"மே 3-க்கு மேல் மேட்ச்சை நடத்துங்கள்!" -பாதுகாப்பு தர மறுத்த தமிழக அரசு #CSK



``இரண்டு ஆண்டுகளுக்குப் பிறகு சென்னைக்கு ஐ.பி.எல் திரும்புகிறது என்பதால் சென்னை சேப்பாக்கம் மைதானத்தை முழுமையாகத் தயார் செய்துவைத்திருந்தோம். ஆன்லைனில் டிக்கெட்டுகள் அனைத்தும் விற்றுத்தீர்ந்தன. ஆனால், போராட்டம், போலீஸ் மறுப்பு, தமிழக அரசின் கைவிரிப்பு காரணமாக சென்னையில் போட்டிகள் இனி நடக்காது என்பது எங்களுக்கே மிகப்பெரிய வேதனையாக இருக்கிறது'' என்கிறார் நம்மிடம் பேசிய சென்னை சூப்பர் கிங்ஸ் (#CSK) நிர்வாகத்தின் மிக மூத்த அதிகாரி.

Sponsored


ஏன் புனேவுக்குப் போட்டிகளை மாற்றினீர்கள் என்று கேட்டபோது, ``எங்களுக்கு வேறு வழியில்லை. நாங்கள் எந்த சாய்ஸும் சொல்லவில்லை. பி.சி.சி.ஐ எங்களை புனேவில் விளையாடச் சொல்லியிருக்கிறது. நாங்கள் ஓகே சொல்லியிருக்கிறோம்'' என்றார் அவர்.

Sponsored


ஏப்ரல் 10-ம் தேதி கொல்கத்தா அணிக்கு எதிராகச் சென்னை சூப்பர் கிங்ஸ் அணி களம் இறங்கக் காத்திருந்தபோது சென்னை அண்ணாசாலை மிகப்பெரிய போராட்டத்தைச் சந்தித்து. காவிரி மேலாண்மை வாரியம் உடனடியாக அமைக்க வேண்டும், அதுவரை ஐ.பி.எல் போட்டிகளை சென்னையில் நடத்தவிடமாட்டோம் என்று சில கட்சிகள் போராட்டம் நடத்தியதால் போர்க்களமானது சேப்பாக்கம். கிட்டத்தட்ட 3,000 பேர் அண்ணாசாலை, வாலாஜா சாலையில் கடந்த செவ்வாய்க்கிழமை கூடியதால் போராட்டக்காரர்களைச் சமாளிக்க முடியாமல் திணறியது சென்னை போலீஸ். போராட்டக்காரர்கள் மீது போலீஸ் தடியடி நடத்த, ஒரு இடத்தில் போலீஸ் மீது போராட்டக்காரர்கள் தாக்குதல் நடத்த, சில இடங்களில் கிரிக்கெட் ரசிகர்கள் மீது போராட்டக்காரர்கள் தாக்குதல் நடத்த எனப் பல  அத்துமீறல்கள் அரங்கேறின.

Sponsored


போராட்டத்தின் உச்சமாக மைதானத்துக்குள் செருப்புகளும் வீசப்பட்டன. கிரிக்கெட்டுக்கு எதிராக இப்படி ஒரு கடுமையான போராட்டத்தை தமிழ்நாடு கிரிக்கெட் வாரியம் இதுவரை சந்தித்ததேயில்லை என்பதால் முழுக்க முழுக்கப் போலீஸையே நம்பியிருந்தது கிரிக்கெட் வாரியம். போலீஸும் செவ்வாய்க்கிழமை போட்டியைத் தடையின்றி நடத்தவேண்டும் என்று முழு ஒத்துழைப்பையும் கொடுத்தது. ஆனால், அடுத்தநாள் (புதன்கிழமை) சென்னை சூப்பர் கிங்ஸ் அணியின் தலைமை அலுவலர் காசி விஸ்வநாதனை அழைத்தார் சென்னையின் போலீஸ் கமிஷனர் ஏ.கே.விஸ்வநாதன்.

