Vikatan.com

www.vikatan.com would like to send you push notifications.

Notifications can be turned off anytime from browser settings.

அசெட் அலகேஷன்! - சொத்து சேர்க்க சூப்பர் ஃபார்முலா!

 

இந்தியர்களான நாம் சேமிப்பதில் கில்லாடிகள். இந்திய ஜி.டி.பி.யில் சுமார் 35 சதவிகிதம் அளவுக்கு நாம் சேமிக்கிறோம். ஆனால், சேமிப்பதை உருப்படியான சொத்துகளாக மாற்றுகிறோமா என்றால், இல்லை என்பதே பதில். சேமித்தால் மட்டும் போதாது; அதை சரியான வழியில் முதலீடு செய்து, சொத்துக்களை உருவாக்க வேண்டும். தற்போதைய நிலையில் நாம் எப்படி சேமிக்கிறோம், இதை எப்படி மாற்ற வேண்டும், அதற்கு நாம்  செய்ய வேண்டியது என்ன என்பது பற்றி பங்குச் சந்தை ஆலோசகர் நாகப்பனிடம் கேட்டோம். விரிவாக எடுத்துச் சொன்னார் அவர். அவர் சொன்ன யோசனைகள் இதோ உங்களுக்காக!

எங்கே முதலீடு செய்வது?

நம்மில் பலர் தங்கம், ரியல் எஸ்டேட், இன்ஷூரன்ஸ் மற்றும் ஃபிக்ஸட் டெபாசிட் போன்றவற்றை மட்டுமே முதலீடாக நினைக்கிறார்கள். ஆனால், பணவீக்கத்தைத் தாண்டிய வருமானம் பெற, குழந்தைகளின் எதிர்காலக் கல்வி மற்றும் திருமணத்துக்கு, நிம்மதியான ஓய்வுக் காலத்துக்கு, மருத்துவச் செலவுகளுக்கு, வீடு, கார் உள்ளிட்ட இதர வசதி களை பெற மேலே சொன்ன முதலீட்டு முறைகளால் நிச்சயம் பூர்த்தி செய்ய முடியாது.

என்ன காரணம்?

நம்மவர்கள் அதிகம் செய்யும் இரண்டு முதலீடுகள் தங்கமும், ரியல் எஸ்டேட்டும்தான். முதலீடு என்பதன் அர்த்தம், குறைவான விலையில் ஒரு பொருளை வாங்கி, விலை அதிகரித்தபிறகு விற்று காசாக்கு வதுதான். ஆனால், நம்மில் எத்தனை பேர் தங்கத்தை விற்று லாபம் பார்த்திருக்கிறார்கள்? கிட்டத்தட்ட யாருமே இல்லை. முதல் மாத சம்பளத்தில் வாங்கியது, அப்பா வாங்கிக் கொடுத்தது என்பது போல தங்கத்துக்கும் நமக்கும் ஒரு 'எமோஷனல்’ உறவு தங்கத்தை விற்காதபடிக்கு நம் கையைக் கட்டிப் போட்டுவிடுகிறது.

சரி, இந்த தங்கம் நமக்கு வருமானமாவது தருகிறதா என்றால் அதுவும் இல்லை. 1982-ம் ஆண்டில் இருந்து 2002-ம் ஆண்டு வரையிலான இருபது வருடங்கள் தங்கத் தின் விலையில் எந்த பெரிய மாற்றமும் இல்லை. (எதிரில் உள்ள சார்ட்டை பார்க்க) தங்கம் விலை பெரிதாக இறங்காது என்று நம்புகிறார்கள் நம்மவர்கள். 1980-ல் தங்கம் விலை கிட்டத்தட்ட 50% சரிந்தது. கடந்த சில ஆண்டுகளில் தங்கம் தந்த லாபத்தைப் பார்த்து வாங்க நினைப்பவர்கள், இனிவரும் ஆண்டுகளிலும் தருமா என்று யோசிக்க வேண்டும். தங்கம் நமக்கு தேவை என்றால் தாராளமாக வாங்கலாம். ஆனால், அதை ஒரு முதலீடு என்று நினைக்கத் தேவையில்லை.

