600 முதல் 1,500 ரூபாயில் பேக்கிங் தரத்தை அறியலாம்! வழிகாட்டும் பேக்கிங் ஆராய்ச்சி நிலையம்!

ஒரு பொருளை எளிதாக விற்பனை செய்ய, அதனுடைய தரம் மட்டும் போதுமானதல்ல. அதன் பேக்கிங்கிலும் கவனம் செலுத்த வேண்டும். குறிப்பாக, விவசாய விளைபொருள்கள் மற்றும் பதப்படுத்த உணவுப் பொருள்களுக்குத் தரமான, வசீகரமான பேக்கிங் என்பது அவசியம். இதனால் நல்ல விலை கிடைப்ப தோடு, அந்தப் பொருள் கொஞ்சமும் சேதாரம் இல்லாமல், பாதுகாப்பாக நுகர்வோரைச் சென்றடைகிறது.

எந்தெந்தப் பொருள்களை எப்படிப் பேக்கிங் செய்ய வேண்டும், இதில் கடைப்பிடிக்க வேண்டிய நவீன யுக்திகள், பேக்கிங்கின் தரத்தை அறியும் கருவிகள் என இது சம்பந்தமான அனைத்துக்கும் வழிகாட்டுகிறது சென்னை, பெருங்குடியில் உள்ள இந்திய பொதிவாக்க தொழில்நுட்பக் கழகம் (Indian Institute of Packaging). மத்திய தொழில் மற்றும் வர்த்தகத் துறையின் கீழ் இயங்கும் இந்நிறுவனம், விவசாயிகள், தொழில்முனைவோர்கள், ஏற்றுமதியாளர்கள் எனப் பல தரப்பினருக்கும் வழிகாட்டி வருகிறது. இந்நிறுவனத்தின் மண்டல இயக்குநர் இரா.பொன்குமாரைச் சந்தித்தோம்.

“1966-ம் ஆண்டு மத்திய வர்த்தக அமைச்ச கத்தின் கீழ் மும்பையில் இந்நிறுவனம் தொடங்கப்பட்டது. அதன் கிளை நிறுவனம் 1971-ம் ஆண்டு, சென்னையில் தொடங்கப் பட்டது. தென்னிந்தியாவில் பேக்கேஜிங்க் எனத் தொடங்கப்பட்ட முதல் ஆராய்ச்சி நிறுவனம் இது. இங்கு வேளாண் விளை பொருள்கள் மற்றும் பதப்படுத்தப்பட்ட உணவுப் பொருள்கள் தரம் குறையாத வகையிலும் நுகர்வோர்களை வசீகரிக்கும் வகையிலும் எவ்வாறு பேக்கிங் செய்யலாம் என்பது குறித்து வழிகாட்டுகிறோம். இது தொடர்பான ஆலோசனைகள் மற்றும் பயிற்சிகள் இங்கு வழங்கப்பட்டு வருகின்றன.

இன்றைக்கு சூப்பர் மார்க்கெட்களிலும், பெரிய காய் கனி அங்காடிகளிலும், ஏற்றுமதி யிலும் அதிக அளவில் வேளாண் விளை பொருள்கள் பயணிக்கத் தொடங்கிவிட்டன. இதில் விளைபொருளின் தன்மையும் பாதிக்கப்படக் கூடாது, அதேசமயம் வாடிக்கையாளர்களைக் கவரும் விதத்திலும் பேக்கேஜிங் இருக்க வேண்டியது அவசியமாகிறது. இதற்காகவே பல்வேறு விதமான ஆராய்ச்சிகளை எங்கள் துறையின் சார்பில் மேற்கொண்டு வருகிறோம். அந்த நவீன பேக்கிங் தொழில்நுட்பங்களையும் கற்றுக் கொடுக்கிறோம்.

