வள்ளி… ஆடி, ஓடி, விளையாடி அருளிய வள்ளிமலை தரிசனம்! காடு, மலை தாண்டி கடவுளைத் தேடி..! – பரவசப் பயணம்! - 8



Sponsored



இந்தத் தொடரின் முதல் அத்தியாயத்தைப் படிக்க ......

இந்தத் தொடரின் இரண்டாம் அத்தியாயத்தைப் படிக்க ......

Sponsored


இந்தத் தொடரின் மூன்றாம் அத்தியாயத்தைப் படிக்க ......

Sponsored


இந்தத் தொடரின் நான்காம் அத்தியாயத்தைப் படிக்க ......

இந்தத் தொடரின் ஐந்தாம் அத்தியாயத்தைப் படிக்க ......

இந்தத் தொடரின் ஆறாம் அத்தியாயத்தைப் படிக்க ......

இந்தத் தொடரின் ஏழாம் அத்தியாயத்தைப் படிக்க ......

அறிவு என்பது வேறு; ஞானம் என்பது வேறு. அறிவை நாம் எப்படியும் எங்கிருந்தும் பெற்றுக்கொள்ளலாம். பார்த்தும், கேட்டும், படித்தும் அறிவை நாம் பெற்றுவிடலாம். அனுபவங்களின் மூலமாகவும் பெறலாம். அறிவு என்பது உங்களை உலகத்துக்குக் காட்டப் பயன்படும். ஆனால், ஞானம் என்பது உங்களை உலகுக்குக் காட்டுவதுடன், உங்களையும் உங்களுக்குக் காட்டும். ஞானம் என்பது ஆன்மிகத் தேடல்களின் மூலமாக மட்டுமே நமக்குக் கிடைக்கும். தேடல் என்றாலே தேடிப் பயணிப்பதுதான்.

தாழ்ந்த இடம் நோக்கிச் செல்லும் நீரைப் போல, வெற்றிடத்தை நோக்கிச் செல்லும் காற்றைப் போல அமைதியை நோக்கி நாடிச் செல்லும் மனமே ஞானத்தை அடைகிறது. பல இடங்களை நோக்கித் தொடரும் யாத்திரையில், எங்கோ ஓர் இடத்தில் மனதுக்கு ஞானம் கிடைத்துவிடுகிறது. அப்படி நமக்கும் எங்கே ஞானம் ஸித்திக்குமோ என்ற ஏக்கமும் எதிர்பார்ப்புமாகவே நாமும் ஞானமலை, ஈசன்மலையைத் தொடர்ந்து நம்முடைய யாத்திரையை வள்ளிமலையை நோக்கித் தொடர்ந்தோம்.

‘ஞானத்தைத் தேடத் தேட மனம் அலைபாய்ந்தபடியே இருந்ததே தவிர, ஒருநிலையில் ஒடுங்கவேயில்லை. சில இடங்களில் மட்டும் மனம் தற்காலிகமாக லயித்துப் போய் இருந்ததே தவிர, பக்குவப்படவே இல்லை. எந்த இடத்தில் மனம் பக்குவப்பட்டு, ஞானம் கிடைத்துவிடுகிறதோ அதன் பிறகு யாத்திரை அந்த இடத்திலேயே முற்றுப் பெற்றுவிடுமே. நம்முடைய யாத்திரையில் நாம் பெற்ற ஞானத்தை மற்றவர்களுக்கு வழங்க முடியாவிட்டாலும், யாத்திரையின்போது நாம் பெற்ற சிலிர்ப்பூட்டும் அனுபவங்களை மற்றவர்களுடன் பகிர்ந்துகொள்ளலாமே’ என்றெல்லாம் பலவாறாக நினைத்தபடி நாம் வள்ளிமலை அடிவாரத்தை அடைந்தோம். 'ஞானத்தைத் தேடிய நம் யாத்திரையில் நாம் இப்போது செல்லப்போகும் வள்ளிமலையிலாவது நமக்கு ஞானம் கிடைத்துவிடாதா?' என்ற எதிர்பார்ப்புடன் நாம் வள்ளிமலையின் தெய்விக அழகை தரிசித்து வணங்கினோம். அந்த மலையின் மீது எழுந்தருளி இருக்கும்

அந்த அழகு முருகனை, மாலவன் மருகனை, வள்ளிக்குற மகளின் உள்ளம் கவர்ந்த நாயகனை மலையடிவாரத்திலிருந்தபடி நாம் இருகரம் கூப்பித் தொழுதோம்.

‘பாலினுள் மறைந்திருக்கும் நெய் போலவும், ஸ்வரங்களுக்குள் மறைந்திருக்கும் ராகங்கள் போலவும், மன மாயை இருளுக்குள் மறைந்திருக்கும் ஞானத்தைத் தேடி அடைந்திடவே, முருகா, நின் திருவடி நாடி வந்துள்ளேன்’ என்று இறைஞ்சியபடியே சற்றுநேரம் நின்றிருந்தோம். நின்றபடியே வள்ளிமலையின் தோற்றத்தை மனத்திரையில் படம் பிடித்துக்கொள்ள முயற்சி செய்தோம்.