இரண்டாவது, ரியல் எஸ்டேட். நாம் குடியிருப்பதற்கு ஒரு வீடு தேவை என்பதில் கருத்து வேறுபாடு இல்லை. ஆனால், முதலீடு என்கிற பட்சத்தில் அது நடுத்தர மக்களுக்குச் சரியானதாக இருக்காது.

ரியல் எஸ்டேட்டில் முதலீடு செய்ய நம் மொத்த சேமிப்பையும் அதில் போட வேண்டும். சொத்தை வாங்கும் முன் ஆவணங்களை சரிபார்க்க வேண்டும். வாங்கியபின் நமக்கு தேவைப்படும் நேரத்தில் விற்று பணமாக்க வேண்டும். ஆனால், ரியல் எஸ்டேட்டில் முதலீடு செய்த பலர் இப்போது நினைத்த நேரத்தில் பணமாக்க முடியாமல் கஷ்டப் படுகிறார்கள்.  

இதேபோலத்தான் காப்பீடு. இதையும் ஒரு முதலீடு என்று நினைத்தே பலரும் எடுக்கிறார்கள். காப்பீடு என்பது நமது எதிர்காலத்தைப் பாதுகாப்பதற்குதானே ஒழிய, முதலீட்டுக்காக அல்ல. அடுத்து, ஃபிக்ஸட் டெபாசிட். இதில் அதிகம் பேர் முதலீடு செய்ய காரணம், போட்ட பணம் நிச்சயம் குறையாது என்பதால்தான். 100 ரூபாய் முதலீடு செய்தால் நிச்சயமாக 108 ரூபாய் கிடைக்கும் என்பது சரிதான். ஆனால், ஒரு முதலீட்டின் மூலம் கிடைக்கக்கூடிய வருமானம் பணவீக்கத்தைத் தாண்டியதாக இருக்க வேண்டும். உதாரணத்துக்கு, பணவீக்கம் 10% எனில், நாம் முதலீடு செய்த 100 ரூபாயின் தற்போதைய மதிப்பு 98 ரூபாய்தான். வெளிப்பார்வைக்கு வேண்டுமானால் 108 ரூபாய் கிடைத்தாலும், நம் பணம் 10 ரூபாய் நமக்குத் தெரியாமலே காணாமல் போகிறது.  

 

ஆனால், பங்குச் சந்தை கடந்த முப்பது வருடங்களுக்கு மேலாக சராசரியாக ஆண்டுக்கு 15 சதவிகிதத்துக்கு மேல் வருமானம் தந்து வருகிறது. சரி, அதற்காக பங்குச் சந்தையிலேயே மொத்த பணத்தையும் முதலீடு செய்யலாமா என்றால் அதுவும் கூடாது. நம் வயதைப் பொறுத்து அதில் எவ்வளவு முதலீடு செய்யலாம் என முடிவு செய்யலாம்.

 

அனைத்து முதலீடுகளிலும் இப்படி ஏதோ ஒரு பிரச்னை இருப்பதால், ஒரே முதலீட்டில் அத்தனை பணத்தையும் போடாமல் தனித்தனியாகப் பிரித்து, பகிர்ந்து முதலீடு செய்ய வேண்டும். இதற்கு பெயர்தான் முதலீட்டுப் பகிர்வு, அதாவது, அசெட் அலகேஷன்.

அதென்ன முதலீட்டுப் பகிர்வு?

தங்கம், ரியல் எஸ்டேட், இன்ஷூரன்ஸ் போன்றவை முதலீட்டு வழிமுறைகள் அல்ல என்பதால் நாம் அதை கணக்கில் எடுத்துக் கொள்ளவில்லை. பங்குச் சந்தை மற்றும் டெபாசிட்டை (நிரந்தர வருமானம் தரும் முதலீடுகள்) மட்டும் நாம் கணக்கில் எடுத்துக் கொள்வோம். பொதுவாக வயதுக்கு ஏற்றவாறு பங்குச் சந்தையில் அதிகமாகவும், நிரந்தர வருமானம் தரும் முதலீடுகளில் குறைவாகவும் முதலீடு செய்ய வேண்டும் என்பார்கள். ஆனால், நாம் நம் முதலீட்டை 50 சதவிகிதம் பங்கு களிலும், 50 சதவிகிதம் நிரந்தர வருமானம் தரும் முதலீடுகளிலும் முதலீடு செய்வதாக வைத்துக் கொள்வோம்.

