந்தைக்கு அதிகஅளவில், சரக்கு சந்தைக்கு வருவதற்க்கு வாய்ப்புள்ளது.  எனவே சந்தைக்கு வரும் சப்ளையின் அளவு கூடினால், விலை குறையும் என்பது நமக்கு தெரிந்ததே.  வரும் மாதங்களில் விலை குறையும் என்பதால், அடுத்தடுத்த மாதங்களில் விலையானது குறைந்து கொண்டே போகிறது.  ஆனால், நடப்பு மாதம், விலையானது,  ஸ்பாட் விலையைவிட கூடுதலாக உள்ளது.  
 
எனவே இங்கு காஸ்ட் ஆஃப் கேரியின் விலை பியூச்சர்ஸ் விலையில் பிரதிபலிக்கிறது.  ஆனால், வரக்கூடிய மாதங்களில் விலை குறைந்து கொண்டே போவதற்க்கு முக்கிய காரணம், வரும் மாதங்களில், சந்தைக்கு அதிக அளவில் சரக்கு வரும் என்ற எதிர்பார்ப்பில்தான்.  
 
இது ஒரு வித்தியாசமான நகர்வில் இருப்பதால், இதையும் ஆராய்ந்து பார்க்க ஒரு முடிவெடுத்தோம்.  மற்றபடி எல்லா சந்தைகளிலும், தேவை மற்றும் அளிப்பு என்ற இரண்டு விஷயங்களே சந்தயில் விலையின் ஏற்ற, இறக்கங்களை தீர்மானிக்கிறது.
 
 
அடுத்து நாம் கற்றுக்கொள்ள இருக்கும் இன்னும் ஒரு விஷயம் பேசிஸ் என்பது.
 
பேசிஸ் என்றால் என்ன?
 
பேசிஸ்:
நாம் இதுவரை இரண்டுவிதமான சந்தைகளில் ஒரு பொருளின் விலை மாற்றத்தை படித்து வந்தோம்.  அதில் ஒன்று, ஸ்பாட் மார்கெட் மற்றது, பியூச்சர்ஸ் மார்கெட்.  மேலும் பியூச்சர்ஸ் மார்கெட் விலையானது, ஸ்பாட் விலையைவிட கூடுதலாக இருக்கும்.  அதை காஸ்ட் ஆஃப் கேரி என்றும் பார்த்தோம் அல்லவா!.
கூடவே இன்னும் ஒரு விஷயத்தையும் படித்தோம்.  அதாவது, பியூச்சர்ஸ் விலையானது, ஸ்பாட் விலையுடன் காஸ்ட் ஆஃப் கேரியுடன் சேர்ந்து வியாபாரம்.  இது ஒரு வரையறைதான்.  ஆனால், சந்தையில் ஒரு பொருளின் விலை நியாயமான விலையைவிட கூடுதலாகவோ அல்லது குறைவாகவும் வியாபாரம் ஆகலாம் என்றும் படித்தோம்.
இப்போது நம் விஷயத்திற்க்கு வருவோம்.  
 
அதாவது, பேசிஸ் என்பது, ஸ்பாட் விலைக்கும், பியூச்சர்ஸ் விலைக்கும் இடையே உள்ள இடைவெளியை குறிக்கிறது.  பியூச்சர்ஸ் விலையானது, நாம் மேலே பார்த்த பல்வேறு காரணங்களுக்காக கூடலாம் அல்லது குறையலாம்.  அது எதுவாக இருந்தாலும், ஸ்பாட் விலைக்கும், பியூச்சர்ஸ் விலைக்கும் உள்ள இடைவெளியே குறிப்பது பேசிஸ் என்று அழைக்கப்படும்.  இந்த பேசிஸ் அளவானது, பியூச்சர்ஸ் விலை கூடி குறைவதற்க்கு ஏற்ப, மாறிக்கொண்டே இருக்கும்.
 
இந்த இடைவெளி எதுவரை தொடரும்?
 
இந்த இடைவெளி மாறலாமா?
 
இந்த இடைவெளியே குறைந்து குறைந்து எதிர்மறையாகவும் மாறலாமா?  
 
இந்த கேளவிக்கு எல்லாம் விடை காண முனையலாம்.  
 