``சென்னையில் இன்னும் 6 போட்டிகள்தான் இருக்கின்றன. பாதுகாப்பு தாருங்கள்'' என காசி விஸ்வநாதன் கேட்க, தமிழக அரசு சொன்னதை காசி விஸ்வநாதனிடம் சொல்லியிருக்கிறார் போலீஸ் கமிஷனர் விஸ்வநாதன். ``மே-3ம் தேதிக்கு மேல் 6 மேட்ச்சுகளையும் சென்னையில் விளையாடும்படி மாற்றுங்கள். முழு பாதுகாப்பு தருகிறோம். போராட்டங்களும் ஓய்ந்துவிடும். செவ்வாய்கிழமை போராட்டங்களைக் கட்டுப்படுத்துவதே பெரும்பாடாக இருந்தது. இப்போதுகூட சேப்பாக்கத்துக்குப் பாதுகாப்பு தரலாம். சென்னையின் மற்ற இடங்களுக்குப் போராட்டம் பரவினால் கட்டுப்படுத்துவது கடினம்'' என கமிஷனர் சொல்ல, அந்த முடிவு தங்கள் கையில் இல்லை என்பதை சொல்லிவிட்டு வந்திருக்கிறார் காசி விஸ்வநாதன்.

தமிழக அரசின் முடிவை, சென்னை போலீஸின் விளக்கத்தை காசி விஸ்வநாதன் ஐ.பி.எல் தலைவர் ராஜீவ் சுக்லாவிடம் சொல்ல, பி.சி.சி.ஐ இதுதொடர்பான ஆலோசனைகளை நடத்தியது. ஐ.பி.எல் ஷெட்யூலை ஒரு அணிக்காக மாற்ற முடியாது என்பதால் சென்னைக்குப் பதிலாக புனே, திருவனந்தபுரம், விசாகப்பட்டினம், ராஜ்கோட் என நான்கு இடங்களில் போட்டிகள் நடத்த பரிந்துரைக்கப்பட்டது. சென்னை அணி விசாகப்பட்டினத்தை ஓகே சொன்னது. ஆனால், பி.சி.சி.ஐ நிர்வாகம் குறிப்பாக, ஐ.பி.எல் தலைவர் ராஜுவ் சுக்லா புனேவை டிக் செய்தார். சென்னை சூப்பர் கிங்ஸின் முக்கால்வாசி வீரர்கள், கோச் மற்றும் உதவியாளர்களுக்கு ஏற்கெனவே புனேவில் விளையாடிய அனுபவம் இருப்பதோடு, புனேவிலிருந்து ஐ.பி.எல் போட்டிகள் நடைபெறும் மற்ற எல்லா ஊர்களுக்கும் கனெக்டிங் விமானங்கள் இருப்பதால் புனேவில் விளையாடும்படி சொல்லியிருக்கிறார் சுக்லா. 

``நாங்கள்  மீண்டும் முதலிலிருந்து தொடங்கவேண்டும். டிக்கெட் விலையை புதிய ஸ்டேடியத்துக்கு ஏற்ப மாற்றியமைக்க வேண்டும். ஆனால், இவை எல்லாவற்றையும் விட, சென்னை ரசிகர்களுக்குப் பெரும் ஏமாற்றத்தைத் தந்துவிட்டோம் என்பதுதான் பெரிய உறுத்தலாக இருக்கிறது. சென்னை ரசிகர்களிடம் மன்னிப்புக் கேட்டுக்கொள்கிறோம்'' என்றார் சிஎஸ்கே நிர்வாகி. 

சென்னையில் போட்டிகள் நடைபெறாததால் டிக்கெட் விலையிலிருந்து தமிழக அரசுக்குக் கிடைத்திருக்க வேண்டிய கிட்டத்தட்ட 5 கோடி ரூபாய் நஷ்டம். அதேபோல், போட்டிகள் இடம் மாறியதால் தமிழ்நாடு கிரிக்கெட் வாரியத்துக்கும் மூன்றரைக் கோடி ரூபாய் நஷ்டம் என்கிறார்கள் தமிழ்நாடு கிரிக்கெட் வாரிய நிர்வாகிகள்!



Trending Articles

Sponsored