Vikatan.com

www.vikatan.com would like to send you push notifications.

Notifications can be turned off anytime from browser settings.

ஃபாரெக்ஸ் நஷ்டத்தைத் தவிர்க்க: ஆப்ஷன் கான்ட்ராக்ட்!

 ஃபாரெக்ஸ் நஷ்டத்தைத் தவிர்க்க: ஆப்ஷன் கான்ட்ராக்ட்!

டி.பி.கபாலி, பொருளாதார நிபுணர்
 

இந்திய ஃபைனான்ஷியல் மார்க்கெட் கடந்த மூன்று ஆண்டுகளில் கடுமையான ஏற்ற, இறக்கங்களைக் கண்டுவருகிறது. அமெரிக்க டாலருக்கு எதிராக இந்திய ரூபாயின் விலையில் ஏற்பட்ட / ஏற்பட்டு வருகிற ஏற்ற, இறக்கங்கள் இதற்கு நல்லதொரு உதாரணம்.

கடந்த 2011, ஜூன் மாதத்திலிருந்து 2014 ஆகஸ்ட் மாதம் வரையிலான இந்த மூன்று ஆண்டுகளில், இந்திய ரூபாய் 45-லிருந்து 69 வரையிலான ஒரு பரந்த இடைவெளியில் (Wide range) நகர்ந்துள்ளது.  கடந்த மூன்று ஆண்டுகளில் ரூபாயானது டாலருக்கு எதிராக சுமார் 33% மதிப்பு இழந்துள்ளது. இந்தப் பரந்த இடைவெளியில் ஏற்பட்டுள்ள ரூபாயின் ஏற்ற இறக்கத்தில் நாம் இரண்டு முக்கிய அம்சங்களைக் கவனிக்க வேண்டும்.

1. இந்த ஏற்ற இறக்கம் சீராக, ஒரே ஏறுமுகமாகவோ அல்லது இறங்கு முகமாகவோ நடக்கவில்லை.

மாறாக, ஏற்ற இறக்கங்கள் இரண்டு திசைகளிலும் கடுமையாக நடந்துள்ளன. இரண்டு திசைகளிலும் மூவ்மென்ட் இருந்தாலும், இந்திய பொருளாதாரம் மிகவும் பலவீனமாக இருப்பதால், ரூபாயின் மத்திய கால (Medium term) எதிர்பார்ப்பு இறங்குமுகமாகவே இருக்குமென தெரிகிறது.

2. இந்தக் கடும் ஏற்ற இறக்கங்கள் ஏற்றுமதியாளர்களும், இறக்குமதியாளர் களும் சாதாரணமாக உபயோகிக்கும் 60/90 நாள் தவணைக் காலத்திலேயே (Credit Period) நடந்துள்ளது.
ஏற்றுமதியாளர்களும், இறக்குமதி யாளர்களும் இங்குக் கவனிக்க வேண்டியது, இந்த அளவு ஏற்ற இறக்கம் இனியும் தொடர்ந்து நடக்கும் என்பது போலவே தெரிகிறது.

உதாரணமாக, இப்போது மார்க்கெட் நிலவரப்படி, ரூபாய் / டாலர் மார்க்கெட்டில் அடுத்த ஒரு மாதத்தில் 57.50 - 62.40 என்கிற இடைவெளியில் மூவ்மென்ட் இருக்கும் போலத் தெரிகிறது.

செப்டம்பர் 2013-ல் இருந்து ரூபாய் / டாலர் மார்க்கெட் ஓரளவு அமைதியாக இருப்பது என்னவோ உண்மை. ஆனால், இந்த அமைதி தொடர்ந்து அப்படியே நிலவும் என்று யாராலும் சொல்ல முடியாது. மார்க்கெட்டில் ஏற்ற இறக்கம் மீண்டும் மெள்ள மெள்ள அதிகரிக்க ஆரம்பித்துள்ளது.

உதாரணமாக, மே மாதம் 15-ம் தேதியில் இருந்து பார்த்தால், ரூபாய் சுமார் 5 சதவிகித மதிப்பை இழந்துள்ளது. 57.50-62.40 இடைவெளியில் அடுத்த மாதத்தில் மூவ்மென்ட் இருக்கும் என்பதே ஓர் எச்சரிக்கைதான். அந்த அளவு மூவ்மென்ட் இருக்கலாம்; அதற்குமேலும் இருக்கலாம்; குறைவா கவும் இருக்கலாம்.

ஆக மொத்தத்தில், மார்க்கெட்டில் பலதரப்பட்ட உள்நாட்டு, வெளிநாட்டு பொருளாதார, அரசியல்  காரணங் களினால் ஏற்ற இறக்கங்கள் இருக்கவே செய்யும். இந்த அளவு ஏற்ற இறக்கங்கள் தொடர்ந்து இருந்தால், அதுவும் 60/90 நாள் தவணைக் காலத்திலேயே இருந்தால், ஏற்றுமதியாளர்களுக்கும், இறக்குமதியாளர்களுக்கும் நிதி நிர்வாகத்தில் பெரும் சவால்கள் உருவாகின்றது.

