சொல்வனம்

யானை வரைதல்...

யானை வரைதல் எளிது
கறுப்பு நிற பென்சில் ஒன்றே போதுமானது
ஏ-4 தாளில் எடுப்பாய்த் தெரியும்
ஆசீர்வதிக்கும் தும்பிக்கையில் தொடங்கி
பாகன் அமரும் முதுகு வழியாக இறங்கி
கீழ் நோக்கிய அம்பாக வாலில் முடிக்கலாம்
வயிற்றுக்கு இருபுறங்களிலும்
நடப்பதுபோல்
நான்கு தூண்கள் வரைந்தால்
சாந்தமான யானை தயார்
காதுமடல் போக
விலைமதிப்பற்ற தந்தமும் வரையலாம்
யானைக்குப் பின்னே சாணம் இருப்பின்
பின்னாட்களில்
மரமொன்று தளைத்திடும் வாய்ப்புண்டு
எல்லாம் போக
பசும்பச்சையில் வனாந்திரம் வரைந்திடுதல்
சாலச் சுகம்
இல்லையேல் நீரருந்தக் காகிதம் தங்காமல்
வீடு புகும் அபாயம் உண்டு.

-மு.மகுடீசுவரன்

Do you like the story?

Please Appreciate the Author by clapping!

Editor’s Pick

மாதத்திற்கு 7 எக்ஸ்க்ளுசிவ் கட்டுரைகள் படிக்க லாகின் செய்யுங்கள்அனைத்து எக்ஸ்க்ளுசிவ் கட்டுரைகளையும் படிக்க சந்தா செய்யுங்கள்