முன்னாள் பிரதமர் `பாரத ரத்னா’ வாஜ்பாய் காலமானார்!



டெல்லி எய்ம்ஸ் மருத்துவமனையில் சிகிச்சைப் பெற்று வந்த முன்னாள் பிரதமர் அடல் பிகாரி வாஜ்பாய் உடல்நலக் குறைவால் இன்று மாலை காலமானார். 

Sponsored


பா.ஜ.க-வின் மூத்த தலைவரும் முன்னாள் பிரதமருமான அடல் பிகாரி வாஜ்பாய் வயது மூப்பின் காரணமாகவும், சிறுநீர்த்தொற்று நோய் ஏற்பட்டதாலும் டெல்லியில் உள்ள எம்ய்ஸ் மருத்துவமனையில் கடந்த சில தினங்களுக்கு முன்பு அனுமதிக்கப்பட்டார். அவருக்கு, தலைமை மருத்துவர்களின் மேற்பார்வையில் சிகிச்சை அளிக்கப்பட்டு வந்தது. முன்னதாக, வாஜ்பாயின் உடல்நலத்தில் பின்னடைவு ஏற்பட்டுள்ளதாக நேற்று இரவு மருத்துவமனை அறிக்கை வெளியிட்டது. அறிக்கை வெளியானதும் பா.ஜ.க தலைவர்களும் தொண்டர்களும் பதற்றத்தில் ஆழ்ந்தனர். அதன் பின்னர், மருத்துவர்களின் தீவிர கண்காணிப்பில் வாஜ்பாய்க்கு தொடர் சிகிச்சை அளிக்கப்பட்டது. 

Sponsored


இதையடுத்து, பிரதமர் மோடி, சுஷ்மா ஸ்வராஜ், அத்வானி, ராஜ்நாத் சிங், காங்கிரஸ் தலைவர் ராகுல் காந்தி உள்ளிட்ட தலைவர்கள் மருத்துவமனைக்கு நேரில் சென்று  நலம் விசாரித்தனர். இவர்களைத் தொடர்ந்து, துணை ஜனாதிபதி வெங்கைய நாயுடு, டெல்லி முதல்வர் அரவிந்த் கெஜ்ரிவால், பா.ஜ.க தலைவர் அமித் ஷா உள்ளிட்டோரும் இன்று காலை நேரில் சென்று உடல்நிலை குறித்துக் கேட்டறிந்தனர். இந்த நிலையில், வாஜ்பாயின் உடல்நிலை மேலும் பின்னடைவு ஏற்பட்டதாகப் புதிய அறிக்கையை மருத்துவமனை வெளியிட்டது. இதனால், பா.ஜ.க-வின் முக்கிய தலைவர்கள் மருத்துவமனைக்கு விரைந்தனர். இந்த நிலையில் இன்று மாலை 5.05-க்கு வாஜ்பாய் காலமானார் என்று எய்ம்ஸ் மருத்துவமனை அறிவித்துள்ளது.

மத்தியப் பிரதேச மாநிலம் குவாலியரில் 1924-ம் ஆண்டு டிசம்பர் 25-ம் தேதி பிறந்த வாஜ்பாய் தனது 93 வயதில் மரணம் அடைந்தார்.

Sponsored


அடல் பிகாரி வாஜ்பாய்... இந்திய அரசியல் வரலாற்றில், குறிப்பாக பி.ஜே.பி-யின் அதீத வளர்ச்சியில் இவரைத் தவிர்த்துவிட்டு எந்தவொரு தலைவரையும் சொல்லிவிட முடியாது எனலாம்... மேலும் படிக்க...

பிரதமர் மோடி இரங்கல்:

முன்னாள் பிரதமர் வாஜ்பாய் வயது மூப்பின் காரணமாக நீண்ட காலமாக அரசியலில் இருந்து ஓய்வில் இருந்துவந்தார். இந்தநிலையில், அவருக்குச் சிறுநீரகத்தில் ஏற்பட்ட தொற்று காரணமாகக் கடந்த ஜூன் 11-ம் தேதி டெல்லி எய்ம்ஸ் மருத்துவமனையில் அனுமதிக்கப்பட்டார். அங்கு சிறுநீரகத் தொற்று உள்ளிட்ட பிரச்னைகளுக்கு சிகிச்சை எடுத்து வந்தார். அவரை பிரதமர் மோடி, காங்கிரஸ் தலைவர் ராகுல்காந்தி உள்ளிட்ட அரசியல் தலைவர்கள் சந்தித்து நலம் விசாரித்தனர். இந்தநிலையில் நேற்று அவரின் உடல்நிலை குறித்து டெல்லி எய்ம்ஸ் மருத்துவமனை அறிக்கை ஒன்றை வெளியிட்டிருந்தது. அதில், ``அவரது உடல்நிலையில் தொடர்ந்து பின்னடைவு ஏற்பட்டு, கவலைக்கிடமாக இருக்கிறது என்றும், அவருக்கு உயிர்காக்கும் மருத்துவ உபகரணங்கள் உதவியுடன் தொடர்சிகிச்சை அளிக்கப்பட்டு வருகிறது" என்றும் தெரிவிக்கப்பட்டது. இதற்கிடையே, சிகிச்சை பலனின்றி இன்று மாலை 5.05 மணிக்கு வாஜ்பாய் மரணமடைந்தார். இதை எய்ம்ஸ் மருத்துவமனை அதிகாரபூர்வமாக அறிவித்துள்ளது. அவரின் மறைவுக்குப் பிரதமர் மோடி இரங்கல் தெரிவித்துள்ளார். 

