அன்புக்கு ஏங்கியவர்... அருமையான ஆசிரியர்... லவ் யூ ஒபாமா! #HBDObama



வெள்ளை மாளிகைக்கு முன்பு 20 லட்சம் பேர் 2.4 டிகிரி செல்சியஸ் குளிரில் நின்று இந்த மனிதர் அதிபராக பதவியேற்பதைப் பார்த்து ரசித்தார்கள். இது எந்த ஒரு அமெரிக்க அதிபருக்கும் இன்று வரை கிடைக்காத வரவேற்பு. 6 அடி 2 அங்குல உயரம். இவரது பேச்சு எல்லாரையும் வசியப்படுத்தும், இவர் பேசினால் தன்னம்பிக்கை ததும்பும். 12 ஆண்டுகள் சிகாகோ பல்கலைக்கழகத்தில் சிறந்த பேராசிரியராக பணியாற்றியவர், இந்தப் பெருமைகளையெல்லாம் தாங்கி நிற்கும் அந்தப் பெயர் பாரக் ஹூசைன் ஒபாமா. அமெரிக்க அதிபராக 8 ஆண்டுகள் மக்கள் மனதில் அழியாத இடம் பிடித்தவர். 2016-ல் அதிபர் பதவி முடிந்தும் இன்னும் மக்கள் மனதில் மக்களின் அதிபராக வாழ்கிறார். அரசு சிக்கல் தரும்போதெல்லாம் அமெரிக்கா 'மிஸ் யூ ஒபாமா'' என்கிறது. 

அமெரிக்கா ஹவாய் மாகாணத்தின் ஹோனோலுலுவில் 1961-ம் ஆண்டு ஆகஸ்ட் 4-ம் தேதி பிறந்தார். ஹார்வர்டு மற்றும் கொலம்பியா பல்கலைகழகங்களில் பட்டம் பெற்றார். சிகாகோ சட்டப் பல்கலைக்கழகத்தில் பயிற்சி பெற்றபோது அறிமுகமான மிஷேலைக் காதலித்து திருமணம் செய்துகொண்டார். மலியா, நடாஷா (எ) சாஷா என்று இரண்டு தேவதைகளுக்கு தந்தையானார்.  1997-ம் ஆண்டு இலினோய்ஸ் மாகாணத்தின் செனட் உறுப்பினரானார். அங்கு ஹெல்த் கேர் சட்டத் திருத்தங்களைக் கொண்டுவந்தார். 2004-ம் ஆண்டு இந்த பதவியை ராஜினாமா செய்துவிட்டு அமெரிக்க செனட் பதவிக்குப் போட்டியிட்டார். அதிலும் வெற்றி பெற்ற ஒபாமா 2008-ம் ஆண்டு ஜனநாயகக் கட்சியின் அதிபர் வேட்பாளர்.

Sponsored


Sponsored


அதிகாரபூர்வ வேட்பாளராக அறிவிக்கப்பட்ட ஒபாமா 2009-ம் ஆண்டு அமெரிக்க அதிபர் தேர்தலில் பெரிய தாக்கத்தை ஏற்படுத்தினார். நான் ஒடுக்கப்பட்ட இனத்தைச் சேர்ந்தவ‌ன் என்றெல்லாம் கூறாமல் சாமானிய அமெரிக்கர்களின் பிரச்னைகளான ஊதிய உயர்வு, மருத்துவச் செலவு, கல்விவசதி போன்றவற்றை மேம்படுத்துவேன். மாற்றம் வேண்டும் அதை ஏற்படுத்தும் நம்பிக்கை என்னிடம் உள்ளது என்று உரை மூலம் தன்னை மக்களின் அதிபராக நிலைநிறுத்திக்கொண்டார் ஒபாமா.

