நான்காவது முறையாக கோப்பை வெல்லும் முனைப்பில் ஜூனியர் இந்திய அணி!



Sponsored



19 வயதுக்கு உட்பட்டோருக்கான ஜூனியர் உலகக் கோப்பை கிரிக்கெட் தொடர்,  நியூஸிலாந்தில் நடைபெற்றுவருகிறது. 12-வது ஜூனியர் உலகக்கோப்பை கிரிக்கெட் போட்டி (19 வயதுக்குட்பட்டோர்), இறுதிக்கட்டத்துக்கு வந்துவிட்டது. 16 அணிகள் பங்கேற்ற இந்தத் தொடரின் இறுதிப் போட்டியில், இந்தியா- ஆஸ்திரேலியா அணிகள் மோதுகின்றன. 

மவுன்ட் மாங்கானுவில், இந்திய நேரப்படி காலை 6:30 மணிக்குத் தொடங்கிய இந்தப் போட்டியில், டாஸ் வென்ற ஆஸ்திரேலிய அணி பேட்டிங் செய்தது. பேட்டிங் தேர்வுசெய்த ஆஸ்திரேலிய அணிக்குத் தொடக்கம் அவ்வளவு சிறப்பாக அமையவில்லை. அந்த அணி 59 ரன்கள் சேர்ப்பதற்குள், 3 முக்கிய விக்கெட்டுகளை இழந்தது. இந்திய அணியின் இஷான் பரோல் மற்றும் கமலேஷ் நகர்கோட்டி ஆகியோர் ஆஸ்திரேலிய பேட்ஸ்மேன்களுக்குக் கடும் நெருக்கடிகொடுத்தனர். இதையடுத்து, 4-வது விக்கெட்டுக்கு ஜோடி சேர்ந்த உப்பல் மற்றும் மெர்லோ ஜோடி, ஆஸ்திரேலிய அணியைச் சரிவிலிருந்து மீட்கும் முயற்சியில் ஈடுபட்டனர். இந்த ஜோடி, 4-வது விக்கெட்டுக்கு 75 ரன்கள் சேர்த்திருந்த நிலையில், 34 ரன்களுடன் உப்பல் ஆட்டமிழந்து வெளியேறினார். அடுத்து வந்த மெக்ஸ்வீனி, 23 ரன்களில் வெளியேறினார். ஒருபுறம் விக்கெட்டுகள் வீழ்ந்தாலும், மறுமுனையில் சிறப்பாக ஆடி மெர்லோ அரை சதம் அடித்தார். இதனால், ஆஸ்திரேலிய அணி 250 ரன்களைக் கடந்துவிடும் என்று கணிக்கப்பட்டது. ஆனால், மெர்லோ 76 ரன்களில் ஆட்டமிழக்க, ஆஸ்திரேலிய அணி ரன் குவிப்பு கட்டுப்படுத்தப்பட்டது. தொடர்ந்து, சிறப்பாகப் பந்துவீசிய இந்திய அணி, 47.2 ஓவர்களில் 216 ரன்களில் ஆஸ்திரேலிய அணியை ஆட்டமிழக்கச் செய்தது.

Sponsored


இதையடுத்து, 217 ரன்கள் இலக்குடன் களமிறங்கிய இந்திய அணிக்கு கேப்டன் பிரித்வி ஷா, மன்ஜோத் கல்ரா ஜோடி சிறப்பான தொடக்கம் தந்தது. முதல் விக்கெட்டுக்கு 71 ரன்கள் சேர்த்த நிலையில், 29 ரன்களுடன் பிரித்வி ஷா ஆட்டமிழந்தார். அடுத்துவந்த அதிரடி வீரர் சுப்மன் கில், 31 ரன்கள் எடுத்து வெளியேறினார். தொடர்ந்து சிறப்பான ஆட்டத்தை வெளிப்படுத்தி வரும் தொடக்க வீரர் கல்ரா, 90 ரன்கள் எடுத்து ஆடி வருகிறார். 32 ஓவர்கள் முடிவில் இந்திய அணி 2 விக்கெட் இழப்பிற்கு 178 ரன்கள் குவித்துள்ளது.

Sponsored


இந்தத் தொடரில்,  இந்திய அணிதான்  பங்கேற்ற அனைத்துப் போட்டிகளிலும் தோல்வியைச்  சந்திக்காமல் இறுதிப் போட்டிக்கு வந்திருக்கிறது. முன்னதாக,  லீக் சுற்றில் இந்திய அணி 100 ரன்கள் வித்தியாசத்தில் ஆஸ்திரேலியாவைத் தோற்கடித்திருந்தது குறிப்பிடத்தக்கது. 2016-ம் ஆண்டு நடைபெற்ற ஜூனியர் உலகக்கோப்பை தொடரில், டிராவிட்டின்  பயிற்சியின் கீழ்,  இறுதிப் போட்டியில் இந்திய அணி,வெஸ்ட் இண்டீஸிடம் தோற்றிருந்தது. தவறுகளைச் சரிசெய்து,  இந்த முறை டிராவிட்டின் இளம் படை கோப்பையை வெல்லும் என்று எதிர்பார்க்கப்படுகிறது. 



Trending Articles

Sponsored