''வெங்காயம் - பூண்டு உரிக்கும் மெஷின் அப்பாவோட மூளை... என்னோட டெக்னாலஜி கலந்தது'' - அசத்தும் உசிலம்பட்டி ப்ரீத்தி



Sponsored



வெள்ளைப்பூண்டு, வெங்காயம்  உரிக்கும் மிஷின்களைத் தந்தையுடன் இணைந்து கண்டறிந்து, இந்தியாவின் கவனத்தை ஈர்த்துள்ளார் முத்து ப்ரீத்தி.

மதுரை மாவட்டம், உசிலம்பட்டியைச் சேர்ந்த முத்து ப்ரீத்தி, “எங்க தாத்தா காலத்திலிருந்து எங்கள் குடும்பத்துக்கு இன்ஜினீயரிங் ஒர்க்ஸ் பழக்கப்பட்டது. தாத்தாவுக்குப் பிறகு அப்பா நாகராஜ் மிஷின்கள் உருவாக்குவதில் ஆர்வமாக இருதார். மாடர்ன் ரைஸ் மில்களில் பல இயந்திரங்களைச் செய்துகொடுத்து வேலைகளை எளிமையாக்கினார். கர்நாடக பொன்னி  உள்ளிட்ட வெளிமாநில நெல் அரிசி ரகங்கள், குறைந்த விலையில் பொதுமக்களுக்குக் கிடைக்க ஆரம்பிச்சதும், ரைஸ்மில்களுக்குத் தேவைகள் குறைய ஆரம்பிச்சது. அதனால், ரைஸ் இயந்திரங்களுக்குப் பின்னடைவு ஏற்பட்டது.

Sponsored


என்ன செய்யலாம்னு யோசிச்சோம். ஊறுகாய் தயாரிக்கும் நிறுவனங்களில் சென்று பார்த்தபோது எலுமிச்சை, வெள்ளைப்பூண்டு, வெங்காயம் போன்றவற்றை உரிக்க நிறைய நேரம் தேவைப்படறதையும் சிரமம் இருக்கிறதையும் உணர்ந்தோம். அதற்கான மெஷினைக் கண்டுபிடிக்கலாமே என நினைச்சோம். உடனே செயலில் இறங்கின அப்பா, மேனுவல் மெஷின் தயாரிச்சுக் கொடுத்தார். அதற்கு வரவேற்பு கிடைச்சது. என்.ஐ.எஃப் தேசிய விருதையும் முன்னாள் ஜனாதிபதி அப்துல் கலாம் கையால் வாங்கினார். நான் எம்.டெக் படிக்கும்போதே இதன்மீது ஆர்வம் வந்துச்சு. கல்லூரி புராஜெக்ட்டாக, மேனுவலாக இருந்த வெள்ளைப்பூண்டு உரிக்கும்  இயந்திரங்களை, ஆட்டோ மிஷினாக மாற்றினேன். இப்போ, அதில் பல நுணுக்கங்களைச் சேர்த்து, இந்திய அளவில் பல்வேறு இடங்களுக்கு சப்ளை செய்யறோம்'' என்கிறார்.

Sponsored


இந்த இயந்திரம் மூலம் வேலை நேரத்தைக் குறைப்பதுடன், அந்த உணவுப்பொருளை நீண்ட நாள்களுக்குக் கெட்டுப்போகாமல் பாதுகாக்கவும் முடியுமாம். ஊறுகாய் கம்பெனிகள், கேட்டரிங் சர்வீஸ், பெரிய ஹோட்டல்களுக்கு இந்த இயந்திரம் மிகவும் உதவியா இருக்கும். வெள்ளைப்பூண்டு, வெங்காயங்களை உரிச்சு, வெளியூர்களுக்கு பாக்கெட் போட்டும் அனுப்பலாமாம். 

''இந்த வெள்ளைப்பூண்டு, வெங்காயம் இருப்பதை மூன்று கட்டமாக செய்கிறோம், முதலில், டிரையர் மெஷினில் வைத்து, டைம் செட் செய்யறது. பிறகு, தூசுகள் அகற்றும் இயந்திரத்தில் கொட்டி, முழுமையாகத் தூசுகளை அகற்றுவது, பிறகு, தோலை உரிக்கும் பகுதியில் செலுத்தி தோல்களை உரிபப்து. 1 மணி நேரத்தில் 100 கிலோ வெள்ளைப்பூண்டுகளை தயார்செய்துடலாம். அதேபோல், சின்ன வெங்காயத்தை 1 மணி நேரத்தில் 120 கிலோ முதல் 150 கிலோ வரை உரிச்சு எடுக்கலாம். பெரிய வெங்காயம் 100 முதல் 120 கிலோ வரை எடுத்துடலாம்.

கைகளால் உரிக்கும்போது 5 கிலோவுக்கே கடுமையா வலி ஏற்பட்டுவிடும். சுகாதாரக் குறைவும் இருக்கும். இந்த இயந்திரம் மூலம் உரிப்பதால், பிரச்னை இருக்காது. ஆனால், அதிக அளவு வெள்ளைப்பூண்டு , வெங்காயம் உரிப்பவர்களுக்குத்தான் இந்த இயந்திரம் சாத்தியம். பெரும் நிறுவனங்கள் இந்தியாவில் பல இடங்களிலிருந்து இயந்திரத்தை வாங்கறாங்க. அப்பாவும் நானும் இணைந்து இன்னும் பல கண்டுபிடிப்புகளை உருவாக்குவோம். ஐ.ஏ.எஸ் ஆகறது என்னுடைய கனவு. அதனுடன் இந்த மாதிரியான கண்டுபிடிப்புகளும் தொடரும்'' எனப் புன்னகைக்கிறார் முத்து ப்ரீத்தி.

முத்து ப்ரீத்தியின் தந்தை நாகராஜ், “என்னுடைய அனுபவமும் மகளின் டெக்னிக்கல் ஐடியாவும் இணைந்து உருவானதுதான் இந்த இயந்திரம். இதன்மூலம் கிலோ கணக்கில் உரிக்கும் தொழிலாளர்களின் பணிச்சுமை குறையுது. முதலாளிகளின் சிரமங்களும் தவிர்க்கப்படுது. சீனப் பொருள்களுக்குப் போட்டியாக இந்த இயந்திரம் நுணுக்கமாக செயல்படுது. பல ஊறுகாய் நிறுவனங்கள், எங்களைத் தொடர்புகொண்டு இயந்திரங்களை வாங்கறாங்க'' என்கிறார் பெருமையுடன்.



Trending Articles

Sponsored