“தோல்விக்குக் காரணம் தேடுகிறார் ஸ்டாலின்!”

மா.அ.மோகன் பிரபாகரன்

``அம்மாவின் பிரசாரத்தைக் கேட்டு, `தமிழ்நாட்டில் இவ்வளவு சாதனைகள் நடந்திருக்கின்றனவா!' என மக்களே வியந்துகிடக்கிறார்கள். அம்மாவின் பேச்சைக் கேட்க வேண்டும் என்ற ஆர்வம், மக்களை அலைமோதவைத்திருக்கிறது. ஆளும் கட்சியாக ஐந்து ஆண்டுகாலம் இருந்தும், பிரசாரக் கூட்டங்களில் மக்கள் இத்தனை வரவேற்பு தருவது என்பது தமிழக அரசியலில் இதுவரை யாரும் கண்டிராதது. இது ஒரு புதிய அத்தியாயம்'' - டாப் கியர் தட்டுகிறார் நாஞ்சில் சம்பத். அ.தி.மு.க-வின் இந்த ஸ்டார் பேச்சாளர்தான், இணையத்தின் மீம்ஸ் டார்லிங்.

``ஜெயலலிதாவின் ஹெலிகாப்டர் பிரசாரங்களும், கூட்டத்தில் ஏற்பட்ட மரணங்களும் விமர்சனங்களைக் கிளப்பியிருக்கின்றனவே?''

``குழந்தைகளுக்கே உரிய குதூகலத்தோடு அம்மாவின் பிரசாரக் கூட்டங்களில் கலந்துகொள்கிறார்கள் தமிழக மக்கள். பசித்த மக்களுக்குப் பால்சோறாகவும், தவிக்கும் வாய்க்குத் தண்ணீராகவும் விளங்கும் முதலமைச்சர் அம்மாவின் தாயுள்ளத்தை மக்கள் அறிவார்கள்.

ஸ்டாலின் மேற்கொள்ளும் பிரசாரங்களில் 50 கார்களும், வாகனங்களும் அணிவகுத்துச் செல்வதை நீங்களே பார்த்திருப்பீர்கள். இது தேவை இல்லாத செலவு; மக்களுக்கும் இடையூறு. ஹெலிகாப்டரில் போவதில் என்ன ஆடம்பரம்? ஒரு கோடி ரூபாய் மதிப்புள்ள காரில் ஸ்டாலின் வலம்வருகிறார். அது ஆடம்பரம் இல்லையா?

பிரசாரத்தில் மரணம் ஏற்பட்டிருப்பதை நாங்கள் ஏற்றுக்கொள்கிறோம். அதற்குக் காரணம் இந்த நேரத்தில் ஏற்பட்டிருக்கும் பருவநிலை மாற்றமும், இறந்தவர்கள் ஏற்கெனவே நோய்வாய்ப்பட்டிருந்தார்கள் என்பதும்தான். இது எந்த வகையிலும் அரசுக்கோ, எங்களின் ஆட்சிக்கோ அவப்பெயரைக் கொண்டுவந்து சேர்க்காது. எதிர்க்கட்சிகள்தான் இந்தப் பிணங்களை வைத்து ஓட்டு வேட்டை நடத்தப்பார்க்கிறார்கள்.''

``ஜெயலலிதாவின் மூன்று அடுக்குப் பிரசார மேடை, பல தரப்பினரிடையே விமர்சனத்துக்குள்ளானது. ஜெயலலிதாவுடன் ஒரே மேடையில் அமரும் தகுதி உங்கள் வேட்பாளர்களுக்கு இல்லையா?''

``லட்சக்கணக்கான மக்கள் கூடும் இடத்தில் வேட்பாளர்களை அறிமுகம் செய்யும்போது, அவர்கள் தனித்துத் தெரிய வேண்டும் என்பதற்காகவே தனியாக அமரவைக்கப் படுகிறார்கள். இது படாடோபமோ, ஆடம்பரமோ அல்ல. தேர்தல் ஆணையத்தின் விதியை எந்த இடத்திலும் மீறவில்லை. இதை எல்லாமா ஒரு குறையாகப் பேசுவார்கள்?''

Do you like the story?

Please Appreciate the Author by clapping!

Editor’s Pick

மாதத்திற்கு 7 எக்ஸ்க்ளுசிவ் கட்டுரைகள் படிக்க லாகின் செய்யுங்கள்அனைத்து எக்ஸ்க்ளுசிவ் கட்டுரைகளையும் படிக்க சந்தா செய்யுங்கள்