இது எப்படி என்று உதாரணங்களோடு பார்ப்போம்.

 1. ஓர் ஏற்றுமதியாளர் 10 சதவிகித லாபத்தில் தொழில் நடத்துகிறார் என்று வைத்துக் கொள்வோம்.

2. இரண்டு மாதம் கழித்து அவருக்கு வரவிருக்கிற (அவர் சம்பாதித்துள்ள) டாலர்களை அவர் ஃபார்வர்டு கான்ட்ராக்ட் மூலம் ரூபாயாக மாற்றுகிறார்.

3. அவ்வாறு அவர் ஃபார்வர்டு கான்ட்ராக்ட் மூலம் டாலரை விற்றவுடன், ரூபாயின் மதிப்பு 3% சரிகிறது என்று வைத்துக் கொள்வோம். அப்போது என்ன ஆகிறது? ஏற்றுமதியாளர் தனது ஒவ்வொரு டாலருக்கும் 3% அதிக ரூபாயைப் பெறும் வாய்ப்பை இழக்கிறார். இதன்மூலம் 30% அதிக லாபம் பெறும் வாய்ப்பை இழக்கிறார்.

இனி இன்னொரு உதாரணத்தைப் பார்ப்போம். 

1. ஓர் இறக்குமதியாளர் டாலரை ஃபார்வர்டு கான்ட்ராக்ட் மூலம் வாங்குகிறார்.

2. வாங்கியபின், ரூபாய் மதிப்பு 3% அதிகமாகிறது. 

3. அதாவது, ஒவ்வொரு டாலருக்கும் 3% குறைந்த ரூபாய்களைக் கொடுத்து டாலர்களை வாங்கும் வாய்ப்பை அவர் இழக்கிறார். குறைந்த ரூபாய்களைக் கொடுத்து டாலரை வாங்கினால், அவருக்குச் செலவுகள் குறையும் இல்லையா?

நாம் பார்த்த இந்த இரண்டு சவால் உதாரணங்களிலிருந்து என்ன தெரிகிறது?

1. ரூபாய் / டாலர் மார்க்கெட்டில் ஏற்ற இறக்கங்கள் தொடர்ந்து கடுமையாக இருக்கவே சாத்தியக்கூறுகள் உள்ளன.

2. அவ்வாறு கடுமையான ஏற்ற இறக்கம் இருக்கையில், ஏற்றுமதி/ இறக்குமதியாளர்கள் வழக்கமாகப் பயன்படுத்தும் ஃபார்வர்டு கான்ட்ராக்ட் அவர்களுக்கு நிச்சயம் பலன் அளிக்கும் ஒரு ஃபைனான்ஷியல் கருவி அல்ல. ஏனென்றால், ஏற்ற இறக்கம் அதிகம் உள்ள சூழலில்,  ஃபார்வர்டு கான்ட்ராக்ட் பெரும்பாலும் நஷ்டங்களை ஏற்படுத்தும். அதாவது, ஒரு லாபகரமான வாய்ப்பைப் பயன்படுத்திக்கொள்ள முடியாமல் போகும்.

கடந்த மூன்று ஆண்டுகளில் சிறிய கம்பெனிகள் முதல் பெரிய கார்ப்பரேட் நிறுவனங்கள் வரை ஃபாரின் எக்ஸ்சேஞ்ச் நஷ்டம் என்று தங்களுடைய கணக்குகளில் தொடர்ந்து அறிவிப்பதே இதற்கு நல்லதொரு ஆதாரம். 
 
ஏற்றுமதியாளர்களும், இறக்குமதி யாளர்களும் வழக்கமாகப் பயன்படுத்தும் ஃபார்வர்டு கான்ட்ராக்ட்டின் முக்கிய அம்சம் என்ன?

ஃபார்வர்டு கான்ட்ராக்ட்டில் ஒரு ரேட்டை (விலையை) நிர்ணயித்தால், அந்த விலைக்கே (ரேட்டுக்கே) டாலரை விற்க வேண்டும் அல்லது வாங்க வேண்டும். ஃபார்வர்டு கான்ட்ராக்ட்டில் ஒப்புதல் அளித்தபின், மார்க்கெட் நிலவரம் (Market movement) சாதகமாக இருந்தால், அதை ஏற்றுமதி யாளர்களும்/ இறக்குமதியாளர்களும் பயன்படுத்திக்கொள்ள முடியாது. 
ஏற்ற இறக்கங்கள் அதிகம் உள்ள சூழலில் சர்வதேச வியாபாரத்தில் (Expert / import) ஈடுபடுகிறவர்களுக்கு வேறுமாதிரி ஃபார்வர்டு கான்ட்ராக்ட் தேவை. அப்படிப்பட்ட ஒன்றுதான் ஆப்ஷன் கான்ட்ராக்ட் (Option contract) என்பது.