Sponsored


இன்றைக்கும் மோடியின் அச்சே தீன், அன்புமணியின் `மாற்றம் முன்னேற்றம் அன்புமணி', ஸ்டாலினின் `முடியட்டும் விடியட்டும்' போன்ற தேர்தல் பிரசாரங்களின் சாயல் ஒபாமாவின் ஹோப், எஸ் வீ கேன் வாசகங்களைப் போன்றவைதான். பிரசார நேரங்களில் இராக் போரை ஆதரித்துப் பேசிய குடியரசுக் கட்சியை, ‘அமெரிக்கா போரை விரும்பும் நாடு அல்ல!’ என்று ஒற்றை வரியில் காலி செய்தார். அதனால்தான் அமெரிக்காவில் பிறக்காத, கறுப்பர் இனத் தலைவர் ஒருவரை அமெரிக்கா அதிபராக்கியது.

ஒபாமா அதிபராக பதவியேற்றதும் பிரசாரங்களில் சொன்ன விஷயங்களைப் படிப்படியாக செய்யத் தொடங்கினார். இராக்கிலிருந்து படிப்படியாக படைகளை திரும்பப் பெற்றது;  ஒபாமா ஹெல்த் கேர் என்ற மருத்துவ வசதிகளை வழங்கியது; அனைத்து நாடுகளுடன் நல்ல நட்புறவு என்பதில் துவங்கி பருவ நிலை மாற்றத்துக்கான முதல் குரலை எழுப்பி உலகையே பருவநிலை மாற்றத்துக்காக முக்கிய முடிவுகளை எடுக்கச் செய்தது வரை, பல விஷயங்களுக்கு முன்மாதிரியாக விளங்கினார். ஆனால், இவையெல்லாம் தற்போது ட்ரம்ப் ஆட்சிக்கு வந்ததும் முற்றிலுமாக அகற்றப்பட்டன. அப்போதும் அமெரிக்காவின் குரல் `மிஸ் யூ ஒபாமா' என்றுதான் ஒலித்தது. 

அமெரிக்க அதிபர் தேர்தல் பிரசாரங்களில் அவரின் மனைவி மிச்சேல் ஒபாமாவின் பங்கு அளப்பரியது. 2008-ம் ஆண்டு ஜனநாயகக் கட்சியின் மாநாட்டில் மிச்சேல் ஆற்றிய, ``ஏன் என் க‌ணவரை அதிபராக்க வேண்டும்?'' என்ற உரை அமெரிக்க தேர்தல் பிரசார வரலாற்றில் முக்கியத்துவம் வாய்ந்ததாக அமைந்தது.  2012-ம் ஆண்டு இரண்டாவது முறையாக அதிபராக்கப்பட்ட போதும் ``ஒரே நாடு, ஒரே மக்கள். கறுப்பு, வெள்ளை பேதம் இங்கு இல்லை'' என்று முழங்கினார் ஒபாமா. 

ஒபாமா விமர்சனங்களுக்கு சளைக்காத நபர். தன் மீது வைக்கப்பட்ட விமர்சனங்களைத் தைரியமாக எதிர்கொண்டு தனது செயல்களால், அவற்றுக்கு முற்றுப்புள்ளி வைத்தார். ஒபாமா, கிறிஸ்துவ மதத்தைச் சேர்ந்தவர். ஆனால், நியூஸ் வீக் பத்திரிகை நடத்திய கருத்துக்கணிப்பில் இவர் முஸ்லிம் மதத்தைச் சேர்ந்தவர் என 12 சதவிகித அமெரிக்கர்கள் கருத்து தெரிவித்திருந்தனர். இவரது கைக்கடிகாரம் மூலம், அமெரிக்க உளவு அமைப்பான சி.ஐ.ஏ. அவருக்கு ரகசியத் தகவல்களைப் பரிமாறிக்கொள்ளும் என்று ஒரு தகவல் உண்டு. இப்படி ஆயிரம் செய்திகள் ஒபாமாவை சுற்றிக்கொண்டே இருக்கும். 

