’அந்த’ பத்து பேரில் ஒருவர் நீங்களா? ஸ்மார்ட்ஃபோன் சங்கடங்கள்! #SmartphoneAddiction



Sponsored



அமெரிக்கர்கள் இடையே நடத்தப்பட்ட சர்வேயில் பத்தில் ஒருவர் உடலுறவு கொள்ளும்போது கூட ஸ்மார்ட்ஃபோன் பயன்படுத்துவதாக சொல்லியிருக்கிறார்கள். ’அமெரிக்கர்கள் வெட்கப்பட்டுக்கொண்டு பொய் சொல்கிறார்கள்.ஆசியாவில் பத்தில் ஐந்து பேர் செக்ஸின் போது மொபைலை பயன்படுத்துவார்கள்” என இன்னொரு ஊகம் தீயில் பெட்ரோல் ஊற்றுகிறது. 

ஒரு சின்ன டெஸ்ட். கடைசியாக உங்கள் பக்கத்து வீட்டுக்காரர் அல்லது அபார்ட்மெண்ட்வாசியிடம் எப்போது நேரில் பேசினீர்கள்? அவரை பார்த்தால் கூட “கால் பண்றேன்” என்று சொல்லி விட்டுப் போவதுதானே அதிகம்? ஒரு வேளை நீங்களும் அவரும் ஒரே வாட்ஸப் க்ரூப்பில் அதிகம் பேசிக் கொண்டிருந்திருக்கலாம். ஆனால் நேரில் பார்த்தால் நம்மை அறியாமல் எஸ்கேப் ஆக திட்டமிடுகிறோம். இதுவரை நம் வாழ்க்கையின் ஆதாரமாக அம்மா, அப்பா, காதலி, நண்பன் என ஏதோ ஒரு உறவாக சக மனிதனே இருந்திருக்கிறார். இந்த இடத்தை மெல்ல ஆக்ரமித்து விட்டன மொபைல் ஃபோன்கள்.

Sponsored


மொபைலை தங்கள் உடலின் இன்னொரு பாகமாக பார்க்கிறது இன்றைய உலகம். தன்னிடம் இருந்து ஐந்து அடிக்குள் மொபைல் இருக்குமாறு பார்த்துக் கொள்கிறார்கள். பாத்ரூமோ, பாட்டு கிளாஸோ.. அலுவலக மீட்டிங்கோ, காதலியுடன் டேட்டிங்கோ. எங்கு சென்றாலும் மொபைல் இல்லாமல் செல்வதில்லை. எடுத்து செல்வதும் கூட சரி. அங்கேயும் மொபைலை நோண்டி கொண்டிருப்பதுதான் மிகப்பெரிய சிக்கல். மொபைலை பிரிய நேர்ந்தால் பசலை நோய் ஆட்கொண்ட மாதிரி பதறிவிடுகிறார்கள்.

Sponsored


வீட்டிலிருந்த கிளம்பிய 15வது நிமிடத்தில் ஃபோனை வீட்டிலே மறந்தது தெரிந்தால் எப்படி இருக்கும்? ”திக்”கென்று இருக்கிறதா?மொபைல் கையில் இல்லாமல் ஒரு நாளை கடத்துவது என்பது இன்றைய வாழ்வில் சாத்தியமே இல்லை. ஆடை இல்லா மனிதன் அரைமனிதன் என்ற பழமொழியை ரிமிக்ஸ் செய்து “ஸ்மார்ட்ஃபோன் இல்லா மனிதன் அரைமனிதன்” என்றாக்கியிருக்கிறது விஞ்ஞானம். வீட்டிற்கு வரும் விருந்தினர்களை “தன்ணி வேண்டுமா,பாத்ரூம் போறீங்களா” என கேட்பதை தொடர்ந்து “WiFi பாஸ்வேர்ட் வேண்டுமா” என்பதும் விருந்தோம்பல் என மாறியிருக்கிறது. Battery 100% charged என்பதுதான் வெளியெ கிளம்புவதற்கு நல்ல நேரம். ஒரு நிமிடம் கிடைத்தாலும் மொபைலில் மூழ்கி முந்தைய நொடியில் உலகில் என்ன நடந்தது என்பதை பார்க்கிறோம். கேண்டி கிரஷில் யாருக்கேனும் உயிர் தந்து உதவுகிறோம். அடுத்த நாள் காலை என்ன கோலம் போடலாம் என தேடுகிறோம்.. இருபதாம் நூற்றாண்டில் தொடக்கத்தில் கணிணியும், இணையமும் மக்களிடம் சென்று சேர எடுத்துக்கொண்ட காலத்தை விட  ஸ்மார்ட்ஃபோன்ஸ்க்கு குறைவாகவே தேவைப்பட்டிருக்கிறது. மெயில் அனுப்பிய அப்பாக்களை விட இப்போது மொபைலில் லைக் போடும் அம்மாக்கள்தான் அதிகம்.  ஸ்மார்ட்ஃபோன் நம் வாழ்க்கையின் நகராத நொடிகளை வேகமாக நகர்த்துவதுடன் பயனுள்ளதாகவும் மாற்றியிருக்கிறது என்பது உண்மைதான். ஆனால் வாழ்வை எளிமையாக்க மனிதன் கண்டுபிடித்த எல்லா வசதிகளுமே ஒரு கட்டத்தில் அவனுக்கு சுமையாகி போனது என்பதுதானே வரலாறு?

