கலகலப் பக்கம்! - கு.ஞானசம்பந்தன் 'உங்களுக்குக் குரு யாரு?' நண்பர் பரமசாமி, திடீரெனக் கேட்டதும் திகைத்துப் போனேன். 'எந்தக் குருவைக் கேட்கிறீர்கள்? கல்வியிலா? ஆன்மிகத்திலா? வாழ்க்கை வழிகாட்டலிலா?' என்று நான் அடுக்கிக்கொண்டே போக, 'போச்சுடா... உலகத்துல ஒரு ஆளுக்கு இத்தனை குரு இருப்பாங்களா? 'மாதா பிதா குரு’ங்றதுல ஒரு குருதானே வர்றாரு!' என்று ஆச்சரியமாய்க் கேட்டார் பரமு. 'நீங்க சொல்றது உண்மைதான். அந்தக் காலத்துல ஒரு குருநாதர்கிட்டேயே பல்வேறு செய்திகளைக் கத்துக்கிடுவாங்க. அவரும் எல்லாம் தெரிஞ்சவரா இருப்பாரு. ஆனா இன்னைக்கு அப்படியில்ல. கல்வி, இசை, ஓவியம், நாட்டியம், யோகா, ஆன்மிகம் இப்படி எல்லாத்துக்கும் தனித்தனியா குருமார்கள் வந்துட்டாங்க' என்று நான் சொல்ல, 'அதாவது கண் டாக்டர், பல் டாக்டர், சர்க்கரை நோய் டாக்டர்... இதுமாதிரி. அப்படித்தானே?' என்று பரமசாமி கேட்டார். 'விவேகானந்தருக்கு ராமகிருஷ்ணர் ஒருத்தர்தான் குரு. ஆனா ராமானுஜருக்கோ யாதவப் பிரகாசர், திருக்கச்சிநம்பி, திருக்கோஷ்டியூர் நம்பி, பெரியநம்பி எனப் பல குருமார்கள். . .