”இது தானா சேரும் கூட்டம்!” - அணி சேர்த்து ஆச்சர்யப்படுத்தும் ஸ்வார்ம் ட்ரோன்ஸ் #Drones



Sponsored



திர்காலத்தில் உலகை கலக்கும் தொழில்நுட்பங்கள் என யார் பட்டியலிட்டாலும், அதில் மறக்காமல் இடம்பிடிக்கும் ஒரு பெயர் ட்ரோன். முதலில், வானிலிருந்து எதிரி நாடுகளைக் கண்காணிக்கவும் தாக்கவும் மட்டுமே இருந்த ட்ரோன்களின் பயன்பாடு இன்று ராணுவம், சினிமா, பாதுகாப்பு, பேரிடர் மேலாண்மை, கனிமவள ஆராய்ச்சி, வானிலை ஆராய்ச்சி எனப் பல துறைகளில் ஆதிக்கம் செலுத்தத் தொடங்கியிருக்கிறது. கற்பனைக்கும் எட்டாத உயரம் என்பதற்கு இந்த நூற்றாண்டின் சிறந்த உதாரணம் இந்த ட்ரோன்களே! இப்படி வருங்காலத்தில் பலவிதத்தில் கைகொடுக்கப்போகும் ட்ரோன்களைப் பற்றி கொஞ்சம் விரிவாகத் தெரிந்துகொள்வோம்.

எவையெல்லாம் ட்ரோன்கள்?

Sponsored


Unmanned Aerial Vehicles (UAV) என அழைக்கப்படும் ஆளில்லா வானூர்திகள் அனைத்துமே ட்ரோன்கள்தான். அது சின்ன ரிமோட் கன்ட்ரோலர் மூலம் இயங்கும் குவாட்காப்டராக இருக்கலாம்; அல்லது தீவிரவாதிகளின் தாக்குதல் நடத்தும் பெரிய விமானங்களாக இருக்கலாம். அனைத்துமே ட்ரோன்கள்தான். எப்படி உருவானவை இந்த ட்ரோன்கள்?

Sponsored


முதல் உலகப்போர் சமயத்தில்தான் இந்த ட்ரோன்கள் முதன்முதலாகப் பயன்பாட்டிற்கு வந்தன. போரிலும் ஈடுபடுத்தப்பட்டன. ராணுவ ரீதியான பயன்பாடுகளில் ட்ரோன்கள் கலக்க, தொடர்ந்து பல நாடுகளும் ட்ரோன்களைப் பாதுகாப்பிற்காகப் பயன்படுத்தத் தொடங்கின. எதிரி நாடுகளை உளவு பார்க்க, எதிரி நாடுகளின் இருப்பிடத்தின் வரைபடத்தை உருவாக்க, ரகசியமாகத் தாக்குதல் நடத்த எனப் பல்வேறு ரீதியாகப் பயன்படுத்தப்பட்டது. இப்படித் தொடங்கிய இதன் ட்ரோனின் பயணம் இன்று பலதுறைகளைக் கடந்தும் சென்று கொண்டிருக்கிறது. ட்ரோன்களின் செயல்பாடு மற்றும் அதன் தன்மைகளைப் பற்றி விளக்குகிறார்கள் சென்னை ஐ.ஐ.டி.,யின் ஏரோ கிளப் உறுப்பினர்களான ஆதித்யன் வினோத், ஆஷூதோஷ் குமார் மற்றும் அரவிந்த் ராவ் ஆகிய மூவரும்.


ட்ரோன்களைப் பொதுவாக இரண்டு வகையாகப் பிரிக்கலாம். நான்கு அல்லது அதற்குமேல் ரோட்டர்கள் (Rotors) கொண்ட காப்டர்கள் (Copters); அல்லது Fixed wing எனப்படும் நிலையான இறக்கைகளைக் கொண்ட விமானங்கள். இந்த இரண்டு வடிவமைப்பிலும் நிறைய மாற்றங்கள், சிறப்பம்சங்கள் சேர்க்கப்பட்டுதான் பிரத்யேக பயன்பாடுகளுக்கான ட்ரோன்கள் தயாராகின்றன. 

