மும்பை தோற்றால்... பஞ்சாப் பெருவெற்றி பெற்றால்... விட்டுக்கொடுக்குமா சென்னை? #CSKVSKXIP PREVIEW



செம கெத்தாக ப்ளே ஆஃப்க்குள் நுழைந்திருக்க வேண்டிய கிங்ஸ் லெவன் பஞ்சாப் பரிதாபகரமான நிலையில் வந்து நிற்கிறது. 2018 ஐபிஎல்-ன் தொடக்கத்தில் முதல் ஆறு போட்டிகளில் ஐந்தில் வெற்றிபெற்று அசத்திய அணி பஞ்சாப். ஆனால் கடைசி ஏழு போட்டிகளில் 6 போட்டிகளில் தோல்வியடைந்து மோசமான அணியாக மாறி நிற்கிறது.  #CSKVSKXIP

Sponsored



பாயின்ட்ஸ் டேபிளில் இரண்டாவது இடத்தில் இருக்கும் சென்னைக்கும், ஏழாவது இடத்தில் இருக்கும் பஞ்சாபுக்கும் இடையேதான் இன்றைய போட்டி. பஞ்சாப் ஏழாவது இடத்தில் இருந்தாலும் ப்ளே ஆஃப் வாய்ப்பிருக்கிறது. அதற்கு முதலில் இன்று நான்கு மணிக்கு தொடங்கும் மேட்சில் மும்பை, டெல்லியிடம் தோல்வியடைய வேண்டும். அப்படி மும்பை தோல்வியடைந்தாலும் பஞ்சாப் ப்ளே ஆஃப்க்குள் நுழைந்துவிடமுடியாது. சென்னையை 53 ரன்கள் வித்தியாசத்தில் அல்லது 38 பந்துகள் மீதம் உள்ள நிலையில் தோற்கடிக்கவேண்டும். அப்படி மும்பை தோல்வியடைந்து, சென்னையை இப்படி தோற்கடித்தால் மட்டுமே பஞ்சாப் ஐதராபாத், சென்னை, கொல்கத்தா அணிகளுக்கு அடுத்தபடி நான்காவது அணியாக ப்ளே ஆஃப்க்குள் நுழையும்.

Sponsored


Sponsored


பெருவெற்றி பெறுமா பஞ்சாப்?

சென்னை, பஞ்சாப் அணிகளுக்கு இடையேயான இன்றைய போட்டியின் பரபரப்பு டெல்லி கையில்தான் இருக்கிறது. ஐபிஎல்லை விட்டு வெளியேறியிருந்தாலும் மோசமான அணியாக வெளியேறிவிடக்கூடாது என வெறிகொண்டு ஆடும் டெல்லி மும்பையை இன்று தோற்கடித்தால் மட்டுமே சென்னை- பஞ்சாப் மேட்ச் களைகட்டும். மும்பை தோல்வியடைந்துவிட்டால் பஞ்சாபுக்கு பெருவெற்றி வேண்டும். மாறாக சென்னை பெருவெற்றிபெற்றால் பாயின்ட்ஸ் டேபிளில் ஐதராபாத்தை பின்னுக்குத்தள்ளி முதலிடம் பிடிக்கும். 
பஞ்சாபின் தொடர் தோல்விகளுக்கு காரணம் சரியான முடிவுகளை எடுக்க முடியாமல் கேப்டன் அஷ்வினும், அணியின் இயக்குநர் ஷேவாக்கும் திணறுவதுதான். கெய்ல், கேஎல் ராகுல் ஓகே... ஆனால் மிடில் ஆர்டர் பேட்ஸ்மேன்கள் பஞ்சாபின் பெரும் சொதப்பல். ஓப்பனிங் பேட்ஸ்மேன் கேஎல் ராகுல் மட்டுமே இதுவரையிலான 13 போட்டிகளில் 652 ரன்கள் அடித்திருக்க, பஞ்சாபின் மிடில் ஆர்டர் பேட்ஸ்மேன்கள் மொத்தமாகவே 13 மேட்ச்களில் 674 ரன்கள்தான் அடித்திருக்கிறார்கள். கருண் நாயர், ஆரோன் ஃபின்ச், மாயங்க் அகர்வால், யுவராஜ் சிங், மனோஜ் திவாரி என படா பேட்ஸ்மேன்கள் இருந்தும் இவர்கள் எவரும் ஒருங்கிணைந்து ஆடாததே பஞ்சாபின் பலவீனம்.

அதேப்போல் ஆண்ட்ரு டை, முஜீப் என இருவரை நம்பித்தான் பெளலிங்கும் இருக்கிறது. காயம் அடைந்திருக்கும் முஜீப் உர் ரஹ்மான் இன்று ஃபிட்னஸ் டெஸ்ட்டில் தேர்வுபெற்றால் மட்டுமே பஞ்சாபின் பெளலிங் டீம் தெம்பாகும். முஜீப் அணிக்குள் வருவதற்கான சாத்தியங்கள் இன்று அதிகமாகவே இருக்கிறது.

 அன்று... இன்று!

