``ஆனால் அடுத்த 5 ஆண்டுகள் வெயில் கொல்லும்!” - விஞ்ஞானிகள் சொல்லும் காரணம்



``போன வருஷத்த விட இந்தத் தடவை வெயில் அதிகமா இருக்குற மாதிரி தெரியுதே " என்று கோடைக்காலங்களில் யாரேனும் ஒருவர் சொல்லியிருக்கக் கேட்டிருப்போம். உண்மையாகவே நிலைமை அப்படித்தான் இருக்கிறதா இல்லையென்றால் நமக்கு மட்டும்தான் அப்படித் தோணுதானும் பலர் யோசித்திருக்கலாம். நீங்க அப்படியெல்லாம் யோசிக்கவே வேண்டாம். நிஜமாகவே கடந்த நான்கு வருடங்களில் வெப்பநிலை அதிகரித்திருப்பது உண்மைதான் எனக் கூறும் விஞ்ஞானிகள், நிலைமை இன்னும் மோசமாகக் கூடும் என எச்சரித்திருக்கிறார்கள்.

Sponsored


புவி வெப்பமயமாதல் என்ற விஷயம் பல வருடங்களாக வெறும் விவாதப் பொருளாக மட்டுமே இருந்து வந்தது. அதனால் ஏற்படும் எதிர்கால விளைவுகளைப் பற்றி நீண்ட காலமாகவே எச்சரிக்கை செய்து வந்தார்கள் விஞ்ஞானிகள். ஆனால், மனிதர்கள் அதையெல்லாம் காதில் வாங்கிக் கொள்வது போலவே தெரியவில்லை. வழக்கம் போல தங்கள் இஷ்டப்படியே செய்து வந்தார்கள். பூமி இத்தனை வருடங்களாக வெப்பநிலையைச் சமநிலையில் வைப்பதற்கு என்ன காரணிகளையெல்லாம் வைத்திருந்ததோ அதையெல்லாம் யோசிக்காமல் அழித்து வந்தார்கள். இவ்வளவு காலமும் பொறுத்துக்கொண்டிருந்த பூமி இப்போது அதன் விளைவை நமக்கு திருப்பித் தரத் தொடங்கியிருக்கிறது. அதன் ஒரு பகுதிதான் வழக்கத்தை விடவும் அதிகமான வெப்பத்தை உணர்வது.

Sponsored


அடுத்த ஐந்து வருடங்களில் நிலைமை இன்னும் மோசமாகலாம் 

Sponsored


இதுவரை பதிவு செய்யப்பட்டிருந்த வரலாற்றிலேயே கடந்த நான்கு வருடங்களில்தான் உலகம் முழுவதிலும் அதிகமான வெப்பநிலை நிலவியது என்று விஞ்ஞானிகள் ஏற்கெனவே தெரிவித்திருந்தார்கள். அதிலும் குறிப்பாக 2016-ம் ஆண்டே வழக்கத்துக்கு மாறாக அதிக வெப்பம் பதிவாகியிருக்கிறது. ``அடுத்த ஐந்து வருடங்களில் அதிகமான வெப்பத்தை நாம் எதிர்கொள்ள வேண்டியிருக்கும் என்பதை நாங்கள் கண்டறிந்திருக்கிறோம்" என்கிறார் பிரான்ஸின் தேசிய அறிவியல் ஆராய்ச்சி மையத்தைச் சேர்ந்த ஃப்ளோரியன் செவேலெக் (Florian Sevellec). இவரும் இங்கிலாந்தின் சவுத்தாம்ப்டன் பல்கலைக்கழகத்தைச் சேர்ந்த விஞ்ஞானி ஒருவரும் இணைந்து ஆய்வுக்கட்டுரை ஒன்றை நேச்சர் (nature) என்ற அறிவியல் இதழில் சமர்ப்பித்திருக்கிறார்கள். அதில்தான் இந்தத் தகவல்கள் குறிப்பிடப்பட்டிருக்கின்றன.

புவி வெப்பமயமாதல் தொடர்ச்சியாக அதிகரித்துக் கொண்டே இருந்த வேளையில் 2000வது ஆண்டு தொடங்கி சில வருடங்கள் அதன் வேகம் சற்று குறைந்தது. அதற்குக் காரணமாக இருந்தது சில உள் காரணிகள்தாம். குறிப்பாகப் பூமியில் உள்ள பெருங்கடல்களில் நடைபெற்ற ஏற்றத்தாழ்வுகள் அதற்கு முக்கியக் காரணமாக இருந்தது. இது போன்ற உள் காரணிகள் பூமியின் வெப்பத்தைக் குறைக்க உதவின. இதற்கு முன்பு அது வெப்பத்தைக் குறைக்க உதவியதோ அதுவே தற்பொழுது வெப்பம் அதிகரிப்பதற்கு காரணமாகப் போகிறது என்பது அதிர்ச்சியளிக்கக் கூடியதாக இருக்கிறது.

இந்த ஆய்வின் போது ஏற்கெனவே இருக்கும் பத்துக்கும் மேற்பட்ட காலநிலை தரவுகளை ஆராய்ந்திருக்கிறார்கள். அதன்படி வரும் இந்த ஆண்டு தொடங்கி வரும் 2022-ம் ஆண்டு வரை அதிக வெப்பம் நிலவ வாய்ப்புள்ளது. 58 சதவிகிதம் பூமியின் ஒட்டுமொத்த வெப்பநிலை அதிகரிப்பதற்கும் 69 சதவிகிதம் கடல்களின் வெப்பநிலை அதிகரிப்பதற்கும் வாய்ப்புள்ளதாக தெரிவித்திருக்கிறார்கள். அதே நேரத்தில் இது தரவுகளின்படி கணிக்கப்பட்ட ஒன்று என்பதால் இதற்கு முழுமையான உத்தரவாதத்தை அளிக்க முடியாது என்பதையும் குறிப்பிட்டிருக்கிறார்கள். அதே நேரத்தில் அவர்களின் கருத்துக்கு மாறாக இது நிகழ்வதற்கான வாய்ப்புகள் மிகக் குறைவானது என்று தெரிவித்திருக்கிறார் நாசாவைச் சேர்ந்த விஞ்ஞானி ஒருவர். அப்படியே நிகழ்ந்தாலும் பெரிதாக ஒன்றும் பாதிப்பு ஏற்படுவதற்கான வாய்ப்புகள் இல்லை என்றும் தெரிவித்திருக்கிறார். 



Trending Articles

Sponsored