''நடராசனின் வீட்டுக் காவலில் ஜெயலலிதா!'' - சசிகலா வீழ்ந்த கதை - அத்தியாயம் 8



Sponsored



தொடரின் முந்தைய பகுதியைப் படிக்க இங்கே க்ளிக் செய்யவும்

1989 மார்ச் 25-ம் தேதி நடைபெற்ற சட்டசபை மோதல் சம்பவத்துக்குப்பின், தீவிர அரசியலில் ஈடுபடாமல் இருந்தார் ஜெயலலிதா. மே, ஜூன் மாதங்களில் ஜெயலலிதாவின் சுவடே வெளியே தெரியவில்லை. இதனால், 'ஜெயலலிதா எங்கிருக்கிறார்?' என்ற விமர்சனங்கள் எழுந்தன. 'உடல்நலக் குறைவு காரணமாக மருத்துவமனையில் ஜெயலலிதா சிகிச்சைப் பெற்று வருகிறார்' என்கிற செய்திகள் வலிந்து பரப்பப்பட்டன.

Sponsored


'உடல்நலக் குறைவு காரணமாக அரசியலில் தீவிரமாக ஈடுபடாமல் இருந்த ஜெயலலிதா, விரக்தி நிலைக்குப் போனார்' என பத்திரிகைகளில் செய்திகள் வெளியாகி கொண்டிருந்தன. 'ஜெயலலிதாவுக்கு விரக்தியா?' என்ற தலைப்பில் செய்தி ஒன்றை பதிவு செய்தது தினமணி.

Sponsored


'சென்னையிலா... பெங்களூரிலா... ஜெயலலிதா எங்கிருக்கிறார்?' என இரண்டு மாதங்களாக மர்மம் நீடித்து வந்த நிலையில், இரண்டு பத்திரிகைகள் மீது சென்னை உயர் நீதிமன்றத்தில் அவதூறு வழக்குகள் போட்டார் ஜெயலலிதா. இதுதொடர்பான ஆவணங்களில், ஜெயலலிதா கைழுத்திட்டிருந்தார். அதை வைத்து அவர் சென்னையில்தான் இருக்கிறார் என பேசப்பட்டன. இந்த அவதூறு வழக்குக்குப் பின்னணியும் உண்டு. வழக்கு போடப்பட்ட பத்திரிகைகளில் அப்போது வெளியாகிக் கொண்டிருந்த 'தராசு' பத்திரிகையும் ஒன்று. 'தராசு' மீது வழக்கு பாய்ந்த கதையை பார்ப்போம்.

'ஜெயலலிதா எங்கிருக்கிறார்? என கண்டுபிடித்து, அவரை நீதிமன்றத்தில் ஆஜர்படுத்த வேண்டும்' என 'தராசு' வார இதழின் ஆசிரியர் ஷ்யாம் சென்னை உயர் நீதிமன்றத்தில் ஹேபியஸ் கார்பஸ் மனு ஒன்றைப் போட்டார். அந்த மனுவில் என்ன சொல்லியிருந்தார்?

'பொது மக்கள் நலன்கருதி, இந்த ரிட் மனுவை போட்டிருக்கிறேன். ஜெயலலிதாவின் ஆலோசகர், குடும்ப நண்பர் என கூறப்படும் எம்.நடராசன் மற்றும் அவரது ஆட்கள் ஜெயலலிதாவை சட்டவிரோதமாக அடைத்து வைத்திருப்பதாகத் தெரிகிறது. அரசியல் மற்றும் பொது விஷயங்கள் குறித்து, ஜெயலலிதாவின் கருத்தை கேட்க, நிருபர் சென்றால் அவரைப் பார்க்க முடியவில்லை. அவர் பெங்களூர் அருகே உள்ள ஒரு மருத்துவமனையில் சிகிச்சைப் பெற்று வருவதாக நடராசன் கூறுகிறார். ஆனால், அங்கே சென்று பார்த்தால், ஜெயலலிதா இல்லை. பொது விஷயங்கள் குறித்து ஜெயலலிதாவின் கருத்தையறிய பொது மக்களுக்கு உரிமையுண்டு. எனவே, ஜெயலலிதாவை நீதிமன்றத்தில் ஆஜர்படுத்தி, அவரை சுதந்திரமாக நடமாட விட வேண்டும்.' என அந்த மனுவில் சொல்லியிருந்தார் ஷ்யாம்.