காப்டர் என்ற ட்ரோன்கள் பல ரோட்டர்கள் மூலம், உந்துசக்தி உருவாக்கப்பட்டு பின்னர் பறக்கும். இதில் அதிக மின்சக்தி தேவைப்படும். எடை அதிகமாக இருக்கும். மேலும் சத்தமும் ஏற்படும். இந்த வகை ட்ரோன்கள் பெரும்பாலும் உள்ளரங்க அல்லது குறைவான உயரம் கொண்ட பயன்பாடுகளில் பயன்படுத்தப்படும். உதாரணமாக அறைகளைக் கண்காணிக்க உதவும் ட்ரோன்கள், வீட்டை ஸ்கேன் செய்யும் ட்ரோன்கள், பொதுவான கண்காணிப்பு ட்ரோன்கள் போன்றவற்றைக் குறிப்பிடலாம். நிலையான இறக்கைகள் கொண்ட Fixed Wing விமானங்கள் மற்ற துறைகளில் பயன்படுத்தப்படுகின்றன. இந்தவகை ட்ரோன்களில் இன்ஜின் மூலமாக உந்துசக்தி தரப்பட்டு, ஒரே ஒரு புரப்பெல்லர் (Propeller) மூலமாகவே நம்மால் இயக்க முடியும். இதனால் இதைக் குறைவான சத்தத்தில், அதிக உயரத்திலும், வேகத்திலும் செலுத்த முடியும். வேளாண்மை, கண்காணிப்பு, வானிலை ஆராய்ச்சிகள், ராணுவம் போன்றவற்றில் இதுபோன்ற ட்ரோன்கள் பயன்படுத்தப்படும். அமேசானின் ட்ரோன் டெலிவரி முதல் ஷூட்டிங் செய்யும் ட்ரோன்கள் வரை அனைத்திலுமே ஒரே ஒரு ட்ரோனைத்தான் தற்போது பயன்படுத்திக்கொண்டிருக்கிறோம். ஆனால் தற்போது swarm drones எனப்படும் ட்ரோன்களைப் பற்றி நிறைய ஆராய்ச்சிகள் நடந்துவருகின்றன. அதாவது ஒரே ஒரு ட்ரோனை மட்டுமே தனித்து இயக்காமல், குழுவாகப் பல ட்ரோன்களை இயக்கி, குறிப்பிட்ட பணிகளைச் செய்வதுதான் இந்த ட்ரோன்களின் பணி. எப்படிப் பறவைகள் மற்றும் தேனீக்கள் கூட்டாகப் பறக்கின்றனவோ, அதைப் போலவே இணைந்து பறப்பதுதான் இவற்றின் பணி.

Swarm ட்ரோன்ஸ் வீடியோ:

இதற்கு உதாரணமாக பென்சில்வேனியா பல்கலைக்கழக ட்ரோன்கள் ஒன்றிணைந்து, ஜேம்ஸ்பாண்ட் தீம் மியூசிக் வாசித்ததையும், இன்டெல் நிறுவனத்தின் ட்ரோன் வானவேடிக்கையையும் குறிப்பிடலாம். ஒருபக்கம் வாசிப்பதற்கு தயாராக கீ-போர்டு, ட்ரம்ஸ் ஆகியவை ட்ரோன்களுக்கு ஏற்ற சிறப்பு வசதிகளோடு ரெடியாக இருக்கும். மற்றொருபக்கம் ட்ரோன்கள் வாசிப்பதற்கு தயாராக பறந்துவரும். ஒரு ட்ரோனுக்கு கீ-போர்டு, இன்னொரு ட்ரோனுக்கு ட்ரம்ஸ் என ஒவ்வோரு ட்ரோனுக்கும் ஒரு பணி ஒதுக்கப்பட்டு, அதற்கேற்ற வசதிகளோடு வடிவமைக்கப்பட்டு, புரோகிராமிங்கும் செய்யப்பட்டிருக்கும். இவை இணைந்து செயல்படும்போது ஜேம்ஸ்பாண்ட் தீம் மியூசிக் உருவாகும். இதைத்தான் சில வருடங்களுக்கு முன்னர் பென்சில்வேனியா பல்கலைக்கழகம் செய்தது. 

