Vikatan.com

www.vikatan.com would like to send you push notifications.

Notifications can be turned off anytime from browser settings.

இப்போதைய நிலையில் தங்கம் வாங்கினால் லாபம் கிடைக்குமா?

 இப்போதைய நிலையில் தங்கம் வாங்கினால் லாபம் கிடைக்குமா?

ஷியாம் சுந்தர்

கடந்த ஏழு அல்லது எட்டு ஆண்டுகளில் தங்கம் விலை அபார ஏற்றம் கண்டது. இந்த விலை உயர்வு ஏன் ஏற்பட்டது? பிறகு தங்கத்தின் விலை சரிய என்ன காரணம்,? தங்கம் விலை தற்போது இருக்கும் நிலையிலிருந்து எந்த திசையில் செல்லும்? என்பதை தெரிந்து கொள்ள ஆவலாக இருக்கிறார்கள் தங்கம் வாங்க நினைக்கிறவர்கள். இந்திய மக்களின் அசாத்திய நம்பிக்கையாக தங்கம் இருப்பதால்,உலக நிகழ்வுகளை ஒரளவிற்கு அறிந்துகொண்டால், முதலீடுகளை அதற்கேற்றார்போல் மாற்றி அமைத்து பயன் பெறலாம்.

ஆறு காரணங்கள்! தங்கம் சர்வதேச சந்தையில் 1200 டாலருக்கு அருகாமையில் ஏற்ற, இறக்கங்களுடன் வர்த்தகம் நடைபெறுகிறது. முதலில் தங்கத்தின் விலையானது,

 1) அமெரிக்க டாலரின் மதிப்பில் காணப்படுகின்ற ஏற்ற/ இறக்கங்கள்,

 2), ஒவ்வொரு நாட்டின் மத்திய வங்கிகளின் தேவைக்க்காக வாங்குவது,

 3) மற்றும் இந்தியா, சீனா போன்ற நாடுகளின் மக்களின் பயன்பாடு அல்லது

 தேவைகள்,

4) போர் பதற்றங்கள்,                                                      

5) உலகப் பொருளாதார வளர்ச்சியில் தொய்வு அல்லது வளர்ச்சி,

6) இந்தியாவைப் பொருத்தவரை, இந்திய ரூபாயின் டாலருக்கு நிகரான மதிப்பு

ஆகிய ஆறு காரணங்களை அடிப்படையாகக் கொண்டு வர்த்தகமாகின்றன.

2008-க்குப் பிறகு, வளர்ந்த நாடுகளின் பொருளாதார வளர்ச்சி குறைவு. அதே சமயம், வளரும் நாடுகளில் காணப்பட்ட  பொருளாதார  ஏற்றம், தங்கத்தின் போக்கை மாற்றி அமைத்தன.

சமீப காலமாக, அமெரிக்காவின் வட்டி விகிதங்கள் உயர்த்தப்படலாம் என்கிற செய்தி அவ்வப்போது பேசப்படுகிறது. இதனால் தங்கத்தின் விலை அவ்வப்போது சரிகிறது. 

வட்டி விகிதங்களுக்கும், தங்கத்துக்கும் என்ன தொடர்பு ?

வளர்ந்த நாடுகள் அனைத்தும் 2008-க்குப் பிறகு வட்டி விகிதங்களை மிகவும் குறைவாக வைத்துக்கொண்டு 'ஸ்டிமுலஸ்' (Stimulas) என்கிற பெயரில் பணப்புழக்கத்தை அதிகரித்து, அதன் மூலம் பொருளாதாரத்தை மேம்படுத்த முயன்றன. ஆனால் என்ன நடந்தது? ஸ்வீடன், டென்மார்க், சுவிட்ஜர்லாந்து போன்ற நாடுகளில் எதிர்மறையான விளைவுகளை ஏற்படுத்தியுள்ளன.

வங்கிகளில் பணம் முதலீடாக செலுத்தினால், முதலீட்டாளர்களுக்கு வங்கிகள் வட்டி தராது. வைப்பு நிதியிலிருந்து, வங்கியானது பிடித்தம் செய்து மீதித்தொகையைத்தான் முதிர்வின்போது முதலீட்டாளர்களுக்கு தரும் நிலைக்கு எதிர்மறையான விளைவுகளை ஏற்படுத்தியுள்ளன.