வள்ளிமலை ஓர் அபூர்வமான தோற்றத்தைக் கொண்டது. எந்த ஒரு மலையையும் கண்ணால் கண்ட பிறகு கண்களை மூடிக்கொண்டு அந்த மலையின் தோற்றத்தை மனதுக்குள் கொண்டு வந்துவிட முடியும். ஆனால், வள்ளிமலையின் தோற்றத்தை மட்டும் நம் மனத் திரையில் படம் பிடிக்க முடியவில்லை. மனதுக்குச் சிக்காத மந்திரமலை அது! அந்த மலை வள்ளிமலையல்லவா? வள்ளி என்றால் இச்சா சக்தி. அதாவது ஆசை - எண்ணங்களின் வடிவம் வள்ளி. தேவசேனா கிரியா சக்தி அதாவது ஆசைகளை - எண்ணங்களைச் செயல்வடிவம் பெறச் செய்யும் ஆற்றல் சக்தி. ஆசைகளையும் ஆற்றல்களையும் கட்டுப்படுத்தும் ஞானசக்தியே முருகப்பெருமான். நமக்குள் ஞானம் பெறவேண்டும் என்ற எண்ணத்தைத் தூண்டியவள் வள்ளி; எண்ணம் செயல்வடிவம் பெறுவதற்காக நாம் மேற்கொள்ளும் யாத்திரைக்குத் தேவையான ஆற்றலை நமக்கு அருள்பவள் தேவசேனா. தேவியர் இருவர் அருளுடன் ஞானசக்தியான முருகனின் அருளைப் பெற்றிட விரும்பிய நாம் வள்ளிமலையை அடைந்துவிட்டோம்.

வள்ளிக்குறமகள் பிறந்து உலவிய இடம் இது, அவளை ஆட்கொண்டு மணம்புரிய எம்பெருமான் குமரவேல் திருவிளையாடல் நடத்திய இடம் இது. இவர்களின் திருமணத்துக்கு உதவ விநாயகப்பெருமான் யானை உருவமெடுத்து வந்த தலம் இது என்று மனம் நிறைய பக்தியோடு முதலில் நாம் சென்றது ஆறுமுகநாத சுவாமிக் கோயில். கோயில் சந்நிதிக்கு வெளியில், நிறைய திருமண மண்டபங்களாக இருந்தன. வள்ளியை முருகப்பெருமான் மணந்த தலம் இது என்பதால், இங்கு நிறைய திருமணங்கள் நடைபெறுகின்றன போலும்! மலையடிவாரக் கோயிலின் முன்புறம் பரந்த மண்டபமும் உள்ளது. அதன் மேற்புறத்தின் சுற்றுப்புறங்களில் வள்ளிப்பெருமாட்டியின் வரலாற்றைச் சொல்லும் படங்களும், முருகப் பெருமானின் திருஅவதாரம் கூறும் படங்களும் அழகுற வரையப்பட்டுள்ளன. மண்டபத்தைத் தாண்டி, ஐந்துநிலை மாடக் கோபுரத்தைத் தாண்டி கோயிலின் உள்ளே செல்கிறோம்.

அமைதியான ஒரு சுற்றுக்கோயில். கருவறைக்குள் ஸ்ரீ வள்ளி தேவசேனா சமேத ஆறுமுகநாதர் அழகுற காட்சியளிக்கிறார். எல்லா வினைகளையும் அறுத்தெறிந்து ஆட்கொள்ளும் முருகப்பெருமானை கண் குளிர தரிசித்து கோயிலைச் சுற்றி வந்தோம். கோயிலின் இடப் புறமாக நவகிரக சந்நிதி அமைந்துள்ளது. கோயிலெங்கும் குரங்குகளின் நடமாட்டம் அதிகமாகவே உள்ளது.

மலையடிவாரக்கோயிலை விட்டு வெளியே வர, பின்புறமாக அமைந்துள்ளது சரவணப்பொய்கை எனும் அழகிய திருக்குளம். குளத்துக்கு முன்புறமாக திருமுருக கிருபானந்த வாரியாரின் சிலை அமைக்கப்பட்டுள்ளது. வள்ளிமலையின் வளர்ச்சிக்கு காரணமான வள்ளல் அல்லவா அவர்!

திருக்குளத் தீர்த்தத்தை சிறிது எடுத்து நம் தலையில் தெளித்துக்கொண்டு மலையடிவாரத்தை அடைந்தோம்.

மலையடிவாரத்தில் தமிழ்க்குறமகள் வள்ளி பிராட்டியின் தனிச்சந்நிதி முதலில் காணப்பட்டது. இந்தச் சந்நிதி வள்ளிமலையில் மிக மிக விசேஷமான இடம் என்று அந்த கோயில் அர்ச்சகர் நம்மிடம் கூறினார்.

அப்படி என்ன விசேஷம் அந்தக் கோயிலுக்கு..?

பயணம் தொடரும்...



Trending Articles

Sponsored