பிரான்ஸ் கொடி பறக்க வேண்டிய இடத்தில் பிரிட்டிஷ் கொடி..! மெட்ராஸ் உருமாறிய வரலாறு



Sponsored



கிராமமாக இருந்த மெட்ராஸ், கடந்த 400 ஆண்டுகளில் `கிரேட்டர் சென்னை'யாக மாறியிருக்கிறது. தனது ஆக்டோபஸ் கரத்தை சென்னை எப்படி வலுப்படுத்தியிருக்கிறது என்பதற்கு, தனி வரலாறே உண்டு. மசூலிப்பட்டனத்தில் இருந்த பிரிட்டிஷின் கிழக்கிந்திய நிறுவனம், கொஞ்சம் கொஞ்சமாகத்தான் சென்னைக்கு இடம்பெயர்ந்தது. ஒரு கட்டத்தில் செயின்ட் ஜார்ஜ்கோட்டையில் பிரான்ஸ் நாட்டின் கொடி பறந்திருக்கிறது என்கிறார்கள் வரலாற்று ஆராய்ச்சியாளர்கள். 

ஐரோப்பா கண்டத்திலிருந்து முதன்முதலில் இந்தியாவுக்கு வந்தவர்கள் போர்ச்சுகீசியர்கள்தாம். இவர்கள் கோவாவை தலைநகராகக்கொண்டு இந்தியப் பகுதிகளை கொஞ்சமாகப் பிடித்து ஆட்சிசெய்ய தொடங்கினார்கள். அவர்கள் சென்னைப் பகுதிக்கு வந்து முதன்முதலில் தங்கள் வணிகத்தை ஆரம்பித்தபோது, அவர்கள் குறிப்பிட்ட பெயர் `சாந்தோம் டி மெலியாபூர்’. இதன் பொருள் தற்போதைய மயிலாப்பூரின் சாந்தோம் என்பதாகும். 

Sponsored


Sponsored


வியாபாரம் செய்ய வந்த ஐரோப்பியர்கள், இந்தியாவில் நிலவிய ஒற்றுமையின்மையைப் பயன்படுத்திக்கொண்டு இந்தியாவைக் கொஞ்சம் கொஞ்சமாகப் பிடித்து ஆட்சிசெய்யலாம் என்ற முடிவுக்கு வந்தார்கள். இதற்கிடையே ஆங்கிலேயர்கள், பிரெஞ்சுக்காரர்கள், போர்ச்சுகீசியர்கள், டச்சுக்காரர்கள், டேனியர்கள் என ஐந்து நாட்டவர்களிடையே யார் இந்தியாவில் முழுமையான அதிகாரம் செலுத்துவது என்ற போட்டிவந்தது. அவர்களுக்குள் சண்டைகள் நடந்து ஒவ்வொருவராக வெளியேற, இறுதிப்போட்டியில் பிரான்ஸும் இங்கிலாந்தும் மோதின. அதில் இங்கிலாந்து வெற்றி பெற்று நம்மை ஆளத்தொடங்கியது. இந்தப் பின்னணியில்தான் சென்னையும் தோன்றி வளர்ந்திருக்கிறது. 

கி.பி.1600-ம் ஆண்டுகளில், இங்கிலாந்தில் ஆங்கிலேய கிழக்கிந்திய நிறுவனம் உருவாக்கப்பட்டது. இந்தியாவுடன் வியாபாரம் செய்ய ஆரம்பிக்கப்பட்ட இந்த நிறுவனத்தின் பணியாளர்கள் இந்தியா முழுவதும் பல்வேறு பகுதிகளில் பயணம் செய்து, அங்கு உள்ள வளங்களுக்கு ஏற்ப தங்க ஆரம்பித்தனர். இந்த வகையில், மசூலிப்பட்டினத்திலும், நெல்லூருக்கு அருகில் அர்மகாம் பகுதியிலும் ஆங்கிலேயர்கள் தங்கினர். 

மசூலிப்பட்டினம் மற்றும் அர்மகாம் பகுதிகளுக்கு ஆங்கிலேய கிழக்கிந்திய நிறுவனத்தின் பிரதிநிதியாக இருந்தவர் பிரான்சிஸ்டே. இவர், `அர்மகாம் மற்றும் மசூலிப்பட்டினம் தவிர, வேறு பாதுகாப்பான இடம் பார்க்க வேண்டும்' என்று பிரிட்டிஷ் நிறுவனத்திடம் கேட்டுக்கொண்டார். இடத்தைத் தேர்வுசெய்யும் அதிகாரம் அவருக்கே வழங்கப்பட்டது. 