மேலும், வட்டி விகிதங்கள் உடனடியாக ஏறுவதற்கு வாய்ப்பில்லை என்று செய்திகள் வெளியானால், பங்குச்சந்தைகள் ஏறுகின்றன. வட்டி விகிதங்கள் அதிகரிக்கப்படலாம் என்ற பேச்சு வரும்போதெல்லாம், பங்குச் சந்தைகள் சரிகின்றன. ஏனென்றால், வட்டி அதிகரித்தால், நிறுவனங்களின் லாப சதவிகிதம் பாதிக்குமோ என்கிற அச்சம் நிலவுவதால், முதலீட்டாளர்கள் பங்குகளை விற்கிறார்கள். இந்த செய்திகளுக்கேற்ப தங்கத்தின் விலை அதிகரிக்கவோ, குறையவோ செய்கிறது. 

 தங்கம் எப்போதெல்லாம் அதிகரித்தது?

 முதல் உதாரணம்-

 

1970-ல் அமெரிக்காவில் வட்டி விகிதங்கள் 4% இருந்தது. 1977 முதல் 1980 வரை படிப்படியாக 17% வரை  அதிகரிக்கச் செய்தார்கள். அதேசமயம், தங்கம் $35-லிருந்து நான்கு மடங்கு அதிகரித்து $850 என்ற நிலைக்கு சென்றது. 

 

 இரண்டாவது உதாரணமாக, 

 

அமெரிக்காவில் அக்டோபர் 2003 முதல் அக்டோபர் 2006 வரையிலான  காலகட்டத்திலும் வட்டி விகிதங்கள் -1 சதவிகித்திலிருந்து 2% உயர்த்தியது. இந்த காலக்கட்டத்தில் தங்கம் $400-லிருந்து $600-ஆக உயர்ந்தது.  

 

 இதன்பிறகு 1980-ல் 17 சதவிகிதமாக இருந்த வட்டி விகிதம் 1990-ல் 8%, 2000ல் 6%, 2008-க்கு பிறகு 0.25 சதவிகிதமாக குறைந்து தற்போது வரை நீடித்திருக்கிறது.

2008-க்குப் பிறகு ஏன் அதிகரித்தது?

கடந்த 2009 ஆண்டில் 900 டாலாரக இருந்தது 2011-ல் 1900 டாலர் அளவுக்கு ஏன் அதிகரித்தது எனில், 2008-ல் அமெரிக்காவின் பொருளாதாரத்தில் நிதிச் சிக்கல் ஏற்பட்டதால்

பொருளாதாரத்தை ஊக்கப்படுத்தும் விதத்தில் 3.5 ட்ரில்லியன் அளவுக்கு 2008-ம் ஆண்டிலிருந்து மிகப் பெரிய அளவில் பணப்புழக்கத்தை அதிகரிக்கச் செய்தது. 2008ல் க்யூ.இ.1-யில் 1.75 ட்ரில்லியன் டாலர்களாகவும், 2010 கடைசியில் க்யூஇ-2-ல் 600 பில்லியன் டாலர்களாகவும், 2012 கடைசியில் க்யூஇ-ல் 85 பில்லியன் டாலர்களாகவும் என்று மூன்று முறை அறிவிக்கப்பட்டது.

இதன் நோக்கம் என்னவென்றால், வேலைவாய்ப்பை பெருக்குவது இதை வேறுவிதமாக சொல்வதானால், வேலை இல்லாதவர்களின் எண்ணிக்கையை 2009-ல் 9.5 சதவிகிதமாக இருப்பதை 5 சதவிகிதமாகக் குறைப்பது, பணவீக்கத்தை அதிகரிக்கச் செய்வது.

மேலும், பொருளாதார சரிவைத் தடுக்க வட்டி விகிதங்களை மிகவும் குறைந்த அளவில், அதாவது 0% அருகாமையில் வைத்திருப்பது. சந்தையில் பேப்பர் கரன்சி அதிகரித்ததால் டாலரின் மதிப்பு சரிந்தது. தங்கம் விலை ஏற்றம் கண்டது.

நடந்தது என்ன?

