Vikatan.com

www.vikatan.com would like to send you push notifications.

Notifications can be turned off anytime from browser settings.

லைஃப் இன்ஷூரன்ஸ் மாயைகளும், உண்மைகளும்!

லைஃப் இன்ஷூரன்ஸ் மாயைகளும், உண்மைகளும்!

ஸ்ரீதரன், தலைமை இன்ஷூரன்ஸ் ஆலோசகர், ஃபண்ட்ஸ்இந்தியா டாட் காம் 
 
இன்ஷூரன்ஸ் பாலிசி குறித்த விழிப்பு உணர்வு என்பது இந்தியாவில் மிகவும் குறைவாக உள்ளது. மேலும், சில தவறான நம்பிக்கைகள் காரணமாக பாலிசி எடுப்பதை சிலர் தவிர்த்து விடுகிறார்கள். எனக்கு இந்தப் பிரச்னை உள்ளது,  இதனால் எனக்கு கவரேஜ் கிடைக்காது என நினைத்து பாலிசி எடுப்பதைத் தவிர்த்து விடுகிறார்கள். எந்தவிதமான மாயைகள் உள்ளன. அதை எப்படி தவிர்ப்பது?
 
1. தனியாக இருக்கிறேன். இப்போதைக்கு எந்தவிதமான கமிட்மென்ட்டும் இல்லை என நினைத்து பாலிசி எடுப்பதைப் பலரும் தவிர்த்து விடுகிறார்கள். இது முற்றிலும் தவறு. வேலைக்குச் சேர்ந்த உடனே லைஃப் இன்ஷூரன்ஸ் எடுப்பது அவசியம். இளம் வயதில் இன்ஷூரன்ஸ் எடுக்கும்போது பிரீமியம் குறைவாக இருக்கும். 
 
2. இன்ஷூரன்ஸ் பாலிசி எடுக்கும்போது, பெரும்பாலான பாலிசிதாரர்கள் 2 ஆண்டு சம்பளத் தொகைக்கு கவரேஜ் கிடைத்தால் போதும், அந்தத் தொகையிலேயே எல்லா தேவைகளையும் நிறைவேற்றிக்கொள்ள முடியும் என நினைக்கிறார்கள். ஆனால், உண்மையில் லைஃப் இன்ஷூரன்ஸ் பாலிசியின் கவரேஜ் தொகையானது ஆண்டு சம்பளத்தைப் போல 10 - 15 சதவிகிதம் இருக்க வேண்டும். அப்போதுதான் எதிர்பாரதவிதமாக அசம்பாவிதம் நிகழும்போது அனைத்து தேவைகளையும் நிறைவேற்றிக்கொள்ள உதவியாக இருக்கும்.
3. ஐ.டி, எம்என்சி நிறுவனங்கள் மற்றும் பெரிய நிறுவனங்கள் தங்கள் ஊழியர்களுக்கு லைஃப் இன்ஷூரன்ஸ் கவரேஜ் வழங்குகின்றன. இது மட்டும் போதும் என நினைத்து பலரும் வேறு இன்ஷூரன்ஸ் பாலிசி எடுப்பதில்லை. நிறுவனங்கள் கொடுக்கும் இன்ஷூரன்ஸ் கவரேஜ் தொகை  மிகவும் குறைவாக இருக்கும். இது ஒருவரின் தேவையைப் பூர்த்தி செய்துகொள்ள போதுமானதாக இருக்காது. மேலும், வேலையைவிட்டு வேறு வேலைக்குச் செல்லும்போது இந்த கவரேஜ் கிடைக்காது. எனவே, தனியாக ஒரு லைஃப் இன்ஷூரன்ஸ் பாலிசி எடுத்துவைப்பது நல்லது.
 
4. இன்ஷூரன்ஸ் பாலிசிக்கு செலுத்தும் பிரீமியத்தை முதலீடாக அல்லது சேமிப்பாக பார்க்கக் கூடாது. அதை ஒரு சமூக அக்கறையுடன் பார்ப்பது அவசியம். ஏனெனில், இன்ஷூரன்ஸ்  என்பது பலரும் செலுத்தும் பிரீமியத்திலிருந்து  அசம்பாவிதம் நிகழும் குடும்பத்துக்கு க்ளைமாக வழங்கப்படுகிறது. எனவே, இதை சமூக அக்கறையுடன் அணுகுவது நல்லது. செலுத்தும் பிரீமியத்துக்கு ஏற்ப வருமானம் கிடைக்க வேண்டும் என நினைக்கக் கூடாது.
 
