Vikatan.com

www.vikatan.com would like to send you push notifications.

Notifications can be turned off anytime from browser settings.

வங்கி சேவைகள் - வைப்பு கணக்குகள்

 

- கே ஆர் வைகுண்டம், மதுரை

வங்கியில் வைப்புக் கணக்கு தொடங்குவதன் மூலம் உங்களுடைய பணத்தை வங்கியில் சேர்த்து வைக்க முடிகிறது.

வைப்புக் கணக்குகள் இரு வகையாகும்.
 
கரண்ட் அக்கவுண்ட் எனப்படும் நடப்புக் கணக்குகளும் சேவிங்க்ஸ் அக்கவுண்ட் எனப்படும் சேமிப்புக் கணக்குகளும் ஒரு வகையானவை.

ஃபிக்ஸ்ட் டெபாசிட் எனப்படும் நிரந்தர வைப்புக் கணக்குகளும் ரெக்கரிங்க் டெபாசிட் எனப்படும் தொடர் வைப்புக் கணக்குகளும் இன்னொரு வகையானவை. 

நடப்புக் கணக்குகளும் சேமிப்பு கணக்குகளும்


எளிதாக அடிக்கடி பணம் போடவும், எடுக்கவும், பணம் அனுப்பவும், பெறவும் முடியும் வகையில் அமைக்கப்பட்டுள்ளன. நாம் வங்கிகளைத் தவிர கம்பெனிகளிலும், சிட் ஃபண்டுகளிலும் கூட பணம் போட்டு வைக்கலாம். ஆனால் வங்கிகளைத் தவிர வேறெந்த நிறுவனமும், தேவைப்படும்பொழுதெல்லாம் பணம் எடுக்கும், பணம் மாற்றும் வசதியை அளிக்கும் காசோலைகளையும், ஏடிஎம் கார்டுகளையும். ஆன்லைன் பணமாற்ற முறையையும் கொடுக்க முடியாது.

கேட்ட போது (ஆன் டிமாண்ட்) நம் பணத்தை எடுக்க முடிவதால் இவ்வகை கணக்குகள் டிமாண்ட் டெபாசிட் என்று அழைக்கப்படுகின்றன. கேட்புக் கணக்குகள் என்றும் சொல்லலாம்.

கரண்ட் அக்கவுண்ட் எனப்படும் நடப்புக் கணக்குகளை பொதுவாக தொழிற்சாலைகள், வியாபா¡¢கள், பல்கலைக்கழகம் போன்ற நிறுவனங்கள் துவங்குகின்றன. நடப்புக் கணக்குகளில் பணம் போட்டு எடுத்தலும் பணமாற்றமும் மிக அதிக அளவில் நடக்கும். நடப்புக் கணக்குகளின் நோக்கம் சேமிப்பு அல்ல. ஆகவே ரிசர்வ் வங்கி உத்தரவுப்படி நடப்புக் கணக்குகளின் இருப்பின் மேல் வட்டி கொடுப்பது தடை செய்யப்பட்டுள்ளது. தனி மனிதர்களும் நடப்புக் கணக்கு துவங்கலாம். ஆனால் வட்டி கிடைக்காது.

குறிப்பிட்ட கணக்கால் ஏற்படும் வேலைப் பளுவைப் பொருத்து மினிமம் பேலன்ஸ் எனப்படும் அந்தக் கணக்கில் இருக்க வேண்டிய குறைந்தபட்சமான இருப்புத் தொகை ஒன்றை வங்கிகள்  நிர்ணயிக்கின்றன. இத்தொகை சேமிப்புக் கணக்குகளை விட நடப்புக் கணக்குகளில் கூடுதலாகவே இருக்கும். இருந்தும் கணக்கு துவங்குவதின் முக்கிய நோக்கம் சேமிப்பாக இல்லாமல் இருக்குமேயானால் அத்தகைய வாடிக்கையாளர்கள் நடப்புக் கணக்கு துவங்குவதே முறையாகும்.

சேமிப்புக் கணக்குகள் பெயருக்கேற்றாற் போல் சேமிப்புக்கானவை. தொழிலுக்காகவோ வணிகத்துக்காகவோ உபயோகிக்கக்கூடாது. சேமிப்புடன் காசோலை, ஏ டி எம் கார்ட் வசதிகள் கிடைப்பது இந்தக் கணக்கின் சிறப்பு. ஃபிக்ஸ்ட் அக்கவுண்ட்டுகளைப் போல் அல்லாமல் தேவைக்கேற்ப எடுக்கும் வசதி உள்ளது.

நடப்புக் கணக்குகளைப் போல் வரையறை இன்றி போட்டு எடுக்க முடியாவிட்டாலும் வங்கிகள் சேமிப்புக் கணக்குகளில் தாராளமாகவே போட்டு, எடுத்து, மாற்றம் செய்வதை அனுமதிக்கின்றன. இவ்வளவு வசதிகள் இருப்பதால் வங்கிகள்  சேமிப்புக் கணக்குகளில் ஒரு குறைந்த பட்ச பண இருப்பை எதிர்பார்க்கின்றன. பல வங்கிகள் கணக்கில் இருப்பு இந்த குறைந்த பட்ச தொகைக்குக் கீழ் சென்றால் பெனல்டி விதிக்கின்றன.

