சொல்வனம்

ஓவியம்: எஸ்.இளையராஜா

வாசம் மாறும் மல்லி

ஒரே வாசமாயிருந்த
மல்லிகைச் சரம்
மூன்றாகப் பகிரப்பட்டு
தலைவி, சகோதரி, தோழி
இவர்களின் கூந்தலில்
குடியேறிய பின்
மூன்று வெவ்வேறு
வாசங்களைத் தருகின்றன எனில்
அவை வெவ்வேறு மல்லி என்றறிக.

- நாகராஜ்

என்னைப்போலவே ஒருவன்

பால்ய காதல் தந்தவளை
அன்று சந்தித்தேன்.
என் போன்று ஆயிரம் மேகங்களை
வெட்டி வீழ்த்திய அந்தப் பளீர் மின்னலை
எண்ணெயின்றி தள்ளாடி
மங்கத் துவங்கும் சிம்னி விளக்காய்
ஆக்கியிருந்தான்
என்னைப்போலவே ஒருவன்.

- ஸ்ரீராம்

மழைக் கவிதை

காகிதக் கப்பல்கள்
செய்துதரச் சொல்லிக் கேட்கிறாய்.
பாதியில்விட்ட மழைக் கவிதை எழுதிய
காகிதங்களைத் தருகிறேன்.
ஒவ்வொன்றாய் மடித்து
கப்பலாக்கித் தந்த பின்
உன் கையிலிருந்து
நீரில் மிதந்துபோகையில்
மின்னும் உனதிந்த
சின்னச் சந்தோஷத்தில்
மிக அழகாக முடிகிறது
மறுபாதி மழைக் கவிதை.

- பிரபாகரன் ஈஸ்வரமூர்த்தி

பள்ளிக்கூட வாசலிலேயே...

பள்ளிக்கூட வாசலில்
ஜவ்வுமிட்டாய் விற்பவருக்கு
ஒரே ஒரு மூங்கிலில் கடை.
மூங்கிலுக்குக் கீழிருக்கும் வளையத்தை
காலால் இழுக்க
உச்சியில் இருக்கும் பொம்மை
ஜிங் ஜிங் எனக் கைதட்டிக் கூப்பிட
வேடிக்கை பார்க்கக்கூடும் குழந்தைகள் கூட்டம்.
ஜவ்வுமிட்டாயில்
கொக்கு பிடித்து கையில் தருவதை
‘அய் கொக்கு...’ எனக் குதூகலிப்பான் ஒருவன்.கடிகாரம் செய்து கையில் மாட்டிவிட்டால்
அதில் நேரம் பார்த்துக்கொண்டு
ஓடுவான் இன்னொருவன்.
ஓசி கேட்டால் சிறு மிட்டாய் இழுத்து
கன்னத்தில் ஒட்டிவிடுவார்...
குதூகலிப்பார்கள்.
கடிகாரத்துக்கும் கொக்குக்கும்
கால் ரூபாயை வாங்கிக்கொள்வார்.
‘அண்ணே அஞ்சு பைசா குறையுது’ என்றாலும்
அதையும் வாங்கிப் போட்டுக்கொள்வார்.
மகிழ்ச்சியையும் சேர்த்து
ஜவ்வுமிட்டாய்க்குக் கொடுத்துவிட்டே
பள்ளிக்குள் நுழைவார்கள் குழந்தைகள்.

- நாகராஜ்

பதில்

தொலைக்காட்சி
நகைச்சுவைப் போட்டி நிகழ்ச்சிகளில்
மனைவியிடம் அடிவாங்கும் கணவன்
துணுக்குகளைப் பார்த்து,
வாய்விட்டுச் சிரிக்கையில்
சலனமின்றி எழுந்து
சமையலறைக்குப்
போய்விடுவாள் அம்மா.

Do you like the story?

Please Appreciate the Author by clapping!

Editor’s Pick

மாதத்திற்கு 7 எக்ஸ்க்ளுசிவ் கட்டுரைகள் படிக்க லாகின் செய்யுங்கள்அனைத்து எக்ஸ்க்ளுசிவ் கட்டுரைகளையும் படிக்க சந்தா செய்யுங்கள்