பங்குகள் என்றவுடன் எந்த பங்கை வாங்குவது என்று குழம்ப வேண்டாம். ரிஸ்க் எடுக்கும் முதலீட்டாளர்கள் தாங்கள் விரும்பும் பங்குகளை தேர்ந்தெடுத்து முதலீடு செய்யலாம். இல்லை என்றால், இண்டெக்ஸ்களிலே (இண்டெக்ஸ் ஃபண்டுகளையும் பரிசீலிக்கலாம்) முதலீடு செய்யலாம். அவை நல்ல வருமானத்தைத் தந்து வருகிறது.

2007-ம் ஆண்டு ஜனவரியில் நாம் முதலீட்டைத் தொடங்குவதாக வைத்துக் கொள்வோம். ஒரு லட்ச ரூபாயில் 50,000 ரூபாயை பங்குகளிலும் மீதமுள்ள 50,000 ரூபாயை டெபாசிட்களிலும் முதலீடு செய்வோம். அந்த ஆண்டு (அதாவது, ஆண்டு முடிவில்) பங்குச் சந்தை 60% வருமானம் தந்தது. டெபாசிட் 11% வருமானம் தந்தது. அப்படியானால் பங்குச் சந்தையில் செய்த 50,000 முதலீடு 80,000 ரூபாயாக உயர்ந்திருக்கும். டெபாசிட்களில் செய்த முதலீடு 55,500 ரூபாயாக உயர்ந்திருக்கும். இப்போது நம்மிடம் இருக்கும் தொகை 1,35,500.

நம் விதிமுறைப்படி நம்மிடம் இருக்கும் தொகையில் 50% பங்குச் சந்தையில் இருக்க வேண்டும். மீதம் 50% டெபாசிட்டில் இருக்க வேண்டும். அப்படியானால் 67,750 ரூபாய் போக மீதம் இருக்கும் 12,250 ரூபாயை ஃபிக்ஸட் டெபாசிட்டில் முதலீடு செய்ய வேண்டும் விவரம் பங்குகள் டெபாசிட்கள் வருட ஆரம்பத்தில் முதலீடு செய்த தொகை 50,000 (50%) 50,000 (50%) ஆண்டு இறுதியில் வருமானம்- பங்குச் சந்தை 60%, டெபாசிட் 11% 80,000 55,500 பங்குகளில் இருக்கும் உபரி ரூபாயான 12,250 ரூபாயை டெபாசிட்களில் போடவும் 67,500 (50%) ஆண்டு இறுதியில் இருப்பது. 67,500 (50%)

2008-ம் ஆண்டு பங்குச் சந்தை 50% சரிந்தது. அந்த ஆண்டு நாம் பங்குச் சந்தையில் முதலீடு செய்த 67,750 ரூபாய் 33,875 ரூபாயாக குறைந்திருக்கும். அதே சமயம் ஃபிக்ஸட் டெபாசிட்டில் அந்த ஆண்டு 10% வட்டி கிடைத்தது. நமது 67,750 ரூபாய் 74,525 ரூபாயாக உயர்ந்திருக்கும். இப்போது நம்மிடம் இருக்கும் தொகை 1,08,400 ரூபாய். அதனால் டெபாசிட்டில் இருந்து உபரியாக இருக்கும் 20,325 ரூபாயை எடுத்து பங்குச் சந்தையில் முதலீடு செய்ய வேண்டும்.