`ஒபாமாவுக்கு தீவிரவாதிகளுடன் தொடர்பு இருக்கிறது' என்று குற்றச்சாட்டுகள் எழுந்தபோது, 'உண்மையான அன்புக்காக சிறு வயதில் ஏங்கியவன் நான். போதைப் பொருள் பழக்கத்தில் இருந்து மீண்டவன்!' என்று இவர் தனது சிறு வயது நினைவுகளை மனம் திறந்து பகிர்ந்துகொண்டது அமெரிக்க இளைஞர்கள் மத்தியில் இவருக்கு பெரிய அளவில் மதிப்பை ஏற்படுத்தியது. 2009-ம் ஆண்டு அமைதிக்கான நோபல் பரிசு ஒபாமாவுக்கு வழங்கப்பட்டது. ``அந்தப் பரிசுக்கு ஒபாமா தகுதியானவரா என்பது ஒருபுறம் இருக்கட்டும்... இந்தப் பரிசை அளித்ததன் மூலம் அமெரிக்கர்களைத் தர்மசங்கடத்தில் ஆழ்த்திவிட்டது நோபல் கமிட்டி. பதவி ஏற்ற ஒன்பதே மாதங்களில் அவருக்கு அளிக்கப்பட்ட இந்த அங்கீகாரம் மிகவும் பிரமாண்டமானது!' என தலையங்கம் எழுதியது அமெரிக்காவின் மனசாட்சியான 'தி லாஸ் ஏஞ்சல்ஸ் டைம்ஸ்' பத்திரிகை.

அமெரிக்காவை நடுங்கச் செய்த 9/11 தாக்குதலை நடத்திய ஒசாமா பின்லேடனை வீழ்த்தி, சர்வதேச தீவிரவாத தாக்குதலுக்கு அமெரிக்காவால் சரியான பதிலடி கொடுக்க முடியும் என்பதையும் உணர்த்தினார் ஒபாமா. இவர் அமெரிக்க அதிபர் என்பதைத் தாண்டி அன்பானவர் என்பதற்கு பல உதாரணங்கள் சொல்லலாம். அமெரிக்காவின் வெள்ளை மாளிகை பூங்காக்களில் அமெரிக்க சிறுவர்களுடன் உரையாடுவது,  கடிகாரத்தில் வெடிகுண்டு தயாரித்தான் என்று தவறாக கணித்து கைது செய்யப்பட்ட‌ சிறுவனை ‘அஸ்ட்ரானமி நைட் டின்னரு’க்கு அழைத்து, ‘நீ எப்போது வேண்டுமானாலும் வெள்ளை மாளிகைக்கு வரலாம்!’ என அன்பு காட்டியது என்று ஒபாமாவின் இன்னொரு முகத்தைக் காட்டும் செயல்கள் பல. அமெரிக்க அதிபராக இருந்த காலத்தில் ஒபாமா வெள்ளை மாளிகைக்குள் செய்த சேட்டைகளின் புகைப்படத் தொகுப்பும் நெட்டில் வைரல். ‘அமெரிக்க அதிபரானால் என்ன நானும் ஒரு மனிதன்தான்’ என்று  இருந்த இவரது இந்தக் குறும்புகள் இளைஞர்கள் மத்தியில் லைக்ஸ் அள்ளியது.

அமெரிக்க அதிபர் பதவிக்காலம் முடிந்ததும் வெள்ளை மாளிகையை விட்டு வெளியேறிய ஒபாமாவை கண்ணீர் மல்க வழியனுப்பி வைத்தது அமெரிக்கா. ஒபாமா அறக்கட்டளை மூலம் மக்களுக்கு உதவுகிறார். பல்கலைக் கழகங்களில் உரையாற்றுகிறார். அமெரிக்க அதிபர் செய்யும் தவறுகளுக்கு எதிர்ப்புக்குரல் தருகிறார். அன்பால் உலகை ஆள்கிறார். அன்று அன்புக்கு ஏங்கியவர் இன்று அன்பின் அடையாளம்... அருமையான ஆசிரியர்... அமெரிக்காவுக்கு மிஸ் யூ ஒபாமா... ஒட்டுமொத்த உலகமும் லவ் யூ ஒபாமா...



Trending Articles

Sponsored