“ஒன் ப்ளஸ் 5 வரட்டும்னு காத்திருக்கோம்!” - வெயிட்டிங்கிலே வெறியேற்றும் 'வாவ்' மொபைல்



நிறைய எதிர்பார்ப்புகளுக்கு மத்தியில் வரும் 20-ம் தேதி அதிகாரபூர்வமாக வெளியாகவிருக்கிறது ஒன்ப்ளஸ் 5. இந்தியாவில் ஜூன் 22-ம் தேதி வெளியாகிறது. ரெட்மியின் பட்ஜெட் மொபைல்களைப் போலவே மிட்ரேஞ்ச் மொபைல்களில் ஹிட் அடித்த மாடல் ஒன்ப்ளஸ் 3-யும், ஒன்ப்ளஸ் 3T-யும். அதனால் ஒன்ப்ளஸ் 5 மீதும் அதிக எதிர்பார்ப்பு ஏற்பட்டுள்ளது. Snapdragon 835 பிராஸசர், டூயல் கேமரா என இப்போதே இந்த போன் தொடர்பான உறுதியான செய்திகளும் வலம்வரத் துவங்கிவிட்டன. ஒன்ப்ளஸ் 5-ல் என்னென்ன அம்சங்கள் இடம்பிடிக்கவிருக்கிறது?

ஒன்ப்ளஸ் 4-க்கு என்னாச்சு?

Sponsored


ஒன் ப்ளஸ் 3 போன் ஆனது கடந்த ஆண்டு ஜூன் மாதம் வெளியானது. அதன் அப்டேட் வெர்ஷனான 3T டிசம்பர் மாதம் வெளியானது. இதைத் தொடர்ந்து ஒன் ப்ளஸ் 4 ஆனது இந்த ஆண்டு ஜூன் மாதத்தில் வெளியாகவிருக்கிறது எனத் தகவல்கள் வெளியாகின. ஆனால் அடுத்து வரப்போவது ஒன்ப்ளஸ் 4 அல்ல. ஒன்ப்ளஸ் 5-தான் என இந்த ஆண்டின் மார்ச் மாதமே உறுதி செய்தது அந்நிறுவனம். 4-ம் எண்ணைத் தவிர்த்து நேரடியாக ஒன்ப்ளஸ் 5-க்கு செல்வதற்கு முக்கியமாக சொல்லப்படும் காரணம் சீனாவின் நான்காம் நம்பர் சென்டிமென்ட்தான். சீனாவைப் பொறுத்தவரை 4 என்பது மரணத்துடன் தொடர்புடைய எண்ணாக கருதப்படுவதால் அதைத் தவிர்த்துள்ளது ஒன்ப்ளஸ் நிறுவனம். நான்காம் எண்ணைக் கண்டு அஞ்சும் டெட்ராபோபியா பிரச்னை இந்த நிறுவனத்திற்கு மட்டுமல்ல. நோக்கியா, விவோ நிறுவனங்களுக்குக் கூட இருக்கின்றன.

Sponsored


பவர்ஃபுல் பிராஸசர்:

5.5 இன்ச் AMOLED டிஸ்ப்ளே, முன்பக்க ஃபிங்கர்பிரிண்ட் ஸ்கேனர், டேஷ் சார்ஜ் டெக்னாலஜியுடன் கூடிய 3,600 mAh பேட்டரி, 6 ஜி.பி ரேம், 128 ஜி.பி இன்டர்னல் மெமரி ஆகியவை இடம்பெற்றிருக்கும் என எதிர்பார்க்கப்படுகிறது. குவால்காம் Snapdragon 835 பிராஸசர் இருப்பது மட்டுமே தற்போது உறுதியாகியுள்ளது. இதனால் பெர்பார்மன்சில் எந்தக் குறையும் இருக்காது என்பது மட்டும் உறுதி. மேலும், ஐபோன் போல திடீரென 3.5 mm ஆடியோ ஜாக்கை ஒன்ப்ளஸ் நிறுவனம் நீக்கப்போவதில்லை.

டூயல் கேமரா:

ப்ரீமியம் போன்களில் இருப்பது போன்ற டூயல் கேமரா செட்டப் என்பது உறுதியாகிவிட்டது. அது முன்பக்க கேமராவாகக் கூட இருக்கலாம். மேலும், தன் கேமராக்களின் போட்டோகுவாலிட்டியை மேம்படுத்துவதற்காக  DxO நிறுவனத்துடன் கைகோத்துள்ளது. எனவே கேமராவில் சில நல்ல மாற்றங்களை எதிர்பார்க்கலாம். 16 எம்.பி திறன்கொண்ட ஃபிரன்ட் கேமரா மற்றும் ரியர் கேமராக்கள் இடம்பெறும் வாய்ப்பிருக்கிறது. 

ஆபரேட்டிங் சிஸ்டம்:

ஆண்ட்ராய்டு நௌகட் ஆபரேட்டிங் சிஸ்டத்துடன், அப்டேட் ஆக வரவிருக்கிறது ஒன்ப்ளஸ் 5. மேலும், தன் கஸ்டமைஸ்டு ஆபரேட்டிங் சிஸ்டமான ஆக்சிஜன் ஓ.எஸ்.,ஸில் மட்டும் சில மாற்றங்களை செய்யவிருக்கிறது.

டிசைன்:

ஷார்ப் எட்ஜ் இல்லாமல், ரவுண்ட் எட்ஜ் எனப்படும் வட்டவடிவமான விளிம்புகளோடு இருக்கிறது ஒன்ப்ளஸ் 5. அலுமினியம் மெட்டாலிக் பாடியுடன், ஒன்ப்ளஸ் 3T-யை விடவும் கொஞ்சம் மெலிதாக இருக்கும். கறுப்பு, கோல்ட், பச்சை மற்றும் மேலும் ஒரு நிறத்துடன் வெளிவர வாய்ப்பிருக்கிறது. ஏனெனில் இந்த கலர் ஆப்ஷன்கள் குறித்து ஏற்கெனவே ட்விட்டரில் கேள்வி கேட்டிருந்தது ஒன்ப்ளஸ்.

விலை:

தற்போது விற்பனையில் இருக்கும் ஒன்ப்ளஸ் 3 மாடல் 27,999 ரூபாய்க்கும், 3T மாடல் 29,999 ரூபாய்க்கும் விற்பனையாகிக் கொண்டிருக்கிறது. பிராஸசர், கேமரா, ரேம் என அனைத்திலும் ஒன்ப்ளஸ் 5 கில்லியாக இருக்கும் என்பதால் இந்தமுறை 35,000 ரூபாய் அளவில் விற்பனைக்கு வரலாம்.



Trending Articles

Sponsored