ஜேம்ஸ்பாண்ட் தீம் மியூசிக் வாசித்த வீடியோ

இதேபோல இன்டெல் நிறுவனமும் கடந்த ஆண்டு ட்ரோன்களை வைத்து வானவேடிக்கை நிகழ்ச்சிகளை நடத்தியது. 

இன்டெல் நிறுவனத்தின் swarm drone வீடியோ:

இவையெல்லாம் swarm drone-களுக்கான உதாரணம் மட்டும்தான். இன்னும் பலவகையில் இந்த ட்ரோன்களைப் பயன்படுத்த முடியும். உதாரணமாக, ஒரு ட்ரோனால் 10 கிலோகிராம் எடையைத்தான் தூக்கமுடியும் என்றால், அதனால் 20 கிலோ எடையுள்ள பொருளை சுமந்துசெல்ல முடியாது. ஆனால் அந்த ட்ரோனுடன் இன்னொரு ட்ரோனை இணைத்து செயல்படுத்தினால் இரண்டு ட்ரோன்களும் சேர்ந்து அந்தப் பொருளை சுமந்து செல்ல முடியும். ராணுவ தாக்குதலில் ஒரே ஒரு ட்ரோனைப் பயன்படுத்தும்போது, அதை ஏவுகணைகள் மூலமாக எளிதில் தாக்கி அழித்துவிடலாம். ஆனால் பல ட்ரோன்களை கூட்டாக இயக்கும்போது அதற்கான வாய்ப்பு பலமடங்கு குறையும். இதனால் ட்ரோன்கள் காப்பற்றப்படுவதோடு மட்டுமில்லாமல், தாக்குதலையும் துல்லியமாக நடத்தமுடியும். இப்படிப் பல விதங்களில் இந்த swarm drone-களைப் பயன்படுத்த முடியும். ஆனால் சாதாரண ட்ரோன்கள் போல, இவற்றை எளிதில் இயக்கிவிட முடியாது. காரணம் அனைத்து ட்ரோன்களையும் கட்டுப்படுத்துவது, வானில் பறக்கும்போது ஒன்றுடன் ஒன்று தொடர்புகொண்டு அதற்கேற்ப நிலையாகப் பறப்பது, தடைகளை எதிர்கொள்வது என இதில் நிறைய சிக்கல்கள் இருக்கின்றன. இவற்றையெல்லாம் தாண்டிதான் இந்த swarm drones இயங்க வேண்டும். இதற்கான ஆராய்ச்சிகள் தொடர்ந்து நடைபெற்று வருகின்றன.

எப்படி வேறுபடுகின்றன?

பறப்பதற்கான உந்துசக்தியை அளிக்கும் ரோட்டார் அல்லது இன்ஜின், சென்சார்கள், கன்ட்ரோல் யூனிட், ட்ரோனுக்கு சக்தியளிக்கும் பேட்டரி அல்லது எரிபொருள் ஆகியவைதான் ட்ரோன்களின் அடிப்படை அம்சம். இவை இருந்தாலே போதும். சாதாரணமாக ஒரு ட்ரோனை இயக்கமுடியும். ட்ரோன்கள் என்பவை பொதுவாக வானில் பறப்பவை மட்டும்தான். அதில் கேமரா வைக்கிறோமா, துப்பாக்கி வைக்கிறோமா என்பதைப் பொறுத்துதான் அதன் பயன்பாடுகள் மாறும். அப்படிச் சில உதாரணங்களைப் பார்ப்போம்.