பிரான்சிஸ்டே, ஆங்கில கிழக்கிந்திய கம்பெனிக்காகப் பார்த்த இடங்களுள் மெட்ராஸ் மிகவும் பிடித்துப்போய்விட்டது. அப்போது மெட்ராஸ் பகுதி, சந்திரகிரி மன்னனின் ஆளுகைக்குக் கீழ் இருந்தது. இந்தச் சந்திரகிரி, ஆந்திராவில் இப்போதும் இருக்கிறது. சந்திரகிரி அரசரின் வரிவசூல் அதிகாரியாக பூந்தமல்லி நாயக்கர் வேங்கடகிரி இருந்தார். சென்னையை வாங்குவதற்கான பேச்சுவார்த்தைகள் பூந்தமல்லி நாயக்கருடன் நடத்தப்பட்டன. பிறகு, சந்திரகிரி அரசரிடம் பேச்சுவார்த்தைகள் இறுதிசெய்யப்பட்டன. 

கி.பி.1639-ம் வருடம் ஆகஸ்ட் மாதம் 22-ம் தேதி, சந்திரகிரி அரசரிடமிருந்து பிரான்சிஸ்டே மெட்ராஸ் பகுதியை விலைக்கு வாங்கினார். ஆங்கிலேயர் வியாபாரம் செய்துகொள்ளவும், கடைகளும் கோட்டையும் கட்டிக்கொள்ளவுமே இடம் விற்பனை செய்யப்பட்டது. விற்பனை ஒப்பந்தம் செய்துகொண்ட ராஜமகால் அரண்மனை, சந்திரகிரி ரயில்வே ஸ்டேஷன் அருகில் (காட்பாடி-கூடூர் ரயில் பாதையில்) இருக்கிறது. 

சந்திரகரி அரசரிடமிருந்து நிலம் வாங்கிய ஒரு வருடம் கழித்து, 1640-ம் ஆண்டில் செயின்ட் ஜார்ஜ்கோட்டை கட்டப்பட்டது. அந்தக் கோட்டையை மையமாகக்கொண்டு ஆங்கிலேயரின் குடியிருப்புகள் உருவாகின. சென்ன பட்டினத்தையொட்டி இருந்த திருவல்லிக்கேணி, புரசைவாக்கம், எழும்பூர், சேத்துப்பட்டு ஆகிய கிராமங்கள் இத்துடன் இணைந்தன. 

Photos Courtesy: gutenberg.org

ஆங்கிலேயர்கள் வந்தவுடனே வசதியாக கோட்டை கட்டிவிடவில்லை. மெட்ராஸ் ஒரு மணற்பாங்கான கடற்கரை. அங்கே மூங்கிலும் பனைமரங்களும் அதிகம் இருந்தன. எனவே, அவர்கள் வைக்கோல்நார் குடிசைகளைக் கட்டி வசிக்க ஆரம்பித்தார்கள். ஆரம்பத்திலிருந்தே இந்தக் குடியேற்றக் குடிசைகள் `புனித ஜார்ஜ்கோட்டை' என்றே அழைக்கப்பட்டன. பல ஆண்டுகளுக்குப் பிறகே வலிமையான கோட்டையும் குடியிருப்புகளும் முழுமைபெற்றன. எல்லாவிதமான ராணுவத் தாக்குதல்களையும் எதிர்பார்த்து எல்லாத் திசைகளிலும் கோட்டைச் சுவர்கள் வலிமையாக்கப்பட்டன. 

ஐரோப்பாவில் இங்கிலாந்தும் பிரான்ஸும் சண்டைபோட்டுக்கொண்டிருந்தன. அதன் எதிரொலியாக சென்னையிலும் பிரான்ஸுக்கும் இங்கிலாந்துக்கும் இடையே பெருங்கலகம் மூண்டது. 1746-ம் ஆண்டு பிரான்ஸின் கடுமையான தாக்குதலுக்குள்ளானது புனித ஜார்ஜ்கோட்டை. இதுவே `முதல் கர்நாடகப் போர்' எனக் குறிப்பிடப்படுகிறது.

இந்தப் போரில் பிரான்ஸின் கடற்படைத் தாக்குதலைச் சமாளிக்க முடியாமல் ஆங்கிலேயர்கள் பிரான்ஸிடம் சரணடைந்துவிட்டார்கள். மெட்ராஸில் பிரெஞ்சுக் கொடி பறந்தது. ஆனால், பிறகு ஏற்பட்ட போர் சமாதான உடன்படிக்கையைத் தொடர்ந்து மெட்ராஸ், பிரிட்டிஷிடம் ஒப்படைத்திருக்கிறது பிரான்ஸ். இதனால், பிரான்ஸ் கொடிக்குப் பதிலாக மீண்டும் பிரிட்டிஷ் கொடி பறக்க ஆரம்பித்திருக்கிறது. 

ஒருவேளை, புனித ஜார்ஜ்கோட்டையில் பிரான்ஸ் கொடி பறந்திருந்தால், சென்னையின் வரலாற்றில் மட்டுமல்ல கலாசாரத்திலும் பல்வேறு மாற்றங்களைச் சந்தித்திருப்போம்.



Trending Articles

Sponsored