5. வரிச் சேமிப்புக்காக இன்ஷூரன்ஸ் பாலிசிகளை தேர்ந்தெடுக்கக்கூடாது. அதாவது, இன்ஷூரன்ஸ் என்பது பாதுகாப்புக்காகத்தான். வரிச் சேமிப்பு காரணிகளில் இதுவும் ஒன்று அவ்வளவுதான். முழு வரிச் சேமிப்புக்கும் இன்ஷூரன்ஸ் பாலிசிகள் எடுப்பது முற்றிலும் தவறு. உங்களுடைய தேவையின் அடிப்படையில் பாலிசிகளை எடுப்பது நல்லது. 
 
6. பெரும்பாலான பெற்றோர்கள் குழந்தைகளின் பெயரில் பாலிசியை எடுத்துவிடுகிறார்கள். இன்ஷூரன்ஸ் பாலிசிகள் என்பது பெற்றோர்களின் பெயரில் இருப்பதே சிறப்பாக இருக்கும். இந்த பாலிசிகளுக்கு குழந்தைகளின் பெயரை வேண்டுமானால் நாமினியாகச் சேர்த்துக் கொள்ளலாம். பெற்றோர்களுக்கு ஏதாவது அசம்பாவிதம் நிகழ்ந்தால், அதன் பிறகு குழந்தைகளின் தேவைகளை நிறைவேற்றிக் கொள்ளத்தான் லைஃப் இன்ஷூரன்ஸ் பாலிசிகள். எனவே குழந்தைகளின் பெயரில் எடுப்பதைத் தவிர்ப்பது நல்லது. 
 
7. எனக்கு எந்தவிதமான கடனும் இல்லை. தேவைக்கு அதிகமாக வருமானம் உள்ளது. எனவே, எனக்கு இன்ஷூரன்ஸ் பாலிசி தேவையில்லை என நினைக்கக் கூடாது. இது முற்றிலும் தவறானது. ஏனெனில், எப்போது என்ன நடக்கும் என்பது யாருக்கும் தெரியாது. எனவே, பாதுகாப்புக்காக லைஃப் இன்ஷூரன்ஸ் கட்டாயம் தேவை. 
 
8. பாலிசி எடுக்கும் பலரும் ஏஜென்ட் சொல்வதை வேத வாக்காக எடுக்கிறார்கள். ஏஜென்ட் சொன்னால் சரியாக இருக்கும் என நினைத்து அவர் சொல்லும் பாலிசியை வாங்குகிறார்கள். பாலிசியை வாங்குவதற்கு முன் ஏஜென்ட் சொல்லும் தகவல்கள் சரியாக உள்ளதா என்பதை உறுதி செய்வது அவசியம். அடுத்தது ஏஜென்ட் கூறும் பாலிசி உங்களின் தேவையைப் பூர்த்தி செய்வதாக உள்ளதா என்பதை ஆராய்ந்த பிறகு பாலிசி எடுப்பது நல்லது.
9. எனக்கு எந்தவிதமான வியாதியும் இல்லை. மேலும், என்னுடைய குடும்பத்திலும் யாருக்கும் எந்த வியாதியும் இல்லை. குடும்பத்தில் 80 வயது வரை அனைவரும் ஆரோக்கியமாகத்தான் இருந்தார்கள். எனவே, எனக்கு லைஃப் இன்ஷூரன்ஸ் பாலிசி தேவையில்லை என்பார்கள். இது தவறான அணுகுமுறை. அவர்கள் வாழ்ந்த சூழ்நிலை வேறு.  நாம் வாழும் வாழ்க்கை சூழ்நிலை வேறு.  இரண்டையும் ஒப்பிட்டுப் பார்க்க கூடாது.
மேலும், சிலர் எனக்கு மது, புகைப் பழக்கம் உள்ளது. அதனால் எனக்கு லைஃப் இன்ஷூரன்ஸ் கவரேஜ் கிடைப்பதில் சிக்கல் இருக்கும் என நினைத்து பாலிசி எடுப்பதையே தவிர்த்து விடுகிறார்கள்.
 
10. இன்ஷூரன்ஸ் பாலிசி எடுத்துவிட்டு அதுகுறித்த விவரத்தைக் குடும்பத்தில் யாருடனும் பகிர்ந்துகொள்ளாமல் இருப்பது தவறு. பாலிசி எடுத்தவுடனே குடும்ப உறுப்பினர்களிடம் பாலிசி எந்த நிறுவனத்தில் எடுக்கப்பட்டுள்ளது, ஆன்லைனில் எடுத்துள்ளீர்களாக அல்லது ஏஜென்ட், புரோக்கர் மூலமாக எடுத்திருக்கிறீர்களா என்பதைத் தெரிவிக்க வேண்டும். மேலும், பாலிசியின் கவரேஜ் தொகை எவ்வளவு, யாரை நாமினியாக குறிப்பிட்டுள்ளீர்கள் என்பதைத் தெரிவிப்பது அவசியம்.  அப்போதுதான் தேவை ஏற்படும்போது அதைச் சரியாக பயன்படுத்திக்கொள்ள முடியும். 
 
தொகுப்பு:  இரா.ரூபாவதி.
 
விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