இன்று என்ன நடக்கிறது? நான்கு நண்பர்கள் ஒன்றாக கேண்டினுக்கு வருவார்கள். இடம் கிடைத்து அமர்ந்த பின் எல்லா கைகளையும் ஸ்மார்ட்ன்போன்ஸ் ஆக்ரமிக்கும். அரட்டை அடிக்க வந்தவர்கள் மொபைலில் மூழ்குவார்கள். உச்சக்கட்ட காமெடியாக, எதிரில் இருப்பவருக்கே ஏதேனும் ஃபார்வர்டை வாட்சப் செய்வார். அவரும் நிமிர்ந்து பார்க்காமலே அதை பார்த்து சிரித்துக் கொண்டிருப்பார். எல்லோருமே கர்ணன். எல்லோர் கைகளிலும் மொபைல் கவசம். உலகெங்கும் 50 சதவிகித மக்கள் தற்போது ஸ்மார்ட்ஃபோன்ஸ் பயன்படுத்துகிறார்கள் என்கின்றன புள்ளி விபரங்கள். 

ஸ்மார்ட்ஃபோன்களால் பல பிரச்சினைகள் இருக்கின்றன. அதில் முக்கியமானது ப்ரைவசி. பெரும்பாலானோருக்கு அடுத்தவர்களின் மொபைலில் இருப்பதை பார்ப்பதில் ஆர்வம் அதிகமாக இருக்கிறது. பொறாமை, சந்தேகம், தனிமை, விரக்தி என இன்றைய இளைஞர்களை இருட்டுப்பாதைக்கு கொண்டு செல்வதில் மொபைல்கள் தான் முக்கிய பங்கு வகிப்பதாக மன நல நிபுணர்கள் கவலை கொள்கிறார்கள். மொபைலை தங்களது அந்தரங்க பகுதியாக நினைத்துக் கொண்டு வேண்டாத பல விஷயங்களை சேமித்து வைக்கிறார்கள். இது மற்றவர்கள் கண்ணில் படும்போது மரியாதை இழக்கிறார்கள். தேவையற்ற சண்டை எழுகிறது. 

அடுத்த பிரச்னை கவனக்குறைவு. முன்பு குறுஞ்செய்திகளுக்கு கட்டணம் இருந்தது. இப்போது வாட்சப் காலம். இதனால் தேவையோ இல்லையோ எப்போதும் எதையாவது டைப் செய்து கொண்டே இருக்கிறார்கள். தியேட்டரில் படம் பார்த்துக்கொண்டே ட்விட்டுகிறார்கள்.. 15 செகண்டுக்கு மேல் சிக்னலில் நின்றால் மொபைலை எடுத்துக் கொள்கிறார்கள். சிலர் கார் ஓட்டிக்கொண்டே மெசெஜ் அனுப்புவதும் உண்டு. சாப்பிடும் போதும் கையில் மொபைல்.  இப்படி ஒரே நேரத்தில் பல வேலைகளை செய்ய பழகி கொள்வதால் எதிலும் கவனம் செலுத்த முடியாமல் போகிறது. மல்ட்டி ஸ்கில் என்பதும், மல்ட்டி டாஸ்க் என்பதும் வேறு வேறு. மல்ட்டி டாஸ்க்கிங் என்பது எந்த வேலையையும் சிக்கலாக்கும் வழிமுறைதான்.

