Vikatan.com

www.vikatan.com would like to send you push notifications.

Notifications can be turned off anytime from browser settings.

செல்போன் நிறுவனங்கள் vs ஆப்ஸ்!! கட்டணத்தை அதிகரிக்குமா ''நெட் நியூட்ராலிட்டி'' பிரச்னை?

இன்று தொழில்நுட்ப முன்னேற்றம் காரணமாக அனைவரையும் செல்போன் வசதி சென்றடைந்துவிட்டது. அதிலும் ஸ்மார்ட்போன்கள் அதிவேகமான வளர்ச்சியில் வளர்ந்து வருகின்றன. இது வளர்ச்சி தானே என நாம் நினைத்து கொண்டிருக்கும் வேளையில் புதியதாக ஒரு பிரச்னை தலை தூக்கியுள்ளது. இது தான் நெட் நியூட்ராலிட்டி  

நெட் நியூட்ராலிட்டி என்றால் என்ன?

நெட் நியூட்ராலிட்டி எனும் இணையதள சமநிலை என்பது இணையதள சேவையை வழங்கும் செல்போன் சேவை நிறுவனமும், அரசும் அனைத்து இணையதள டேட்டாக்களையும் சமநிலையில் வழங்க வேண்டும், ஒரு வாடிக்கையாளருக்கும் மற்றோரு வாடிக்கையாளருக்கும் கட்டணத்தில் வித்தியாசத்தை காட்ட கூடாது, அதேபோல் தகவல், இணையதளம், இயங்குதளம், ஆப்ஸ், தொலைதொடர்பு முறை ஆகியவற்றுலும் சமநிலையை கடைபிடிக்க வேண்டும் என்பதே நெட் நியூட்ராலிட்டி ஆகும். இது கொலம்பியா யுனிவர்சிட்டி மீடியா சட்ட பிரிவின் பேராசிரியர் டிம் வூவால் 2003ம் ஆண்டு வகுக்கப்பட்டது.  

 என்ன பிரச்னை?

இந்த நெட் நியூட்ராலிட்டிக்காக தான் இணையதள நிறுவனங்கள் போராடி வருகின்றன. காரணம் இன்று அதிகரித்துள்ள உடனடி ஆப்ஸ் நிறுவனங்கள்தான். உடனடி ஆப்ஸ் நிறுவனங்கள் தங்கள் ஆப்ஸை இலவசமாக ப்ளே ஸ்டோர்களில் வைத்துள்ளன. அதனை டவுன்லோடு செய்து குறைந்தபட்ச இணையதள சேவை இருந்தாலே செய்திகளை பரிமாறி கொள்ள முடியும் என்ற நிலையை உருவாக்கியுள்ளன. அதுமட்டுமின்றி வாய்ஸ் கால், வீடியோ கால் போன்றவற்றை அறிமுகப்படுத்தி தகவல் பரிமாற்றத்தை எளிமையாக்கியுள்ளன. இதனால் தேசிய அளவில் எஸ்.எம்.எஸ் மற்றும் கால் செய்பவர்களது எண்ணிக்கை கணிசமான அளவில் குறைந்துள்ளன. இதனால் கால் மற்றும் எஸ்எம்எஸ் மூலம் கிடைக்கும் வருமானமும் குறைந்துள்ளது என செல்போன் சேவை நிறுவனங்கள் கண்டனம் தெரிவித்துள்ளன.

இது குறித்து செல்போன் நெறிமுறையாளரான ட்ராய் அமைப்பிடம்செல்போன் சேவை நிறுவனங்கள் ஏற்கெனவேகோரிக்கை விடுத்துள்ளன. இதில் உடனடி ஆப்ஸ் நிறுவனங்களால் செல்போன் நிறுவனங்களின் வருமானத்திற்கு பாதிப்பு ஏற்படுகிறது என கூறப்பட்டுள்ளது. இன்றைய நிலையில் 350 மில்லியன் செல்போன் பயன்பாட்டாளர்களை கொண்ட இந்தியாவில் ஸ்மார்ட்போன் வேகமாக பரவி வரும் வேளையில் செல்போன் சேவை நிறுவனங்களின் வருமானம் பெரிய அளவில் குறையும் என கூறியுள்ளன.

இந்தப் பிரச்னையை அணுக மக்கள் மத்தியில் என்ன எதிர்பார்ப்பு உள்ளது என்பதை அறிய ட்ராய் 21 கேள்விகளை மக்கள் முன் வைத்துள்ளது. இதனை நிரப்பி ட்ராயின் மின்னஞ்சல் முகவரிக்கு அனுப்பலாம். இதற்கு வரும் பதில்களை பொறுத்து முடிவெடுக்க ட்ராய் முடிவு செய்துள்ளது.

என்ன கேள்விகள் என்பதை அறிய க்ளிக் செய்க

மக்களை பாதிக்குமா?

