10 செகண்ட் கதைகள்

ஓவியங்கள்: செந்தில்

ஷாக் ட்ரீட்மென்ட்

``சின்னப் பிரச்னைதான், ஸ்கேன் ரிப்போர்ட்ல பயப்படுற மாதிரி ஒண்ணும் இல்லை’’ என்று சொன்ன டாக்டர், ``முப்பதாயிரம் ரூபாய்க்குள்ள முடிஞ்சிடும்’’ என்றார்!

- ந.கன்னியக்குமார்

கொண்டாட்டம்

``என்ன ஆச்சுன்னு தெரியலை... காலையிலேர்ந்து கரன்ட்டே இல்லை. ஒரு டி.வி புரோகிராம்கூடப் பார்க்க முடியலை. இந்தப் பொங்கல், பொங்கல் மாதிரியே இல்லை’’ - அலுத்துக்கொண்டாள் மாளவிகா!

- அஜித்

விலை

மகனுக்கு ஆக்ஸிடென்ட் ஆனதைக் கேட்டு, ``என்னாச்சுப்பா..?’’ எனக் கனிவோடு விசாரித்த அப்பாவிடம் ``மொபைல்ல லேசா ஸ்க்ராட்ச், லேப்டாப்புக்கு ஒண்ணும் ஆகலை. ஹெட்போன்தான் அறுந்துருச்சு’’ என்றான் விக்னேஷ்!
 
- எஸ்கா

இது டாப் 10 அல்ல..!

தீபாவளிக்கு வெளியான படத்தை ‘தேறாது’ என விமர்சனம் செய்த டி.வி-யில், மூன்று மாதத்துக்குள் ‘புத்தம் புதிய அதிரடி நகைச்சுவை படம்’ என்ற அறிவிப்போடு அதே படம் ஒளிபரப்பானது!

 - ச.பூபால் சிங்

விளக்கவுரை

ஆசிரியர்: ‘பகுத்துண்டு பல்லுயிர் ஓம்புதல்’ - இந்தக் குறளுக்கு அர்த்தம் தெரியுமா?

மாணவன்: ஓ... ‘வைஃபை’ சார்!

 - கே.லக்‌ஷ்மணன்

வாழப் பழகாதவர்!

தன் வாழ்நாளில் லஞ்சமே வாங்காத கந்தசாமியின் உடல், ஆயிரம் ரூபாய் அழுத பின்னர்தான் குடும்பத்துக்குக் கிடைத்தது!

- சாய்ராம்

நிழல்

``உன்னைப் பெண் பார்க்க வரும் மாப்பிள்ளைகிட்டே உன் ஃபேஸ்புக் ஐ.டி எல்லாம் சொல்லாதே. உன் ஃப்ரெண்ட்ஸ் யார் யார் எல்லாம் என்னென்ன கமென்ட் அடிச்சாங்கனு செக் பண்ணிட்டு இருப்பாரு.’’

``சரிம்மா. ஆனா, ஆல்ரெடி அவர் என்னோட ஃபாலோயரா இருந்தா?” என்றாள் மகள்!

- சி.பி.செந்தில்குமார்

கனவுகளே...

``ஃபாலோ யுவர் ட்ரீம்ஸ்’’ என்றேன்.

``அதைத்தான் செய்றேன். கண்டுக்கவே மாட்றா’’ என்றான் நண்பன்!

- ஆர்.எல்.பிரியதர்ஷினி

கடிதல்

`` `ஹோம்வொர்க் செய்யும்போது டி.வி பார்க்கக் கூடாது’னு எத்தனை தடவை சொல்லியிருக்கேன்?’’ எனக் கடிந்துகொண்டாள் திவ்யா, தன் அம்மாவை!

- ந.கன்னியக்குமார்

ஸ்கூப் நியூஸ்

மூன்று பேர் காணாமல்போன வழக்கில் தலைவரை விசாரிக்க வந்த அதிகாரிகளின் வாகனம், அவரது பண்ணை வீட்டில் மூன்று இடங்களில் ஸ்பீடு பிரேக்கர்களை ஏறிக் கடந்தது!

- கி.ரவிக்குமார்


Do you like the story?

Please Appreciate the Author by clapping!

Editor’s Pick