இதுகுறித்து ட்விட்டரில் பதிவிட்டுள்ள அவர், ``வாஜ்பாய் அளித்த உத்வேகம், வழிகாட்டல், ஒவ்வோர் இந்தியருக்கும் பா.ஜ.க-வினருக்கும் இருக்கும். அவரின் மறைவு ஒரு சகாப்தத்தின் முடிவை குறிக்கிறது. வாஜ்பாய் தேசத்துக்காக வாழ்ந்து வந்தவர். அடல் ஜீ தலைமையில், 21-ம் நூற்றாண்டின் வலுவான, வளமான உள்ளடக்கிய இந்தியாவின் அஸ்திவாரங்கள் ஏற்படுத்தப்பட்டன. அவரின் கொள்கை இந்தியாவில் வாழும் ஒவ்வொரு குடிமகனின் வாழ்க்கையையும் தொட்டுள்ளது. அவரின் இறப்பு தனிப்பட்ட முறையில் எனக்குப் பெரிய இழப்பு. அவருடன் பயணித்த எண்ணிலடங்கா நினைவுகள் என்னுள் இருக்கிறது. விடா முயற்சி மூலமாகப் பா.ஜ.க-வை அவர் கட்டமைத்தார். பா.ஜ.க-வின் கொள்கைகளைப் பரப்ப அவர் இந்தியா முழுவதும் பயணித்துள்ளார். அதனாலேயே, இப்போது பல மாநிலங்களில் பா.ஜ.க வலுவான சக்தியாக மாறியுள்ளது" எனக் கூறியுள்ளார். 

தலைவர்கள் இரங்கல்: 
 

குடியரசுத் தலைவர் ராம்நாத் கோவிந்த்:

வாஜ்பாயின் மறைவு மிகுந்த வருத்தத்தை அளிக்கிறது. அவர் ஒரு சிறந்த தலைவர். ஆளுமைமிக்க, முதிர்ச்சியான தலைவரை இந்தியா இழந்துவிட்டது.

பிரதமர் மோடி:

வாஜ்பாய் அளித்த உத்வேகம், வழிகாட்டல், ஒவ்வொரு இந்தியருக்கும், பா.ஜ.க-வினருக்கும் இருக்கும். அவரின் மறைவு ஒரு சகாப்தத்தின் முடிவை குறிக்கிறது. வாஜ்பாய் தேசத்துக்காக வசித்துவந்தவர். அடல் ஜீயின் இறப்பு தனிப்பட்ட முறையில் எனக்கு பெரிய இழப்பு. அவருடன் பயணித்த எண்ணிலடங்கா நினைவுகள் என்னுள் இருக்கிறது. வார்த்தைகள் இன்றி உணர்ச்சி மேலோங்கிய நிலையில் உள்ளேன்.

நடிகர் ரஜினிகாந்த்: 

சிறந்த தலைவரான வாஜ்பாய் மறைவு வேதனையைத் தருகிறது. அவரது ஆன்மா சாந்தி அடையட்டும்.

காங்கிரஸ் தலைவர் ராகுல்காந்தி: 

ஒரு சிறந்த மகனை நாடு இழந்து விட்டது. மறைந்த முன்னாள் பிரதமர் வாஜ்பாய் கோடிக்கணக்கான மக்களால் விரும்பப்பட்டவர் மற்றும் மதிக்கப்பட்டவர்.

துணைக் குடியரசுத் தலைவர் வெங்கைய நாயுடு:

பன்முகத்தன்மை கொண்ட ஒரு ரத்தினத்தை நாடு இழந்துவிட்டது. வாஜ்பாயை இந்தியா நீண்ட காலத்துக்கு நினைவில் வைத்துக்கொள்ளும். மாணவப்பருவத்தில் இருந்தே என்னை கவர்ந்த தலைவர். வாஜ்பாயின் ஆளுமை, கடமையின் மீதான பக்தி, தலைமைப் பண்பு நீண்ட காலத்துக்கு நினைவு கூறப்படும்

கோவா முதல்வர் மனோகர் பாரிக்கர்:

தனது முழுவாழ்க்கை முழுவதையும் நாட்டுக்காகவும், மக்களுக்காகவும் அர்ப்பணித்தவர் வாஜ்பாய். அவரது மறைவின் மூலம் இந்தியா ஒரு மிகப்பெரிய தலைவரை இழந்துள்ளது.

