“சுஹாசினிக்கு நான் கொடுத்த வாய்ப்பு..!” - ஜெயராஜ் | Jayaraj shares about Director Mahendran's Memories - Ananda Vikatan | ஆனந்த விகடன்

வெளியிடப்பட்ட நேரம்: 06:00 (11/04/2019)

“சுஹாசினிக்கு நான் கொடுத்த வாய்ப்பு..!” - ஜெயராஜ்

“எனக்கும், மகேந்திரனுக்குமான நட்புக்கு 60 வயது. 60 ஆண்டுகளுக்கு முன்னால் மதுரை அமெரிக்கன் கல்லூரியில் நான் பி.ஏ இரண்டாம் ஆண்டு படித்துக்கொண்டிருந்தபோது, மகேந்திரன் முதலாமாண்டு மாணவர். இயல்பாகவே அவருக்கு ஓவியத்தின் மீது ஈடுபாடு அதிகம். அப்போது, எங்கள் கல்லூரியில் அழகி என்றொரு மாணவி படித்துக்கொண்டிருந்தார். நான் வகுப்பறையிலிருந்து வெளியில் வந்தாலே, சக மாணவர்கள் என்னைச் சூழ்ந்துகொண்டு ‘டேய் அழகி படத்தை வரைஞ்சு கொடுடா’ என்று நச்சரிப்பார்கள். எனக்குள் பெருமை ஒட்டிக்கொள்ள, ஒருவித பந்தாவோடு சில நொடிகளில் அவர்களுக்கு வரைந்து கொடுப்பேன். அப்போது என்னைப் பார்த்துச் சிரித்துக்கொண்டே ‘நல்ல வேலை பண்றீங்க சார்’ என்று கிண்டலடிப்பார் மகேந்திரன். அவருக்கும் அழகியின் படத்தை வரைந்துகொடுத்தேன். சென்னைக்கு வந்து ஓவியரானபோது, எனக்கு 24 வயது. அப்போதும் எங்கள் நட்பு தொடர்ந்தது. ஆயிரம்விளக்குப் பகுதியில் நான் வசித்தபோது தினமும் நானும், மகேந்திரனும் ஒரு  சாதாரண மெஸ்ஸில் தோசை சாப்பிடுவோம். ‘நாம் சாப்பிடும் இந்த தோசை விசேஷமானது’ என்பார், அவர். ‘ரெண்டணாக் காசு கொடுத்து சாப்பிடுற இந்த தோசை எப்படி விசேஷம்?’ என்று கேட்டேன். ‘நாம ரெண்டுபேரையும் தினமும் சந்திக்க வைப்பதாலேயே இது விசேஷ தோசை’ என்று கவித்துவமாய்ப் பேசுவார். பிறகு,  ‘தங்கப்பதக்கம்’ படத்துக்கு மகேந்திரன் கதை, வசனம் எழுதிய பிறகு, அதாவது இருபது வருட இடைவெளிக்குப் பிறகுதான் அவரை நேரில் சந்தித்தேன். அப்போது எனக்குக் கல்யாணம் முடிந்துவிட்டது, அவருக்கும் கல்யாணமாகி, குழந்தைகள் இருந்தனர். சிறந்த எழுத்தாளர், சிறந்த டைரக்டர், சிறந்த தயாரிப்பாளர் என்பதையெல்லாம் தாண்டி, எனக்கு அவர் சிறந்த நண்பர்.  

நீங்க எப்படி பீல் பண்றீங்க