நாப்கின் சில உண்மைகள்...



பீரியட்ஸின்போது பெரும்பாலும் துணி பயன்படுத்திய காலம் ஒன்று இருந்தது. அதனால், பெண்களுக்குப் பல சுகாதாரக் குறைபாடுகள், பிரச்னைகள் உண்டாகின. நாப்கின் பரவலான பிறகு, ஒரு நாளைக்கு எத்தனை பேட் வைப்பது? ஒரு பேடை எவ்வளவு நேரம் வைத்திருப்பது? ரத்தப்போக்கு குறைவாக இருக்கும்போது நாள் முழுக்க ஒரு பேட் போதுமா? சிந்தெடிக் பேட் நல்லதா, காட்டன் பேட் நல்லதா? சிந்தெடிக் பேட் வைத்தால் அந்த இடத்தில் கேன்சர் வருமா? இப்படி எக்கச்சக்க சந்தேகங்கள், குழப்பங்கள் இன்றைய பெண்களிடம் ஏற்பட்டுள்ளன. எல்லாவற்றுக்கும் பதில் சொல்கிறார், மகப்பேறு மருத்துவர் நிவேதா பாரதி. 

Sponsored


சிந்தெடிக் பேட் சிலருக்கு அலர்ஜியையும் அரிப்பையும் ஏற்படுத்துவது உண்மைதான். இது, தனி நபர் சம்பந்தப்பட்ட விஷயம். எல்லாருக்கும் இப்படி நிகழும் என்பதில்லை. 

Sponsored


நம் ஊரில் ஒரு நாப்கின் முழுக்க நனைகிற வரை அதை மாற்றுவதில்லை. இது தவறான பழக்கம் சகோதரிகளே. நான்கு மணி நேரத்துக்கு ஒரு முறை மாற்றிவிட வேண்டும். 

Sponsored


குறைந்தபட்சம் 3 மணி நேரத்திலிருந்து 4 மணி நேரம் வரை ஒரு நாப்கினை வைத்திருக்கலாம். அதற்கு முன்பே நனைந்து கசகசப்பு வந்துவிட்டால், உடனே மாற்றிவிடுவது நல்லது. 

ஒரு சிலர் ஈர கசகசப்பைத் தவிர்க்க, சிந்தெடிக் லேயருடன் வருகிற பேட்களை வைக்கிறார்கள். ஈர உணர்வுதான் இல்லையே என மாலை வரை ஒரே நாப்கினை வைத்திருக்கிறார்கள். இதனால், அரிப்பு, அலர்ஜி உண்டாகும். காட்டன், சிந்தெடிக் என்று எந்த வித்தியாசமும் இல்லை. இந்த இரண்டில் எது பெஸ்ட் என்று பார்த்தால், காட்டன்தான். 

இன்றைய இளம் பெண்கள் டைட்டாக பேன்ட் அணிந்து, சிந்தெடிக் நாப்கினும் பயன்படுத்துகிறார்கள். இதனால், அலர்ஜி வர நிறைய வாய்ப்புள்ளது. இன்பெக்‌ஷனும் உண்டாகலாம். 

ஒரு நாப்கினை நீண்ட நேரம் வைத்திருந்தால், சிலருக்கு யூரினரி டிராக்கில் இன்பெக்‌ஷன் உண்டாகும். 

இந்தச் சமயத்தில், 'அடிக்கடி யூரின் போகவேண்டியுள்ளதே' எனத் தண்ணீர் குடிப்பதைக் குறைப்பது தவறு. தண்ணீரும் குடிக்காமல், பேடையும் நீண்ட நேரம் மாற்றாமல் இருப்பது ஆரோக்கியமல்ல. வேலைப் பரபரப்பில், நிறையப் பெண்கள் இந்தத் தவற்றை செய்கிறார்கள். வேலையைவிட முக்கியம் ஆரோக்கியமல்லவா? 

சில பெண்கள் பீரியட்ஸ் சமயத்தில், பிறப்பு உறுப்பில் வெப்பமாக பீல் பண்ணுவார்கள். இதை இன்பெக்‌ஷன் என்று நினைத்துப் பயந்துவிட வேண்டாம். 

சிலருக்குப் பிறப்பு உறுப்பு ரணமாகி, குளிர்ந்த நீர் பட்டாலும், திகுதிகுவென்று எரியும். இதுவும் யூரினரி இன்பெக்‌ஷன் கிடையாது. பீரியட்ஸ் சமயத்தில் இப்படி ரணமாவது சகஜமே. 

முதல் நாளில் ரத்தப்போக்கைப் பொறுத்து, அடிக்கடி பேட் வைத்துக்கொள்ளூம் பெண்கள், மூன்றாம் நாளில் ரத்தப்போக்கு குறைந்துவிட்டது என்று ஒரே பேடையே பயன்படுத்துவது தவறு. 

நாப்கினைப் பொறுத்தவரை விலை அதிகமானது, குறைவானது என்று கிடையாது. எது உங்களுக்கு அரிப்பை, அலர்ஜியை தரவில்லையோ, அதைப் பயன்படுத்துங்கள். 

டெலிவரியான பிறகு பயன்படுத்தும் திக் காட்டன் பேட் கம்ஃபர்டபிள் கிடையாது. அது நல்லதுதான் என்றாலும், வீட்டில் இருக்கும்போது பயன்படுத்தலாம். 

கடைசியாக ஒரு விஷயம், ஒரு பேடை அதிக நேரம் வைத்திருந்தால், கேன்சர் வரும் என்பதெல்லாம் பொய். இந்த கேன்சர் பயம் பெண்களை விட்டுப்போக, இன்னும் தெளிவாகச் சொல்கிறேன். ஒரு கூர்மையான பல், இரவும் பகலும் கன்னத்துத் தசையைக் கீறிக்கொண்டே இருந்தால், அது கேன்சராக மாறலாம். இந்த தியரி, நாப்கினுக்குப் பொருந்தாது. அது ஒன்றும் வருடக் கணக்கில் 24 மணி நேரமும் உங்கள் அந்தரங்க உறுப்பை உரசிக்கொண்டே இருப்பதில்லையே. அதனால், கேன்சர் வர வாய்ப்பே இல்லை. பீரியட்ஸை உங்களுக்கு செளகர்யமான நாப்கினுடன் எந்தவித பயமுமின்றி கடந்து வாருங்கள்!



Trending Articles

Sponsored