ஜெயலலிதாவுக்கு மிகப் பிடித்த பிறந்த நாள் பரிசு எது தெரியுமா?



Sponsored



"இந்த வலிமை - தைரியம் எங்கிருந்து வந்தது?'' என்று ஒருமுறை நிருபர் கேட்கிறார்.''எனக்குள்ளே இருப்பது! எங்கிருந்தாவது வருமா என்ன?அது எனக்குத் தெரியாது...'' என்று சிரிக்கிறார் ஜெயலலிதா. அந்த அளவுக்கு அவரிடம் தைரியமும், துணிச்சலும் கொட்டிக்கிடந்தது.

வேதவள்ளி - ஜெயராம் தம்பதிகளுக்கு 24.2.1948 -ம் ஆண்டு பிறந்த ஜெயலலிதாவின் இயற்பெயர் கோமலவள்ளி ஜெயராம். திரைப்படத்துறைக்கு வந்த பிறகு தனது பெயரை ஜெயலலிதா என மாற்றிக் கொண்டார். ஸ்ரீதர் இயக்கிய, 'வெண்ணிற ஆடை' படத்தின் மூலம் திரையுலகில் அறிமுகமான ஜெயலலிதா. எம்.ஜி.ஆரின் நம்பிக்கை நட்சத்திரமாக ஜொலிக்கத் தொடங்கினார். அரசியலில் 'கொள்கை பரப்புச் செயலாளர்' பதவியில் தொடங்கி 'தமிழகத்தின் இரண்டாவது பெண் முதலமைச்சர்' என்ற உயரிய பதவிவரை இட்டுச்சென்றது.

Sponsored


ஆனந்த விகடனில் நினைவு கூர்ந்த ஜெயலலிதா !

Sponsored


ஆறுமுறை தமிழக முதலமைச்சர் பதவியை அலங்கரித்த அவர், கடந்த 2016-ம் ஆண்டு டிசம்பர் 5-ம் தேதி  உடல் நலக்குறைவு காரணமாக மரணமடைந்தார். தைரியமும் துணிச்சலும் மிக்க பெண்மணியாகத் திகழ்ந்த ஜெயலலிதாவின்  69-வது பிறந்தநாள் இன்று கொண்டாடப்படுகிறது. 'நடிகை முதல் முதலமைச்சர் வரை...' என பலப் பதவிகளை கடந்து வந்துள்ளார். அந்த காலக்கட்டங்களில் பிறந்த நாள் கொண்டாடிய ஜெயலலிதாவுக்கு ரசிகர்கள், தொண்டர்கள், அதிகாரிகள், அமைச்சர்கள்... என அனைவரும் வரிசையில் நின்று வாழ்த்து சொல்லியிருக்கிறார்கள்.

முதலமைச்சராக உயர் பதவியில் இருந்தபோது எளிதில் யாரும் அணுகமுடியாதவராக இருந்த ஜெயலலிதா , நடிகையாக இருந்தபோது அவருடைய எண்ணச் சிறகுகளை மிக அழகாக விரித்து பறந்துள்ளார். அவர் நடிகையானபிறகு கொண்டாடிய முதல் பிறந்த நாளில், தனக்கு சிறப்பு பரிசுகள் கொடுத்தவர்கள் குறித்து ஆனந்த விகடனில் மனம் திறந்துள்ளார். வாரம் ஒரு நட்சத்திரம் பகுதியில், 'ஜெயலலிதா பேசுகிறார்' என்று வெளியான கட்டுரையில்தான் இதனை தெரிவித்துள்ளார்.

அதில் "சென்னைக்கு வந்த நாள் முதலாக மாதவன்தான் எங்கள் குடும்ப டிரைவர். சிறு வயதில் இருந்தே என் பிறந்த நாளில் எனக்கு இனிப்பு வாங்கிக் கொடுப்பது மாதவனின் வழக்கம். இந்தப் பிறந்த நாளில் மாதவனுக்கு உடல்நிலை சரியில்லாத காரணத்தால் மருத்துவமனையில் அனுமதித்து இருந்தோம்.தினமும் வீட்டில் இருந்து வேலை ஆள் சாப்பாடு கொண்டு கொடுத்து வருவான். இந்த பிறந்த நாளன்று வேறு ஆள்மூலம் இனிப்பு வந்து சேர்ந்தது. அதை வாங்கிக் கொள்ளும்போது என் கண்கள் பனித்தது. பிறந்த நாளன்று எனக்குக் கிடைத்த எவ்வளவோ விலை உயர்ந்த பரிசுகள் எல்லாவற்றையும் விட, மாதவன் கொடுத்த அந்த இனிப்புதான் விலை மதிக்க முடியாதவை.'' என்று அந்தக் கட்டுரையில் தெரிவித்துள்ளார் ஜெயலலிதா.

அரசியல் களத்தில், அவர் வெற்றிடத்தை விட்டுச் சென்றாலும் திரைத்துறையில், ஆயிரம் ஆயிரம் நீங்கா நினைவுகளை பரிசாகத் தந்துவிட்டுச் சென்றுள்ளார் ஜெயலலிதா!

கே.புவனேஸ்வரி



Trending Articles

Sponsored