கலர் கலராக மின்னும் வானவில் மலைத்தொடர்... குவியும் சுற்றுலாப் பயணிகள்!



Sponsored



அதிசயம் என்பது தண்ணீரில் நடப்பது கிடையாது, அதிசயம் என்பது பசுமையான பூமியில் நடப்பது, தற்போதைய தருணத்தில் ஆழமான உணர்வுகளுடன் வாழ வேண்டும்

- திஷ் நாட் ஹான்(Thich Nhat Hanh)

எனும் புத்த துறவியின் வார்த்தைகளின்படி பசுமையான பூமியில் நடப்பதுதான் தற்போது அதிசயமாக இருக்கிறது. தொடர்ந்து பூமியை மாசுபடுத்திக்கோண்டே சுத்தமான காற்றைத் தேடியும் பசுமையான பூமியைத் தேடியும் அலைந்துகொண்டேயிருக்கிறோம். உலகமயமாக்கலுக்குப் பின் அழுத்தம் நிறைந்த வாழ்க்கையிலிருந்து சற்று ஆசுவாசப்படுத்திக் கொள்ள மனிதன் நாடுவது இயற்கையைத்தான். இயற்கையின் அதிசயங்களைத் தேடிக் கண்டு வியந்து நெகிழ்கிறான். பூமி தோன்றி பல கோடி ஆண்டுகள் ஆன பின்னும் இயற்கையின் பல்வேறு ரகசியங்களைப் புரிந்து கொள்ளாமல் தெரிந்து கொள்ளாமல்தானிருக்கிறோம். இயற்கையாகவே அவையெல்லாம் வெளிப்படும்போது இயற்கையில் கரைந்து போவதை விட ஆன்ம சுகம் வேறெதுவும் இருப்பதில்லை. இயற்கையில் ஒரு மலைத்தொடரே வானவில்லாகக் காட்சியளிக்கிறது. வானவில் மலைத்தொடர்(Rainbow Mountains) என்றே அழைக்கப்படும் அந்தப் பகுதி பல்வேறு சுற்றுலாப் பயணிகளால் அதிகம் விரும்பப்படும் பகுதியாக மாறி வருகிறது.

Sponsored


உலகின் முக்கியமான மலைத்தொடர்களில் ஒன்று ஆண்டிஸ் மலைத்தொடர்(Andes Mountains). தென் அமெரிக்க கண்டத்தில் காணப்படும் இந்த மலைத்தொடரின் ஒரு பகுதியில்தான் இந்த வானவில் வண்ண மலைத்தொடர்கள் காணப்படுகின்றன. பெருவின் அசுங்கேட் மலைப்பகுதியில் (Ausangate Mountain) இவை அமைந்துள்ளன. 2013 வரை மற்ற மலைகளைப் போலத்தான் இதுவும் காணப்பட்டது. அதுவரை இதன்மேல் பனி படர்ந்து இருந்ததாக அங்குள்ள உள்ளூர்வாசிகள் சொல்கின்றனர். மொத்தமாகப் பனி உருகியதால் இந்த வானவில் வண்ணப் பாறைகள் உலகிற்குத் தெரிய வந்துள்ளன. இந்தப் புகைப்படங்களில் பார்ப்பதற்கு மலையை போட்டோஷாப் செய்தது போலத் தோன்றும் அளவிற்குத் துல்லியமான அழகுடனான வண்ணத்தில் இருக்கின்றன. இந்த மலையானது எரிமலைஸ் சங்கிலித் தொடருடனும் தென் அமெரிக்க மற்றும் நாஸ்கா டெக்டானிக் தட்டுகளின் விளிம்பிலும் அமைந்திருப்பது அப்பகுதியை அதிக கனிம வளம் உடையப் பகுதியாக வைத்திருக்கிறது. இந்த மலைத்தொடர் முழுவதும் அரிதான கனிமங்கள் அதிகமாகக் காணப்படுவதுதான் இந்த வானவில் வண்ணத்திற்குக் காரணம் என்கின்றனர். ஒவ்வொரு வண்ணத்திற்கும் ஒவ்வொரு கனிமம் காரணமாக உள்ளது. சிவப்பு நிறத்திற்கு இரும்பு ஆக்சைடு துருவும்(Iron Oxide rust) ஆரஞ்ச், மஞ்சள் நிறங்களுக்கு இரும்பு சல்பைடு( Iron Sulphide) வும் நீலபச்சை வண்ணத்திற்கு குளோரைடும்(Chloite) காரணமாக இருக்கின்றன. இப்படி மலையின் மேற்பரப்பில் வண்ணங்கள் அனைத்தும் ஒன்றின் பின் ஒன்றாக வரி வரியாக அமைந்துள்ளன. இதே வரம்பில் அருகில் உள்ள மலைகள் எப்போதும் போல வண்ணங்களற்று சாதரணமாகவே காணப்படுகின்றன. அவற்றிலும் கனிமங்கள் அதிகமாகக் காணப்படுவதால் இதேபோன்ற வண்ணங்கள் மேற்புறத்திற்கு அடியில் இருக்க வாய்ப்புள்ளது என்றும் சொல்கின்றனர். வானவின் மலைத்தொடர் கூட தொடர்ச்சியான காலநிலை மற்றும் மலையின் மேற்பரப்பு அரிப்பு ஆகியவற்றின் காரணமாக உட்புறத்தில் இருந்த வண்ணங்கள் வெளிப்பட்டிருக்கின்றன.