பொதுவாக, விவசாயிகள் தாங்கள் உற்பத்தி செய்யும் காய்கறிகள் மற்றும் பழங்களைச் சாக்கில் மூட்டை கட்டியும், கூடைகளில் அடைத்தும் விற்பனைக்கு அனுப்புவதுதான் வழக்கம். இப்படி அனுப்பும் காய்கறிகள், பழங்கள் சம்பந்தப்பட்ட வங்களுக்குப் போய்ச் சேர்வதற்குள் 10 - 20 சதவிகிதம் அளவுக்கு சேதத்தைச் சந்திக்கிறது. இதனால், நாம் அனுப்பும் பொருள்களுக்கு முழுமையான விலை கிடைப்பதில்லை. மாம்பழம், சீத்தாப்பழம், திராட்சை, மாதுளை உள்ளிட்ட பழ வகைகளை மூட்டை கட்டியோ, கூடையில் வைத்தோ அனுப்பும் போது காற்றோட்டம் இல்லாமல் அனுப்பப் படுகிறது. அறுவடை செய்யப்பட்ட காய்கறிகள், பழங்களைக் காற்றோட்டம் இல்லாமல் அடைத்து அனுப்பும்போது, அழுகல், விரைவில் பழுத்துவிடுதல் ஆகிய பாதிப்புகள் ஏற்படும். அதிக அழுத்தத்தால் அடியில் காய்கள், பழங்கள் சேதமடைவதும் நிகழ்கிறது. இதனால் மார்க்கெட்டில் விலையை நிர்ணயிக்கும்போது சேதத்தையும் கணக்கில் கொண்டே விலையை நிர்ணயிப்பதால் உரிய விலை கிடைக்காமல் போகிறது. அதேபோன்று தனிநபர்களுக்கு அனுப்பும்போதும் பழங்கள், காய்கறிகள் கெட்டுப்போய்விட்டால் பிறகு, அடுத்த ஆர்டர் கிடைப்பது அரிதாகிவிடுகிறது. பேக்கேஜிங்கில் முறையான கவனம் செலுத்தா விட்டால் பொருளாதார ரீதியாக நஷ்டத்தைச் சந்திக்க வேண்டியுள்ளது.

இதற்கெல்லாம் தீர்வாகத்தான் பழங்கள் மற்றும் காய்கறிகளைத் துளையுள்ள அட்டைப்பெட்டிகளிலும்... வெங்காயம், உருளைக்கிழங்கு, தேங்காய் ஆகியவற்றை துளையுள்ள ஜூட் (சணல்) சாக்குகளிலும் பேக்்கேஜிங் செய்யப் பரிந்துரைக்கிறோம். ரெடி டூ குக் என்ற முறையில் காய்கறிகளை அனுப்புவதற்கும் சில பேக்கேஜிங் முறைகளைப் பரிந்துரைக்கிறோம். குளிர்சாதன வசதியுள்ள வண்டியில் காய்கறிகள், பழங்களை அனுப்பும் போது எப்படிப் பேக்கேஜிங் செய்ய வேண்டும் என்று பல விஷயங்களைப் பரிந்துரைக்கிறோம்.

அட்டைப்பெட்டிகள் என்றால் எந்தத் தடிமனில் இருக்க வேண்டும், பழங்கள் ஒன்றை யொன்று நெருக்காதவாறு இடையில் வைக்கும் அடுக்குகள் எவ்வளவு தடிமனில் இருக்க வேண்டும் என ஒவ்வொன்றைப் பற்றியும் சொல்லிக் கொடுக்கிறோம். அதேபோன்று பார்சலில் அனுப்பப்படும் பொருள்களின் உறுதித் தன்மையைச் சோதித்தறியும் கருவிகளும் இங்கே உள்ளன. சிறிய அளவில் என்றாலும் சரி, பெரிய அளவில் என்றாலும் சரி, ஒவ்வொன்றுக்கும் அதன் உறுதித்தன்மையைச் சோதித்தறிந்து தெரிவித்துவிடுவோம்” என்றவர் அந்தக் கருவிகள் வைத்திருக்கும் கூடத்துக்கு அழைத்துச் சென்று விளக்கினார்.

உலகளாவிய சோதனை இயந்திரம் (UTM)

“இந்தக் கருவியைக் கொண்டு பிளாஸ்டிக், ஜூட் பேக்குகள் உட்பட அனைத்து வகையான பைகளையும் சோதித்தறியலாம். இந்தக் கருவியின் (Uuniversal Testing Machine) மூலம் சாக்கின் உறுதித்தன்மை, எத்தனை கிலோ வரை எடையைத் தாங்கும், இதன் இழுவிசை என்ன, வெயிலில் வைத்தால் இந்தச் சாக்கு எத்தனை நாள்கள் தாங்கும் உள்ளிட்ட அனைத்து விவரங்களையும் சோதித் தறிந்து சொல்லிவிடுவோம்.