பொருளாதாரத்தை ஊக்கப்படுத்த அறிமுகப்படுத்தப்பட்ட பணப்புழக்கமானது, வங்கியில் வட்டி விகிதங்கள் உயராததால், முதலீட்டாளர்கள் ரிஸ்க் அதிகம் உள்ள பங்குச்சந்தையில் முதலீடு செய்ய ஆரம்பித்தார்கள். 2009-க்குப் பிறகு எஸ் அண்ட் பி 500 குறியீடானது மூன்று மடங்கு அதிகரித்துள்ளது.  ஒருவேளை, பங்குச்சந்தை  சரிய ஆரம்பித்தால், மீண்டும் டாலர் வலுவிழப்பதர்கான சாத்தியக்கூறுகள் இருக்கின்றன என்பதை நினைவில் வைத்துக்கொள்ளவேண்டும்

இந்த இடத்தில் நாம் முக்கியமாக பார்க்கவேண்டியது, வட்டி விதங்கள் குறைவாக இருந்த காரணத்திலால்பங்குச்சந்தை குறியீடுகள் அதிகரித்ததே தவிர, நேரிடையாக ஒட்டுமொத்த வளர்ச்சிக் குறியீட்டில் பிரதிபலிக்கவில்லை.

தங்கம் சரிந்தததுக்கான காரணங்கள் என்ன?

2013-ல் அமெரிக்க பெடரல் (US FEDERAL) ஏற்கனவே நடைமுறையில் இருக்கின்ற பொருளாதார ஊக்குவிப்பு நடவடிக்கைகள், படிப்படியாக குறைக்கப்படும் என்று அறிவித்தவுடன், தங்கம் விலை சரியத் துவங்கியது. 2013 டிசம்பரில் குறைக்க ஆரம்பித்து, 2014 அக்டோபர் மாதம் முழுவதுமாக நிறுத்திக்கொண்டது. அதாவது, பொருளாதாரம் மேம்படலாம் என்கிற எதிர்பார்ப்பில், ஒரு சில புள்ளிவிபரங்கள் சாதகமாய் வந்ததை ஒட்டி பணப்புழக்கம் நிறுத்தப்பட்டது. ஆனாலும், வட்டி விகிதங்களை ஏற்றாமல், பொருளாதாரத்தை மேம்படுத்தும் வகையில் மிகக் குறைந்த அளவிலேயே நிறுத்திக்கொண்டது.

ஊக்குவிப்பு நடவடிக்கைகளுக்குப் பிறகு பொருளாதார மாற்றங்கள் ஏற்பட்டதா?, அப்படி என்றால், பங்குச்சந்தை சரிவடை வாய்ப்பு இருக்கிறதா? 

அமெரிக்க ஃபெடரல் எதிர்பார்த்த வேலை இல்லாதோர் எண்ணிக்கை சதவிகிதத்தை 9 சதவிகிதத்திலிருந்து 5.5 சதவிகிதமாகக் குறைத்தாலும், அவர்கள் பெறக்கூடிய 1 மணி ஊதியமானது  அதிகரிக்கவில்லை. பணவீக்கத்தை 2 சதவிகிதத்தை இலக்கை அடைய முடியவில்லை. பணவீக்கம் எப்போது அதிகரிக்கவில்லையோ, தேவை (DEMAND) இல்லை என்று அர்த்தம்.

 

காசோலின் (Gasoline) விலை குறைந்ததை அடுத்து, இதனால் வரக்கூடிய சேமிப்பை, மக்கள் செலவுகளை அதிகரிக்கச் செய்வார்கள் என்று எதிர்பார்த்த வேளையில், சேமிப்பு மற்றும் பங்குச்சந்தையில் முதலீடுகளை தொடர்ந்ததால், பணவீக்கம் அதிகரிக்கவில்லை. வட்டி விகிதங்கள் அதிகரிக்கும்பட்சத்தில், பங்குச்சந்தை சரிவடையலாம். அமெரிக்காவினால் வட்டி விகிதங்களை உயர்த்த முடியாமல் போனால், நிதி நெருக்கடி (RECESSION) என்று சொல்லக்கூடிய நிலைக்கு மீண்டும் தள்ளப்படலாம். இதன் விளைவாக, உடனடியாக இல்லாவிட்டாலும் வரும் ஆண்டுகளில் அமெரிக்க டாலரின் மதிப்பு குறைய  ஆரம்பிக்கலாம். .டாலர் மதிப்பு குறையும்போதெல்லாம் தங்கம் அதிகரிப்பது வழக்கமான ஒன்றாகும்

 

 

 

 அமெரிக்காவின் தற்போதைய பொருளாதார நிலைமை என்ன?