பீட்ஸா வட்டமாக இருந்தாலும், வாடிக்கையாளர்கள் அதை முக்கோண வடிவமாகத்தான் பார்ப்பார்கள். அது போல, ஸ்மார்ட்ஃபோனிலே வாழ்பவர்களுக்கு நண்பர்கள் என்பவர்கள் கூட வெறும் நம்பர்கள்தான். மொபைல் மூலமான உரையாடலில் நன்றாக பேசும் இவர்கள் நேரில் பேசவே அஞ்சுவார்கள். மனிதர்களின் அடையாளமே இவர்கள் பார்வையில் மாறியிருப்பது அதிர்ச்சிக்குரிய விஷயம். மொபைலுக்கு அடிக்ட் ஆனவர்கள் “ஸ்மார்ட் தீவு” என்ற மாய வலைக்குள் சிக்கி தவிப்பதாக ஆராய்ச்சியாளர்கள் தெரிவிக்கிறார்கள். இவர்களை யதார்த்த வாழ்க்கைக்கு திருப்புவது என்பது கடினமான செயல். 

தினம் ஒரு புதுப்பிரச்சினை எழுப்பி வரும் ஸ்மார்ட்ஃபோன்கள் கடந்த சில ஆண்டுகளில் உருவாக்கிய மிகப்பெரிய சிக்கல் செல்ஃபி. நம்மை நாமே படமெடுத்துக் கொள்வதில் என்ன சிக்கல் இருக்க முடியும் தானே? இருக்கிறது. சில ஆண்டுகளுக்கு முன்னர் அமெரிக்காவில் டீன் ஏஜ் யுவதி ஒருவர் ஒரே இரவில் 2000 செல்ஃபிக்கள் எடுத்திருக்கிறார். அதை விட கொடுமை, அந்த செல்ஃபிக்கள் எவையுமே திருப்தி தராமல் மறுநாள் காலை தற்கொலை செய்து கொண்டார். நம்ம ஊரிலும் செல்ஃபி எடுக்கிறேன் என பின்னாலே சென்று தடுக்கி விழுவது, விபத்தில் சிக்கிவது ஆன பல சுவாரஸ்ய துரதிர்ஷ்ட சம்பவங்கள் நடந்த வண்ணம் உள்ளன. 

ஸ்மார்ட்ஃபோன்களால் நம் ஆரோக்கியமும் பாதிக்கப்படுகிறது. கிட்டத்தட்ட ஒரு நாளைக்கு நான்கு மணி நேரங்களை நாம் ஸ்மார்ட்ஃபோனில் செலவு செய்கிறோம். இதனால் உடல் எடை பிரச்சினை, முதுகு வலி ஆகிய கோளாறுகள் வருகின்றன. சிறு வயதில் நம் இடது மூளை வளர்ந்து, பின் வலது மூளை வளரும். ஆனால் ஸ்மார்ட்ஃபோன்ஸ் பயன்பாடு இடது மூளை வளர்ச்சியை மட்டுமே ஊக்குவிக்கிறது. குழந்தைகள் வளரும் பருவத்தில் மனிதர்களுடன் உரையாடாமல் மொபைல், டேப்லட் போன்ற இண்ட்ராக்டிவ் கருவிகளுடன் அதிக நேரம் செலவிட்டால் அவர்களது யோசிக்கும் முறையே மாறிவிடும். மனிதர்களையும் அவர்கள் இன்னொரு கருவியாக மட்டுமே பார்க்க நேரிடலாம். இதனால் எதிர்காலத்தில் அன்பு, பாசம், பயம் போன்ற எந்த மனித உணர்வுக்கும் வேலையே இருக்காது என எச்சரிக்கிறார்கள். 

முடிவாக, இன்னொரு டெஸ்ட். மொபைல் இல்லாமல் ஒரு நாள் முழுவதும் இருப்பது சாத்தியமில்லைதான். ஆனால் குறைக்கலாமே! அழைப்புகள், அலுவலக விஷயங்கள் தவிர மற்ற எதையும் பயன்படுத்தாமல் உங்கள் மொபைலுடன் ஒரு நாள் இருந்து பாருங்கள். நீங்கள் எந்த அளவிற்கு அடிக்ட் ஆகியிருக்கிறீர்கள் என்பது புரியும். டெக்னாலஜியும் பணத்தை போலதான். நம் கட்டுப்பாட்டில் இருக்கும்வரைதான் அது வரம். அதன் கட்டுப்பாட்டில் நாம் போய்விட்டால் சாபம்.

-கார்க்கிபவா



Trending Articles

Sponsored