தமிழக முதல்வர் பழனிசாமி:

வாஜ்பாயின் மறைவு இந்தியாவுக்கே பேரிழப்பு. அவரை இழந்து வாடும் பா.ஜ.க-வினர், அவரது குடும்பத்தினருக்கு ஆழ்ந்த இரங்கல். மூன்று முறை இந்தியாவின் பிரதமராக இருந்த வாஜ்பாய் பா.ஜ.க-வில் இருந்து தேர்வான முதல் பிரதமர். இலக்கியத்தின் மீது ஆர்வம் கொண்ட அவர் சிறந்த பேச்சாளர்.

மைத்ரேயன் எம்.பி:

ஒரு சகாப்தம் முடிவுக்கு வந்துள்ளது. இந்தியாவிலேயே மிகப்பெரிய தலைவர் வாஜ்பாய்.

முன்னாள் பிரதமர் மன்மோகன் சிங்:

வாஜ்பாய் ஒரு மிகச் சிறந்த பேச்சாளர். ஈடு இணையற்ற சேவகராக, சிறந்த பிரதமராக, கவிஞராக திகழ்ந்தவர். அவர் சிறந்த எம்பியாகவும் இருந்தார். அவரது மறைவு வேதனை அளிக்கிறது.

புதுச்சேரி துணைநிலை ஆளுநர் கிரண்பேடி:

நாட்டின் உச்ச அதிகாரத்தில் இருந்த மிகச்சிறந்த மனிதரை தேசம் இழந்துள்ளது. வலிமையான தலைவரையும், நல்ல மனிதரையும் நாடு இழந்துவிட்டது. 

பாஜக மூத்த தலைவர் அத்வானி:

வாஜ்பாய் மறைவால் தாங்க முடியாத துயரத்தில் உள்ளேன். இந்தியாவின் மிகப்பெரிய தலைவராக விளங்கிய வாஜ்பாய் இழப்பை தெரிவிக்க வார்த்தைகள் இல்லாமல் தவிக்கிறேன். மூத்தவர் என்பதை விட 65 ஆண்டுகளுக்கு மேலாக என் உற்ற தோழனாக தோள் கொடுத்தவர். ஆர்எஸ்எஸ்-ல் தொடங்கி ஜனசங்கம் உருவானது வரை எங்களது பயணத்தை மறக்க முடியாது.

தமிழக ஆளுநர் பன்வாரிலால் புரோஹித்:

நாட்டில் உள்ள அரசியல்வாதிகளுக்கு முன்னுதாரணமாக திகழ்ந்த வாஜ்பாயின் மறைவு வேதனை தருகிறது. வாஜ்பாயின் சேவைகள் என்றும் மக்கள் மனதில் நிலைத்து நிற்கும்

மத்திய உள்துறை அமைச்சர் ராஜ்நாத் சிங்:

வாஜ்பாய் மறைவு செய்தி மிகுந்த வலியை ஏற்படுத்தியது, மிகச்சிறந்த தலைவரை தேசம் இழந்துள்ளது. வாஜ்பாயின் உடல் பொதுமக்கள் அஞ்சலிக்காக அவரது வீட்டில் வைக்கப்படும்.

புதுச்சேரி முதலமைச்சர் நாராயணசாமி

வல்லமை பொருந்திய தலைவர் வாஜ்பாயின் இறப்பு நாட்டிற்கே பேரிழப்பு. 

டிடிவி தினகரன்:

நெடிய அரசியல் வரலாற்றுக்கு சொந்தக்காரராகவும், மிகச்சிறந்த பாராளுமன்றவாதியாகவும், இந்திய நாட்டின் வளர்ச்சியை தன் நோக்கமாக கொண்டு, பல பெருமைகளையும், சிறப்புக்களையும், இந்திய நாட்டிற்கும், இந்திய மக்களுக்கும் பெற்றுத் தந்தவர் வாஜ்பாய். சகோதர நேசத்தை முன்னிறுத்திய மனிதநேயம் கொண்ட மாமனிதர் வாஜ்பாய் இழப்பு இந்திய தேசத்திற்கு பேரிழப்பாகும். 

மத்திய அமைச்சர் அருண் ஜெட்லி:

வாஜ்பாய் இந்தியாவின் மிகச்சிறந்த தலைவர் என்பதில் மாற்றுக்கருத்தே இல்லை, நாட்டிற்கு அவர் அளித்த பங்களிப்பு எந்நாளும் போற்றப்படும்.