 2015 முதல் மூன்று மாதங்களில் எந்த மாதிரியான நிலவரம் அங்கு நிலவுகிறது என்பதைப் பார்க்கலாம்.

1)  வேலை இல்லாதவர்களின் எண்ணிக்கை 5.5 சதவிகிதமாகக் குறைந்தது காணப்பட்டாலும் கட்டட வேலையில் சுணக்கம் கண்டுள்ளது, ஆனால், இதற்கு காரணம் வானிலை (குளிர்) காரணமாக மக்கள் வெளியில்  செல்லாததால் வியாபாரம் அதிகரிக்கவில்லை என்று சொல்லப்படுகிறது . முக்கியமாக, பணியாளர்களின் ஊதியம் அதிகரிக்கவில்லை. வருடாந்திர அளவில் சராசரி ஊதிய உயர்வு  2.1% மட்டுமே அதிகரித்துள்ளது. ஆகையால், தனிநபர் செலவும் அதிகரிக்கவில்லை.

இதுமட்டுமில்லாமல், குறைந்த ஊதியத்தில் வளரும் நாடுகளின் தொழிலாளர்கள் கிடைப்பதால், அமெரிக்காவின் உள்நாட்டு தொழிலாளர்களின் வேலைவாய்ப்பில் சிக்கல்கள் எழுந்துள்ளன. இதன் அடிப்படையில் பணவீக்கம் 2% என்கிற இலக்கை அடைய முடியவில்லை. கச்சா எண்ணை விலை சரிந்த நிலையில், எரிபொருள் துறையில் செய்யப்பட்டுள்ள நிறுவனங்களின் செயல்பாடுகள் வரும் காலங்களில் எவ்வாறு இருக்கப் போகின்றன என்பதில் முதலீட்டாளர்களிடையே சந்தேகம் எழுந்துள்ளது

2) டாலரின் மதிப்பு உயர்ந்ததால், ஐரோப்பிய நாடுகளுக்கு ஏற்றுமதி செய்யப்படும் தொழிற்சாலை சம்பந்தப்பட்ட பொருட்களின் விலை 20% அதிகரித்ததால், விற்பனை குறைந்து நிறுவனங்களுக்கு பாதிப்பு ஏற்பட்டுள்ளது.

3) இத்தகைய சூழ்நிலையில், வட்டி விகிதங்களை உயர்த்துவதில் அமெரிக்க ஃபெடரல் காலதாமதம் செய்கிறது. இப்போது இந்த வருட கடைசியில் இருக்கக்கூடும் என்று கூறத் துவங்கியுள்ளது மொத்தத்தில் ஒட்டுமொத்த வளர்ச்சி விகிதம் அதிகரிக்க முடியவில்லை. 

தங்கம் வாங்கலாமா?

 

மிகப் பெரிய அளவில் பணப்புழக்கத்தை அதிகரிக்கச் செய்தும், பணவீக்கத்தை 2% என்கிற அளவிற்கு எட்டாத நிலையில் டாலர் வரும் காலத்தில் வலுவிழப்பதற்கு வாய்ப்பு இருப்பதால் தங்கம் விலை ஏறுவதற்கு முகாந்திரங்கள் இருக்கின்றன. ஒருவேளை, வட்டி விகிதங்களை ஏற்றினால், பொருளாதார வளர்ச்சி தடைபடும் என்பதால், மேலும் ”பெடரல் ரிசர்வ்வானது ” வட்டி உயர்த்தும் எண்ணத்தை  காலதாமதப்படுத்தும் நிலைக்கு தள்ளப்படும்.என்று எதிர்பார்க்கப்படுகிறது. நீண்ட வருடங்களுக்கு வட்டி விகிதங்களை மிகவும் குறைத்து வைத்திருப்பது பொருளாதாரத்தை பெரிய அளவில் பாதிக்கச் செய்யும் என்பது தங்கத்துக்கு சாதகமாக பார்க்கப்படுகிறது. ஆக    

மொத்தத்தில், தங்கத்தில் இன்று முதலீடு செய்வது, நிச்சயம் பாதுகாப்பான ஒன்றாகவும் விலை ஏற்றத்துக்குத் தயாராகி வருவதாகவும் பார்க்கப்படுகிறது.

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