இந்த 10 பழகிய அறிகுறிகள் இருந்தால்.... அலட்சியம் வேண்டாம்...! #HealthAlert



சிலருக்கு அடிக்கடி தலைவலி வரும். அதைப் பொருட்படுத்தாமல், தைலத்தைத் தேய்த்துக்கொண்டோ, ஒரு மாத்திரையை போட்டுக்கொண்டோ வேறு வேலையைப் பார்க்கப் போய்விடுவார்கள். சிலர் எல்லாப் பருவநிலைகளிலும் சளி, இருமலால் பாதிக்கப்படுவார்கள். மருந்துக்கடையில் ஏதாவது ஒரு மாத்திரையை வாங்கிச் சாப்பிடுவதோடு விட்டுவிடுவார்கள். சிலருக்கு நெஞ்சுப்பகுதியில் அடிக்கடி வலி எடுக்கும். வாய்வுக் கோளாறு என்று தங்களைத் தாங்களே சமாதானப்படுத்திக்கொண்டு வீட்டு வைத்தியமாக எதையாவது செய்துவிட்டு விட்டுவிடுவார்கள். `இப்படித் தொடர்ச்சியாக சில உடல் உபாதைகள் ஏற்பட்டால், கவனக்குறைவாக இருக்கக் கூடாது’ என்கிறார்கள் மருத்துவர்கள்.

Sponsored


எந்த நோயும் அறிகுறிகள் இல்லாமல் ஒருவரை பாதிப்பதில்லை. அறிகுறி ஏற்படும்போதே அலெர்ட்டாகிவிட்டால், பெரிய பிரச்னைகள் வராமல் நம்மைக் காத்துக்கொள்ளலாம். எனவே, சில குறிப்பிட்ட நோய் அறிகுறிகள் தென்பட்டால், அதை உதாசினப்படுத்திவிடக் கூடாது; ஒதுக்கக் கூடாது. அப்படியான சில முக்கியமான அறிகுறிகள் குறித்து விளக்குகிறார் மருத்துவர் சுந்தர்ராமன்.

Sponsored


* நெஞ்சுப் பகுதியில் அழுத்தமாக உணர்வது, இதயம் இறுகுவதுபோல உணர்வது, தாங்க முடியாத தொடர்வலி... முதலியவை உடனே கவனிக்கப்பட வேண்டியவை. இவை இதயம் தொடர்பான கோளாறுகளுக்கான அறிகுறிகளாகவும் இருக்கலாம். எனவே, தாமதிக்காமல் உடனே மருத்துவரை அணுகவும்.

Sponsored


* வழக்கத்தைவிட வேகமாக மூச்சுவிடுவது, திடீரென்று மூச்சு அதிகரிப்பது அல்லது திணறுவது. குறிப்பாக மூச்சிரைப்பு (Wheezing) ஆகியவை மிக ஆபத்தானவை. இவை, நுரையீரல் மற்றும் இதயம் தொடர்பான பிரச்னைகளுக்கான அறிகுறிகள் என்பதால், தாமதிக்காமல் மருத்துவ ஆலோசனை பெற வேண்டும்.

* திடீரென்று தாங்க முடியாத தலைவலி ஏற்படுவது, மூளை தொடர்பான பிரச்னைகளுக்கான முக்கியமான அறிகுறி. தலைவலியுடன் சேர்த்து கண்களில் பாதிப்பு ஏற்படுவது, இன்னும் ஆபத்தானது. குறிப்பாக, கண்களின் பின்பகுதியில் வலிப்பது, பார்வை மங்கலாகத் தெரிவது போன்ற அறிகுறிகள் இருந்தால் உடனடியாக மருத்துவரை அணுக வேண்டும்.

* குறிப்பிட்ட சில காலங்களுக்குள் உடல் எடை அதிகம் குறைவதும் கவனிக்கப்பட வேண்டிய ஒன்றே. சர்க்கரைநோய், நாளமில்லாச் சுரப்பி பாதிப்புகள், புற்றுநோய் போன்றவற்றுக்கான அறிகுறிகளாகவும் இவை இருக்கலாம்.

* நவ துவாரங்களில் (நம் உடலில் இருக்கும் ஒன்பது துவாரங்கள்) எந்த துவாரத்திலிருந்து ரத்தம் வெளியேறினாலும் ஆபத்து. வாந்தி, சளி, காது, கழிவுகள் என எதன் மூலம் ரத்தம் வெளியேறினாலும் உடனடியாக மருத்துவரை அணுக வேண்டும். இவற்றைக் கண்டுக்கொள்ளாமல் தொடரவிடுவது புற்றுநோய், நிமோனியா, காசநோய் போன்றவற்றுக்கு வழிவகுக்கக்கூடும்.

*உடலின் ஏதாவது ஒரு பகுதியில் தொடர்ந்து கட்டிகள் வருவதும் ஆபத்தே. பெரும்பாலும் இவை புற்றுநோய்க்கான அறிகுறிகளாக இருக்கும்.

* சிலருக்கு அடிவயிற்றில் அடிக்கடி வலி எடுக்கும். இந்தப் பிரச்னை இருக்கும் பலர், அது செரிமானக் கோளாறாக இருக்கலாம் என்று சுய மருத்துவம் செய்துகொள்வதைக் காணலாம். உண்மையில் நீர்க்கட்டி, அல்சர், குடல்வால் அழற்சி, குடல் பாதிப்புகள் போன்றவற்றின் அறிகுறிகளாகவும் அடிவயிற்றில் வலி இருக்கக்கூடும்.

* தொடர் நெஞ்செரிச்சல் இருப்பவர்கள் (இரண்டு வாரங்களுக்கும் மேலாக) மருத்துவரை அணுகவேண்டியது அவசியம்.

* வாந்தி, தொடர் வயிற்றுப்போக்கு, அதிகளவு காய்ச்சல்... இவை மூன்றும் ஏற்பட்டு, இரண்டு நாள்களுக்கும் மேலாக உடல் வலுவின்றி இருப்பவர்கள் உடனடியாக மருத்துவரை அணுக வேண்டும்.

* பார்வையில் பிரச்னை. கிட்டப்பார்வை, தூரப்பார்வை போன்ற பார்வைக் குறைபாடுகள் இருப்பது பிரச்னை இல்லை. மாறாக, அதிக வெளிச்சம்பட்டது போன்ற உணர்வு ஏற்படுவது, கண்களில் ஃப்ளாஷ் அடித்தது போன்ற உணர்வு அடிக்கடி ஏற்படுவது, கண் சிவப்பாக மாறுவது, பொருள்கள் இரட்டையாகத் தெரிவது, கண்களின் உள்ளே வலி எடுப்பது போன்ற அறிகுறிகள் இருந்தால் உடனடியாக மருத்துவரை அணுக வேண்டும்.


 



Trending Articles

Sponsored