முதல் மேட்சில் சென்னையை தோற்கடித்திருக்கிறது பஞ்சாப். அந்த வெற்றி தந்த அனுபவத்தில்தான் இன்று சென்னையை எதிர்கொள்வார் பஞ்சாப் கேப்டன் அஷ்வின். முதல் மேட்சில் பஞ்சாபுக்கு நம்பிக்கைத் தந்தவர் கிறிஸ் கெய்ல். 33 பந்துகளில் 63 ரன்கள் அடித்து பஞ்சாபின் பேட்டிங்கிற்கு பவர் கொடுத்தார் கெய்ல். 197 ரன்கள் அடித்த பஞ்சாபிடம் நான்கு ரன்கள் வித்தியாசத்தில் தோல்வியடைந்தது சென்னை. 

கிட்டத்தட்ட அன்று சென்னைக்கு எதிராக விளையாடிய அதே ப்ளேயிங் லெவன் கொண்டே அஷ்வின் களம் இறங்குவார். ஆனால் யுவராஜ் சிங்குக்கு பதிலாக மனோஜ் திவாரி களத்தில் இருப்பார் என எதிர்பார்க்கலாம். மற்றபடி பேட்டிங், பெளலிங்கில் பெரிய மாற்றங்கள் எதுவும் இருக்காது. மோஹித் ஷர்மா, ஆண்ட்ரு டை என வேகப்பந்து வீச்சாளர்களுடன் முஜீப், அஷ்வின், அக்ஸர் பட்டேல் என மூன்று ஸ்பின்னர்களும் இன்று பஞ்சாபில் இருப்பார்கள். காரணம் பஞ்சாபுக்கு ஸ்பின்னர்கள்தான் அதிக ரன்களை  விட்டுக்கொடுக்காமல் இருந்திருக்கிறார்கள் என்பதோடு வாட்ஸன், ராயுடு, டுப்ளெஸ்ஸி, பிராவோ ஆகியோரை சமாளிக்க ஸ்பின்னர்களே தேவை. பேட்டிங்கைப் பொருத்தவரை ராகுல், கெய்ல், கருண் நாயர், ஃபின்ச், மனோஜ் திவாரி, மாயங்க் அகர்வால் ஆகியோர் அணிக்குள் இருப்பார்கள்.


 

சென்னையின் ப்ளேயிங் லெவன்!

ப்ளே ஆஃப் போட்டிகளுக்கான முன்னோட்டமாகவே இன்றைய போட்டியை சென்னை ஆடும். கொல்கத்தாவுக்கு எதிரான  போட்டியைத்தவிர மற்ற போட்டிகளில் சரியாக பேட் செய்யாத சாம் பில்லிங்ஸை தோனி இன்றைய ப்ளேயிங் லெவனில் சேர்க்கமாட்டார் என நம்பலாம். அவருக்கு பதிலாக தென் ஆப்ரிக்க கேப்டன் டுப்ளெஸ்ஸி அணிக்குள் இடம்பிடிப்பார். வாட்ஸன், டுப்ளெஸ்ஸி, ராயுடு, ரெய்னா, தோனி, ஜடேஜா, பிராவோ என்பதுதான் சென்னையின் பேட்டிங் லைன் அப்பாக இருக்கும். 
பெளலிங்கைப் பொருத்தவரை போன மேட்சில் ஆடிய அதே பெளலர்களே இன்றைய போட்டியில் இருப்பார்கள். லுங்கி எங்கிடி, தீபக் சாஹர், ஷ்ரதுல் தாக்கூர், ஹர்பஜன் சிங், ஜடேஜா ஆகியோர் சென்னையின் முக்கிய பெளலர்களாக இருப்பார்கள்.


புனே பிட்ச்?!

புனேவில் இந்த சீஸனில் இதுவரை 5 போட்டிகள் நடைபெற்றுள்ளன. இதில் மூன்று போட்டிகளில் சேஸ் செய்த  அணிகளே வெற்றிபெற்றிருக்கின்றன. இதுவரை ஆடிய போட்டிகளில் இந்த பிட்சில் டெல்லிக்கு எதிராக சென்னை அடித்த 211 ரன்கள்தான் அதிகபட்சம். அதேப்போல் பெங்களூரு அடித்த 127 ரன்கள்தான் குறைந்தபட்ச ஸ்கோர். சேஸிங் செய்ய ஏற்ற பிட்ச் என்பதால் டாஸ் வெல்லும் அணி முதலில் பெளலிங்கையே தேர்ந்தெடுக்கும். 
சென்னைக்கு இந்த மேட்சில் பெரிய பிரஷர் ஏதும் இல்லை. ஆனால் மும்பை டெல்லியிடம் தோல்வியடைந்தால் ப்ளே ஆஃப்க்குள் நுழைய வேண்டும் என்கிற கூடுதல் பிரஷருடன் பஞ்சாப் விளையாடும். ஆனால் எப்படிப்பார்த்தாலும் சென்னைக்கு எதிராக பஞ்சாப் பெருவெற்றி பெறுவது என்பது பெரும்கனவுதான்!



Trending Articles

Sponsored