அவிட்டம் நட்சத்திரத்தில் பிறந்தவர்களின் குணநலன்கள், ஜோதிடப் பலன்கள்! #Astrology



செவ்வாயை அதிபதியாகக் கொண்ட நட்சத்திரங்களில் மூன்றாவது நட்சத்திரம் அவிட்டம். இந்த நட்சத்திரத்தின் முதல் இரண்டு பாதங்கள் மகர ராசியிலும் அடுத்த இரண்டு பாதங்கள் கும்ப ராசியிலும் இடம்பெறும். இந்த நட்சத்திரத்தில் பிறந்த நீங்கள் ஒழுக்கத்துக்கு முக்கியத்துவம் தருவீர்கள். ஒருவன் கெட்டவனாக இருந்தால்கூடப் பொறுத்துக்கொள்வீர்கள். ஆனால், நம்பிக்கை துரோகத்தைப் பொறுத்துக் கொள்ள மாட்டீர்கள். பெற்றோரிடம் மிகுந்த பாசம் கொண்டிருப்பீர்கள். கஷ்டமான சூழ்நிலையில் கூட அவர்களைக் கண்ணும் கருத்துமாகப் பார்த்துக்கொள்வீர்கள். இசையில் ஆர்வம் உள்ளவர்களாக இருப்பீர்கள். `உச்சி மீது வானிடிந்து வீழுகின்றபோதிலும் அச்சமில்லை' என்று பாரதி பாடியதற்குப் பொருத்தமானவராக பூகம்பமே வந்தாலும் பதறமாட்டீர்கள். சுயமாக உழைத்து முன்னேறவேண்டும் என்று விரும்புவீர்கள். இனப் பற்றும் தேசப்பற்றும் மிக்கவர்கள். நாட்டின் நன்மைக்காக எதையாவது செய்யவேண்டும் என்று நினைப்பீர்கள். தியாகத்துக்கு மதிப்புத் தருவீர்கள். நீங்களாக சண்டைக்குப் போகமாட்டீர்கள். வந்த சண்டையை இரண்டில் ஒரு கை பார்த்துவிடுவீர்கள். 

Sponsored


யதார்த்தமாகச் சிந்திப்பீர்கள். உறவினர்களை விட நண்பர்களிடம் அதிக அன்பு செலுத்துவீர்கள். ஆன்மிகத்தில் அதிக நம்பிக்கை உள்ளவர்களாக இருப்பீர்கள். அதே தருணத்தில் மூடநம்பிக்கைகளை எதிர்ப்பவர்களாகவும் இருப்பீர்கள். எதையும் காசு கொடுத்து வாங்க நினைப்பீர்களே தவிர, இலவசமாக எதையும் யாரிடமிருந்தும் பெற்றுக்கொள்ள மாட்டீர்கள். உழைப்பதற்குச் சளைக்கமாட்டீர்கள். ஆனால், உழைப்புக்கேற்ற பலன் கிடைக்காதபோது சோர்ந்துவிடுவீர்கள். வசதி வாய்ப்புகள் இருந்தாலும், எளிமையாக இருப்பதையே விரும்புவீர்கள். தன்னம்பிக்கை மிக்கவர்களாக இருப்பீர்கள். மற்றவர்களை உபசரிப்பதில் உங்களுக்கு நிகர் நீங்கள்தாம். வாழ்க்கையில் எத்தனை போராட்டங்கள் எதிர்ப்பட்டாலும் எதிர்த்து நின்று வெற்றி பெறுவீர்கள். நகைகள் அணிந்துகொள்வதில் விருப்பமுடையவர்கள். மென்மையான மனம் கொண்ட நீங்கள், மற்றவர்களின் விமர்சனத்தைப் பொறுத்துக்கொள்ள மாட்டீர்கள். அரசாங்கத்தினரின் நட்பைப் பெற்றிருப்பீர்கள். முக்கியப் பிரமுகர்களும் மதிக்கும்படி நடந்துகொள்வீர்கள். 