1. லேசர் சென்சார்:

அறைகளை ட்ரோன்கள் உதவியுடன் மேப்பிங் செய்வதற்கு இந்த லேசர் சென்சார் உதவும். ஒரு கட்டடத்தில் தீ விபத்து நடந்திருக்கிறது என்றால், அதனுள் அவ்வளவு எளிதில் மனிதர்கள் சென்று அறைகளை நோட்டமிட முடியாது. ஆனால் லேசர் சென்சார்கள் கொண்ட ட்ரோன்களை உள்ளே அனுப்புவதன் மூலம், அந்த அறையின் வடிவத்தை கணினியிலேயே பார்த்துவிட முடியும். எனவே எந்தப் பாதையின் வழியாக செல்லலாம் என்பதுமுதல் அனைத்தையும் நம்மால் முன்கூட்டியே கணிக்க முடியும்.

2. கேமரா:

ஷூட்டிங், மேப்பிங் போன்றவற்றில் கேமராக்களின் பங்கு அளப்பரியது. இதன் மூலமாக நிலப்பரப்பை ஸ்கேன் செய்து, மேப் தயாரிக்கலாம். போட்டோ எடுக்கலாம். காடுகள், பாலைவனங்கள், கடல்பரப்புகள் போன்ற இடங்களில் கண்காணிப்புப் பணிகளில் ஈடுபடுத்தலாம்.

3. ராணுவ பயன்பாடுகள்:

பெரும்பாலும் ராணுவ பயன்பாடுகளுக்கான ட்ரோன்கள் ஆயுதங்கள் தாங்கியவையாக இருக்கும். அத்துடன் கேமரா, சென்சார் போன்றவையும் இடம்பெற்றிருக்கும்.

4. ரோபோட்கள்:

ஒரு கட்டடத்தின் 56-வது மாடியில் ஒரு கண்ணாடி உடைந்திருக்கிறது என வைத்துக்கொள்வோம். அதில் ஒரு மனிதர் ஏறி, அதைச் சரிசெய்வது என்பது கடினமான பணி. ஆபத்தானதும் கூட. ஆனால் ஒரு ட்ரோனில், கன்ட்ரோலர்கள் மூலம் இயங்கும் ரோபோட்டிங் கரங்களை அதில் இணைத்துவிட்டால் கீழிருந்தே சில நிமிடங்களில் அதனை மாற்றிவிட முடியும். இப்படிப் பல இடங்களில் ரோபோக்களை ட்ரோன்களுடன் இணைத்துப் பயன்படுத்தவும் ஆராய்ச்சிகள் நடந்துவருகின்றன.

5. சென்சார்கள்:

மேலே பார்த்த தீ விபத்து உதாரணத்தையே மீண்டும் எடுத்துக்கொள்வோம். மனிதர்கள் நுழைய முடியாத அந்தக் கட்டடத்தில் ட்ரோன்களை அனுப்பி, உள்ளே ஆட்கள் இருக்கிறார்களா என நாம் ஆய்வு செய்யலாம். அப்போது அகச்சிவப்பு கதிர்களுக்கான (IR) சென்சாரைப் பயன்படுத்தினால் மனிதர்கள் இருக்கிறார்களா என்பதை கடுமையான புகைமூட்டத்திற்கு நடுவேகூட நம்மால் கண்டுபிடித்துவிட முடியும்.

பயன்பாடுகள்:

