தெய்வத்தான் ஆகாதெனினும்! - "இன்னைக்கு உங்களுக்கு என்னோட கிஃப்ட்!” | Inspirational story of a Differently abled Young girl - Ananda Vikatan | ஆனந்த விகடன்

வெளியிடப்பட்ட நேரம்: 06:00 (11/01/2018)

தெய்வத்தான் ஆகாதெனினும்! - "இன்னைக்கு உங்களுக்கு என்னோட கிஃப்ட்!”

இத்தொடரின் மற்ற பாகங்கள்:

தமிழ்ப்பிரபா, படம்: கே.ராஜசேகரன்

``பக்கத்துல இருக்கிற ஸ்கூலுக்கு என் பொண்ண தோள்ல வெச்சுத் தூக்கிட்டுப் போனப்போ அவளுக்குப் பத்தொன்பது வயசு. ‘இவ்ளோ வயசாயிடுச்சு இதுக்கு அப்புறம் ஸ்கூல்ல சேத்து என்ன ஆகப்போகுது’ன்னு சொன்னப்போ என்னைவிட என் பொண்ணு ரொம்ப அவமானப்பட்டா. அவளுக்கு உடம்புலதான் குறையே தவிர மூளையில இல்லைங்க” என நிவேதாவின் அம்மா சொன்னபோது அதை ஆமோதிக்கும் விதமாகத் தலையை ஆட்டிச் சிரித்தார் நிவேதா.

ஒன்றரை வயதில் திடீரென ஒரு நாள் ஜுரம் அதிகமாக மருத்துவமனைக்குத் தூக்கிச் சென்றதற்குப் பிறகு நிவேதா பழையபடியே வீடு திரும்பவில்லை. பன்மெய்ப்புல சவால் கொண்டக் குழந்தையாக மாறினார் நிவேதா. அப்படிப்பட்ட நிவேதா இப்போது தன் இருபத்தேழு வயதில் டெல்லி சென்று தேசிய விருது பெற்றுவந்திருக்கிறார்.

நிவேதாவுக்கு கேட்கும் திறனும் பேசும் திறனும் இல்லை. காலூன்றிச் சரியாக நடக்க முடியாது. உடல் முழுதும் எப்போதும் நடுங்கிக்கொண்டே இருக்கும். உடல்ரீதியாக இப்படிப் பல சவால்களைக் கொண்ட ஒரு பெண் தன்னுடைய நம்பிக்கையினாலும், பெற்றோர்களின் அரவணைப்பினாலும் மட்டுமே வாழ்ந்து கொண்டிருக்கிறார்.

நிவேதாவின் நிலையை வைத்து அவரை சராசரிப் பள்ளியிலும் சேர்க்க முடியவில்லை. நிவேதாவால் நடக்க முடியாது என்பதால் காது கேளாதோர் பள்ளியிலும் அவரை  அனுமதிக்க மறுத்துவிட்டனர். பிறகு வீட்டருகில் உள்ள பள்ளியில் ஆறாம் வகுப்புவரை அவரைப் படிக்க வைத்தார்கள்.  அதற்கு மேல் அந்தப் பள்ளியிலும் நிவேதாவால் படிக்க இயலவில்லை.