ஆப்ஷன் என்கிற வார்த்தைக்கு உரிமை (Right) என்று அர்த்தம் கொள்ளலாம். ஏற்றுமதியாளரும்/ இறக்குமதியாளரும் வழக்கமான ஃபார்வர்டு கான்ட்ராக்ட்டுக்கு பதில், ஆப்ஷன் கான்ட்ராக்ட் மூலம் தங்கள் டாலர்களை விற்கவோ, வாங்கவோ முடியும்.

இப்படி ஆஃப்ஷன் கான்ட்ராக்ட்டை பயன்படுத்தினால், என்ன நன்மைகள் கிடைக்கும்? 

ஆப்ஷன் கான்ட்ராக்ட் கையெழுத்திட்டபின், மார்க்கெட் மூவ்மென்ட் (நிலவரம்) சாதகமாக இருந்தால், அவர்கள் கான்ட்ராக்ட்டில் உள்ள ரேட்டில்தான் (விலையில்தான்) தங்கள் டாலர்களை விற்க / வாங்க வேண்டிய கட்டாயம் கிடையாது. மாறாக, சாதகமான மார்க்கெட் ரேட்டிலேயே டாலரை விற்க / வாங்க கூடிய உரிமையை ஆப்ஷன் கான்ட்ராக்ட் அளிக்கிறது. 
 

ஆப்ஷன் கான்ட்ராக்ட்டின் மற்றொரு முக்கிய அம்சம், அது குறைந்த பட்ச (Minimum) பாதுகாப்பான விலையை ஏற்றுமதியாளருக்கு அளிக்கும். அதேபோல், இறக்குமதி யாளருக்கு ஓர் அதிகபட்ச பாதுகாப்பான ரேட்டை (Maximum) அளிக்கும்.

உதாரணமாக, ஓர் ஏற்றுமதியாளர் ரூ.61-க்கு ஆப்ஷன் கான்ட்ராக்ட் வாங்குகிறார் என்று வைத்துக் கொள்வோம். கான்ட்ராக்ட் போட்டபின் டாலர் ரூ.61-க்கு மேலே இருந்தால், ஏற்றுமதியாளர் அந்த அதிகமான, சாதகமான விலையில் தனது டாலர்களை விற்கலாம். அதற்கு அவருக்கு உரிமை இருக்கிறது. ஆனால், டாலர் ரூ.61-க்கு கீழே இருந்தால், ஏற்றுமதியாளர் கவலைப்பட வேண்டியதில்லை. அவர் தனது டாலர்களை ரூ.61-க்கு விற்கலாம். இப்படி செய்வதன் மூலம் சந்தர்ப்ப நஷ்டங்கள் (Oppurtunity losses)  ஏற்படும் வாய்ப்புகள் குறைகிறது. ஆக மொத்தத்தில், ஆப்ஷன் கான்ட்ராக்ட், ஒரு காப்பீட்டு கான்ட்ராக்ட் (Insurance contract)  போல் செயல்படுகிறது.

ஏற்றுமதியாளருக்கு நாம் மேலே சொன்ன உதாரணம்போல, இறக்குமதியாளருக்கும் ஆப்ஷன் கான்ட்ராக்ட் காப்பீட்டு கான்ட்ராக்ட்டாகவும் செயல்படுகிறது. இறக்குமதியாளருக்கு அதிகபட்ச (Maximum) விலை காப்பீடு செய்யப்படுகிறது. மார்க்கெட் சாதகமாக இருந்தால், அதைப் பயன்படுத்தக்கூடிய வாய்ப்பை அளிக்கிறது.

இவ்வளவு பயன் அளிக்கக்கூடிய ஆப்ஷன் கான்ட்ராக்ட் ஒரு காப்பீட்டு கான்ட்ராக்ட் போல செயல்படுவதால், அதற்கு பிரீமியமாக ஒரு விலை தரவேண்டியுள்ளது.

இந்த ஆப்ஷன் கான்ட்ராக்ட்டை எங்கே வாங்குவது என்று கேட்கிறீர்களா?சிறு கம்பெனிகள் / ஏற்றுமதி / இறக்குமதியாளர் இந்த கான்ட்ராக்ட்டை நேஷனல் ஸ்டாக் எக்ஸ்சேஞ்சில் (NSE) ஃபாரின் எக்ஸ்சேஞ்ச் பிரிவில் (Segment) வாங்க முடியும்/ விற்க முடியும்.

ஏற்ற இறக்கங்கள் அதிகம் உள்ள இன்றைய சூழலில், ஏற்றுமதியாளரும் இறக்குமதியாளரும் இந்த ஆப்ஷன் கான்ட்ராக்ட்டை பயன்படுத்த தெரிந்துகொண்டால், பெருமளவில் நஷ்டத்தைத் தவிர்க்க உதவும்!

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