உண்மையின் குரல் கேளுங்கள்!

டாஸ்மாக்குக்கு எதிராகப் பாடல் எழுதிய 'குற்றத்துக்காக’ கைதுசெய்யப்பட்டிருக்கிறார் பாடகர் கோவன். தேசத் துரோகம் மற்றும் சமூகத்தின் இரு பிரிவினரிடையே மோதலை உருவாக்குதல் ஆகிய இரு பிரிவுகளில் அவர் மீது வழக்குகள் பாய்ந்துள்ளன. சாராயத்தின் கேடுகளை, அது மக்களின் வாழ்க்கையை எப்படிச் சூறையாடுகிறது என்பதை எடுத்துச் சொன்ன குற்றத்துக்காக, ஒரு நள்ளிரவு நேரத்தில் வீடு புகுந்து கைதுசெய்யப்பட்டிருக்கிறார் கோவன். 

இந்தியா எங்கும் இணையம் எங்கும் இதற்கு எதிர்ப்புக் குரல்கள் எழுந்தவண்ணம் இருந்தாலும், வழக்கம்போல இதற்கு ஒரு பதிலும் சொல்லாமல் மௌனம் காக்கிறது தமிழ்நாட்டு அரசும், கொடநாட்டு அரசும். ஒரு மாநிலத்தின் முதலமைச்சரை ஒருமையில் பாடுவதும், கொச்சைச் சொற்களில் அவமதிப்பதும் கடும் கண்டனத்துக்கு உரியது; கண்டிக்கத்தக்கது. அந்த அவதூறுதான் பிரச்னை என்றால், அதற்கு உரிய பிரிவில் வழக்குப் பதியட்டும்!

'அரசு, மதுவிலக்கை அமல்படுத்த முயற்சிக்க வேண்டும்’ என அரசியலமைப்புச் சட்டம் சொல்கிறது. 'மதுவிலக்கு என்பது அரசின் கொள்கை’ என சட்டமன்றத்தில் அமைச்சர் சொல்கிறார். மதுவிலக்குக்கு எனத் தனியே ஒரு துறை இருக்கிறது. அதற்கு ஓர் அமைச்சரும் இருக்கிறார். இதையே கோவன் சொன்னால், அது எப்படிக் குற்றமாகும்? அரசு, தானே அறிவித்துக்கொண்ட ஒரு கொள்கையைப் பின்பற்ற வேண்டும் எனச் சொல்வதே குற்றம் என்றால், உண்மையில் அரசின் கொள்கை என்ன? மது விற்பனையா... மதுவிலக்கா? அரசின் நிலைப்பாட்டை விமர்சிப்பதே தேசத் துரோகமாகக் கருதப்படுமானால், ஆளும் கட்சிக்கு எதிரானவர்கள் எல்லோர் மீதும் இந்தச் சட்டம் பாயுமா?

இதற்கு மேலும் சீரழிக்க முடியாது என்கிற அளவுக்கு சாராயத்தை வாரிவழங்கி மக்களின் வாழ்க்கையைச் சூறையாடிக்கொண்டிருக்கிறது அரசு. குடித்துக் குடித்தே குடும்பத்தை நடுத்தெருவில் நிறுத்தி, பல்லாயிரம் பெண்கள் விதவைகளாக நட்டாற்றில் விடப்பட்டு, விபத்துக்களில் உறுப்புகளை இழந்து... தமிழ்நாடே சிதைந்து சின்னாபின்னமாகிக்கிடக்கிறது. பள்ளிச் சிறுவர்கள் குடித்துவிட்டு சீருடையுடன் தெருவில் வீழ்ந்துகிடக்கிறார்கள். இந்த அவலத்தைத் தடுத்து நிறுத்துங்கள் எனச் சொன்னால், அது தேசத் துரோகமா?  

கோவன் தன் சொந்த நலன்களுக்காக பாடல் எழுதவில்லை; தான் புகழ் அடைய வேண்டும், பொருள் சேர்க்க வேண்டும் எனப் பாடவில்லை. மதுவின் கொடுமையால் மக்கள் அடையும் வேதனை தாளாது அவர் பாடியிருக்கிறார். ஆட்சியாளர்கள் இந்த உண்மையின் குரலை முதலில் செவிகொடுத்துக் கேட்க வேண்டும். அதற்கு முன்பு கோவன் மீது போடப்பட்டுள்ள வழக்குகளைத் திரும்பப் பெற்று, அவரை விடுதலை செய்ய வேண்டும்.  

'சாராயம் விற்பது ஜனநாயகம். அதை எதிர்ப்பது ஜனநாயக விரோதம்’ என்பதுதான் இந்த அரசு நமக்கு உணர்த்துகிற செய்தி. இங்கு சாராயம் குடிக்க மட்டும்தான் மக்களுக்கு உரிமை. சாராயம் குடிக்க மறுப்பது மக்களின் உரிமை அல்ல; அது தேசத் துரோகமா?  

மதுவினால் பெரும் தீங்கை நிகழ்த்திக்கொண்டே, அதை எதிர்ப்போரை சிறையில் தள்ளும் கொடும் தீங்கையும் சேர்த்து இழைத்தால், மக்கள் உங்களை மன்னிக்க மாட்டார்கள்!

Do you like the story?

Please Appreciate the Author by clapping!

Editor’s Pick