`கருண் நாயருக்கு நீங்கள் பதில் அளித்தே ஆக வேண்டும்' - இந்திய அணி நிர்வாகத்தைச் சாடும் சுனில் கவாஸ்கர்!



கடைசி டெஸ்ட் போட்டியில் கருண் நாயரை ஆடும் லெவனில் எடுக்கவில்லை என அணி நிர்வாகத்துக்கு முன்னாள் இந்திய கேப்டன் சுனில் கவாஸ்கர் கேள்வி எழுப்பியுள்ளார். 

Sponsored


இந்தியா - இங்கிலாந்துக்கு எதிரான கடைசி டெஸ்ட் போட்டி நேற்று ஓவலில் தொடங்கியது. ஏற்கனவே டெஸ்ட் தொடரை இழந்த நிலையில் ஆறுதல் வெற்றி பெறும் இந்திய அணி களமிறங்கியது. முன்னதாக 4வது டெஸ்ட்டில் தோற்றபோது அணி நிர்வாகம் வீரர்கள் தேர்வில் சொதப்பியது என முன்னாள் இந்திய வீரர்கள் கோலி, பயிற்சியாளர் ரவி சாஸ்திரி மீது குற்றம் சுமத்தினர். இதனால் இந்தப் போட்டியில் நிறைய மாற்றங்கள் இருக்கும் என எதிர்பார்க்கப்பட்டது. எதிர்பார்ப்புக்கு ஏற்றவாறே ஆடும் லெவனில் ஜடேஜா, ஹனுமா விஹாரி ஆகியோர் சேர்க்கப்பட்டனர். அவர்களுக்குப் பதிலாக அஸ்வின் மற்றும் ஹர்திக் பாண்டியா ஆகியோர் அணியில் இருந்து நீக்கப்பட்டனர்.  ஆனால் பெரிதும் எதிர்பார்க்கப்பட்ட கருண் நாயர் அணியில் சேர்க்கப்படவில்லை. இங்கிலாந்து அணி இந்தியா வந்திருந்த போது அந்த அணிக்காக முச்சதம் அடித்திருந்தார்  கருண் நாயர். அதேபோல் `ஏ' அணி சார்பாக உள்நாடு, வெளிநாடுகளில் நடந்த போட்டிகளிலும் கருண் நாயர் முத்திரை பதித்திருந்தார். இதனால் அவர் அணியில் சேர்க்கப்பட வேண்டும் என முன்னாள் வீரர்கள் குரல் எழுப்பியிருந்தனர். ஆனால் அவருக்கு ஆடும் லெவனில் வாய்ப்பளிக்கப்படவில்லை. 

Sponsored


அணி நிர்வாகத்தின் இந்த முடிவை முன்னாள் இந்திய அணி கேப்டன் சுனில் கடுமையாக சாடியுள்ளார். இதுகுறித்து அவர் கூறுகையில், ``கருண் நாயர் உங்களுக்குப் பிடித்த வீரர் அல்ல. தேர்வாளர்கள் தான் அவரை இங்கிலாந்து தொடருக்கு அழைத்து வந்தனர். அதற்காக அணி நிர்வாகத்துக்கு அவரை பிடித்திருக்கிறது என எண்ண வேண்டாம். ஆடும் லெவனில் தான் சேர்க்கப்படாது குறித்து கேள்வி எழுப்ப கருண் நாயருக்கு முழு உரிமை உண்டு. அவருக்கு இந்த விவகாரத்தில் பதில் தேவை. கண்டிப்பாக கருணுக்கு அணி நிர்வாகம் பதிலளித்தே ஆக வேண்டும்" எனக் காட்டமாக கூறியுள்ளார். இங்கிலாந்து தொடர் குறித்து முன்னாள் வீரர்களுக்கும், அணி நிர்வாகத்துக்கும் வார்த்தைப் போர் முற்றிவரும் நிலையில் கவாஸ்கரின் கருத்து கூடுதல் சர்ச்சையை ஏற்படுத்தியுள்ளது.

Sponsored




Trending Articles

Sponsored