மதிப்புக்கூட்டப்பட்ட தக்காளிச் சாறு, மஞ்சள்தூள், மிளகாய்த்தூள் பாக்கெட் போடும் கவரை சோதித்தறியும் கருவி. எவ்வளவு வெப்பத்தைத் தாங்கும். அதிக வெப்பநிலையில் வெளிப்புறம் பாதிக்கப்படுமா, கசக்கினால் கவர் கிழியுமா? உள்ளிட்ட பலகட்ட சோதனைகள் இதில் மேற்கொள்ளப்படும்.

ஓர் அட்டைப்பெட்டியின் மேல் எத்தனை கிலோ எடை வரை வைக்கலாம். அட்டைப் பெட்டியின் உள்ளே எத்தனை கிலோ எடை வரை வைக்கலாம் என்பதையும் சோதனை செய்கிறோம். பாக்கெட்டுகள் மற்றும் மூட்டை களின் மேல் போடப்படும் சீல் அழியாமல் இருக்குமா என்பது குறித்தும் சோதனை செய்யலாம்.

குறிப்பாக, வெளிநாடுகளுக்கு ஏற்றுமதி செய்யும் பொருள்களை ஒன்றின் மீது ஒன்றாக அடுக்கி வைத்து விடுவார்கள். அதனால் பெட்டிகள் மீது போடப் பட்டிருக்கும் சீல் அழிந்துவிடும். சில இடங்களில் இந்தச் சீல் இல்லாவிட்டால் பொருள்களை எடுக்க மாட்டார்கள். ஆகவே அச்சிடப்பட்ட சீலை சோதித் தறியும் கருவியும் (Scuff tester) இங்குள்ளது. ஓர் அட்டைப் பெட்டி எவ்வளவு கூர்மையைத் தாங்கும் என்று சோதித்தறியும் (Puncture Tester) கருவியும் இங்குள்ளது. பிளாஸ்டிக் கவர்கள் மற்றும் பாட்டில்களை மைக்ரோ ஓவனில் வைத்து... பேக்கிங்கில் உள்ள ரசாயனங்கள், உணவுப் பொருள்களுக்குள் செல்கிறதா, பொருள்கள் பாதிக் கப்படுமா என்பதையும் சோதித் தறிவோம்.

அதிர்வை அறியும் கருவி

லாரியிலோ, கன்டெய்னரிலோ பொருள்கள் செல்லும்போது அட்டைப்பெட்டிக்குள்ளோ, சாக்கு மூட்டைக்குள்ளோ இருக்கும் பொருள்கள் அதிர்வு ஏற்படும்போது உடைபடுமா, அதிர்வைத் தாங்குமா என்று சோதித்தறிவோம். தொழி லாளர்கள் அட்டைப் பெட்டி யையோ, மூட்டையோ தூக்கும் போது அவை தவறுதலாகக் கீழே விழுந்தால் எந்தளவுக்கு இழப்பு ஏற்படும் என்பதை. 3 - 10 அடி உயரம் வரை விழுவது போன்று சோதனை செய்வோம். அதேபோன்று சறுக்கி விழுவது உள்ளிட்ட பலவிதமான சோதனைகளைச் செய்து ஒரு பொதியின் உறுதித் தன்மையைச் சோதித்தறியலாம். ஓர் அட்டைப் பெட்டையில் எத்தனை கிலோ அனுப்பலாம், என்னென்ன வடிவத்தில் பொருள்களை வைக்கலாம், எவ்வளவு வைக்கலாம் போன்ற விவரங்களையும் சொல்லிக் கொடுப்போம்.