ஜெயலலிதாவை நேரில் ஆஜர்படுத்த கோரும் ஹேபியஸ் கார்பஸ் மனு உயர் நீதிமன்றத்தில் தாக்கல் செய்த அதே நேரம், அப்போது சபாநாயகராக இருந்த தமிழ் குடிமகனிடமும் ஒரு மனு அளிக்கப்பட்டது. ஜெயலலிதாவின் சொந்த தொகுதியான போடியிலிருந்து வாக்காளர் ஒருவர், சட்டமன்ற செயலகத்தில் மனு ஒன்றை அளித்தார். 'எதிர்க் கட்சித் தலைவர் ஜெயலலிதாவை சட்டசபையில் ஆஜர்படுத்த சபாநாயகர் உத்தரவிட வேண்டும்' என அவர் கேட்டிருந்தார். ''எதிர்க்கட்சித் தலைவரை சட்டப்பேரவையில் நேரில் ஆஜர்படுத்தும்படி போலீஸாருக்கு உத்தரவிட முடியாது'' என சொன்னார் தமிழ் குடிமகன்.

ஷ்யாம் போட்ட வழக்கு, நீதிபதிகள் எஸ்.சிவசுப்பிரமணியன், டி.எஸ்.அருணாசலம் ஆகியோர் அடங்கிய டிவிஷன் முன்பு  1989 ஜூன் 20-ம் தேதி விசாரணைக்கு வந்தது. மனுவை விசாரணைக்கு ஏற்காமலேயே தள்ளுபடி செய்தது உயர் நீதிமன்றம். உத்தரவில் நீதிபதிகள் சொன்ன விஷயம் இதுதான்.

'பொது மக்கள் நன்மை கருதி இந்த மனு தாக்கல் செய்யப்பட்டது என்பதை ஏற்க முடியாது. அதற்கான ஆதாரங்களை நீதிமன்றம் திருப்திபடுத்தும் வகையில் மனுதாரர் வைக்கவில்லை. ஜெயலலிதா சட்டவிரோதமாக அடைத்து வைக்கப்பட்டிருக்கிறார் என்பதற்கு எவ்வித முகாந்திரமும் மனுதாரர் கூறவில்லை. ஏதோ அனுமானத்தின் பெயரால் இந்த மனு தாக்கல் செய்யப்பட்டுள்ளது. காற்றுவாக்கில் கேள்விப்பட்ட செய்திகளைக் கொண்டு, ஜெயலலிதா எங்கேயோ அடைத்து வைக்கப்பட்டுள்ளார் என முடிவு செய்து, மனு தாக்கல் செய்துவிட்டார் மனுதாரர். எதிர்க் கட்சித் தலைவராக உள்ள ஒருவரை, தனிப்பட்ட ஒருவர் எப்படி சட்டவிரோதமாக அடைத்து வைத்திருக்க முடியும்? என்பதை எங்களால் புரிந்து கொள்ள முடியவில்லை. அவர் சார்ந்துள்ள கட்சித் தொண்டர்களோ தலைவர்களோ ஜெயலலிதாவை நடராசன் அடைத்து வைத்துள்ளார் என்பது பற்றி எந்தவிதமான புகாரையும் கூறவில்லை. நிருபரோ அல்லது பொது மக்களோ ஒரு தலைவரிடம் இருந்து, கருத்துகளை எதிர்பார்க்க எப்படி உரிமையுள்ளதோ அதே போல், அந்தத் தலைவர், அவர்களிடமிருந்து ஒதுங்கியிருக்க உரிமையுண்டு. ஜெயலலிதாவைப் பல இடங்களில் தேடியதாக மனுதாரர் கூறியிருக்கிறார். அவர் போலீஸாரின் உதவியை நாடியதாகத் தெரியவில்லை. தேவைப்பட்டால் அவர் போலீஸாரின் உதவியை நாடலாம்.' என சொன்னார்கள் நீதிபதிகள்.

ஷ்யாம் சார்பில் ஆஜராகிய வழக்கறிஞர் எஸ்.கிருஷ்ணசாமி, ''சுப்ரீம் கோர்ட்டில் அப்பிள் மனு தாக்கல் செய்ய அனுமதி வேண்டும்'' எனக் கேட்டார். ஆனால், நீதிபதிகள் அனுமதி தரவில்லை.

அதன்பிறகு என்ன நடந்தது? 

தொடரும்...



Trending Articles

Sponsored