நெட் நியூட்ராலிட்டி கொண்டுவர வேண்டும் என்பதற்கு முக்கிய காரணமே இந்த ஆப்ஸ்களால் வருமானத்தை இழக்கும் நிறுவனங்கள் இரண்டு முயற்சிகளை மேற்கொள்ளலாம். ஒன்று இணையதள சேவைகளுக்கான கட்டணத்தை உயர்த்தலாம். அல்லது ஆப்ஸ் நிறுவனங்களோடு ஒப்பந்தம் போட்டு அவர்களிடம் இருந்து பெரிய தொகையை பெற்று குறைந்த விலையில் சேவையை வழங்கலாம். ஆனால் ஆப்ஸ் நிறுவனங்கள் அதிக பணத்தை செலவழிக்க முன் வராது என்பதால் இணையதள சேவை கட்டணங்கள் உயர்த்தப்பட வாய்ப்புள்ளது. ஏற்கெனவே இரண்டு மடங்காக உயர்த்தப்பட்ட கட்டணம் இப்போது தனித்தனியாக ஒவ்வொரு ஆப்ஸுக்கு அதிகரிக்கும் என்று எதிர்பார்க்கப்படுகிறது.

இப்போது உள்ள சூழலில் கட்டணம் எப்படி அதிகரிக்கும் எனில் மாதாந்திர சேவைக்காக அடிப்படை கட்டணம் 150 ரூபாயாக இருக்கலாம் என்றும், கூகுள், யாகூ போன்ற தேடுதல் தளங்களுக்கு கட்டணம் 18 ரூபாய் முதல் 30 ரூபாய் வரை மாதம் வசூலிக்கப்படலாம் என்றும், வாட்ஸ்அப், வீசாட் போன்ற உடனடி ஆப்ஸ்கள் 80 ரூபாய் என்ற அளவில் விற்கப்படலாம் என்றும் கூறப்படுகிறது.

இவை தவிர - காமர்ஸ் நிறுவனங்கள் ஆப்ஸில் பர்சேஸ் செய்ய அனைவரையும் பழக்கி விட்டன. அதன் விலை 50 ரூபாயை தாண்டும் என்று கூறப்படுகிரது. இப்படியே போனால் மாதம் இந்த ஆப்ஸ்களை பயன்படுத்த மட்டும் தோராயமாக 800 ரூபாய் முதல் 1000 ரூபாய் வரை செலவழிக்க வேண்டி இருக்கும்.

இந்தப் பிரச்னைகளுக்கு தீர்வு மற்றும் நெட் நியூட்ராலிட்டி குறித்து அரசின் முடிவு மே 8 ம் தேதி அறிவிப்பு வெளியாகும் என்று ட்ராய் கூறியுள்ளது.

விதிமுறையை மீறியதா ஏர்டெல்?

நெட் நியூட்ராலிட்டிக்கான விதிமுறைகள் குறித்த ஆய்வுநடந்துவரும் வேளையில் பாரதி ஏர்டெல் நிறுவனம் ''ஏர்டெல் ஜீரோ'' திட்டத்தின் மூலம் ஓடிடி (OTT) முறையில் இயங்கும் ஆப்ஸ்களில் சிலவற்றை இலவசமாக பயன்படுத்த முடியும் என்று கூறியுள்ளது. இந்த அறிவிப்பு நெட் நியூட்ராலிட்டிக்கு எதிராக உள்ளது என சேவை நிறுவனங்கள் மத்தியில் பரபரப்பை ஏற்படுத்தியுள்ளது. - காமர்ஸ் நிறுவனங்களுடன் ஏற்கெனவே ஒப்பந்த அடிப்படையில் குறைந்த விலையில் மார்க்கெட்டிங் வாய்ப்பபுகளை வழங்கி வரும் ஏர்டெல் நெட் நியூட்ராலிட்டி விதிமுறையை மீறியுள்ளது என குற்றச்சாட்டு எழுந்துள்ளது. இது குறித்து கருத்து தெரிவித்துள்ள ட்ராய் '' பிரச்னையை பரிசீலனை செய்து வருவதாகவும், விரைவில் இந்த பிரச்னைக்கு தீர்வு காணப்படும் என்று கூறியுள்ளது.

ட்ராய் இதற்கு ஒரு நல்ல முடிவை அளித்து அதேசமயம் விலை நிர்ணயித்தலுக்கும் சரியான தீர்வை அளிக்க நடவடிக்கைகளை எடுக்க வேண்டும். இல்லையெனில் விலை அதிகரிக்கவோ அல்லது தொழில்நுட்ப ரீதியாக பின்னடைவை சந்திக்கவோ வாய்ப்புள்லது. ஆப்ஸ்கள் தான் இன்றைக்கு அனைத்தும் எனும்போது இந்த சேவை நிறுவனங்களை தவிர்த்து வாடிக்கையாளர்கள் வை - பை போன்ற வசதிகளை பயன்படுத்தி கால் மற்றும் எஸ்.எம்.எஸ்களை செய்ய வாய்ப்புள்ளது என்பதால் இருதரப்புக்கும் பிரச்னையான விஷயத்தை அரசு கவனத்துடன் கையாண்டால் மட்டுமே இந்தப் பிரச்னைக்கு சரியான தீர்வு கிடைக்கும்.

.ஸ்ரீராம்



 


விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