சேமிப்புக் கணக்குகளில் இருப்புக்கு வட்டி உண்டு. அண்மைக்காலம் வரை இவ்வட்டி விகிதம் ரிசர்வ் வங்கியால் நிர்ணயிக்கப்பட்டு எல்லா வங்கிகளிலும் ஒன்று போலவே இருந்து வந்தது. அண்மையில் ரிசர்வ் வங்கி இந்த வட்டி விகிதத்தை நிர்ணயிக்கும் பொறுப்பை வங்கிகளிடமே விட்டு விட்டது. சில வங்கிகள் கூடுதலான வட்டி அளித்து வருகின்றன.

ஃபிக்ஸ்ட் டெபாசிட் என்று அழைக்கப்படும் நிரந்தர வைப்புக் கணக்குகள் சேமிப்புக்கேன்றே உள்ளன. இவற்றில் அவ்வப்பொழுது சேரும் வட்டியை நமக்குக் கொடுப்பது ஒரு முறை. அப்படிக்கொடுக்காமல் வட்டி சேரும் நாளிலேயே அந்த வட்டியை மீண்டும் வைப்பு செய்து வட்டிக்கு வட்டி அளித்து அந்த வைப்புக் கால முடிவு ஆகும் பொழுது அசல், வட்டி, வட்டிக்கு வட்டி என்று சேர்த்து மொத்தத் தொகையையும் கொடுப்பது இன்னொரு வகை. நம் தேவைக்கேற்ப வைப்பு முறையைத் தேர்ந்தேடுக்கலாம்.

ரெக்கரிங்க் டெபாசிட் எனப்படும் தொடர் வைப்புத் திட்டங்கள் நிரந்தர வைப்புக் கணக்குகளில் ஒரு உட்பிரிவு. இவற்றில் நாம் ஒரு குறிப்பிட்ட தொகையை மாதந்தோறும் சேமித்து வர வேண்டும். நாம் செலுத்தும் எல்லாத் தொகைகளும் குறிப்பிட்ட ஒரே நாளில் கால முடிவு அடையும்.

சேமிப்பை மட்டுமே முன்னிட்டு தொடங்கப்படுவதால் இவ்விதமான நிரந்தர வைப்புக்கணக்குகளில் காசோலைகளோ ஏ டி எம் கார்டுகளோ கிடைக்காது. ஆன்லைனில் பணமாற்றம் செய்யவும் இயலாது. இவ்வித கட்டுப்பாடுகள் இருப்பதால் சேமிப்புக் கணக்குகளை விட இவற்றில் வட்டி விகிதம் அதிகம். வைப்புக் காலம் முடிவதற்க்குள் பணம் தேவைப்பட்டால் எடுக்க முடியும். வங்கிகள் மறுக்க இயலாது. ஆனால் நடப்பு / சேமிப்பு கணக்குகளைப் போல அவ்வளவு எளிதாக இருக்காது. முன்னால் எடுத்தால் வட்டி விகிதமும் குறைந்து விடும். பணம் உடனடியாகத் தேவை ஆனால் நட்டமும் பட வேண்டாமே என்று நினைத்தால் வைப்புத் தொகையின் மேல் கடன் பெற முடியும்.

நிரந்தர வைப்புக் கணக்குகளின் மேல் கொடுக்கும் வட்டி விகிதத்தை வங்கிகள் தங்கள் தேவைக்கேற்ப நிர்ணயிக்கின்றன. வட்டியை மிகவும் குறைத்தால் வாடிக்கையாளர்கள் வேறு வங்கிகளுக்கு சென்று விடுவார்கள். வட்டியை மிகவும் அதிகரித்தால் வங்கிக்கு நட்டம் ஏற்படும். ரிசர்வ் வங்கியின் விதி முறைகளின் படி வங்கிகள் என்ன வட்டி விகிதம் கொடுத்தாலும் அதே வட்டி விகிதத்தை வங்கியின் எல்லாக் கிளைகளிலும் எல்லா வாடிக்கையாளர்களுக்கும் கொடுக்க வேண்டும்.

பாரபட்சம் காட்ட முடியாது. வங்கியில் வேலை செய்பவர்களுக்கும் மூத்த குடிமக்களுக்கும் சற்று அதிகமான வட்டி கொடுக்கப்படுகிறது. கோடிக்கணக்கில் வைப்பு செய்வோருக்கு அந்த உறவின் தேவையைப் பொறுத்து வங்கிகள் வட்டி விகிதத்தை நிர்ணயம் செய்யலாம்.

 

விகடன் இதழ்கள் மற்றும் இ-புத்தகங்களை உங்கள் மொபைலில் படிக்க புதிய Vikatan APP

MUST READ