பல தொழில்நுட்பங்கள் ட்ரோன்களில் வந்துவிட்டாலும் இன்னும் நிறைய நாடுகளில் ட்ரோன்கள் கண்காணிப்புப் பணிகளுக்காகத்தான் அதிகளவில் பயன்படுத்தப்படுகின்றன. அடுத்தது தாக்குதல்களுக்கு. அமெரிக்கா ட்ரோன்கள் மூலமாக ஆப்கானிஸ்தான் மற்றும் பாகிஸ்தான் பகுதிகளில் நடத்திய ட்ரோன் தாக்குதல்கள் நிறைய பாராட்டுகளையும், எதிர்ப்புகளையும் ஒருசேர குவித்தது. நிறைய தீவிரவாதிகள் இந்தத் தாக்குதல்களில் கொல்லப்பட்டாலும், கூடவே நிறைய பொதுமக்களும் மாண்டனர். வானில் இருந்து இயங்கும் ட்ரோன்கள் போலவே, ஆழ்கடலில் பாதுகாப்புப் பணிகளில் ஈடுபடுவதற்காக ஆழ்கடல் ட்ரோன்களும் இருக்கின்றன. இதுபோக போட்டோகிராபி போன்ற பொழுதுபோக்குப் பயன்பாடுகளுக்காகவும் பயன்படுத்தப்படுகின்றன.

வேளாண்துறையிலும் ட்ரோன்களின் பங்கு வளர்ந்துகொண்டே வருகிறது. வயலைக் கண்காணிக்க, வானில் இருந்து வயலில் பூச்சிக்கொல்லி மருந்துகள் தெளிக்க என வேளாண்துறையிலும் பயன்பட்டுவருகிறது. எண்ணெய் நிறுவனங்களின் எண்ணெய்க் குழாய்களில் விரிசல்கள் ஏற்பட்டிருக்கிறதா, கசிவுகள் இருக்கிறதா எனவும் பயன்படுவதால் தொழில்துறையிலும் கொஞ்சம் கொஞ்சமாக நுழைந்திருக்கின்றன ட்ரோன்கள். அமேசான் நிறுவனம் ட்ரோன் டெலிவரி செய்ய திட்டமிட்டிருப்பது அனைவரும் ஏற்கெனவே அறிந்ததுதான். இவை போக ஒரு இடத்தின் வரைபடத்தை உருவாக்கவும், தகவல் தொழில்நுட்ப வசதிகளை நீட்டிக்கவும் ட்ரோன்கள் பயன்படுகின்றன. தற்போது ட்ரோன்கள் என்பவை மனிதனின் கட்டுப்பாட்டைக் கொண்டு இயங்குகின்றன. செயற்கை நுண்ணறிவு கொண்ட ரோபோக்கள் போலவே, சுயமாக இயங்கும் ட்ரோன்களும் எதிர்காலத்தில் உருவாகும். இடத்திற்கு ஏற்ப சிந்தித்து செயல்பட வேண்டிய மீட்புப் பணிகள், ராணுவப் பணிகள் போன்றவற்றில் இவை பங்களிக்கும். இப்படி இவற்றின் பயன்பாடுகளை சொல்லிக்கொண்டே போகலாம்.

இதில் மட்டும் உஷார்!

எல்லா தொழில்நுட்பங்களுக்குமே சில குறைபாடுகள் இருக்கும். அதேபோல ட்ரோன்களுக்கும் சில குறைபாடுகள் இருக்கின்றன. இதைத்  தவறாகப் பயன்படுத்தினால் மற்றவர்களின் பிரைவசி பாதிக்கப்படுவதற்கான சாத்தியக்கூறுகள் இருக்கின்றன. இவற்றை யார் பயன்படுத்துவது, எப்படிப் பயன்படுத்துவது போன்றவை குறித்த முறையான விதிமுறைகள் இந்தியாவில் இன்னும் வகுக்கப்படவில்லை. இங்கே இன்னும் பயன்பாடுகள் அதிகமாகவில்லை என்பதும் குறிப்பிடத்தக்கது. ஆனால் விரைவில் அதற்கான நடவடிக்கைகள் எடுக்கப்படும் என நம்புவோம்.

காணும்போதெல்லாம், கண்ணில் பட்ட காக்கா குருவி போல எதிர்காலத்தில் ட்ரோன்கள் கூட வானில் அங்குமிங்கும் பறந்துகொண்டிருந்தால் கூட ஆச்சர்யப்படத் தேவையில்லை. எல்லாம் டெக்னாலஜி!

படம்: ஜெ.வேங்கடராஜ்



Trending Articles

Sponsored