ப.சிதம்பரம்:

ஒரு கருணை உள்ளம் கொண்ட கண்ணியமான அரசியல் தலைவரை இந்தியா இழந்துவிட்டது. வாஜ்பாய்க்கு நிறைய நண்பர்கள் இருந்தார்கள் என்பது புதிய செய்தி அல்ல. அவருக்குப் பகைவர்களே இல்லை என்பதுதான் அவருடைய தனிச்சிறப்பு. 

அமித் ஷா:

தேச நலனுக்காக தனது உடலையும், ஆன்மாவையும் ஒரு சேர அர்ப்பணித்தவர் வாஜ்பாய்.

முலாயம் சிங் யாதவ்:

இது நாட்டிற்கு பேரிழப்பு. மூத்த தலைவராக இருந்தாலும் மிகவும் எளிமையாகவே இருந்தார். அவரை பற்றி பெருமை கூட அவர் பேசியது கிடையாது. தற்கால அரசியல் தலைவர்கள், வாஜ்பாயிடம் நிறைய கற்க வேண்டியுள்ளது. 

கவிஞர் வைரமுத்து:

வாஜ்பாய் மறைவால் இந்தியா எழுந்து நின்று அழுகிறது. வாஜ்பாயின் மரணம் என்பது ஒன்றல்ல. ஒரு தலைவருக்கும் ஒரு கவிஞருக்குமென்று இரண்டு மரணங்கள் நேர்ந்திருக்கின்றன. இந்த மாதம் மரணத்திற்கு இலக்கியப் பசி போலும். தெற்கே ஓர் இமயமாகத் திகழ்ந்த கலைஞரையும், வடக்கே ஒரு கடலாகத் திகழ்ந்த வாஜ்பாயையும் ஒரே மாதத்தில் உண்டு முடித்திருக்கிறது.

தேமுதிக நிறுவனர் விஜயகாந்த்:

இந்தியாவை வளர்ந்த நாடாக மாற்றியவர் வாஜ்பாய். அனைத்துக் கட்சியினராலும் பாராட்டப்பட்ட முக்கியமான பாஜக தலைவர். கார்கில் போர், பொக்ரான் அணுகுண்டு சோதனையை ஆகியவற்றில் வெற்றிகண்டவர். செய்தி கேட்டு மிகவும் அதிர்ச்சியும், மன வேதனையும் அடைந்தேன். 

திமுக செயல் தலைவர் ஸ்டாலின்:

முன்னாள் பிரதமர் வாஜ்பாய் அவர்களின் மறைவுச் செய்தி கேட்டு பெரிதும் வேதனையடைந்தேன். ஜனநாயகத்தின் பக்கம் நின்று தன் வாழ்நாள் முழுவதும் அயராது போராடிய வாஜ்பாய் அவர்களின் இழப்பு நாட்டிற்கும், பன்முகத்தன்மைக்கும் பேரிழப்பாகும்

அமெரிக்க தூதரகம்:

இந்திய, அமெரிக்க உறவுகளை மேம்படுத்துவதில் முக்கிய பங்காற்றியவர் வாஜ்பாய்.

அத்வானி உருக்கம்:

வாஜ்பாயின் உற்ற நண்பரும் பா.ஜ.க மூத்த தலைவருமான எல்.கே.அத்வானி வெளியிட்டுள்ள இரங்கல் குறிப்பில், ``வாஜ்பாய் மறைவால் தாங்க முடியாத துயரத்தில் உள்ளேன். இந்தியாவின் மிகப்பெரிய தலைவராக விளங்கிய வாஜ்பாய் இழப்பை தெரிவிக்க வார்த்தைகள் இல்லாமல் தவிக்கிறேன். மூத்தவர் என்பதைவிட 65 ஆண்டுகளுக்கும் மேலாக என் உற்றத் தோழனாக தோள் கொடுத்த நெருங்கிய நண்பரை இழந்து தவிக்கிறேன். ஆர்.எஸ்.எஸ்-ல் தொடங்கி ஜனசங்கம் உருவானது வரை எங்கள் பயணத்தை மறக்க முடியாது. மத்திய அரசில் முதல்முறையாகக் காங்கிரஸ் அல்லாத அரசாங்கத்தின் முன்னோடியாக இருந்தவர் என வாஜ்பாய் என்றும் நினைவூகூரப்படுவார். அவருக்குத் துணையாக 6 ஆண்டுகள் அவரது தலைமையில் பணி புரிந்தது எனக்கு மிகவும் பெருமை" என உருக்கமாகக் கூறியுள்ளார்.



Trending Articles

Sponsored