இந்த ஆய்வுகள் என்பது, வேளாண் விளைபொருள்களை வெளிநாடுகளுக்கு ஏற்றுமதிக்குச் செய்வதற்கு மட்டுமல்ல... உள்நாட்டு விற்பனைக்கும் அவசியம். காய்கறிகள் மற்றும் பழங்கள் ஊர் விட்டு ஊருக்கும், மாநிலம் விட்டு மாநிலத்துக்கும் பயணிக்க ஆரம்பித்துவிட்டது. அதை முறையாகவும், பாதுகாப்பாகவும் அனுப்புவது மிக முக்கியம். அதற்காகத்தான் இந்தச் சோதனைகள். எல்லாப் பொருள்களையும் சோதித்தறிய வேண்டிய அவசியமில்லை. சாம்பிள்களை மட்டும் கொண்டு வந்து கொடுத்தால் போதும். சோதனை செய்து கொடுத்திடுவோம். வேளாண் ஏற்றுமதி செய்யும் பெரிய நிறுவனங்கள், உணவுப் பதப்படுத்தும் தொழிலில் ஈடுபட்டுள்ள நிறுவனங்கள், மதிப்புக்கூட்டலில் ஈடுபட்டுள்ள நிறுவனங்கள் தாங்களாகவே இதுபோன்ற கருவிகளை வைத்திருக்கும். ஆனால், புதிதாகக் காய்கறி, பழங்கள் விற்பனை தொழில் ஈடுபடும் விவசாயிகள், தொழில்முனைவோர், வியாபாரி களிடம், பேக்கிங் சோதனை செய்யும் கருவிகள் இருக்க வாய்ப்பில்லை. அவர்கள் இங்கு சோதனை செய்துகொள்ளலாம். இந்தச் சோதனைகள் செய்ய 600 ரூபாயிலிருந்து 1,500 ரூபாய் வரை கட்டணம் வாங்குகிறோம். இதிலேயே இன்னும் ஆழமான விஷயங்களைத் தெரிந்துகொள்ள வேண்டுமென்றால் அதற்குக் கூடுதல் கட்டணம் ஆகும். சோதித்தறிவதற்கென்றே ஒரு குழு இங்கே செயல்படுகிறது” என்று சொல்லி விடைகொடுத்தார்.

தொடர்புக்கு:

மண்டல இயக்குநர், இந்திய பொதிவாக்க தொழில்நுட்பக் கழகம் (Indian Institute of Packaging), 169, இண்டஸ்ட்ரியல் எஸ்டேட், 2-வது மெயின் ரோடு, பர்மா காலனி, பெருங்குடி, சென்னை.

பொன்குமார்,

செல்போன்: 93821 99089

ஐ.எஸ்.ஓ தரம்

அட்டைப்பெட்டி, பிளாஸ்டிக் மட்டுமல்லாமல் மரம், கண்ணாடி, உலோகம், காகிதம் என எவற்றால் செய்யப்பட்ட பொருளானாலும் அதன் உறுதித்தன்மையைச் சோதித்தறிந்து சொல்வோம். இங்கே ஐ.எஸ்.ஓ தரத்தில் சோதனை செய்து கொடுக்கிறோம். மொத்தம் 200 வகையான சோதனைகளை எங்கள் கூடத்தில் மேற்கொள்கிறோம். ஒரு பேக்கிங் மெட்டீரியலின் தாங்கும் திறன், ரசாயன திறன், போக்குவரத்துக்கான தரம் உள்ளிட்ட எல்லாவற்றையும் சோதித்தறிந்து கொடுப்போம். இங்கு உலகத் தரத்திலான சோதனைகளை மேற்கொள்கிறோம். அதனால் மற்ற நாடு களும் இதை ஏற்றுக்கொள்கின்றன.

பயிற்சிகள்

இரண்டு ஆண்டுக்கான முதுகலைப் படிப்புகளையும், ஓர் ஆண்டுக்கான சான்றிதழ் படிப்புகளையும் (Certified Packaging Engineer), நேரடியாகவும் ஆன்லைனிலும் நடைபெறும். இதைக் கற்றுக் கொண்டு பேக்கிங் துறை சார்ந்த பணிகளுக்குச் செல்லலாம். தனியாக பேக்கிங் பணிகளையும் எடுத்துச் செய்யலாம். நிறைய தொழில் வாய்ப்புகள் இந்த பேக்கிங் துறையில் உள்ளன. 

எந்தெந்த மையங்களில் என்னென்ன பயிற்சிகள் நடைபெறும் என்ற முழு விவரங்களை www.iip-in.com என்ற வலைதளத்தில் தெரிந்துகொள்ளலாம். அவ்வப்போது பேக்கிங்கில் உள்ள நவீன தொழில்நுட்பங்கள், உணவுப் பாதுகாப்புத் துறை தரும் பேக்கிங்கான விதிமுறைகள், பிளாஸ்டிக்குக்கு மாற்றான தொழில்நுட்பங்கள் எனப் பல பயிற்சிகளை நடத்தி வருகிறோம். தேவைப்படுபவர்கள் கலந்துகொண்டு பயன்பெறலாம்.