சொல்வனம்

திரவச் சொற்கள்

கிடா விருந்துக்கு அழைக்க
வீடு வந்திருந்த மாமன்
அதிசயமாகத் தெரிந்தார்
பழைய பகையை முன்னிறுத்தி
பேசாமல் ஆண்டுக்கணக்கில் ஊமையானவர்
`செல்லாண்டியம்மனுக்கு
ரொம்ப நாள் வேண்டுதல் மாப்ள’ என்றார்
சமாதான நிமித்தமாக
ஒரு சொம்பு தண்ணீரை
கடக்கெனக் குடித்தவர்
நரை மீசையைக் கீழ் வழித்தபடி
`சின்னக் கிடாக் குட்டிதான்
ஆறு கிலோ தேறும்
அளவான அழைப்புதான்’ என்றார்
சர்க்கரை குறைவாக டீ கேட்டுக் குடித்தார்
பிள்ளைகள் படிப்பை அக்கறையாக விசாரித்தார்
கிளம்புகையில்
`மொய் வாங்கல மாப்ள’
விளையாட்டாய்க் கண்ணடித்தவர்
அவசியம் குடும்பத்தோட வரணுமென்று கை கூப்பி
வாசலுக்குச் சென்று திரும்பியவர்
நா தழுதழுக்க விடைபெறும்போது
கை பற்றி நின்றவரின் காய்ந்த கண்கள்
உதிர்த்த நீர்த்துளிகள் அத்தனையும்
அவர் வேண்டுதலின் திரவச் சொற்கள்.

- மு.மகுடீசுவரன்

Do you like the story?

Please Appreciate the Author by clapping!

Editor’s Pick

மாதத்திற்கு 7 எக்ஸ்க்ளுசிவ் கட்டுரைகள் படிக்க லாகின் செய்யுங்கள்அனைத்து எக்ஸ்க்ளுசிவ் கட்டுரைகளையும் படிக்க சந்தா செய்யுங்கள்