2009-ம் ஆண்டு ஆரம்பத்தில் பங்குச் சந்தை மற்றும் டெபாசிட்களில் நாம் முதலீடு செய்த தொகை 54,200 ரூபாய். அந்த ஆண்டு பங்குச் சந்தை 75% வரை உயர்ந்தது. நமது 54,200 ரூபாய் 94,850 ரூபாயாக இருக்கும். டெபாசிட் 8 சதவிகித வருமானம் மட்டும் கொடுத்தால் 54,200 ரூபாய் 58,536 ரூபாயாக இருக்கும்.

நம்மிடம் இருக்கும் தொகையை கூட்டும்போது பங்குச் சந்தையில் அதிக முதலீடு இருப்பதால், 50 சதவிகிதத்துக்கு மேல் இருக்கும் முதலீட்டை எடுத்து ஃபிக்ஸட் டெபாசிட்டில் முதலீடு செய்ய வேண்டும். இப்போது பங்குச் சந்தை மற்றும் டெபாசிட்களில் 76,693 ரூபாய் இருக்கும். 

2010-ம் ஆண்டு பங்குச் சந்தை 18% வருமானம் கொடுத்தது. டெபாசிட்டுக்கான வட்டி 8 சத விகிதமாக இருந்தது. அப்படியான நமது 76,693 ரூபாய் முதலீடு பங்குச் சந்தையில் 90,498 ரூபாயாகவும், டெபாசிட்டில் 82,828 ரூபாயாகவும் இருக்கும். இப்போது உபரியாக இருக்கும் 3,835  ரூபாயை எடுத்து டெபாசிட்களில் முதலீடு செய்யவும்.

இப்போது பங்குச் சந்தை மற்றும் டெபாசிட் களில் தலா 86,663 ரூபாய் இருக்கும்.

2011-ம் ஆண்டு பங்குச் சந்தை 25% வரை சரிந்தது. அதனால் பங்குச் சந்தை முதலீடு 64,997 ரூபாயாக இருக்கும். அந்த ஆண்டு ஃபிக்ஸட் டெபாசிட் 9% வருமானம் கொடுத்தது. அப்படியானால் ஃபிக்ஸட் டெபாசிட்டில் நாம் செய்த முதலீடு 94,463 ரூபாயாக இருக்கும். இப்போது ஃபிக்ஸட் டெபாசிட்டில் அதிக தொகை இருப்பதால் அதிலிருந்து 14,733 ரூபாயை பங்குச் சந்தையில் முதலீடு செய்ய வேண்டும்.

2012-ம் ஆண்டு ஆரம்பத்தில் நம்மிடம் 1,59,460 ரூபாய் இருக்கும். 2007-ம் ஆண்டு நாம் முதலீடு செய்த ஒரு லட்ச ரூபாய் 1.59 லட்ச மாக இப்போது இருக்கிறது. அதாவது, நமது முதலீட்டுக்கு ஆண்டுக்கு சுமார் 10% வருமானம் கிடைத்திருக்கிறது. இதையே சென்ற வருடம் எடுத்திருந்தால் 13% கிடைத்திருக்கும்.

இதில் நாம் டிவிடெண்டையோ, வரிகளையோ கணக்கில் எடுத்துக் கொள்ளவில்லை என்பது முக்கியமான விஷயம். ஒரு ஆண்டு ஏற்றம், அடுத்த ஆண்டு இறக்கம் என சந்தையில் பல மாற்றங்கள் நடந்தாலும் முதலீட்டைப் பிரித்து செய்வதன் மூலம் ஆண்டுக்கு சராசரியாக நமக்கு 10% வருமானம் கிடைக்கும்.

இது ஒரு மாதிரிதான். இப்படித்தான் முதலீடு செய்ய வேண்டும் என்று கட்டாயமில்லை. உங்கள் வசதிக்கேற்ப பங்குச் சந்தையில் இவ்வளவு, டெபாசிட் முதலீட்டில் இவ்வளவு என்று மாற்றி வைத்துக் கொள்ளலாம். ஆனால், பிரித்து முதலீடு செய்தால் நிச்சயம் லாபம் கிடைக்கும் என்பது மட்டும் உறுதி.

 

(நாணயம் விகடன் 01.07.2012 இதழில் வெளியான கட்டுரை)

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