Sponsored


Sponsored


இனி பாதவாரியான பலன்களைப் பார்ப்போம்...

அவிட்டம் 1-ம் பாதம்:
நட்சத்திர அதிபதி - செவ்வாய்; ராசி அதிபதி - மகர சனி; நவாம்ச அதிபதி - சூரியன்

நீதி நியாயத்துக்குக் கட்டுப்பட்டு நடப்பவர்களாக இருப்பீர்கள். கல்வியில் சிறந்து விளங்குவீர்கள். உங்களைத் தவறாகப் புரிந்துகொண்ட உறவினர்களை விட்டு ஒதுங்கிவிடுவீர்கள். நண்பர்கள் பலர் இருந்தாலும் சிலரிடம் மட்டுமே நெருங்கிப் பழகுவீர்கள். கல்வியில் சிறந்து விளங்குவீர்கள். காதலித்து, பெற்றோர் சம்மதத்துடன் திருமணம் செய்துகொள்வீர்கள். வாழ்க்கைத் துணை, பிள்ளைகளிடம் மிகுந்த பாசம் கொண்டிருப்பீர்கள். உங்களிடம் இருப்பதை மற்றவர்கள் கேட்டால் கொடுத்து உதவும் மனப்பான்மையைப் பெற்றிருப்பீர்கள். மன்னிக்கும் மனப்பான்மையைப் பெற்றிருப்பீர்கள். உறவினர்களிடம் ஓர் அளவோடுதான் பழகுவீர்கள். கிடைப்பதை உண்பீர்கள். உங்களில் சிலர் அரசியலில் ஈடுபட்டு பிரகாசிப்பீர்கள். `என் வழி தனி வழி' என்று உங்களுக்கென்று தனி வழி ஏற்படுத்திக்கொள்வீர்கள். வாழ்க்கையில் எதிர்பாராத பல திருப்பங்களைச் சந்திப்பீர்கள்.

அவிட்டம் 2-ம் பாதம்:
நட்சத்திர அதிபதி - செவ்வாய்; ராசி அதிபதி - மகர சனி; நவாம்ச அதிபதி - புதன்

அவிட்டம் இரண்டாம் பாதத்துக்கு அதிபதி உச்சம் பெற்ற கன்னி புதன். சவாலான காரியங்களைக் கூட சாமர்த்தியமாகச் செய்து முடிப்பீர்கள். பல விஷயங்களையும் கற்றுக்கொள்வதில் ஆர்வம் கொண்டிருப்பீர்கள். உள்ளத்தில் உள்ளதை உள்ளபடியே பேசுவீர்கள். தவறான பாதைக்குச் செல்லமாட்டீர்கள். மற்றவர்கள் தவறு செய்தால் கண்டிக்கவும் தயங்கமாட்டீர்கள். இயற்கை யெழில் சூழ்ந்த இடங்களுக்குச் சென்று வருவதில் ஆர்வம் கொண்டிருப்பீர்கள். உணவு தரமாகவும் ருசியாகவும் இருக்கவேண்டும் என்று விரும்புவீர்கள். காதலித்துப் பெற்றோர் சம்மதத்துடன் திருமணம் செய்துகொள்வீர்கள். நடிப்புத் துறையிலும் ஈடுபடக்கூடிய வாய்ப்பு கிடைக்கும். எதிரிகளிடம் நேரடியாக மோதாமல், மறைமுகமாக அவர்களை வெற்றி கொள்வீர்கள். குடும்பத்தினரிடம் மிகுந்த அன்பு செலுத்துவீர்கள். பெற்றோருக்கு எந்தத் துன்பமும் நேரிடாமல் பார்த்துக்கொள்வீர்கள்.

