45 வகைகள், 3,000 தொட்டிகள்... கள்ளிச் செடிகளுக்கென ஊட்டியில் பிரத்யேக கண்ணாடி மாளிகை!

சதீஸ் ராமசாமி & கே.அருண்

பொது முடக்க காலத்தில் நீலகிரி சுற்றுலாத்தலங்களில் பயணிகளுக்கு அனுமதி வழங்கப்படவில்லை என்றாலும், பூங்கா பராமரிப்புப் பணிகள் தொடர்ந்து நடைபெற்று வந்தன. தற்போது பூங்காக்கள் திறக்கப்பட்டுள்ள நிலையில், பயணிகளின் எண்ணிக்கை நாளுக்குநாள் அதிகரித்தவண்ணம் உள்ளது. சுற்றுலாத்தலங்களும் புதுப்பொலிவு பெற்று வருகின்றன.

நூற்றாண்டு பழைமை வாய்ந்த பூங்காவான ஊட்டி அரசு தாவரவியல் பூங்காவில் கண்ணாடி மாளிகை புதுப்பொலிவு செய்யப்பட்டு 45 வகையான கள்ளிச் செடிகள் ஒரே இடத்தில் வைத்து பராமரிக்கப்பட்டு வருகிறது. இது குறித்து பூங்கா அதிகாரிகள், ``இந்தப் பூங்காவில் பல்வேறு நாடுகளில் காணப்படும் பல வகையான தாவரங்கள், மலர்ச் செடிகள், மரங்கள், மூலிகைத் தாவரங்கள், பெரணி மற்றும் கள்ளிச் செடிகள் பராமரிக்கப்படுகின்றன.

மேல் கார்டனில் உள்ள கண்ணாடி மாளிகை தற்போது கள்ளிச் செடிகளுக்கு என ஒதுக்கப்பட்டு, சகூரா, ஓல்டு லேடி, ஸ்டார், ஈஸ்டர் மற்றும் மூன் உட்பட 45 வகைகளில் 3,000 தொட்டிகளில் கள்ளிச் செடிகள் வைக்கப்பட்டுள்ளன.

வெவ்வேறு வடிவங்களில் காணப்படும் இந்தக் கள்ளிச் செடிகளும், பாலைவனங்களில் காணப்படும் சில தாவரங்களும் சுற்றுலா பயணிகளைக் கவர்ந்து வருகின்றன. தாவரவியல் ஆய்வு மற்றும் பள்ளி மாணவ மாணவிகளும் இதனால் பயன்பெறுவர்" என்றனர்.