நான்காம் சுவர் - 9

இத்தொடரின் மற்ற பாகங்கள்:
முகங்கள்பாக்கியம் சங்கர் - ஓவியங்கள்: ஹாசிப்கான்

சம் போன கண்ணாடியின் முன்பு, குளித்து முடித்து ஈரத்துடன் வந்த கல்யாணி தன் மேனியை முழுவதுமாகப் பார்த்தாள். அங்க வளைவுகளில் ஆங்காங்கே நிதானித்து ரசித்தவள் “நல்லா எடுப்பாத்தாண்டி இருக்குறே, உனக்கென்னடி ராஜாத்தி” என்று தனக்குள்ளாகவே பேசிக் கண்ணாடியில் தன் முகத்தைக் கிள்ளி, தானே முத்திக்கொண்டாள். பெட்டியிலிருந்து அரக்கு நிறத்தில் ரோஜாப்பூ வரைந்த ஒரு புடவையைத் தேர்வு செய்து உடுத்திக்கொண்டாள். குட்டிகுராவை உள்ளங்கை முழுதும் கொட்டி முகத்தில் அப்பிக்கொண்டாள். புருவத்திற்கும் இமைகளுக்கும் மைதீட்டிக்கொண்டாள். கொஞ்சம் மஸ்காரா போட்டுக்கொண்டாள். மஸ்காராவைத் தீட்டிக்கொண்டே “மஸ்காரா போட்டு மயக்குறியே” என்ற பாடலை முணுமுணுத்துக்கொண்டாள். கண்ணாடியில் ஒட்டப்பட்டிருந்த பொட்டுகளில் எதைத் தேர்வு செய்வதென்று குழம்பியவள், ஸ்டார் பொட்டைப் பிய்த்து நெற்றியில் வைத்துக்கொண்டாள். இதழ்களுக்கு லிப்ஸ்டிக் போடும்போது கவனித்தாள். இதழ்களின் ரசம் குறைந்து வறட்சியாய் இருந்ததால் நாவின் நீர் கொண்டு ஈரப்படுத்திக்கொண்டாள். தோடைக் கழற்றிவிட்டு ஜிமிக்கிக்கம்மலை மாட்டிக்கொண்டாள். தையல் இலையில் மடித்து வைக்கப்பட்டிருந்த மல்லிகையைச் சூடிக்கொண்டாள். பேக்கில் இருந்த தாலியை எடுத்துக் கழுத்தில் போட்டுக்கொண்டு முழு ஒப்பனையோடு தன் முகத்தைப் பார்த்தாள் கல்யாணி. 

Do you like the story?

Please Appreciate the Author by clapping!

Editor’s Pick