அவிட்டம் - 3-ம் பாதம்:
நட்சத்திர அதிபதி - செவ்வாய்; ராசி அதிபதி - கும்ப சனி; நவாம்ச அதிபதி - சுக்கிரன்

அவிட்டம் மூன்றாம் பாதத்துக்கு அதிபதி சுக்கிரன். மற்றவர்களை வசீகரிக்கும் முகத் தோற்றம் கொண்டவர்களாக இருப்பீர்கள். ஆனால், அடிக்கடி சோம்பல் குணம் தலைதூக்கும். புதுப்புது டிசைன்களில் ஆடைகளையும், ஆபரணங்களையும் அணிந்துகொள்வதில் விருப்பமுடையவர்களாக இருப்பீர்கள். அறிவுப்பூர்வமாகச் சிந்திப்பீர்கள். யதார்த்தமாகச் செயல்படுவீர்கள். எப்படிப்பட்ட சூழ்ச்சிகளையும் கண்டறிந்து முறியடிப்பதில் வல்லவராக இருப்பீர்கள். வாழ்க்கைத் துணை மற்றும் பிள்ளைகளை அதிகம் நேசிப்பதுடன், அவர்களுக்கு முழுச் சுதந்திரம் கொடுப்பீர் கள். சில நேரங்களில் முன்கோபத்தின் காரணமாக வார்த்தைகளைக் கொட்டிவிட்டு, பிறகு அதற்காக வருந்தவும் செய்வீர்கள். உங்கள் மனதில் இருப்பதை சுலபத்தில் வெளிப்படுத்த மாட்டீர்கள். மாற்றுத் திறனாளிகளுக்கு முடிந்த உதவி செய்வீர்கள். பெற்றோர் மறுத்து விட்டாலும், காதலித்தவரையே திருமணம் செய்துகொள்வீர்கள். 

அவிட்டம் 4-ம் பாதம்:
நட்சத்திர அதிபதி - செவ்வாய்; ராசி அதிபதி - கும்ப சனி; நவாம்ச அதிபதி -  செவ்வாய்

மன உறுதி மிக்கவர்களாகவும், மற்றவர்களை அடக்கி ஆளும் திறமை கொண்டவர்களாகவும் இருப்பீர்கள். அடிக்கடி முன்கோபத்தில் வார்த்தைகளைக் கொட்டிவிட்டு, பிறகு அதற்காக வருத்தப்படச் செய்வீர்கள். மற்றவர்களை சுலபத்தில் நம்பிவிட மாட்டீர்கள். மற்றவர்களிடம் உங்களைப் பற்றி பெருமையாகப் பேசிக்கொள்வீர்கள். எப்போதும் தனிமையில் இருக்கவேண்டு மென்று விரும்புவீர்கள். வாழ்க்கைத் துணை மற்றும் பிள்ளைகளுக்குப் புரிந்துகொள்ள முடியாத புதிராக இருப்பீர்கள். பாதுகாப்புத் துறையில் பெயரும் புகழும் பெறுவீர்கள். எந்த முடிவு எடுப்பதாக இருந்தாலும் மிகவும் யோசிப்பீர்கள். சில நேரங்களில் சுயநலத்துடன் நடந்துகொள்வீர்கள். மற்றவர்களிடம் விஷயங்களைப் பகிர்ந்துகொள்ளாமல், மனதுக்குள்ளேயே வைத்துப் புழுங்குவீர்கள். படிப்பில் அவ்வளவாக ஆர்வம் காட்ட மாட்டீர்கள். ஆனாலும் ஏதேனும் ஒரு பட்டம் பெற்றுவிடுவீர்கள். பெற்றோர் பார்த்து நிச்சயிக்கும் வரனையே திருமணம் செய்து கொள்வீர்கள்.

வழிபட வேண்டிய தெய்வம் : அனந்த பத்மநாபசுவாமி, முருகப்பெருமான்
அணியவேண்டிய நவரத்தினம்: பவளம் 
வழிபடவேண்டிய தலங்கள்:  திருவனந்தபுரம், வைத்தீஸ்வரன்கோவில்



Trending Articles

Sponsored