Sponsored


பார்த்தவுடன் மனதைப் பறிகொடுக்கும் அளவுக்கு அழகாக இருக்கும் இந்த மலைக்கு வரும் சுற்றுலாப் பயணிகளின் எண்ணிக்கை அதிகரித்துக் கொண்டே வருகிறது. மலையின் அருகில் இருக்கும் பகுதியின் மக்கள் சுற்றுலா வழிகாட்டிகளாக இருக்கின்றனர். இதனால் அப்பகுதியின் பொருளாதாரம் குறுகிய காலத்திலேயே உயர்ந்துள்ளது. 5௦௦ உள்ளுர்வாசிகள் தங்களது வேலையை விட்டுவிட்டு சுற்றுலா வழிகாட்டியாக மாறிவிட்டனர். நாளொன்றுக்கு 1௦௦௦ சுற்றுலாப் பயணிகளுக்கு மேல் இங்கு வருகின்றனர். ஒருவரிடம் இருந்து 3 டாலர் மட்டுமே கட்டணமாக பெறுகின்றனர். ஒட்டுமொத்தமாக ஆண்டுக்கு 4,௦௦,௦௦௦ டாலர்கள் இந்த மலையால் வருவாய் வருகிறது

வானவில் மலைத்தொடர் கடல்மட்டத்திலிருந்து 5௦௦௦ மீட்டருக்கும் மேல் உயரத்தில் அமைந்துள்ளது. கீழிருந்து மேலே துணையில்லாமல் ஏற முடியாது. பாதைத் தடத்தை மறந்துவிட்டால் ஆபத்தான பாதைக்கு செல்லக்கூட வாய்ப்புள்ளது. அங்குள்ள உள்ளுர்வாசிகளும் கடந்த ஐந்தாண்டுகளாகத்தான் மலையேறுகின்றனர். இங்கிருந்து 1௦௦கிமீ தொலைவில் உள்ள குஸ்கோ( Cusco) நகரில்தான் அனைத்து சுற்றுலாப் பயணிகளும் தங்குகின்றனர். அங்கிருந்து இந்த மலைப்பகுதிக்கு வழிகாட்டி உதவியில்லாமல் வர முடியாது. சுற்றுச்சூழல் செயற்பாட்டாளர்கள் இதனை வேறு பார்வையில் எச்சரிக்கின்றனர். அளவுக்கு அதிகமான சுற்றுலாப் பயணிகள் வருவதால் மலையின் சூழல் பாதிக்கப்படும். கண்முன்னே சாட்சியாக குறைந்த காலத்தில் அதிகமான மக்கள் மலையேறியதில் 4கிமீக்கும் மேற்பட்ட மலைப்பாதையானது முற்றிலும் அழிக்கப்பட்டுவிட்டது. அதுமட்டுமில்லாமல் அருகில் இருக்கும் காடுகளுக்கும் மச்சு பிச்சுவிற்கும் கூடப் பாதிப்பு ஏற்படலாம்.

சுற்றுலாப் பயணிகளின் எண்ணிக்கையைச் சமாளிக்கும் அளவிற்கு போதிய சுற்றுலா வழிகாட்டிகள் இங்கு இல்லை. மேலும் ஏற்கெனவே இருக்கும் வழிகாட்டிகளும் அங்குள்ள உள்ளூர்வாசிகள். அவர்களுக்கு முறையான முதலுதவியோ, சுற்றுலாப் பயணிகளை எப்படி ஒழுங்காகக் கூட்டிச்சொல்வது என்பதோ தெரிவதில்லை.கனிம வளங்கள் அதிகமாகக் காணப்படுவதால் அதனை வெட்டியெடுத்து மலையை நாசமாக்கப் பெருமுதலாளிகளும் இந்த மலையைக் குறி வைத்துள்ளனர். தற்போதே இரண்டு, மூன்று பன்னாட்டு நிறுவனங்கள் கனிமம் எடுக்க அனுமதி வாங்கியுள்ளன. அப்பகுதியில் இருக்கும் பழங்குடியினர் இந்த மலையை வழிபடுகின்றனர். அவர்களது வரலாற்றில் இந்த மலைக்கு அதிகம் முக்கியத்துவம் இருக்கிறது. ஆண்டுக்கொருமுறை ஸ்டார் ஸ்னோ விழாவிற்காக ஆயிரக்கணக்கான மக்கள் இம்மலைக்கு வரும் பழக்கம் உள்ளது. தேனியின் பொட்டிபுரமாக இருக்கலாம், பெருவின் குஸ்கொவாக இருக்கலாம். பூமியின் எப்பகுதியானாலும் மண்ணின் பூர்வகுடிகள் அப்பகுதியின் இயற்கையோடு மிக நெருங்கிய தொடர்பைக் கொண்டிருக்கிறார்கள். அதிகாரமும், அரசும்தான் அதனைக் கண்டுகொள்வதே இல்லை.        



Trending Articles

Sponsored