முதலில் சாதாரண சூழ்நிலையை எடுத்துக்கொண்டு பார்ப்போம்.  பொதுவாக ஸ்பாட் விலையைவிட  ஃபியூச்சர்ஸ் விலையானது, அதிகமாத்தான் இருக்கும் என்று நமக்கும் நன்கு தெரியும்.  இந்த நிலை தொடரந்தால், ஸ்பாட் விலைக்கும் ஃபியூச்சர்ஸ் விலைக்கும் உள்ள இடைவெளி தொடரும்.  ஆனால், இந்த இடைவெளி கடைசிவரை தொடர வாய்ப்பிருக்கிறதா என்றால், இல்லை என்றுதான் சொல்லவேண்டும்.  ஏனெனில், ஒவ்வொரு கான்டிராக்டும் கடைசியில் செட்டில்மென்டில் முடியவேண்டும்.  செட்டில்மென்ட் என்பது பொதுவாக ஸ்பாட் விலையில்தான் முடியும்.
 
ஏன்?
 
நீங்கள் ஒரு குறிப்பிட்ட பொருளை, எடுத்துக்காட்டுக்கு தங்கத்தை எடுத்துக்கொள்ளலாம்.  தங்கத்தை நீங்கள் பியூச்சர்ஸ் மூலம் வாங்குவதாக வைத்துக்கொண்டால், காஸ்ட் ஆஃப் கேரி அடிப்படையில், அதிக விலைக்குதான் வாங்குவீர்கள்.  அந்த கான்டிராக்ட் அடிப்படையில் முடிவுக்கு வரும்போது, தங்கமானது, ஸ்பாட் விலையின் அடிப்படையில் செட்டில் பண்ணப்படும்.  எனவே செட்டில்மென்ட் ஆகும் அந்த நாளில், தங்கத்தின் பியூச்சர்ஸ் விலையும் ஸ்பாட் விலையும் ஒரே விலையில் முடியும்.
 
எனவே ஒரு கான்டிராக்ட் ஆரம்பத்தில், ஃபியூச்சர்ஸ் மற்றும் ஸ்பாட் விலைக்கும் இடையே ஒரு இடைவெளி இருக்கும்.  இந்த இடைவெளியானது, செட்டில்மென் நாளை நோக்கி நகர நகர அது குறுகிக்கொண்டே போகும்.  பின்பு செட்டில்மென் நாள் அன்று, ஒன்றாக இணைந்துவிடும்.
 
இந்த கருத்தின் அடிப்படையில் பார்க்கும்போது, ஃபியூச்சர்ஸ் விலையானது, ஸ்பாட் விலையைவிட கூடுதலாக இருக்கும்.  இதை பாசிடிவ் பேசிஸ் என்று அழைப்பார்கள்.  ஏற்கெனவே நாம் பாரத்த சில எடுத்துக்காட்டுகளில், சிலசமயம், ஃபியூச்சர்ஸ் விலையானது, ஸ்பாட்விலையைவிட, குறைவாக இருந்ததையும் பார்த்தோம்.  இதை பேக்வாட்டேஷன் என்று படித்தோம்.  இந்த நிலையில், ஃ பியூச்சர்ஸ் விலைக்கும் ஸ்பாட் விலைக்கும் இடைவெளி இருந்தாலும் இது எதிர்மறையாக இருக்கும்.  எனவே இதை நெகடிவ் பேசிஸ் என்று அழைப்பார்கள்.
 
 
 
 
 
 
அடுத்து நாம் கமாடிட்டி டிரேடில் இருக்கக்கூடிய வியாபார முறைகள் ஒவ்வொன்றாக பார்க்கலாம்.  பொதுவாக கமாடிட்டி வியாபாரம் பியூச்சர்ஸ் என்ற அடிப்படையில் நடக்கிறது என்பதை மனதில் வைத்துக்கொள்ள வேண்டும்.
வியாபார முறைகள்:
அதன் அடிப்படையில் பார்க்கும்போது, மூன்றுவிதமான வியாபார முறைகளை பார்க்கிறோம்.
 1. ஹெட்ஜிங்
 2. ஸ்பெகுலேஷன்
 3. ஆர்பிட்ராஜ்
இதில் முதலாதாக உள்ள ஹெட்ஜிங முறை பற்றி பார்ப்போம்.
ஹெட்ஜிங் என்பது, நாம் ஏற்கெனவே கையில் வைத்திருக்கும் பொருளின் மதிப்பு குறைந்துவிடுமோ என்ற அச்சப்படும்போது, அந்த பொருளின் மதிப்பு குறைவதை தடுப்பதற்காக, பியூச்சர்ஸ் வியாபாரத்தில் எதிர்மறையான பொஷிஷனை எடுப்பது ஆகும்.
எடுத்துக்காட்டாக சொல்வதானால், உங்களிடம் ஒரு கிலோ தங்கம் இருப்பதாக வைத்துக்கொள்வோம்.  அதன் மதிப்பு சுமார் ரூ.30 லட்சம் என்றும் வைத்துக்கொள்வோம்.  அதாவது, ஒரு கிராம் விலை ரூ.3000/-உங்களுக்கு தற்போது சூழலில், தங்கத்தின் விலை இன்னும் ஒரு மாதத்தில் சுமார் 10% குறையும் என்று நினைப்பதாக எடுத்துக்கொள்வோம்.  உங்கள் அச்சம் நிஜமானால், உங்களுக்கு சுமார் ரூ.3 லட்சம் ரூபாய் நட்டமாக முடியும்,   இந்த நட்டத்தை நீங்கள் தடுக்கவேண்டும் என்று நினைக்கிறீர்கள்.
 
அதற்கு என்ன செய்யலாம்?
 
நீங்கள் நேராக கமாடிட்டி எக்சேஞ்சுக்கு சென்று, தங்கத்தின் ஒருமாத கான்டிராக்ட்டை தேர்வு செய்து, அதில் ஷாட் அடிக்கலாம். அதாவது, ஒரு கிலோ என்ற காட்டிராக்ட்டை தேர்வு செய்து ஷாட் அடிக்கலாம்.
ஒரு மாதம் கழித்து தங்கத்தின் விலை நீங்கள் எதிர்பார்த்ததை போலவே ஒரு கிராம் விலை ரூ.3000/-ல் இருந்து குறைந்து ரூ.2700/-ஆக குறைகிறது என்று வைத்துக்கொள்வோம்.  தற்போது, உங்கள் கையில் உள்ள தங்கத்தின் மதிப்பு, ரூ.30 லட்சத்தில் இருந்து ரூ.27 லட்சமாக குறைந்துவிட்டது.  உங்களுக்கு மதிப்பு ரீதியாக ரூ.3 லட்சம் நட்டம்.
 
கவலைப்பட வேண்டாம்.
 
அதே நேரம், நீங்கள் பியூச்சர்ஸ் மார்கெட்டில், ஒரு கிலோ தங்கத்திற்கான ஒரு மாத கான்டிராக்ட்டை விற்ற விலை ஒரு கிராம் ரூ.3000/- என்று வைத்துக்கொள்ளலாம்.  இனி, அந்த சந்தையிலும் தங்கத்தின் விலை குறைந்து இருக்கும்.  அங்கும் ஒரு கிராம் ரூ.2700/- என்ற விலையில் இருக்கலாம்.  அப்படி இருக்கும்பட்சத்தில், நீங்கள் ஒரு கிராம் தங்கத்தை ரூ.3000/-த்திற்க்கு விற்றுவிட்டு, ஒரு மாதம் கழித்து ரூ.2700/- என்ற விலைக்கு வாங்குவதால், உங்களுக்கு ஒரு கிராமுக்கு ரூ.300/- லாபம் கிடைக்கிறது.  ஒரு கிலோ தங்கத்திற்க்கு ரூ.3 லட்சம் லாபம் கிடைக்கிறது.  
 
எனவே கையில் இருக்கும் தங்கத்தின் மீது உங்களுக்கு வரக்கூடிய நட்டம், பியூச்சர்ஸ் சந்தையில் நீங்கள் ஹெட்ஜ் செய்ததன் மூலம் வந்த லாபத்தின் மூலம் ஈடு செய்யப்படுகிறது.
இதைத்தான் ஹெட்ஜிங் என்று அழைப்பார்கள்.  வரக்கூடிய வாரங்களில் இந்த ஹெட்ஜிங்கின் பல்வேறு பரிமாணங்களை பார்க்கலாம்.
 
 

 

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